Ka li zaˬ˗euˬ dehꞈ ziˇ

Byawˬ gʼa mo gʼa˗eu jeˬ˗ahˇ yaw gahˇ gahˇ˗ehˇ tseˇ

Aˬ dui byawˬ gʼa mo gʼa˗eu jeˬ˗ahˇ aˬ jeˬ miˇ neh yaw gahˇ gahˇ lehˇ ya tseˇ˗eu nga? Aˬ jeˬ miˇ neh ehˇ naˇ, aˬ dui haw˗eu biˬdiˬoˬ, dawˬ caˇ, gʼoeˇsaiˇ, paˇ dmˬ, keˆ, heu deuˬ naˇ, aˬ dui yawˬ ha˗euˬ nui ma˗ahˇ dawˆ ahˇ˗eu jeˬ pyeuꞈ˗eu miˇ neh meh. Aˬ dui neh tseˇ˗euˬ jeˬ, aˬ dui˗euˬ nui ma hawˇ˗eu mˇ jeˬ saˇ kawˆ nehˬ˗ehˇ taꞈ˗awˇ, nymˬ˗mˇ iˬ nah˗euˬ byawˬ gʼa mo gʼa˗eu jeˬ myaˬ tiˬ paˆ naˇ Yeˬhawˇbaˬ bye˗eu jeˬ tehꞈ˗ehˇ byah jiˇ taˬ˗euˬ meh. (Ja ceuˬ 11:5; Gaˬlaˬtiˆ 5:19-21) Teu miˇ neh Jaˇliꞈ aˬ dui˗ahˇ aˬ myah luꞈ Yeˬhawˇbaˬ˗ahˇ ciˬ huiˬ ciˬ mahˇ˗eu jeˬ˗ahˇ noeˬ keuˆ lehˇ gʼaˬ biꞈ˗eu meh.—Piˇliˇpiˆ 4:8.

Ngaˇ aˬ joˆ˗ehˇ gʼeh˗eu byawˬ gʼa mo gʼa˗eu jeˬ˗ahˇ tseˇ paˬ˗ehˇ gʼeh˗eu nga? lehˇ ehˇ˗eu biˬdiˬoˬ haw gʼaˬ naˇ, laꞈ oˆ jaˆ˗eu naˇ haˬ˗eu jeˬ heu deuˬ˗ahˇ dawˬ kʼoꞈ biꞈ.

Nymˬ˗mˇ iˬ nah˗euˬ byawˬ gʼa mo gʼa˗eu jeˬ heu naˇ, gaˇ hu Loˇmaˆ˗euˬ dawꞈ ceh diˬ ceh ceh˗eu keˆ nehˬ˗ehˇ aˬ joˆ˗ehˇ duˇ leˇ˗eu nga?
Aˇ muˇ laꞈ kʼoeˇ˗euˬ mehˇ nmˇ deuˬ, zaˬ hawˇ˗eu zaˬ guˬ deuˬ˗ahˇ byawˬ gʼa mo gʼa˗eu jeˬ˗ahˇ yaw gahˇ gahˇ˗ehˇ tseˇ nya ni aˬ joˆ˗ehˇ caw ba nehˬ nya nga?
Aˬ dui byawˬ gʼa mo gʼa˗eu jeˬ tseˇ ngeh, Loˇmaˆ 12:9 laꞈ kʼoeˇ˗euˬ Jaˇliꞈ zahˇ˗ahˇ aˬ joˆ˗ehˇ zmˬ nya˗eu nga?
Aˬ dui niˇ gʼa nya˗eu muiˬ˗eu byawˬ gʼa mo gʼa˗eu jeˬ, aˬ jeˬ jeˇ jaˆ˗eu nga?

Maˇ diˇ gaˇ dahˇ tsoeˬ˗eu, aˬ joˆ˗ehˇ gʼeh˗eu byawˬ gʼa mo gʼa˗eu jeˬ nga?

Nymˬ˗mˇ iˬ nah tsawˇ haˬ myaˬ ni ya leˇ˗eu byawˬ gʼa mo gʼa˗eu jeˬ naˇ, aˬ dui˗ahˇ yawˬ ha mˇ jeˬ maˬ mˇ ni aˬ cawˬ neh mˇ˗euˬ jeˬ˗ahˇ haw haw˗ehˇ jawˇ˗eu tsawˇ haˬ bi pyeuꞈ˗iˇ˗eu meh. Paˇ dmˬ, biˬdiˬoˬ, tiˬbiˬ laꞈ kʼoeˇ˗euˬ gaˇ kawˆ heu deuˬ naˇ, nawˬ˗euˬ nui noeˬ maˬ ngeuˇ˗eu aˬ cawˬ˗euˬ nui noeˬ pyeuꞈ meh. Nawˇ toˆ˗ehˇ gʼeh˗eu jeˬ˗ahˇ ui cuiˆ na paˇ haw luꞈ naˇ kʼawꞈ, yawˬ ha˗euˬ laꞈ keuˆ˗iˇ˗eu byawˬ gʼa mo gʼa˗eu jeˬ naˇ, gaˇ dahˇ tsoeˬ dzehˬ ngaˇ lehˇ yaw myaˬ gʼaˬ ehˇ˗eu meh. Yaw jeˬ ma jeˬ, yaw myaˬ gʼaˬ deuˇ˗mˬ diˬ gaˇ hawˇ˗eu aˇ baˇ boꞈ gaˇ maˬ ehˇ, baw duiˇ behˆ niˇ gʼa gaˇ hawˇ˗eu, bawˇ tsahˬ˗ahˇ cah niˇ gʼa gaˇ maˬ ehˇ, uˬ ciꞈ yaꞈ niˇ gʼa˗iˇ gaˇ maˬ ehˇ, ya leˇ˗eu meh. Aˬ dui aˬ joˆ˗ehˇ gʼeh˗eu byawˬ gʼa mo gʼa˗eu jeˬ˗ahˇ tseˇ kʼawꞈ, “kʼaˇ mˇ kʼaˇ shaˇ˗eu yawˬ jeˬ na luꞈ Miˬyehˇ˗euˬ yaw shehꞈ kʼahˬ sehˇ doˆ laˇ ni mˇ” luꞈ˗uˇ.—1 Gawˇliˬtu 10:31.