Ka li zaˬ˗euˬ dehꞈ ziˇ
Yawˬ kʼoꞈ na luꞈ˗eu Smˬ nah mehˬ bawˬ, nui gaˬ mˇ mawˇ˗eu aˇ yamˬ pyeuꞈ
Aˬ dui smˬ nah mehˬ baw˗ahˇ iˇ ngeh aˬ jeˬ miˇ neh laˬ kʼaˬ cehˇ dui dui˗eu nga? Iˇsaˬleˬlaˆ deuˬ loꞈ˗ehˇ duˇ ni nymˬ˗mˇ iˬ nah˗euˬ smˬ nah mehˬ bawˬ nui jah paw taꞈ˗eu mehˇ nmˇ aˇ heˇ aˇ muiˇ gʼaˬ nehˬ˗ehˇ Yeˬhawˇbaˬ˗ahˇ tiˬ kawˆ loꞈ˗ehˇ uˬ duˬ ya tahˬ˗eu aˇ yamˬ pyeuꞈ meh. Aˬ dui Yeˬhawˇbaˬ nehˬ˗ehˇ gʼoeˇ leˇ ni caw ba nehˬ˗euˬ zaˬ siˬ nui gʼahˇ za˗eu miˇ neh laˬ kʼaˬ cehˇ˗awˇ, nymˇ jiˇ hawˇ˗eu cawˬ deuˬ nehˬ˗ehˇ muiˬ˗eu aˇ yamˬ heu˗ahˇ tiˬ kawˆ loꞈ˗ehˇ ya jawˇ˗eu miˇ neh jiˇ laˬ kʼaˬ cehˇ˗eu ma.
Aˬ dui mehˬ bawˬ heu˗ahˇ aˇ yeˇ taˬ hui˗euˬ miˇ neh smˬ nah luꞈ iˇ mawꞈ˗eu ma. Aˬ dui mehˬ bawˬ˗ahˇ iˇ ngeh yawˬ ha ya leˇ˗eu jeˬ˗ahˇ tehꞈ˗ehˇ maˬ shaˇ noeˬ ni aˬ cawˬ˗ahˇ nui gaˬ aˬ joˆ˗ehˇ mˇ mawˇ nehˬ paˬ nga lehˇ shaˇ noeˬ paˬ˗ehˇ gʼeh˗eu meh. (Gaˬlaˬtiˆ 6:10; Heˬbyehˇ 10:24, 25) Aˬ dui mehˇ nmˇ deuˬ˗ahˇ laˇ gʼoˆ pah nehˬ˗eu uˬ taꞈ nuiˇ duˬ kʼaˇ loˬ˗eu tehˬ˗ehˇ yuˇ taˬ˗eu heu naˇ, aˬ cawˬ˗eu gʼaˇ duˬ shaˇ noeˬ˗eu lehˇ mˇ mawˇ˗eu jeˬ pyeuꞈ meh. (Piˇliˇpiˆ 2:3, 4) Smˬ nah mehˬ baw˗ahˇ cawˬ yaw shuiꞈ jawˇ laˇ nya˗eu aˇ yamˬ pyeuꞈ˗eu miˇ neh mehˬ bawˬ aˇ dahˬ maˬ beh laˇ mi na˗ehˇ maˬ ehˇ, mehˬ bawˬ jiˇ ngeh maˬ ehˇ, nahˇ gʼahˇ paw gʼaˬ naˬ naˬ ngeh maˬ ehˇ, aˬ dui maˬ siˬ nya˗eu deuˬ nehˬ˗ehˇ ngehˬ cawˬ iˇ˗eu lehˇ shaˇ noeˬ taˬ paˬ˗ehˇ gʼehˬ˗eu meh. (2 Gawˇliˬtu 6:13) Aˬ dui neh ngehˬ cawˬ iˇ˗euˬ deuˬ aˬ dui˗euˬ cawˬ pyeuꞈ laˇ nya˗eu meh. Aˇ yeˇ huiˬ˗eu jeˬ naˇ aˬ dui tiˬ gʼaˬ tiˇ gʼaˬ maˇ maˇ ni gaˬ gaˇ ya mawˇ ngeh, Yeˬhawˇbaˬ˗euˬ gaˇ mˇ laˇ mawꞈ˗eu kʼawꞈ pyeuꞈ nya meh.—Yoˇhaˬ 13:35.
“Nui gaˬ mˬ maˬ maˬ byaˆ zaˇ ziˇ ziꞈ” Miˇ kʼahˬ˗euˬ mehˬ bawˬ lehˇ ehˇ˗eu biˬdiˬoˬ haw gʼaˬ naˇ, naˇ haˬ˗eu jeˬ heu deuˬ˗ahˇ dawˬ kʼoꞈ biꞈ.
2019 kʼoꞈ˗euˬ miˇ kʼahˬ˗euˬ mehˬ bawˬ˗ahˇ, mehˇ nmˇ deuˬ miˇ kʼahˬ yawˬ kʼahˬ yawꞈ˗ahˇ neh laˇ˗euˬ dah zaˇ deuˬ˗ahˇ nui gaˬ aˬ joˆ˗ehˇ mˇ mawˇ˗euˬ nga?
Yeˬhawˇbaˬ˗euˬ tsawˇ haˬ deuˬ˗euˬ mehˬ bawˬ gm˗eu jeˬ˗ahˇ maˇ jawˆ ni bi mawˇ laˇ˗eu aˬ geu jeˬ nga?
Uˆ lahˇ˗eu aˇ muˇ, Ka li zaˬ deuˬ˗euˬ nui gaˬ˗ahˇ yaw kʼaˆ˗ehˇ aˬ joˆ˗ehˇ ngehˬ keuˆ˗euˬ nga?
Nawˇ smˬ nah mehˬ bawˬ˗ahˇ jawˇ ngeh, gaˬ˗eu jeˬ aˬ joˆ˗ehˇ mˇ mawˇ nya˗eu nga?
Jeˬmaˬniˬ miˇ kʼahˬ hawˇ˗eu Koˬliˇ˗yaˬ Laꞈ oˆ paw˗euˬ mehˇ nmˇ Ka li zaˬ deuˬ gaˬ˗eu jeˬ, kʼehˬ˗eu kʼaˆ˗eu jeˬ˗ahˇ aˬ joˆ˗ehˇ gʼaˬ leˇ nya˗euˬ nga?
Aˬ dui aˬ jeˬ mˇ˗eu lehˇ noeˬ tsoˆ taˬ paˬ˗ehˇ gʼeh˗eu nga?