Maˬ noeˬ˗euˬ gaˇ naˇ laˇ gawˇ laˇ ngeh˗euˬ gʼaˇ duˬ lehˬ hmˬ taˬ

Aˬ jeˬ miˇ neh ya lehˬ hmˬ˗eu nga? Maˬ noeˬ maˬ duˇ˗ehˇ jawˇ saˇ maˬ doˆ ni pyeuꞈ laˇ nya˗eu miˇ neh meh. Teu miˇ neh naˇ laˇ gawˇ laˇ ngeh yaw muiˬ˗ehˇ laˆ saˆ nya˗eu gʼaˇ duˬ, maˬ naˇ laˇ mi naˆ˗ehˇ jeˬ hu neh ya lehˬ hmˬ taˬ˗eu meh. Aˬ dui toˆ˗ehˇ jahˇ naˇ, dehꞈ ziˇ hawˇ˗eu shiˬ nehˬ˗ehˇ taꞈ leˇ˗awˇ Yeˬhawˇbaˬ˗euˬ zahˇ dawˬ˗ahˇ aˇ poeˬ taˬ baw˗eu jeˬ pyeuꞈ meh.—Gʼaˬkʼehˇ 15:28, 29.

Aˬ jeˬ jeˇ lehˬ hmˬ nya˗eu nga?

• Naˇ gawˇ laˆ saˆ˗eu jeˬ nehˬ˗ehˇ taꞈ leˇ˗awˇ aˬ cawˬ˗ahˇ bi ngehˬ dah˗eu aˇ taꞈ (DPA aˇ taꞈ) boꞈ ngeh, guiˬ lahˬ shaˇ˗awˇ yaw muiˬ˗ehˇ shaˇ noeˬ.a Iˇ cuꞈ shawˇ dzeuˇ˗euˬ deuˬ aˇ taꞈ heu aˇ muˇ laꞈ kʼoeˇ sahˬ boꞈ˗ahˇ haw˗eu gʼaˬ˗ahˇ shaˇ nya˗awˇ, yawˬ ha˗euˬ uˆ lahˇ˗eu uˬ moˆ jawˇ luꞈ˗eu zaˬ deuˬ˗euˬ gʼaˇ duˬ, Yawˬ ha˗euˬ gaˇ kawˆ boꞈ taˬ˗euˬ aˇ taꞈ (ic aˇ taꞈ) jiˇ shaˇ nya meh.

• Nawˇ zaˬ pi luꞈ naˇ, Zaˬ pi luꞈ˗eu deuˬ˗euˬ gʼaˇ duˬ (S-401) lehˇ ehˇ˗eu sahˬ boꞈ shaˇ nya meh. Sahˬ boꞈ heu naˇ nawˇ zaˬ pi luꞈ ngeh hawˇ˗eu zaˬ baw˗eu yaw kaˬ˗ahˇ shaˬ laˇ˗eu jeˬ˗ahˇ yaw muiˬ˗ehˇ noeˬ tsehˆ nya ni caw ba nehˬ nya˗eu meh.

• Naˇ gawˇ laˆ saˆ ngeh shiˬ nehˬ˗ehˇ taꞈ leˇ˗eu gaˇ kawˆ doˆ laˇ ngeh maˬ ngeuˇ naˇ, naˇ gawˇ laˆ saˆ duˬ˗ahˇ ya yuꞈ ngeh, aˇ muˇ˗ahˇ sheuˬ gʼeh deuˬ˗ahˇ jeˬ hu ya ehˇ nehˬ taˬ meh. Kʼoeˇ naˇ saˬ laˬ gʼoˬ deuˬ˗ahˇ ngaˬ˗euˬ cawˬ Yeˬhawˇbaˬ˗euˬ Saˇ kiˇ deuˬ˗ahˇ ngaˇ jawˇ gaˇ bi gʼa laˇ ma lehˇ jiˇ ehˇ nehˬ taˬ.

Aˇ muˇ˗ahˇ sheuˬ gʼeh˗eu deuˬ aˬ joˆ˗ehˇ caw ba nya˗eu nga? Aˇ muˇ˗ahˇ sheuˬ gʼeh˗eu deuˬ DPA sahˬ boꞈ aˇ taꞈ boꞈ gaˇ caw ba nehˬ nya˗eu meh. Ehˇ kʼawꞈ aˬ yawꞈ maꞈ naˇ gawˇ aˬ joˆ˗ehˇ ya laˆ saˆ˗eu lehˇ aˬ dui˗euˬ gʼaˇ duˬ maˬ noeˬ tsehˆ nehˬ˗a. (Loˇmaˆ 14:12; Gaˬlaˬtiˆ 6:5) Aˬ dui shiˬ nehˬ˗ehˇ taꞈ˗eu naˇ gawˇ laˆ saˆ˗eu gaˇ kawˆ jaˆ nga lehˇ aˇ muˇ sheuˬ gʼeh˗eu deuˬ˗ahˇ ehˇ nehˬ naˇ aˬ yawꞈ maꞈ naˇ gawˇ laˆ saˆ˗eu paw˗euˬ gawˬmiˬtiꞈ (HLC)˗ahˇ ngehˬ cawˬ˗eu meh.

Naˇ gawˇ laˆ saˆ˗eu paw˗euˬ gawˬmiˬtiꞈ (HLC) aˬ joˆ˗ehˇ caw ba nehˬ nya˗eu nga? Mehˇ nmˇ heu deuˬ naˇ saˬ laˬ gʼoˬ deuˬ˗ahˇ maˬ ehˇ, miˇ kʼahˬ˗euˬ zahˇ sahˇ kʼoꞈ paw mˇ˗eu deuˬ˗ahˇ maˬ ehˇ aˬ dui˗euˬ jah˗eu jeˬ˗ahˇ yaw muiˬ˗ehˇ dzawˇ nehˬ nya ni ya dzaw taˬ˗euˬ meh. Aˬ yawꞈ maꞈ saˬ laˬ gʼoˬ deuˬ˗ahˇ shiˬ maˬ dawˆ ni naˇ gawˇ laˆ saˆ˗eu gaˇ kawˆ ja ahˇ nehˬ nya˗awˇ teu loꞈ˗ehˇ laˆ saˆ nehˬ mawꞈ˗eu saˬ laˬ gʼoˬ˗ahˇ jiˇ poˆ mawˇ nya ni caw ba nehˬ nya˗eu meh.

Shiˬ nehˬ˗ehˇ taꞈ˗eu naˇ gawˇ laˆ saˆ˗eu jeˬ˗ahˇ yaw muiˬ˗ehˇ aˬ joˆ˗ehˇ noeˬ tsehˆ nya˗eu nga? lehˇ ehˇ˗eu biˬdiˬoˬ haw gʼaˬ naˇ, naˇ haˬ˗eu jeˬ heu deuˬ˗ahˇ dawˬ kʼoꞈ biꞈ.

• Maˬ noeˬ maˬ duˇ˗ehˇ shiˬ nehˬ˗ehˇ taꞈ˗eu, naˇ gawˇ laˆ saˆ˗eu gʼaˇ duˬ lehˬ hmˬ ngeh biˬdiˬoˬ heu˗ahˇ neh aˬ jeˬ ya siˬ leˬ?

  Nawˬ˗euˬ dawˬ k’oꞈ