Aˬ dui aˬ dui˗euˬ Aˬda Yeˬhawˇbaˬ˗ahˇ gaˬ dui dui˗eu ma

1-2. Yeˬhawˇbaˬ aˬ dui˗ahˇ aˬ yawꞈ˗euˬ nymˇ jiˇ laꞈ kʼoeˇ aˬ joˆ˗ehˇ bi jawˇ laˇ˗euˬ nga? Aˬ jeˬ miˇ neh?

Yeˬhawˇbaˬ aˬ dui˗ahˇ aˬ yawꞈ˗euˬ nymˇ jiˇ laꞈ kʼoeˇ kuˇ ahˇ laꞈ˗euˬ meh. Heu naˇ aˇ naˆ ni muiˬ˗eu nga! Nymˇ jiˇ teu laꞈ kʼoeˇ Miˬyehˇ˗ahˇ a nehˬ taˬ˗awˇ aˬ yawꞈ˗euˬ Zaˬmaˇ Yeˬsuˇ˗euˬ ka kʼoꞈ˗eu jeˬ˗ahˇ jah˗eu tsawˇ haˬ deuˬ tehꞈ˗ehˇ jawˇ˗eu meh. Aˬ dui laˬ kʼaˬ cehˇ˗eu nymˇ jiˇ pyeuꞈ˗awˇ, aˬ dui nymˬ˗mˇ neh yaw muiˬ˗ehˇ ya dehꞈ˗eu uˬ taꞈ, mehˬ hu paw jiˇ miˇ tsaˬ˗ahˇ maˬ ehˇ, mˬ taˆ maˬ ehˇ aˬ myah luꞈ dehꞈ gʼeh˗eu noeˬ tmˬ˗eu jeˬ jaˆ˗eu meh.

² Yeˬhawˇbaˬ aˬ dui˗ahˇ gaˬ˗eu miˇ neh, aˬ yawꞈ˗euˬ nymˇ jiˇ laꞈ kʼoeˇ bi jawˇ laˇ˗euˬ meh. Aˬ yawꞈ toˆ˗ehˇ jahˇ nya˗eu gʼaˇ duˬ, gʼawˬ mya jeˬ ya biꞈ˗eu meh. (Yoˇhaˬ 3:16) Aˬ yawꞈ aˬ dui˗ahˇ “aˇ poeˬ biꞈ˗awˇ zeuˇ tsehˆ gʼaˬ˗euˬ” meh. (1 Gawˇliˬtu 6:20) Ka kʼoꞈ˗eu jeˬ baˬ da neh, aˬ dui Yeˬhawˇbaˬ nehˬ˗ehˇ yaw gʼoeˇ gʼoeˇ lehˇ lmˇ boˬ ni dehꞈ nya˗eu meh. Aˬ dui˗ahˇ boeˬ boeˬ luˆ luˆ laꞈ kʼoeˇ Huiˬ dzehˬ mahˇ dzehˬ˗eu gʼaˬ˗ahˇ Aˬda lehˇ ya kuˇ˗eu miˇ neh poeˬ˗eu lehˇ miˇ˗a. Dzeuˇ yaꞈ˗euˬ kawˆ˗ahˇ ya siˬ˗euˬ loꞈ˗ehˇ, Yeˬhawˇbaˬ naˇ aˬ dui yawˬ gʼaˬ na luꞈ geuꞈ mawꞈ˗eu kʼaˇ muiˬ˗eu Aˬda pyeuꞈ meh.

3. Aˬ dui yawˬ ha˗ahˇ aˬ joˆ˗ehˇ naˇ haˬ nya˗eu nga? (“Yeˬhawˇbaˬ ngaˬ˗ahˇ haw luꞈ ngaˇ laˬ?” lehˇ ehˇ˗eu oeˬ coeˇ oeˬ bawˬ˗ahˇ jiˇ haw.)

³ Aˬ dui yawˬ ha˗ahˇ “Sahˬpaˬ Miˬyehˇ ngaˬ˗euˬ kʼoeˇ taˆ muiˬ dui dui˗eu miˇ neh, aˬ yawꞈ˗ahˇ ngaˇ aˬ jeˬ ya damˬ nehˬ nmˇ” lehˇ naˇ haˬ taˬ˗euˬ Jaˇliꞈ boꞈ zaˬ teu gʼaˬ loꞈ˗ehˇ naˇ haˬ nya˗eu meh. (Ja ceuˬ 116:12) Aˬ dui Yeˬhawˇbaˬ˗ahˇ tiˬ jeˬ gʼeh neh˗iˬ maˬ biꞈ kʼoꞈ nehˬ jiˇ nya˗eu yaw duˬ baw meh. Ehˇ kʼawꞈ aˬ yawꞈ aˬ dui˗ahˇ gaˬ˗eu teu naˇ, aˬ dui˗ahˇ aˬ yawꞈ˗ahˇ gaˬ ni laˆ noeˬ nehˬ˗eu meh. Gʼaˬ kʼehˇ Yoˇhaˬ ‘Miˬyehˇ aˬ dui˗ahˇ jeˬ hu gaˬ˗euˬ miˇ neh, aˬ dui aˬ yawꞈ˗ahˇ gaˬ˗eu ma’ lehˇ ehˇ˗eu meh. (1 Yoˇhaˬ 4:19) Aˬ dui mˬ taˆ Aˬda˗ahˇ gaˬ˗eu lehˇ aˬ joˆ˗ehˇ bi mawˇ nya˗eu nga?

Aˬ myah luꞈ Yeˬhawˇbaˬ nehˬ˗ehˇ gʼoeˇ

4. Yaˬkoˆ 4:8-ahˇ haw ngeh, aˬ dui aˬ jeˬ miˇ neh Yeˬhawˇbaˬ nehˬ˗ehˇ gʼoeˇ paˬ˗ehˇ gʼeh˗eu nga?

⁴ Yeˬhawˇbaˬ aˬ dui˗ahˇ aˬ yawꞈ nehˬ˗ehˇ bi gʼoeˇ mawꞈ˗awˇ bi ngehˬ cawˬ mawꞈ˗eu meh. (Yaˬkoˆ 4:8-ahˇ gui.) Yeˬhawˇbaˬ aˬ dui˗ahˇ “aˬ myah luꞈ guiˬ lahˬ shaˇ˗awˬ” lehˇ ehˇ˗awˇ, aˬ yawꞈ jiˇ aˬ myah luꞈ naˇ haˬ˗eu gʼaˇ duˬ lehˬ hmˬ deuˇ taˬ˗euˬ meh. (Loˇmaˆ 12:12) Aˬ yawꞈ aˬ dui˗euˬ dawˬ˗ahˇ naˇ haˬ˗eu maˬ dah gaˇ keuˆ ni gaˇ myaˬ˗awˇ, gʼaˬ doeˇ doeˇ doeˇ˗ehˇ tiˬ jawˇ˗iˬ maˬ gʼeh haw˗aˬ. Aˬ dui kʼawꞈ Jaˇliꞈ hawˇ˗eu Jaˇliꞈ˗ahˇ gʼoˆ shaw laˇ ni caw ba nehˬ˗eu jeˬ˗ahˇ gui gaˇ neh maˬ ehˇ, mehˬ bawˬ˗ahˇ neh maˬ ehˇ, aˬ yawꞈ˗euˬ dawˬ˗ahˇ naˇ haˬ nya˗eu meh. Maˬ tsehˆ leˇ ni ngehˬ cawˬ˗eu jeˬ heu naˇ, zaˬ˗ahˇ aˬ da aˬ ma nehˬ˗ehˇ bi gʼoeˇ leˇ˗eu loꞈ˗ehˇ, aˬ dui jiˇ Yeˬhawˇbaˬ nehˬ˗ehˇ maˬ tsehˆ leˇ ni ngehˬ cawˬ naˇ, aˬ yawꞈ nehˬ˗ehˇ aˬ myah luꞈ gʼoeˇ˗eu meh.

5. Aˬ dui guiˬ lahˬ aˬ joˆ˗ehˇ ya shaˇ˗eu nga?

⁵ Aˬ dui guiˬ lahˬ shaˇ˗eu jeˬ aˬ joˆ˗ehˇ gʼeh nya lehˇ shaˇ noeˬ haw. Yeˬhawˇbaˬ aˬ dui˗ahˇ nui ma laꞈ kʼoeˇ kʼaˇ pyeuꞈ luꞈ˗eu jeˬ bi ehˇ nehˬ mawꞈ˗eu meh. (Ja ceuˬ 62:8) Aˬ dui yawˬ ha˗ahˇ ‘Ngaˇ guiˬ lahˬ shaˇ ngeh, ngeuˇ maˬ ngeuˇ maˬ siˬ˗ehˇ tehꞈ˗ehˇ ngehˬ˗awˇ, aˬ yawꞈ tiˬ dawˬ˗ahˇ tehꞈ˗ehˇ ngehˬ poˆ˗eu caˆ mawˇ kawˇ˗ahˇ duˇ nya laˬ, maˬ ngeuˇ naˇ ngaˇ yaw muiˬ˗ehˇ shaˇ noeˬ˗awˇ aˬ laꞈ neh boꞈ˗euˬ sahˬ boꞈ loꞈ˗ehˇ nui ma laꞈ kʼoeˇ neh ngehˬ miˇ˗a laˬ?’ lehˇ naˇ haˬ paˬ˗ehˇ gʼeh˗eu meh. Aˬ dui Yeˬhawˇbaˬ˗ahˇ gaˬ mawꞈ gʼoeˇ mawꞈ˗eu yaw duˬ baw meh. Teu miˇ neh, aˬ dui aˬ yawꞈ nehˬ˗ehˇ tiˬ kʼehˬ maˬ kaˬ ya ngehˬ cawˬ˗awˇ, nui ma laꞈ kʼoeˇ pyeuꞈ luꞈ˗eu laˬ kʼaˬ cehˇ˗eu jeˬ maˬ ehˇ, noeˬ shaˬ kʼahˬ lahˇ˗eu jeˬ maˬ ehˇ, ya dzawˇ nehˬ˗eu meh. Aˬ dui Yeˬhawˇbaˬ˗ahˇ shaˇ ju nya meh lehˇ jah luꞈ˗uˇ.

6. Aˬ dui aˬ myah luꞈ mˬ taˆ Aˬda nehˬ˗ehˇ gʼoeˇ˗eu gʼaˇ duˬ, aˬ jeˬ ya jahˇ˗eu nga?

⁶ Mˬ taˆ Aˬda nehˬ˗ehˇ gʼoeˇ˗eu gʼaˇ duˬ, aˬ dui guiˬ lahˬ huiˬ˗eu siˬ nya˗eu tsawˇ haˬ ya pyeuꞈ meh. Aˬ dui Ja ceuˬ sahˬ boꞈ boꞈ˗euˬ tiˬ gʼaˬ neh “Nga maꞈ jah˗eu Miˬyehˇ pyeuꞈ˗eu, nga maꞈ˗euˬ Sahˬpaˬ Miˬyehˇ˗oˇ, kʼaˆ jeˬ˗ehˇ gʼeh˗eu gʼawˬ mya jeˬ, nga maꞈ gʼaˇ duˬ nawˇ mˇ˗euˬ meh. Nawˇ loꞈ˗ehˇ gaˇ kawˆ kawˆ nya˗eu, nawˬ˗ahˇ duˇ˗eu gʼaˬ maˬ jawˇ˗a. Nawˬ neh mˇ nehˬ laꞈ˗euˬ gaˇ deuˬ, kʼaˬ meh neh maˬ ja jiˇ coeˇ nya” lehˇ ehˇ taˬ˗euˬ gaˇ nui ma tsaˬ˗eu ma. (Ja ceuˬ 40:5) Aˬ dui guiˬ lahˬ huiˬ miˇ˗a lehˇ tehꞈ˗ehˇ maˬ noeˬ ni, ngehˬ˗awˇ mˇ˗eu jeˬ neh Yeˬhawˇbaˬ˗ahˇ guiˬ lahˬ huiˬ˗eu lehˇ ya mˇ doˆ laꞈ˗eu meh. Teu naˇ aˬ dui˗ahˇ nymˬ˗mˇ iˬ nah˗euˬ tsawˇ haˬ deuˬ nehˬ˗ehˇ bi beu gaˇ˗eu meh. Aˬ dui Miˬyehˇ neh aˬ yawꞈ maꞈ˗euˬ gʼaˇ duˬ mˇ˗euˬ jeˬ˗ahˇ guiˬ lahˬ huiˬ˗eu maˬ siˬ nya˗eu miˇ tsaˬ˗ahˇ jawˇ luꞈ˗eu ma. Aˬ dui “aˇ saˬ saˬ˗eu aˇ nah aˇ yamˬ”˗ahˇ jawˇ luꞈ˗eu lehˇ maˇ jawˆ ni siˬ laˇ˗eu tiˬ jeˬ naˇ, tsawˇ haˬ deuˬ guiˬ lahˬ˗ahˇ maˬ siˬ nya˗eu heu meh. (2 Tiˆmoˇseˬ 3:1, 2) Aˬ dui teu loꞈ˗ehˇ maˬ gʼeh ni dehꞈ luꞈ˗uˇ.

7. Yeˬhawˇbaˬ aˬ dui˗ahˇ aˬ jeˬ bi jahˇ mawꞈ˗eu nga? Aˬ jeˬ miˇ neh?

⁷ Aˬ da aˬ ma deuˬ, zaˬ deuˬ˗ahˇ maˬ ceh dzaˬ ni yaw gʼoeˇ gʼoeˇ lehˇ bi jawˇ mawꞈ˗eu meh. Yeˬhawˇbaˬ jiˇ ni aˬ yawꞈ˗euˬ zaˬ deuˬ˗ahˇ tiˬ gʼaˬ tiˇ gʼaˬ mehˬ bawˬ gm˗eu laꞈ kʼoeˇ, gʼoeˇ law gaˬ law˗ehˇ bi dehꞈ mawꞈ˗eu meh. Aˬ dui tiˬ gʼaˬ tiˇ gʼaˬ gʼoeˇ˗eu gaˬ˗eu jeˬ heu naˇ, Ka li zaˬ maˇ diˇ deuˬ pyeuꞈ˗eu lehˇ bi siˬ˗eu meh. (Yoˇhaˬ 13:35) Aˬ dui Ja ceuˬ sahˬ boꞈ boꞈ˗euˬ tiˬ gʼaˬ neh “Miˬyehˇ˗euˬ tsawˇ haˬ deuˬ nui ma taꞈ˗awˇ dehꞈ˗eu jeˬ, aˇ naˆ ni zahˬ leˇ paˬ˗ehˇ gʼeh˗awˇ, aˇ naˆ ni laˬ kʼaˬ cehˇ paˬ˗ehˇ gʼeh˗eu nga” lehˇ ehˇ˗euˬ dawˬ˗ahˇ nui ma tsaˬ˗eu ma. (Ja ceuˬ 133:1) Aˬ dui mehˇ nmˇ deuˬ˗ahˇ gaˬ naˇ, Yeˬhawˇbaˬ˗ahˇ gaˬ˗eu jeˬ pyeuꞈ meh. (1 Yoˇhaˬ 4:20) “Nui nahˬ nui yu ahˇ˗eu laꞈ kʼoeˇ tiˬ gʼaˬ tiˇ gʼaˬ gʼawˬ shaˬ gaˬ”˗eu nymˇ jiˇ laꞈ kʼoeˇ ya jawˇ˗eu heu aˇ naˆ ni muiˬ˗eu nga!—Eˇpeˇsu 4:32.

Ehˇ dawˬ naˇ haˬ˗awˇ gaˬ˗eu jeˬ bi mawˇ

8. 1 Yoˇhaˬ 5:3-ahˇ haw ngeh aˬ dui Yeˬhawˇbaˬ˗euˬ ehˇ dawˬ naˇ haˬ˗eu teu naˇ, maˇ diˇ naˇ aˬ jeˬ baˬ da neh nga?

⁸ Yeˬhawˇbaˬ zaˬ deuˬ˗ahˇ aˬ da aˬ ma˗euˬ ehˇ dawˬ bi naˇ haˬ mawꞈ˗awˇ, aˬ dui˗ahˇ jiˇ aˬ yawꞈ˗euˬ ehˇ dawˬ bi naˇ haˬ mawꞈ˗eu meh. (Eˇpeˇsu 6:1) Aˬ yawꞈ Beh˗euˬ yaw sahˇ pyeuꞈ˗awˇ, aˬ dui dehꞈ nya ni loˬ˗eu jeˬ biꞈ˗eu gʼaˬ pyeuꞈ˗eu uˬ taꞈ, aˬ da aˬ ma dawˬ tawˆ luꞈ naˆ maˬ tseˇ siˬ nya dzehˬ˗eu miˇ neh, aˬ dui aˬ yawꞈ˗euˬ dawˬ naˇ haˬ mahˇ tsahˇ meh. Maˇ diˇ naˇ, aˬ dui aˬ yawꞈ˗euˬ ehˇ dawˬ naˇ haˬ˗eu heu naˇ, aˬ yawꞈ˗ahˇ gaˬ˗eu miˇ neh ma. (1 Yoˇhaˬ 5:3-ahˇ gui.) Aˬ dui Yeˬhawˇbaˬ˗euˬ ehˇ dawˬ gʼawˬ mya jeˬ baˬ da neh naˇ haˬ paˬ˗ehˇ gʼeh kʼawꞈ, aˬ yawꞈ aˬ dui˗ahˇ maˬ ka tiˇ˗a. Aˬ dui˗ahˇ yawˬ ha naꞈ˗i bi tseˇ˗eu meh. Teu baˬ da neh, aˬ dui aˬ yawꞈ˗euˬ ehˇ dawˬ naˇ haˬ˗eu teu naˇ, aˬ yawꞈ˗ahˇ gaˬ˗eu miˇ neh pyeuꞈ gaˇ aˬ yawꞈ laˬ kʼaˬ cehˇ˗eu meh.

9-10. Aˬ dui Yeˬhawˇbaˬ˗euˬ tsaˬ˗eu dawˇ˗eu zahˇ˗ahˇ siˬ nya˗awˇ, caw teh˗eu heu naˇ aˬ jeˬ miˇ neh aˇ yeˇ huiˬ˗eu nga?

⁹ Aˬ da aˬ ma deuˬ zaˬ˗ahˇ maˬ bi lehˬ maˬ bi ca laˇ mawꞈ˗eu miˇ neh, zaˬ˗ahˇ haw piˇ˗eu gʼaˇ duˬ zahˇ jahˇ doˆ˗eu meh. Zaˬ ehˇ dawˬ naˇ haˬ naˇ, aˬ yawꞈ aˬ da aˬ ma˗ahˇ nui ma taˬ˗awˇ yaw zeu baw˗eu jeˬ pyeuꞈ meh. Teu miˇ neh, aˬ dui Yeˬhawˇbaˬ˗euˬ tsaˬ˗eu dawˇ˗eu zahˇ˗ahˇ siˬ nya˗awˇ, mˇ caw˗eu ngeh˗ehˇ dzehˬ aˇ yeˇ huiˬ˗eu meh. Toˆ˗ehˇ jahˇ˗eu teu naˇ, aˬ dui aˬ yawꞈ˗ahˇ gaˬ˗awˇ yaw zeu baw˗eu jeˬ pyeuꞈ˗eu uˬ taꞈ, yawˬ ha˗ahˇ jiˇ gaˇ dahˇ tsoeˬ˗eu meh. (Iˇsaˬyaˇ 48:17, 18) Yeˬhawˇbaˬ˗euˬ ehˇ dawˬ hawˇ˗eu aˬ yawꞈ˗euˬ tsaˬ˗eu dawˇ˗eu zahˇ˗ahˇ maˬ caw teh˗eu deuˬ naˇ, maˬ muiˬ˗eu jeˬ˗ahˇ ya yehˬ meh.—Gaˬlaˬtiˆ 6:7, 8.

¹⁰ Aˬ dui Yeˬhawˇbaˬ ehˇ˗eu loꞈ˗ehˇ dehꞈ caw ngeh, aˬ dui˗euˬ gʼawˇ mawˇ, nui ma, Miˬyehˇ nehˬ˗ehˇ cawˬ cawˬ˗eu jeˬ, heu deuˬ˗ahˇ deuˬ laˇ˗eu gʼawˬ mya jeˬ˗ahˇ neh jaw dzeuˇ nya˗eu meh. Aˬ dui˗euˬ gʼaˇ duˬ muiˬ˗eu jeˬ˗ahˇ Yeˬhawˇbaˬ taꞈ˗ehˇ siˬ nya˗eu gʼaˬ maˬ jawˇ˗a. Aˬmeˬliˇkaˬ miˇ kʼahˬ˗ahˇ˗euˬ mehˇ nmˇ Awˬloˇlaˬ, “Yeˬhawˇbaˬ˗euˬ ehˇ dawˬ naˇ haˬ˗awˇ dehꞈ˗eu taꞈ˗ehˇ muiˬ˗eu dehꞈ ziˇ maˬ paˇ jaˆ meh lehˇ ngaˇ siˬ nya ma” lehˇ ehˇ˗eu meh. Gaˇ kawˆ heu aˬ dui˗ahˇ jiˇ maˇ diˇ pyeuꞈ˗eu meh. Nawˇ tawˇ neh, Yeˬhawˇbaˬ neh gʼoeˇ˗eu gaˬ˗eu laꞈ kʼoeˇ sheuˬ gʼeh˗eu dawˬ˗ahˇ naˇ haˬ˗eu heu naˇ, nawˬ˗ahˇ aˬ joˆ˗ehˇ muiˬ nga lehˇ noeˬ nya?

11. Guiˬ lahˬ shaˇ˗eu heu naˇ, aˬ dui˗ahˇ aˬ joˆ˗ehˇ caw ba˗eu nga?

¹¹ Guiˬ lahˬ shaˇ˗eu heu naˇ, Yeˬhawˇbaˬ˗euˬ ehˇ dawˬ naˇ haˬ˗eu yaw shaˬ kʼawꞈ, naˇ haˬ ni caw ba nehˬ˗eu meh. Tiˬ poˆ na yaw shaˬ kʼawꞈ ni, aˬ dui˗euˬ laꞈ kʼoeˇ˗euˬ maˬ byah kuꞈ˗eu jeˬ˗ahˇ ya deuˆ daˆ leꞈ meh. Ja ceuˬ sahˬ boꞈ boꞈ˗euˬ tiˬ gʼaˬ Miˬyehˇ˗ahˇ “nawˬ˗euˬ ehˇ dawˬ naˇ haˬ nya ni ngaˬ˗ahˇ caw ba nehˬ laꞈ” lehˇ tahˬ shaˇ˗eu meh. (Ja ceuˬ 51:12) Aˬ myah luꞈ huˬ mehˬ mehˬ˗eu gʼaˬ geuꞈ˗eu Deˬniˇ˗suiꞈ “Ngaˬ˗ahˇ Yeˬhawˇbaˬ ehˇ˗euˬ loꞈ˗ehˇ mˇ caw˗eu yaw shaˬ nya lehˇ noeˬ˗eu kawˆ˗ahˇ, tsaˬ˗eu jeˬ˗ehˇ mˇ nya ni gʼaˬ biꞈ nehˬ laꞈ lehˇ guiˬ lahˬ shaˇ˗eu ma” lehˇ ehˇ˗eu meh. Teu loꞈ˗ehˇ shaˇ˗eu jeˬ˗ahˇ Yeˬhawˇbaˬ aˬ myah luꞈ dawˬ kʼoꞈ biꞈ˗eu yaw duˬ baw meh.—Luˇkaꞈ 11:9-13.

Aˬ cawˬ aˬ dui˗euˬ Aˬda˗ahˇ gaˬ ni caw ba nehˬ

12. Eˇpeˇsu 5:1-ahˇ haw ngeh, aˬ dui aˬ jeˬ jahˇ paˬ˗ehˇ gʼeh˗eu nga?

¹² Eˇpeˇsu 5:1-ahˇ gui. Aˬ dui Yeˬhawˇbaˬ˗euˬ “gaˬ dui dui˗eu zaˬ deuˬ” pyeuꞈ ma. Teu miˇ neh, aˬ dui kʼaˇ gʼeh nya gaˇ neh aˬ yawꞈ˗ahˇ dzaw geuꞈ mawꞈ˗eu ma. Aˬ dui aˬ cawˬ˗ahˇ gaˬ˗awˇ, iˬ baˇ pyehˬ˗eu uˬ taꞈ, yaw muiˬ jeˬ mˇ˗awˇ, Yeˬhawˇbaˬ˗ahˇ dzaw geuꞈ˗eu ma. Miˬyehˇ˗ahˇ maˬ siˬ nya˗eu deuˬ, aˬ dui neh mˇ˗euˬ yaw muiˬ jeˬ˗ahˇ mawˇ ngeh, Miˬyehˇ˗ahˇ siˬ nya mawꞈ laˇ nya˗eu meh. (1 Beˬtuˆluˆ 2:12) Ka li zaˬ aˬ da aˬ ma deuˬ zaˬ˗ahˇ mˇ nehˬ ngeh, Yeˬhawˇbaˬ˗ahˇ dzaw geuꞈ paˬ˗ehˇ gʼeh meh. Toˆ˗ehˇ jahˇ˗eu teu naˇ, zaˬ mˬ taˆ Aˬda nehˬ˗ehˇ yawˬ haˇ yawˬ ha gʼoeˇ mawꞈ laˇ nya˗eu meh.

13. Aˬ dui nui kʼaˬ ahˇ laˇ ni aˬ jeˬ ya jahˇ˗eu nga?

¹³ Aˬ da˗ahˇ kʼahˬ sehˇ jehˆ˗awˇ aˬ da gaˇ kawˆ aˬ cawˬ˗ahˇ ya ja nehˬ gaˇ laˬ kʼaˬ cehˇ˗eu zaˬ loꞈ˗ehˇ, aˬ dui jiˇ aˬ dui˗euˬ Aˬda Yeˬhawˇbaˬ˗ahˇ kʼahˬ sehˇ jehˆ˗awˇ, aˬ yawꞈ˗euˬ gaˇ kawˆ aˬ cawˬ˗ahˇ bi siˬ mawꞈ˗eu ma. Aˬ dui kʼawꞈ “Sahˬpaˬ Miˬyehˇ mˇ˗euˬ gaˇ˗ahˇ, ngaˬ˗euˬ saꞈ laˇ kʼahˬ sehˇ jehˆ” ma lehˇ boꞈ˗euˬ Daˬbiˇ loꞈ˗ehˇ noeˬ˗eu ma. (Ja ceuˬ 34:2) Aˬ dui zawˇ˗ehˇ shaꞈ dawˇ˗eu tiˬ gʼaˬ pyeuꞈ naˇ, nui kʼaˬ aˬ joˆ˗ehˇ ahˇ laˇ nya˗eu nga? Aˬ cawˬ Yeˬhawˇbaˬ˗ahˇ siˬ nya laˇ naˇ aˇ naˆ ni muiˬ˗eu nga, Yeˬhawˇbaˬ aˇ naˆ ni laˬ kʼaˬ cehˇ˗eu nga lehˇ shaˇ noeˬ naˇ, nui kʼaˬ ahˇ laˇ˗eu meh. Yeˬhawˇbaˬ aˬ dui˗ahˇ loˬ˗eu nui kʼaˬ biꞈ nehˬ meh. Yeˬhawˇbaˬ dahˬ beh˗euˬ Ka li zaˬ mehˇ nmˇ deuˬ˗ahˇ nui kʼaˬ ahˇ laˇ ni caw ba nehˬ haw˗euˬ loꞈ˗ehˇ, aˬ dui˗ahˇ jiˇ caw ba nehˬ˗eu yaw duˬ baw meh.—1 Teˇsaˬloˇni 2:2.

14. Guiˬ lahˬ dawˬ tsaꞈ gaˬ˗eu heu naˇ, aˬ jeˬ miˇ neh aˇ yeˇ huiˬ˗eu nga?

¹⁴ Yeˬhawˇbaˬ myaˆ pyawˬ huiˬ nyiˇ maˬ tseˇ˗eu uˬ taꞈ, aˬ dui aˬ cawˬ˗ahˇ aˬ gaˇ neh laˇ˗awˇ aˬ jeˬ˗euˬ tsawˇ jeuˬ pyeuꞈ kʼawꞈ, gaˬ gaˇ ya mawˇ ngeh laˬ kʼaˬ cehˇ˗eu meh. (Gʼaˬkʼehˇ 10:34, 35) Aˬ dui aˬ cawˬ˗ahˇ gaˬ˗eu lehˇ bi mawˇ nya˗eu tiˬ jeˬ naˇ, aˬ yawꞈ maꞈ˗ahˇ guiˬ lahˬ dawˬ tsaꞈ gaˬ˗eu heu meh. (Maꞈtehˬ 28:19, 20) Guiˬ lahˬ dawˬ tsaꞈ gaˬ˗eu heu aˬ joˆ˗ehˇ muiˬ˗eu nga? Ha geuꞈ˗eu deuˬ nymˬ˗mˇ neh dehꞈ ziˇ muiˬ daˆ laˇ˗awˇ, mehˬ hu paw kʼawꞈ aˬ myah luꞈ dehꞈ gʼeh˗eu noeˬ tmˬ˗eu jeˬ za˗eu meh.—1 Tiˆmoˇseˬ 4:16.

Aˬda˗ahˇ gaˬ˗eu hawˇ˗eu laˬ kʼaˬ cehˇ˗eu

15-16. Aˬ dui aˬ jeˬ baˬ da neh laˬ kʼaˬ cehˇ nya˗eu nga?

¹⁵ Yeˬhawˇbaˬ zaˬ˗ahˇ gaˬ˗eu Aˬda pyeuꞈ˗eu miˇ neh, aˬ yawꞈ˗euˬ nymˇ jiˇ˗ahˇ laˬ kʼaˬ bi cehˇ mawꞈ˗eu meh. (Iˇsaˬyaˇ 65:14) Aˬ dui shaˬ zahˬ gʼawˬ mya jeˬ˗ahˇ ya tahˬ puˬ kʼawꞈ, gʼawˬ mya jeˬ baˬ da neh nymˬ˗mˇ neh laˬ kʼaˬ cehˇ nya˗eu meh. Yaw jeˬ ma jeˬ, aˬ dui mˬ taˆ Aˬda aˬ dui˗ahˇ gaˬ dui dui meh lehˇ siˬ duˬ˗awˇ, Jaˇliꞈ nehˬ˗ehˇ taꞈ leˇ˗awˇ tsaˬ˗eu zaˬ siˬ nui gahˇ siˬ nya˗eu ma. (Yeˬlaˬmiˇ 15:16) Kʼoeˇ uˬ taꞈ, aˬ dui Yeˬhawˇbaˬ˗ahˇ gaˬ˗awˇ, aˬ yawꞈ˗euˬ yaw tsaˬ yaw dawˇ˗ahˇ gaˬ˗eu uˬ taꞈ, tiˬ gʼaˬ tiˇ gʼaˬ gaˬ˗eu aˬ cawˬ˗ahˇ maˬ duˇ˗eu nymˇ jiˇ laꞈ kʼoeˇ ya jawˇ˗euˬ ma.—Ja ceuˬ 106:4, 5.

¹⁶ Aˬ dui mehˬ hu paw dehꞈ ziˇ heu naˆ maˬ tseˇ muiˬ meh lehˇ siˬ nya˗eu miˇ neh, aˬ myah luꞈ laˬ kʼaˬ cehˇ nya meh. Gʼawˬ myahˇ maˬ gʼeh˗ehˇ Yeˬhawˇbaˬ maˬ muiˬ˗eu yaw haiˬ yaw doeˇ dawˬ tawˆ luꞈ˗ahˇ laˆ byoˆ jiˇ˗awˇ, aˬ yawꞈ˗euˬ Miˇkʼahˬ miˇ tsaˬ˗ahˇ Baˬlaˬdiˇsuˆ dzaˇ˗iˬ tiˬ poˆ paˇ bi pyeuꞈ kʼoꞈ laˇ meh lehˇ aˬ dui siˬ nya˗eu ma. Kʼoeˇ uˬ taꞈ, shiˇ˗euˬ tsawˇ haˬ deuˬ jiˇ paˇ gʼoꞈ dehꞈ laˇ˗awˇ aˬ dui nehˬ˗ehˇ jawˇ laˇ˗eu lehˇ aˬ dui muiˬ dui dui˗eu noeˬ tmˬ˗eu jeˬ jaˆ˗eu ma. (Yoˇhaˬ 5:28, 29) Heu naˇ aˇ naˆ ni laˬ kʼaˬ cehˇ laˇ paˬ˗ehˇ gʼeh˗eu nga! Aˇ yeˇ kʼaˇ huiˬ˗eu jeˬ naˇ, gʼawˬ myahˇ maˬ gʼeh˗ehˇ mˬ hawˇ˗eu miˇ kʼoeˇ taˆ kʼaˇ jawˇ˗eu yawˬ gʼaˬ na luꞈ, aˬ dui˗ahˇ gaˬ˗eu Aˬda Yeˬhawˇbaˬ˗ahˇ aˬ yawꞈ za geuˇ˗eu jeˬ˗ehˇ ja ceuˬ˗awˇ ciˬ huiˬ ciˬ mahˇ˗eu uˬ taꞈ, uˬ duˬ tahˬ meh lehˇ aˬ dui jah ziꞈ˗eu ma.