Ka li zaˬ˗euˬ dehꞈ ziˇ
‘Pawˇluˆ nui ma gʼaˬ ahˇ laˇ˗awˇ, Miˬyehˇ˗euˬ guiˬ lahˬ˗ahˇ ja ceuˬ’
Loˇmaˆ meuˬ˗ahˇ˗euˬ mehˇ nmˇ deuˬ Pawˇluˆ oe keuˆ mehˬ lehˇ ya gaˬ ngeh, Pawˇluˆ˗ahˇ haw mawˇ le˗eu gʼaˇ duˬ, aˬ yawꞈ maꞈ˗euˬ dahˬ zaˇ gaˇ ma 40 laˇ (64 kiˬloˬmiˬteuˬ) dawˬ peh kaˬ gaˇ neh bi oeˬ˗euˬ meh. Aˬ yawꞈ maꞈ˗euˬ nui ga heu Pawˇluˆ˗ahˇ aˬ joˆ˗ehˇ bi gʼeh leˇ˗euˬ nga? “Aˬ yawꞈ maꞈ˗ahˇ Pawˇluˆ ya mawˇ ngeh, nui ma gʼaˬ tiˬ tiˆ paˇ ahˇ laˇ˗awˇ, Miˬyehˇ˗euˬ guiˬ lahˬ˗ahˇ ja ceuˬ˗euˬ meh.” (Kʼehˇ 28:15) Pawˇluˆ aˬ yawꞈ gʼa iˇ˗eu aˇ muˇ deuˬ˗ahˇ gʼaˬ biꞈ kʼawꞈ, nymˬ˗mˇ aˬ yawꞈ tawˬ˗ahˇ uˇ luꞈ˗eu miˇ neh, mehˇ nmˇ deuˬ gʼaˬ biꞈ˗euˬ jeˬ˗ahˇ loˬ˗eu meh.—2 Gawˇ 13:10.
Nymˬ˗mˇ iˬ nah aˇ maꞈ˗ahˇ sheuˬ gʼeh˗eu deuˬ aˇ muˇ doe ni gʼa iˇ˗awˇ mehˇ nmˇ deuˬ˗ahˇ gʼaˬ biꞈ˗eu meh. Aˬ yawꞈ maꞈ kʼawꞈ Miˬyehˇ gaˇ mˇ zaˬ nui deuˬ loꞈ˗ehˇ, tiˬ poˆ na gʼaˬ doeˇ doeˇ˗awˇ noeˬ shaˬ kʼahˬ lahˇ˗eu uˬ taꞈ, gʼaˬ baˬ laˇ˗eu lehˇ jiˇ baw˗eu meh. Nyaˆ taꞈ poˆ aˇ maꞈ˗ahˇ sheuˬ gʼeh˗eu gʼaˬ hawˇ˗eu aˬ yawꞈ miˬ zaˬ nawˬ˗euˬ aˇ muˇ˗ahˇ gʼa laˇ ngeh, nawˇ aˬ yawꞈ maꞈ˗ahˇ gʼaˬ aˬ joˆ˗ehˇ biꞈ nya˗eu nga? Heu loꞈ˗ehˇ jahˇ˗eu heu naˇ, “nyiˬ paw luꞈ” gʼaˬ biꞈ˗eu jeˬ pyeuꞈ meh.—Maˆ 1:11, 12.
Tsaꞈ gaˬ˗eu gʼaˇ duˬ bawˬ dzaˬ gaˇ gm leˇ. Aˇ maꞈ˗ahˇ sheuˬ gʼeh˗eu gʼaˬ aˬ yawꞈ gʼa leˇ˗eu jaw˗ahˇ mehˇ nmˇ deuˬ gaˇ dahˇ tsoeˬ˗eu jeˬ˗ahˇ za nya ni leh jeh gaˇ ya mawˇ ngeh, gʼaˬ ahˇ leˇ˗eu meh. (1 Teˇ 1:2, 3; 2:20) Aˬ yawꞈ gʼa laˇ ngeh siˬ˗ahˇ tiˬ poˆ na huˬ mehˬ mehˬ˗eu gʼaˬ geuꞈ nya meh. Kʼoeˇ naˇ, aˬ yawꞈ nya nehˬ˗ehˇ tsaꞈ gaˬ iˇ˗eu maˬ ngeuˇ naˇ, Jaˇliꞈ dzaw zaˬ jawˇ gaˇ sheuˬ gʼa˗iˇ˗eu za meh loˇ? Aˬ yawꞈ nyaꞈ mehˇ nmˇ yaw shuiꞈ nehˬ˗ehˇ maˬ ehˇ, tsaꞈ gaˬ ngeh teu naˆ naˆ maˬ ngehˬ nya˗eu deuˬ nehˬ˗ehˇ maˬ ehˇ, mehˇ nmˇ nui deuˬ nehˬ˗ehˇ maˬ ehˇ ya tsaꞈ gaˬ˗euˬ laˬ kʼaˬ cehˇ˗eu meh.
Lmˇ boˬ ni ha nehˬ. Nawˇ aˬ yawꞈ nyaꞈ˗ahˇ nawˬ˗euˬ iˇ kahˇ˗ahˇ bi yaꞈ laˇ˗eu, maˬ ngeuˇ naˇ hawˬ tiˬ byawˇ na bi dzaˬ˗eu za meh loˇ? Heu naˇ nawˇ aˬ yawꞈ nyaꞈ˗ahˇ gaˬ˗eu lehˇ mˇ mawˇ˗eu jeˬ pyeuꞈ meh. Aˬ yawꞈ nyaꞈ gʼawˬ mya jeˬ maˬ loˬ˗a, yaw awˬ awˬ lehˇ jahˇ nehˬ naˇ gʼaˬ meh.—Luˇ 10:38-42.
Ehˇ dawˬ naˇ haˬ˗awˇ, dawˬ mehˬ dawˬ tsoˆ˗ahˇ mˇ caw. Aˇ maꞈ˗ahˇ sheuˬ gʼeh˗eu deuˬ naˇ, aˬ dui Miˬyehˇ gaˇ mˇ˗eu paw bym laˇ ni nui gaˬ keuˆ˗eu laꞈ kʼoeˇ caw ba nehˬ mawꞈ˗eu miˇ neh, tiˬ poˆ na dawˇ coe ni mehˬ nehˬ tsoˆ nehˬ laˇ˗eu meh. (1 Gawˇ 5:1-5) Aˬ dui aˬ yawꞈ maꞈ˗euˬ ehˇ dawˬ naˇ haˬ˗awˇ uˆ lahˇ˗eu uˬ moˆ jawˇ naˇ, aˬ dui jiˇ laˬ kʼaˬ cehˇ nui saˇ oꞈ˗eu meh.—Heˬ 13:17.
Aˇ poeˬ taˬ baw˗eu lehˇ bi siˬ. Aˇ maꞈ˗ahˇ sheuˬ gʼeh˗eu gʼaˬ hawˇ˗eu aˬ yawꞈ˗euˬ miˬ zaˬ˗ahˇ, aˬ yawꞈ nyaꞈ neh leh jeh˗euˬ jeˬ nawˬ˗ahˇ aˇ naˆ ni gaˇ dahˇ tsoeˬ nya lehˇ, dawˬ neh maˬ ngeuˇ naˇ sahˬ boꞈ boꞈ˗awˇ ehˇ nehˬ.—Sehˇ 3:15.