Saˬmeuˬlaˆ˗ahˇ neh aˬ dui dzaw geuꞈ nya˗eu jeˬ

Saˬmeuˬlaˆ aˬ yawꞈ kʼaˇ dehꞈ˗euˬ kʼoeˇ keuˆ ni Yeˬhawˇbaˬ˗ahˇ saˇ jaˇ ziꞈ˗euˬ meh. Aˬ yawꞈ yaw nyiˇ ngeh Eˇliˆ˗euˬ aˬ li Hawˇpaˬniˇ hawˇ˗eu Piˇnaˬhaˇ yaw muiˬ˗ehˇ maˬ dehꞈ mehˬ˗euˬ kʼawꞈ, Saˬmeuˬlaˆ aˬ yawꞈ nyaꞈ˗ahˇ maˬ dzaw geuꞈ˗aˬ. (1 Saˬmeuˬlaˆ 2:22-26) Saˬmeuˬlaˆ tiˬ nah saˇ˗iˬ tiˬ nah huiˬ laˇ luꞈ ngeh, Yeˬhawˇbaˬ aˬ yawꞈ˗ahˇ haw teˬ haw piˇ nehˬ˗euˬ meh. (1 Saˬmeuˬlaˆ 3:19) Aˬ yawꞈ tsawˇ mawˬ mawˬ iˇ˗awˇ aˬ yawꞈ˗euˬ aˬ li deuˬ aˬ yawꞈ loꞈ˗ehˇ maˬ dehꞈ˗euˬ kʼawꞈ, aˬ yawꞈ Yeˬhawˇbaˬ˗euˬ gaˇ ma˗ahˇ cah daˆ leꞈ˗euˬ meh.—1 Saˬmeuˬlaˆ 8:1-5.

Aˬ dui Saˬmeuˬlaˆ˗ahˇ neh aˬ jeˬ dzaw geuꞈ nya˗eu nga? Nawˇ aˇ kʼoꞈ yaw nyiˇ tiˬ gʼaˬ pyeuꞈ naˇ, nawˇ aˬ jeˬ˗euˬ shaˬ zahˬ˗ahˇ ya tahˬ puˬ˗awˇ, nawˬ˗euˬ nui ma aˬ joˆ˗ehˇ gʼeh luꞈ˗eu lehˇ Yeˬhawˇbaˬ siˬ nya meh. Nawˇ nui kʼaˬ ahˇ laˇ ni jiˇ caw ba nya meh. (Iˇsaˬyaˇ 41:10, 13) Nawˇ aˬ da aˬ ma pyeuꞈ˗awˇ nawˬ˗euˬ zaˬ Yeˬhawˇbaˬ˗euˬ gaˇ maˬ mˇ naˇ, Saˬmeuˬlaˆ jiˇ huiˬ laˇ˗euˬ aˬ yawꞈ˗euˬ aˬ li deuˬ˗ahˇ Yeˬhawˇbaˬ˗ahˇ saˇ jaˇ ziꞈ ni maˬ jahˇ nehˬ nya˗euˬ lehˇ ya siˬ˗eu heu, nawˬ˗ahˇ gʼaˬ bi ahˇ laˇ˗eu yaw duˬ baw meh. Saˬmeuˬlaˆ gaˇ kawˆ heu Yeˬhawˇbaˬ˗ahˇ a nehˬ˗awˇ, saˇ jaˇ ziꞈ˗eu laꞈ kʼoeˇ Yeˬhawˇbaˬ nui kʼahˇ shiˇ˗eu jeˬ mˇ daˆ leꞈ˗euˬ meh. Nawˬ neh yaw muiˬ˗ehˇ dehꞈ˗euˬ heu, zaˬ deuˬ˗ahˇ Yeˬhawˇbaˬ jawˇ gaˇ gʼoꞈ laˇ nya ni caw ba nehˬ nya˗eu kʼawꞈ pyeuꞈ nya meh.

Aˬ yawꞈ maꞈ˗ahˇ dzaw geuꞈ—Saˬmeuˬlaˆ lehˇ ehˇ˗eu biˬdiˬoˬ haw gʼaˬ naˇ, naˇ haˬ˗eu jeˬ heu deuˬ˗ahˇ dawˬ kʼoꞈ biꞈ.

• 

  Saˬmeuˬlaˆ yaw nyiˇ ngeh nui kʼaˬ aˬ joˆ˗ehˇ mˇ mawˇ˗euˬ nga?

• 

  Dehˇniˬ nui kʼaˬ aˬ joˆ˗ehˇ mˇ mawˇ˗euˬ nga?

• 

  Saˬmeuˬlaˆ mawˬ iˇ ngeh keuˆ ni yaw muiˬ˗ehˇ aˬ joˆ˗ehˇ dehꞈ˗euˬ nga?

• 

  Dehˇniˬ˗euˬ aˬ da aˬ ma yaw muiˬ˗ehˇ aˬ joˆ˗ehˇ dehꞈ mehˬ˗euˬ nga?