Nawˇ Miˬyehˇ˗euˬ seuˆ dzeuꞈ aˇ gʼehˇ deuˬ˗ahˇ mawˇ maˬ loˇ?

Nawˇ muiˬ dui dui˗eu aˇ yehˆ˗ahˇ haw ngeh maˬ ehˇ, aˬ guiˇ tiˬ byah ni tseh˗eu mˬ˗ahˇ haw ngeh maˬ ehˇ, zawˇ˗ehˇ muiˬ˗eu iˇ cuꞈ tsawˬ tehꞈ˗ahˇ haw ngeh maˬ ehˇ, Beh˗euˬ yaw sahˇ˗euˬ laꞈ zaˇ˗ahˇ mawˇ laˇ miˇ˗a loˇ? Yeˬhawˇbaˬ neh aˬ dui˗euˬ tiˬ jawˬ beh nehˬ taˬ˗euˬ jeˬ, aˬ yawꞈ˗euˬ seu dzeuꞈ aˇ gʼehˇ deuˬ˗ahˇ bya cehˆ ni bi mawˇ laꞈ˗eu meh. (Maˆ 1:20) Aˬ dui tiˬ kʼehˬ naˬ leˇ˗awˇ, aˬ dui˗euˬ myaˆ nuiˆ˗ahˇ mawˇ laˇ˗eu jeˬ˗ahˇ shaˇ noeˬ shaˇ sawˇ naˇ, Miˬyehˇ˗euˬ baoˬ, nui gaˬ, zaˬ siˬ nui gahˇ, yaw tsaˬ yaw dawˇ, tsawˇ tsiˇ maˬ tsiˇ˗eu jeˬ heu deuˬ˗ahˇ ya mawˇ tehꞈ˗a.—Ceuˬ 104:24.

Nawˇ yawˬ nah na luꞈ Yeˬhawˇbaˬ neh beh˗euˬ aˬ jeˬ jeˇ˗ahˇ mawˇ leˬ? Aˬ dui meuˬ laꞈ kʼoeˇ jawˇ kʼawꞈ, aˇ jiˇ hawˇ˗eu aˇ bawˇ deuˬ˗ahˇ mawˇ nya meh. Yeˬhawˇbaˬ neh beh˗euˬ jeˬ˗ahˇ haw˗eu heu naˇ, aˬ dui noeˬ shaˬ˗eu jeˬ bi cuiˆ iˇ nya˗awˇ, aˬ dui˗euˬ shaˬ zahˬ˗ahˇ maˬ bi haw tsoˆ taˬ ni caw ba nehˬ˗eu uˬ taꞈ, Yeˬhawˇbaˬ aˬ dui˗ahˇ aˬ myah luꞈ ngehˬ gʼeh nya ngaˇ lehˇ jah ziꞈ laˇ ni jiˇ caw ba nehˬ˗eu meh. (Tehˬ 6:25-32) Nawˇ zaˬ jawˇ naˇ, nawˬ˗euˬ zaˬ˗ahˇ Miˬyehˇ˗euˬ muiˬ dui dui˗eu seuˆ dzeuꞈ aˇ gʼehˇ deuˬ˗ahˇ mawˇ ni caw ba nehˬ paˬ˗ehˇ gʼeh˗eu meh. Aˬ dui Miˬyehˇ neh beh˗euˬ jeˬ˗ahˇ ngeh˗ehˇ aˇ poeˬ taˬ baw naˇ ngehˬ˗ehˇ, aˬ yawꞈ nehˬ˗ehˇ gʼoeˇ dzehˬ leˇ˗eu meh.—Ceuˬ 8:3, 4.

Zahˬ leˇ paˬ˗ehˇ beh taˬ˗euˬ jeˬ Miˬyehˇ˗euˬ yaw shehꞈ kʼahˬ sehˇ bi mawˇ—Yaw shehꞈ hawˇ˗eu naˬ yawˬ lehˇ ehˇ˗eu biˬdiˬoˬ haw gʼaˬ naˇ, laꞈ oˆ jaˆ˗eu naˇ haˬ˗eu jeˬ heu deuˬ˗ahˇ dawˬ kʼoꞈ biꞈ:

• Aˬ dui aˬ jeˬ miˇ neh naˬ yawˬ gʼawˬ myaˬ jeˬ˗ahˇ ya mawˇ˗eu nga?

• Naˬ yawˬ aˬ jeˬ miˇ neh paˇ iˇ˗eu nga?

• Mˬ˗ahˇ aˬ jeˬ miˇ neh yaw puiˇ yaw neˇ lehˇ gʼawˬ mya jeˬ mawˇ laˇ˗eu nga?

• Nawˬ˗euˬ iˇ kahˇ dawˬ peh, nawˇ zawˇ˗ehˇ muiˬ˗eu aˬ jeˬ jeˇ˗ahˇ mawˇ leˬ?

• Aˬ dui aˬ jeˬ miˇ neh aˬ dui˗euˬ tiˬ jawˬ jaˆ˗eu jeˬ˗ahˇ yaw muiˬ˗ehˇ haw paˬ˗ehˇ gʼeh˗eu nga?