Ka li zaˬ˗euˬ dehꞈ ziˇ
Maˬ ngeuˇ˗eu gaˇ kawˆ˗ahˇ biˇ kʼawˬ gaˇ yahˇ
Nymˬ˗mˇ iˬ nah gaˇ kawˆ deuˬ sahˬ boꞈ hawˇ˗eu mawˇ kawˇ paw neh maˬ ehˇ, tiˬbiˬ hawˇ˗eu iˇteuꞈnehꞈ paw neh maˬ ehˇ, tsawˇ haˬ aˇ lam aˇ lam gʼaˬ jawˇ gaˇ yaw kawˇ ma˗ehˇ iˇ keuˆ nya˗eu meh. “Yaw tsaˬ yaw dawˇ˗euˬ Miˬyehˇ”˗ahˇ uˬ duˬ tahˬ˗eu deuˬ, maˬ ngeuˇ˗eu gaˇ kawˆ maˬ yehˆ maˇ yehꞈ˗ehˇ kʼawꞈ maˬ pyehˬ kʼawˬ mawꞈ˗eu yaw duˬ baw meh. (Ja ceuˬ 31:5, Yaw shawˇ Yehˇ boꞈ 2018; Doˆ˗iˇ˗eu 23:1) Aˬ cawˬ˗ahˇ maˬ tsaˬ˗eu gaˇ kawˆ pyehˬ kʼawˬ nehˬ˗eu heu naˇ, doeˇ dui dui˗eu jeˬ pyeuꞈ laˇ nya˗eu meh. Aˬ geu jeˬ tsaˬ˗eu hawˇ˗eu maˬ tsaˬ˗eu lehˇ pyehˆ tseˇ ngeh, yawˬ ha˗ahˇ heu loꞈ˗ehˇ naˇ haˬ.
‘Gaˇ kawˆ doˆ le duˬ jahˇ coeˇ paˬ˗ehˇ gʼeh ngaˇ laˬ?’ Gaˇ kawˆ heu˗ahˇ ngehˬ˗eu gʼaˬ gaˇ kawˆ dawˬ tawˆ luꞈ˗ahˇ maˬ siˬ jiˇ nya˗eu kʼawꞈ pyeuꞈ nya˗awˇ, tiˬ gʼaˬ˗ahˇ neh tiˬ gʼaˬ ja tawꞈ leꞈ˗euˬ gaˇ kawˆ heu naˇ, maˬ ngeuˇ paw jeˬ˗ehˇ pyeuꞈ˗iˇ nya˗eu meh. Teu miˇ neh gaˇ kawˆ teu aˬ gaˇ neh doˆ laˇ˗euˬ lehˇ maˬ siˬ duˬ naˇ, aˬ dui ya yahˇ˗eu meh. Mehˇ nmˇ deuˬ aˇ muˇ laꞈ kʼoeˇ aˇ yeˇ huiˬ˗eu gaˇ mˇ˗eu deuˬ neh biˇ kʼawˬ˗euˬ gaˇ kawˆ˗ahˇ jah˗eu miˇ neh, aˬ yawꞈ maꞈ gaˇ kawˆ tiˬ jeˬ na˗ahˇ biˇ kʼawˬ˗eu lehˇ gʼeh ngeh, yaw kʼaˆ˗ehˇ ya yahˇ˗eu meh.
‘Gaˇ kawˆ heu ja bu ja doeˇ˗eu jeˬ pyeuꞈ nga laˬ?’ Gaˇ kawˆ heu tsawˇ haˬ tiˬ gʼaˬ na˗ahˇ maˬ ngeuˇ naˇ, tiˬ muˇ na˗ahˇ tsawˇ myahˇ laˆ cawˆ naˇ, biˇ kʼawˬ paˬ˗ehˇ maˬ gʼeh˗a.—Dawˬdaˬ 18:8; Piˇliˇpiˆ 4:8
‘Gaˇ kawˆ heu˗ahˇ jah coeˇ paˬ˗ehˇ gʼeh ngaˇ laˬ?’ Maˬ jah coeˇ paˬ˗ehˇ gʼeh˗eu gaˇ kawˆ maˬ ehˇ, pyeuꞈ leˇ nya paˬ˗ehˇ maˬ gʼeh˗eu puˬ haw mawˇ haw laꞈ˗euˬ gaˇ kawˆ˗ahˇ maˬ ehˇ, ya gaˬ ngeh ya yahˇ˗eu meh
Ja kʼoeˬ˗eu jeˬ˗ahˇ nawˇ kʼawꞈ laˆ naˬ nya lehˇ ehˇ˗eu biˬdiˬoˬ haw gʼaˬ naˇ, laꞈ oˆ jaˆ˗eu naˇ haˬ˗eu jeˬ heu deuˬ˗ahˇ dawˬ kʼoꞈ biꞈ.
Dawˬdaˬ 12:18-ahˇ haw ngeh, aˬ dui neh ngehˬ˗eu dawˬ heu aˬ joˆ˗ehˇ lehˬ laˇ ca laˇ nya˗eu nga?
Piˇliˇpiˆ 2:4 aˬ cawˬ˗euˬ gaˇ kawˆ˗ahˇ ngehˬ keuˆ ngeh, yaw gahˇ gahˇ lehˇ noeˬ tsehˆ nya ni aˬ joˆ˗ehˇ caw ba nehˬ˗eu nga?
Aˬ dui ngehˬ luꞈ˗eu gaˇ kawˆ, aˬ cawˬ˗ahˇ aˬ joˇ joˆ˗ehˇ gʼeh˗eu lehˇ ehˇ luꞈ ngeh maˬ ehˇ, maˬ muiˬ˗eu paw ngehˬ luꞈ ngeh maˬ ehˇ, aˬ joˆ˗ehˇ ya jahˇ˗eu nga?
Aˬ cawˬ˗euˬ gaˇ kawˆ˗ahˇ maˬ ngehˬ keuˆ mi naˆ˗ehˇ, yawˬ ha˗ahˇ aˬ joˆ˗ehˇ naˇ haˬ paˬ˗ehˇ gʼeh˗eu nga?