Miˬyehˇ aˬ dui˗euˬ gʼaˇ duˬ, aˬ jeˬ noeˬ taˬ˗euˬ nga?

“Tsawˇ haˬ zaˬ˗aˬ, dehꞈ ziˇ aˇ nah aˇ yamˬ nymˇ˗awˇ, shaˬ zahˬ tiˬ byah ni jaˆ meh” lehˇ Jaˇliꞈ ehˇ˗eu meh. (Yawˇbaˆ 14:1) Maˇ diˇ naˇ Miˬyehˇ teu loꞈ˗ehˇ bi pyeuꞈ mawꞈ ngaˇ laˬ? Maˬ bi pyeuꞈ mawꞈ˗eu jeˬ miˇ, aˬ yawꞈ aˬ dui˗euˬ gʼaˇ duˬ aˬ jeˬ noeˬ taˬ˗euˬ nga? Miˬyehˇ neh noeˬ taˬ˗euˬ jeˬ teu pyeuꞈ laˇ nya ngaˇ laˬ? Gaˇ kawˆ heu nehˬ˗ehˇ taꞈ leˇ˗awˇ gʼaˬ ahˇ laˇ paˬ˗ehˇ Jaˇliꞈ mehˬ˗eu jeˬ˗ahˇ ja sawˇ ma.

1. Yeˬhawˇbaˬ aˬ dui˗euˬ dehꞈ ziˇ˗ahˇ aˬ joˆ˗ehˇ bi gʼeh mawꞈ˗eu nga?

Yeˬhawˇbaˬ aˬ dui˗ahˇ muiˬ dui dui˗eu dehꞈ ziˇ bi za mawꞈ˗eu meh. Miˬyehˇ dahˬ beh˗euˬ nyiˬ dzeˇ zaˬ pyeuꞈ˗eu Aˬdaˬ hawˇ˗eu Eˇbaˆ˗ahˇ beh gʼaˬ naˇ, Eˬdeˬ ya kmˇ lehˇ kuˇ˗eu muiˬ dui dui˗eu Baˬlaˬdiˇsuˆ˗ahˇ bi jawˇ˗euˬ meh. Kʼoeˇ naˇ, “Jeuˬ le o le˗awˬ. Naw maꞈ˗euˬ zaˬ deuˬ miˇ tsaˬ kʼoeˇ taˆ byah laˇ˗awˇ, miˇ tsaˬ˗ahˇ uˆ lahˇ luꞈ˗uˇ’” lehˇ dawˬ ngehˬ gʼeh˗awˇ guiˬ lahˬ biꞈ nehˬ˗euˬ meh. (Aˇdahˬbeh˗eu 1:28) Yeˬhawˇbaˬ aˬ yawꞈ nyaꞈ˗ahˇ zaˬ bi jawˇ le mawꞈ˗awˇ, miˇ tsaˬ tiˬ siˬ siˬ lah ni Baˬlaˬdiˇsuˆ bi mˇ pyeuꞈ mawꞈ˗eu uˬ taꞈ, jeˬ zaˬ deuˬ˗ahˇ jiˇ bi ngehˬ gʼeh mawꞈ˗eu meh. Miˬyehˇ tsawˇ haˬ zaˬ dawˬ tawˆ luꞈ˗ahˇ yaw muiˬ jawˇ saˇ doˆ˗awˇ mˬ maˬ maˬ byaˆ zaˇ ziˇ laˬ kʼaˬ tiˬ cehˇ bi dehꞈ mawꞈ˗eu meh.

Nymˬ˗mˇ iˬ nah teu loꞈ˗ehˇ maˬ pyeuꞈ kʼawꞈ ni,a Miˬyehˇ neh noeˬ taˬ˗euˬ jeˬ maˬ paˇ˗iˇ˗aˬ siˬ. (Iˇsaˬyaˇ 46:10, 11) Aˬ yawꞈ ehˇ dawˬ naˇ haˬ˗eu tsawˇ haˬ deuˬ˗ahˇ yawˬ jeˬ na luꞈ jaˆ kuꞈ gaˇ mˬ maˬ maˬ byaˆ zaˇ ziˇ laˬ kʼaˬ tiˬ cehˇ bi dehꞈ mawꞈ luꞈ˗a siˬ.—Pah mehˬ˗eu 21:3, 4-ahˇ gui.

2. Nymˬ˗mˇ aˬ dui laˬ kʼaˬ tiˬ cehˇ aˬ joˆ˗ehˇ dehꞈ nya˗eu nga?

Yeˬhawˇbaˬ aˬ dui˗ahˇ ‘aˬ yawꞈ˗euˬ dawˬ gaˬ˗awˇ naˇ haˬ geuꞈ’ nya ni beh taˬ˗euˬ meh. Teu miˇ neh aˬ dui aˬ yawꞈ˗ahˇ siˬ nya laˇ nya˗awˇ uˬ duˬ tahˬ nya˗eu meh. (Luˇkaꞈ 11:28-ahˇ gui.) Yeˬhawˇbaˬ Miˬyehˇ aˬ dui˗ahˇ aˬ yawꞈ nehˬ˗ehˇ bi gʼoeˇ mawꞈ˗awˇ ‘aˬ yawꞈ neh dawˬ kʼaˇ biꞈ taˬ˗euˬ jeˬ bi mˇ’ mawꞈ˗eu uˬ taꞈ, aˬ yawꞈ˗ahˇ gaˬ˗awˇ, ‘nui ma dawˬ tawˆ luꞈ aˬ yawꞈ˗euˬ gaˇ bi mˇ’ mawꞈ˗eu meh. (Dawˬmehˬmehˬ˗eu 10:12; Ja ceuˬ 25:14) Aˬ dui teu loꞈ˗ehˇ jahˇ naˇ shaˬ˗eu zahˬ˗eu jeˬ jaˆ kʼawꞈ maˇ maˇ ni laˬ kʼaˬ cehˇ˗eu meh. Yeˬhawˇbaˬ˗ahˇ uˬ duˬ tahˬ˗eu heu naˇ, aˬ dui˗euˬ dehꞈ ziˇ˗ahˇ aˇ poeˬ bi baw˗awˇ, aˬ dui˗ahˇ aˬ jeˬ˗euˬ gʼaˇ duˬ dehꞈ luꞈ˗eu lehˇ jiˇ bi siˬ laꞈ˗eu meh.

3. Miˬyehˇ tsawˇ haˬ zaˬ˗euˬ gʼaˇ duˬ muiˬ dui dui˗eu jeˬ noeˬ taˬ

Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Miˬyehˇ miˇ tsaˬ heu˗ahˇ aˬ jeˬ miˇ neh beh˗euˬ nga?—Tiˬ tsahˇ na (1:41)

• Miˬyehˇ aˬ jeˬ miˇ neh miˇ tsaˬ heu siˬ˗ahˇ heu naˆ naˆ˗ehˇ beh muiˬ taˬ˗euˬ nga?

Yeˬhawˇbaˬ tsawˇ haˬ zaˬ˗ahˇ “mˬ maˬ maˬ byaˆ zaˇ ziˇ dehꞈ mawꞈ˗eu nui ma beh˗ahˇ nehˬ taˬ˗euˬ” meh lehˇ Jaˇliꞈ ehˇ˗eu meh. (Dawˬtsoˆ 3:11, Miˇ shuiꞈ dawˬ paˇ Jaˇliꞈ) Naˇ haˬ˗eu jeˬ heu˗ahˇ ja sawˇ.

• Jaˇliꞈ heu deuˆ˗ahˇ haw ngeh Yeˬhawˇbaˬ tsawˇ haˬ zaˬ˗ahˇ aˬ joˆ˗ehˇ bi dehꞈ˗eu lehˇ beh˗euˬ nga?

4. Yeˬhawˇbaˬ neh noeˬ taˬ˗euˬ jeˬ maˬ poˆ maˬ paˇ laˇ

Ja ceuˬ 37:11, 29 hawˇ˗eu Iˇsaˬyaˇ 55:11-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Tsawˇ haˬ zaˬ nehˬ˗ehˇ taꞈ leˇ˗awˇ Yeˬhawˇbaˬ neh noeˬ taˬ˗euˬ jeˬ maˬ poˆ maˬ paˇ laˇ˗euˬ lehˇ aˬ joˆ˗ehˇ siˬ laˇ˗eu nga?

5. Yeˬhawˇbaˬ˗ahˇ uˬ duˬ tahˬ˗eu jeˬ aˬ dui˗ahˇ maˇ maˇ ni laˬ kʼaˬ bi cehˇ

Biˬdiˬoˬ: Ngaˇ aˬ jeˬ˗euˬ gʼaˇ duˬ dehꞈ luꞈ˗eu lehˇ ya siˬ˗euˬ ma (5:03)

• Aˬ jeˬ˗euˬ gʼaˇ duˬ dehꞈ˗eu lehˇ ya siˬ˗euˬ heu naˇ, Te lu miˇ˗ahˇ aˬ joˆ˗ehˇ gaˇ dahˇ tsoeˬ˗eu nga?

Dawˬtsoˆ 12:13-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬhawˇbaˬ aˬ dui˗euˬ gʼaˇ duˬ gʼawˬ mya jeˬ mˇ nehˬ laꞈ˗euˬ miˇ neh aˬ dui aˬ yawꞈ˗ahˇ guiˬ lahˬ aˬ joˆ˗ehˇ huiˬ nya˗eu nga?

Kawˆ shawˆ

Yeˬhawˇbaˬ aˬ dui˗ahˇ yawˬ jeˬ na luꞈ jaˆ kuꞈ˗eu miˇ tsaˬ kʼoeˇ taˆ mˬ maˬ maˬ byaˆ zaˇ ziˇ laˬ kʼaˬ tiˬ cehˇ bi dehꞈ gʼeh mawꞈ˗eu meh. Miˬyehˇ˗ahˇ nui ma dawˬ tawˆ luꞈ uˬ duˬ tahˬ˗eu heu naˇ, dehꞈ ziˇ laꞈ kʼoeˇ nymˬ˗mˇ neh kʼawꞈ maˇ maˇ ni laˬ kʼaˬ bi cehˇ laˇ˗eu meh.

Ja sawˇ poˆ˗eu

• Yeˬhawˇbaˬ Aˬdaˬ hawˇ˗eu Eˇbaˆ˗euˬ gʼaˇ duˬ aˬ jeˬ noeˬ taˬ˗euˬ nga?

• Miˬyehˇ neh tsawˇ haˬ zaˬ˗euˬ gʼaˇ duˬ noeˬ taˬ˗euˬ jeˬ, maˬ poˆ maˬ paˇ laˇ˗euˬ lehˇ aˬ dui˗ahˇ aˬ joˆ˗ehˇ siˬ laˇ˗eu nga?

• Dehꞈ ziˇ laꞈ kʼoeˇ maˇ maˇ ni laˬ kʼaˬ cehˇ nya˗eu gʼaˇ duˬ, aˬ dui aˬ jeˬ ya jahˇ˗eu nga?

Haw lahˬ

Eˬdeˬ yaˇ kmˇ maˇ maˇ ni jaˆ yaꞈ˗euˬ lehˇ aˬ dui aˬ joˆ˗ehˇ siˬ nya˗eu nga lehˇ haw.

“Eˇdeˬ yaˇ kmˇ˗euˬ gaˇ kawˆ maˇ maˇ ni nga laˬ, aˬ poeˬ dawˬ oeˇ tehꞈ nga laˬ?” (Loꞈ˗eu nymˇgoˇ, 2011 Tiˬ siˬ ba la 1)

Miˇ tsaˬ tahˬ kʼawˇ mˬ maˬ maˬ byaˆ zaˇ ziˇ jaˆ gʼeh meh lehˇ aˬ jeˬ miˇ neh jah nya˗eu nga lehˇ haw.

“Miˇ tsaˬ heu siˬ bi laˆ cawˆ ngaˇ laˬ?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Aˇ poeˬ baw˗eu dehꞈ ziˇ nehˬ˗ehˇ taꞈ leˇ˗awˇ Jaˇliꞈ aˬ joˆ˗ehˇ ehˇ taˬ˗euˬ nga lehˇ haw.

“Aˬ dui aˬ jeˬ˗euˬ gʼaˇ duˬ dehꞈ luꞈ˗eu nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Yawˬ jeˬ na luꞈ jaˆ kuꞈ jiˇ maˬ lehˇ noeˬ˗euˬ tiˬ gʼaˬ, aˬ yawꞈ˗euˬ dehꞈ ziˇ laꞈ kʼoeˇ maˇ maˇ ni loˬ˗eu jeˬ˗ahˇ ya mawˇ.

Nymˬ˗mˇ ngaˇ aˬ jeˬ˗euˬ gʼaˇ duˬ dehꞈ luꞈ˗eu lehˇ siˬ duˬ maˬ (3:55)