Jaˇliꞈ gui gaˇ neh gaˇ dahˇ tsoeˬ˗eu jeˬ za nya ni aˬ joˆ˗ehˇ ya jahˇ˗eu nga?

Nawˇ gaˇ yaw huiˬ tiˬ hmˬ˗ahˇ mˇ˗eu lehˇ gʼeh ngeh, aˇ dzehˬ˗ehˇ shaˬ nya lehˇ noeˬ haw maˬ loˇ? Gaˇ teu hmˬ bi awˬ dzehˬ laˇ˗eu gʼaˇ duˬ, gaˇ teu˗ahˇ biˇ paˆ˗awˇ tiˬ poˆ cuiˆ cuiˆ˗ehˇ mˇ nya meh. Jaˇliꞈ gui˗eu jiˇ teu gaˇ duˇ meh. Aˬ dui˗ahˇ ‘Ngaˇ aˬ gaˇ neh gui dahˬ beh paˬ nga?’ lehˇ noeˬ laˇ nya meh. Aˬ dui Jaˇliꞈ gui gaˇ hawˇ˗eu dzaw gaˇ laˬ kʼaˬ cehˇ laˇ ni, aˬ joˆ˗ehˇ ya jahˇ˗eu nga lehˇ heu kawˆ laꞈ kʼoeˇ ja sawˇ ma.

1. Aˬ dui aˬ jeˬ miˇ neh yawˬ jawˇ na luꞈ Jaˇliꞈ ya gui˗eu nga?

“Miˬyehˇ˗euˬ zahˇ dawˬ” pyeuꞈ˗eu Jaˇliꞈ˗ahˇ yawˬ jawˇ na luꞈ gui˗eu deuˬ˗aˬ, laˬ kʼaˬ cehˇ˗awˇ, aˬ yawꞈ maꞈ neh kʼaˇ mˇ kʼaˇ shaˇ˗euˬ jeˬ pyeuꞈ leˇ˗eu meh. (Ja ceuˬ 1:1-3-ahˇ gui.) Jaˇliꞈ gui dahˬ beh˗eu gʼaˇ duˬ, tiˬ nah laꞈ kʼoeˇ heu myaˆ peu tehꞈ˗ehˇ kʼawꞈ gui nya meh. Aˬ dui Miˬyehˇ˗euˬ dawˬ˗ahˇ ngehˬ˗ehˇ siˬ nya laˇ naˇ ngehˬ˗ehˇ, Jaˇliꞈ gui gaˇ laˬ kʼaˬ cehˇ dzehˬ laˇ˗eu meh.

2. Jaˇliꞈ gui gaˇ neh gaˇ dahˇ tsoeˬ˗eu jeˬ za nya ni, aˬ dui˗ahˇ caw ba nehˬ˗eu aˬ jeˬ nga?

Jaˇliꞈ gui gaˇ neh tiˬ byah tiˬ loꞈ gaˇ dahˇ tsoeˬ˗eu jeˬ za˗eu gʼaˇ duˬ, aˬ dui gui ngeh tiˬ kʼehˬ naˬ leˇ˗awˇ yawˬ ha neh gui˗euˬ gaˇ kawˆ˗ahˇ ya ‘shaˇ noeˬ˗eu’ meh. (Ja ceuˬ 119:97) Aˬ dui Jaˇliꞈ gui ngeh yawˬ ha˗ahˇ heu loꞈ˗ehˇ ya naˇ haˬ˗eu meh. ‘Gaˇ kawˆ heu Yeˬhawˇbaˬ Miˬyehˇ nehˬ˗ehˇ taꞈ leˇ˗awˇ aˬ jeˬ bi siˬ laꞈ˗eu nga? Ngaˬ˗euˬ dehꞈ ziˇ laꞈ kʼoeˇ aˬ joˆ˗ehˇ zmˬ˗iˇ nya˗eu nga? Jaˇliꞈ aˇ deuˆ heu deuˬ˗ahˇ zmˬ˗awˇ aˬ cawˬ˗ahˇ aˬ joˆ˗ehˇ caw ba nehˬ nya˗eu nga?’

3. Jaˇliꞈ gui˗eu aˇ yamˬ doˆ laˇ ni aˬ joˆ˗ehˇ ya jahˇ˗eu nga?

Nawˇ Jaˇliꞈ gui˗eu aˇ yamˬ maˬ jaˆ nya laˬ? Yaw myaˬ gʼaˬ teu loꞈ˗ehˇ pyeuꞈ luꞈ meh. Toˆ˗ehˇ naˇ, kʼaˇ gʼeh nya gaˇ neh nawˬ˗euˬ “aˇ yamˬ˗ahˇ gaˇ dahˇ tsoeˬ ni zmˬ˗awˬ.” (Eˇpeˇsu 5:16) Teu loꞈ˗ehˇ jahˇ nya˗eu gʼaˇ duˬ, yawˬ nah na luꞈ Jaˇliꞈ gui˗eu aˇ yamˬ yaw duˬ duˬ˗ehˇ ya biˇ taˬ˗eu meh. Tiˬ deuˬ na uˬ shawˬ yaw naꞈ˗ehˇ gui˗awˇ, tiˬ deuˬ na naˇ nah gʼahˇ paw gʼaˬ naˬ naˬ ngeh gui˗eu meh. Kʼoeˇ naˇ uˬ ciꞈ paw yuꞈ leˇ ngeh gui˗eu deuˬ jiˇ jawˇ˗eu meh. Nawˬ˗ahˇ tawˇ neh, aˬ geu ngeh yamˬ˗ahˇ gui˗eu muiˬ dzehˬ nya?

Naꞈ suiˇ ni dzaw

4. Jaˇliꞈ gui gaˇ laˬ kʼaˬ cehˇ laˇ ni leh jeh

Jaˇliꞈ˗ahˇ gui dahˬ beh˗eu teu naˇ, yaw awˬ maˬ ngeuˇ˗eu kʼawꞈ pyeuꞈ nya meh. Ehˇ kʼawꞈ dzaˬ beh beh ngeh maˬ ya leˇ˗eu dzaˇ˗ahˇ dzaˬ dzaˬ˗ehˇ dzaˬ naˇ kuiˇ laˇ nya˗eu loꞈ˗ehˇ, Jaˇliꞈ gui˗eu heu jiˇ gui gui˗ehˇ gui naˇ gui mawꞈ˗eu nui ma ahˇ laˇ nya meh. 1 Beˬtuˆluˆ 2:2-ahˇ gui gʼaˬ naˇ, naˇ haˬ˗eu jeˬ heu˗ahˇ ja saw.

• Nawˇ yawˬ nah na luꞈ Jaˇliꞈ gui naˇ, Jaˇliꞈ gui gaˇ laˬ kʼaˬ cehˇ laˇ˗awˇ, gui mawꞈ˗eu nui ma ahˇ laˇ meh lehˇ noeˬ miˇ˗a laˬ?

Jaˇliꞈ gui˗eu nui ma ahˇ laˇ ni tiˬ gʼaˬ na aˬ jeˬ jeˇ jahˇ˗euˬ nga lehˇ haw˗eu gʼaˇ duˬ, biˬdiˬoˬ pah. Kʼoeˇ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Miˬyehˇ˗euˬ dawˬ˗ahˇ gaˬ laˇ ni leh jeh luꞈ˗eu zaˬ guˬ deuˬ (5:33)

• Biˬdiˬoˬ heu laꞈ kʼoeˇ˗euˬ zaˬ guˬ deuˬ, Jaˇliꞈ gui˗eu heu naˇ aˬ jeˬ miˇ neh maˬ awˬ nya lehˇ ehˇ˗eu nga?

• Aˬ myah luꞈ Jaˇliꞈ gui nya ni aˬ yawꞈ maꞈ˗ahˇ caw ba nehˬ˗eu aˬ jeˬ nga?

• Jaˇliꞈ gui gaˇ nui ma ahˇ laˇ ni, aˬ yawꞈ maꞈ aˬ jeˬ jeˇ jahˇ˗euˬ nga?

Jaˇliꞈ gui dahˬ beh nya ni caw ba nehˬ˗eu jeˬ:

• Tsaˬ˗awˇ saˇ ka˗ahˇ miˇ˗eu dawˬ neh boꞈ taˬ˗euˬ Jaˇliꞈ˗ahˇ gui. Nawˬ˗ahˇ yaw muiˬ˗ehˇ gʼoˆ shaw laˇ˗eu dawˬ neh jahˇ doˆ taˬ˗euˬ Miˇ shuiꞈ dawˬ paˇ Jaˇliꞈ jaˆ naˇ teu dmˬ˗ahˇ gui.

• Kʼaˇ ya leˇ˗eu tsahˇ˗ahˇ neh gui dahˬ beh. Teu loꞈ˗ehˇ jahˇ˗eu gʼaˇ duˬ, “Jaˇliꞈ gui dahˬ beh˗eu” lehˇ ehˇ˗eu tsahˇ˗ahˇ haw.

• Aˬ jeˬ jeˇ gui dzeuˇ˗euˬ lehˇ boꞈ taˬ. Paˇ dmˬ heu dmˬ laꞈ kʼoeˇ ahˇ˗eu “Jaˇliꞈ aˬ geu gaˇ gui keuˆ˗euˬ lehˇ kawˆ taˬ” lehˇ ehˇ˗eu tsahˇ˗ahˇ boꞈ taˬ nya meh.

• JW Laiˇbaˬliˬ (JW Library^®) ehˆ˗ahˇ zmˬ. Nawˇ aˬ gaˇ jawˇ˗eu maˬ kaˬ, naˬ gaˬ maˬ ngeuˇ naˇ keu ka nui deuˬ˗ahˇ zmˬ˗awˇ Jaˇliꞈ gui nya˗eu uˬ taꞈ, teˇ saˇ jiˇ naˇ haˬ nya meh.

• Miˇ shuiꞈ dawˬ paˇ Jaˇliꞈ laꞈ kʼoeˇ˗euˬ dzaw lahˬ˗ahˇ zmˬ. Teu laꞈ kʼoeˇ nawˬ˗ahˇ Jaˇliꞈ bi gui mawꞈ dzehˬ laˇ ni caw ba nehˬ˗eu, miˇ kʼahˬ aˇ baˇ, aˇ yamˬ aˇ law˗euˬ aˇ baˇ, dawˬ tsuiꞈ puiˇ kʼawˬ˗eu gaˇ kawˆ, heu deuˬ hawˇ˗eu nui jeˬ jiˇ ahˇ˗eu meh.

5. Jaˇliꞈ maˬ dzaw mi naˆ˗ehˇ lehˬ hmˬ taˬ

Ja ceuˬ 119:34-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Jaˇliꞈ maˬ gui mi naˆ˗ehˇ maˬ ehˇ, Jaˇliꞈ dzaw˗eu gʼaˇ duˬ lehˬ hmˬ ngeh maˬ ehˇ, aˬ jeˬ miˇ neh guiˬ lahˬ shaˇ paˬ˗ehˇ gʼeh˗eu nga?

Jaˇliꞈ aˬ yawꞈ poˆ yawꞈ dzaw gaˇ neh gaˇ dahˇ tsoeˬ˗eu jeˬ za ni aˬ jeˬ ya jahˇ˗eu nga? Heu dmˬ laꞈ kʼoeˇ˗euˬ dzaw deuˆ tiˬ hmˬ˗ahˇ lehˬ hmˬ ngeh heu loꞈ˗ehˇ jahˇ.

1. 1. Dzaw deuˆ˗euˬ aˇ dahˬ beh˗eu bymˇ˗ahˇ gui.

2. 2. Jaˇliꞈ aˇ deuˆ deuˬ˗ahˇ gui˗awˇ, teu dzaw luꞈ˗eu gaˇ kawˆ nehˬ˗ehˇ aˬ joˆ˗ehˇ taꞈ˗eu nga lehˇ shaˇ noeˬ.

3. 3. Naˇ haˬ˗eu jeˬ˗euˬ dawˬ kʼoꞈ˗ahˇ kawˆ taˬ. Heu loꞈ˗ehˇ jahˇ taˬ naˇ, Jaˇliꞈ mehˬ˗eu gʼaˬ nehˬ˗ehˇ ja sawˇ ngeh gʼoˆ shaw dzehˬ laˇ˗eu meh.

Nawˇ siˬ nya ma loˇ?

Yeˬhawˇbaˬ˗euˬ Saˇ kiˇ deuˬ Jaˇliꞈ gʼawˬ mya jeˬ˗ahˇ zmˬ˗eu meh. Ehˇ kʼawꞈ nga maꞈ tsaˬ˗awˇ yaw awˬ˗ehˇ gʼoˆ shaw laˇ˗eu uˬ taꞈ, Miˬyehˇ˗euˬ tsawˇ myahˇ ahˇ˗eu Miˇ shuiꞈ dawˬ paˇ Jaˇliꞈ˗ahˇ zmˬ myaˬ dzehˬ˗eu ma.—“Yeˬhawˇbaˬ˗euˬ Saˇ kiˇ deuˬ yawˬ ha˗euˬ Jaˇliꞈ jaˆ meh laˬ?” lehˇ ehˇ˗eu iˇteuꞈnehꞈ laꞈ kʼoeˇ˗euˬ gaˇ kawˆ˗ahˇ haw.

Kawˆ shawˆ

Jaˇliꞈ˗ahˇ neh gaˇ dahˇ tsoeˬ˗eu jeˬ tiˬ byah tiˬ loꞈ za˗eu gʼaˇ duˬ, gui˗eu aˇ yamˬ ya laˆ duˬ taˬ˗awˇ, gui˗euˬ jeˬ˗ahˇ gʼoˆ shaw laˇ ni guiˬ lahˬ ya shaˇ˗eu uˬ taꞈ, Jaˇliꞈ dzaw˗eu gʼaˇ duˬ ya lehˬ hmˬ taˬ˗euˬ meh.

Ja sawˇ poˆ˗eu

• Jaˇliꞈ gui gaˇ neh tiˬ byah tiˬ loꞈ gaˇ dahˇ tsoeˬ˗eu jeˬ za˗eu gʼaˇ duˬ, aˬ jeˬ ya jahˇ˗eu nga?

• Nawˇ Jaˇliꞈ yaw duˬ duˬ lehˇ aˬ geu ngeh gui nya˗awˇ, dzaw nya paˬ˗ehˇ gʼeh nga?

• Jaˇliꞈ dzaw˗eu gʼaˇ duˬ lehˬ hmˬ taˬ˗eu, aˬ jeˬ miˇ neh aˇ yeˇ huiˬ˗eu nga?

Haw lahˬ

Jaˇliꞈ gui gaˇ neh heu naˆ maˬ tseˇ gaˇ dahˇ tsoeˬ˗eu jeˬ za nya ni caw ba nehˬ˗eu aˬ jeˬ nga lehˇ haw.

“Jaˇliꞈ aˬ dui˗ahˇ gaˇ dahˇ aˬ joˆ˗ehˇ tsoeˬ˗eu nga?” (Loꞈ˗eu nymˇgoˇ, 2017 Dahˬ beh˗eu dmˬ)

Jaˇliꞈ aˬ joˆ˗ehˇ ya gui˗eu nga lehˇ ehˇ nehˬ laꞈ˗eu smˬ kawˆ˗ahˇ haw.

“Jaˇliꞈ ngaˬ˗ahˇ aˬ joˆ˗ehˇ caw ba nehˬ nya˗eu nga?—Aˇ tsehˆ 1: Jaˇliꞈ gui˗eu” (Iˇteuꞈnehꞈ laꞈ kʼoeˇ˗euˬ gaˇ kawˆ)

Jaˇliꞈ gui gaˇ laˬ kʼaˬ cehˇ ni aˬ joˆ˗ehˇ ya jahˇ˗eu nga lehˇ haw.

“Jaˇliꞈ ngaˬ˗ahˇ aˬ joˆ˗ehˇ caw ba nehˬ nya˗eu nga?—Aˇ tsehˆ 2: Jaˇliꞈ gui mawꞈ dzehˬ laˇ ni leh jeh” (Iˇteuꞈnehꞈ laꞈ kʼoeˇ˗euˬ gaˇ kawˆ)

Jaˇliꞈ gʼawˬ mya kʼoꞈ gui laꞈ˗euˬ deuˬ˗ahˇ neh dzaw geuꞈ.

Yawˬ haˇ yawˬ ha Jaˇliꞈ yaw muiˬ˗ehˇ pyehˆ tseˇ (2:06)