Ka li zaˬ˗euˬ dehꞈ ziˇ

Zahˇ maˬ baw˗eu deuˬ˗ahˇ aˬ yawꞈ maꞈ˗ahˇ beh˗euˬ yaw sahˇ˗ahˇ siˬ nya laˇ ni caw ba

Nawˇ zahˇ maˬ baw˗eu deuˬ˗ahˇ aˬ yawꞈ maꞈ Miˬyehˇ˗euˬ gaˇ kawˆ˗ahˇ nui ma maˬ ahˇ˗a lehˇ noeˬ˗awˇ, maˬ tsaꞈ gaˬ ni gʼeh haw maˬ loˇ? Toˆ˗ehˇ noeˬ haw˗euˬ naˇ, zahˇ maˬ baw˗eu gʼawˬ mya gʼaˬ maˬ ngeuˇ naˇ, Miˬyehˇ˗ahˇ maˬ jah˗eu gʼawˬ mya gʼaˬ kʼawꞈ ni, Yeˬhawˇbaˬ˗euˬ Saˇ kiˇ pyeuꞈ laˇ˗euˬ lehˇ noeˬ taˬ luꞈ˗uˇ. Aˬ dui ya mˇ˗eu jeˬ naˇ, aˬ yawꞈ maꞈ˗ahˇ Miˬyehˇ maˇ diˇ jawˇ˗eu lehˇ siˬ leˇ ni ya caw ba nehˬ˗eu meh.—Loˇmaˆ 1:20; 10:14.

Maˬ jah˗eu deuˬ, jah˗eu tsawˇ haˬ pyeuꞈ laˇ nya˗eu lehˇ taˬ ngehˇ—Tiˬ jeˬ-euˬ zahˇ maˬ tawˬ-eu deuˬ lehˇ ehˇ˗eu diˬbiˬoˬ haw gʼaˬ naˇ, naˇ haˬ˗eu jeˬ heu deuˬ˗ahˇ dawˬ kʼoꞈ biꞈ.

Toˬmaˇsoˬ˗euˬ gaˇ kawˆ heu naˇ aˬ dui˗ahˇ zahˇ maˬ baw˗eu deuˬ˗ahˇ tsaꞈ gaˬ ngeh, yaw muiˬ paw dzeˇ dzaˬ˗ahˇ haw nya ni aˬ joˆ˗ehˇ caw ba nehˬ laꞈ˗eu nga?

Nawˬ˗euˬ dawˬ kʼoꞈ

Aˬ joˆ˗ehˇ caw ba nya˗eu nga?

Tiˬ gʼaˬ paˬ Miˬyehˇ˗ahˇ maˬ jah lehˇ ehˇ ngeh, nui ma maˬ pehˇ ni aˬ yawꞈ maꞈ nehˬ˗ehˇ yaw muiˬ˗ehˇ ngehˬ cawˬ˗awˇ, aˬ yawꞈ maꞈ ngehˬ gaˇ yaw muiˬ˗ehˇ naˇ haˬ nehˬ. (2 Tiˆmoˇseˬ 2:24) Aˬ yawꞈ maꞈ nui ma ahˇ paˬ˗ehˇ gʼeh˗eu gaˇ kawˆ deuˬ˗ahˇ ngehˬ cawˬ. Yaw jeˬ ma jeˬ, aˬ yawꞈ maꞈ beh˗euˬ yaw sahˇ jawˇ ngaˇ laˬ? lehˇ siˬ nya mawꞈ naˇ, gaˇ kawˆ heu deuˬ˗ahˇ dzawˇ nehˬ taˬ˗euˬ paˇ dmˬ deuˬ hawˇ-eu biˬdiˬoˬ deuˬ-ahˇ zmˬ. Dehꞈ˗eu jeˬ beh˗euˬ nga loˇ? hawˇ˗eu Dehꞈ ziˇ dahˬ beh duˬ—Shaˇ noeˬ paˬ˗ehˇ gʼeh˗eu ngaˬ kawˆ lehˇ ehˇ˗eu boˬloˬshaˬ Mehˬ-eu keu ka bawˬ keuˆ laꞈ k’oeˇ dawˆ ahˇ nehˬ taˬ-euˬ meh.

Dahˬ beh ngeh aˬ dui Miˬyehˇ˗ahˇ maˬ jah˗eu deuˬ˗ahˇ, maˬ tsaꞈ gaˬ peuˬ˗eu kʼawꞈ pyeuꞈ nya meh. Nawˇ toˆ˗ehˇ noeˬ naˇ puˬ haw mawˇ laꞈ˗euˬ mehˇ nmˇ deuˬ˗ahˇ neh caw ba˗eu jeˬ shaˇ. Kʼoeˇ naˇ dahˬ beh ngeh Miˬyehˇ jawˇ meh lehˇ maˬ jah˗eu tsawˇ haˬ heu deuˬ˗ahˇ kʼawꞈ, aˬ yawꞈ maꞈ yaw tsaˬ yaw dawˇ˗ahˇ ha geuꞈ laˇ ni, nui ma ahˇ laˇ ni Yeˬhawˇbaˬ caw ba nya meh lehˇ shaˇ noeˬ luꞈ˗uˇ.—Gʼaˬkʼehˇ 13:48.