Gui˗eu deuˬ naˇ haˬ˗eu jeˬ

Uˬduˬtahˬ˗eu 19:16-ahˇ “yawˬ ha˗euˬ cawˬ˗ahˇ sehꞈ˗eu taˬ jawˬ” lehˇ ehˇ taˬ˗euˬ dawˬ heu naˇ aˬ jeˬ˗ahˇ ehˇ mawꞈ˗eu nga? Aˬ dui teu˗ahˇ neh aˬ jeˬ ya siˬ˗eu nga?

Yeˬhawˇbaˬ Iˇsaˬleˬlaˆ deuˬ˗ahˇ muiˬ˗eu shawˇ˗eu tsawˇ haˬ pyeuꞈ˗awˬ lehˇ ehˇ nehˬ˗euˬ meh. Teu miˇ neh Yeˬhawˇbaˬ aˬ yawꞈ maꞈ˗ahˇ “Aˬ cawˬ˗euˬ gaˇ kawˆ ja bu ja bu˗ehˇ taˬ cah. Yawˬ ha˗euˬ cawˬ˗ahˇ sehꞈ˗eu taˬ jawˬ. Ngaˇ˗aˬ, Yeˬhawˇbaˬ ma” lehˇ ehˇ nehˬ˗euˬ meh.—Uˬduˬtahˬ˗eu 19:2, 16, MS.

“Taˬ jawˬ” lehˇ ehˇ˗eu heu dawˬ˗ahˇ Heˬbyehˇ dawˬ naˇ aˬ jeˬ˗ahˇ ehˇ mawꞈ˗eu nga? Uˬduˬtahˬ˗eu sahˬ boꞈ nehˬ˗ehˇ taꞈ leˇ˗awˇ Yuˇdaˆ tsawˇ haˬ˗euˬ paˇ dmˬ tiˬ dmˬ˗ahˇ “Taˬ jawˬ lehˇ ehˇ˗eu dawˬ heu dawˬ˗ahˇ Heˬbyehˇ dawˬ paw neh kʼaˇ boꞈ taˬ˗euˬ loꞈ˗ehˇ ya ehˇ naˇ, ‘gaˇ taˆ taˬ yawꞈ, gaˇ dzeˇ taˬ yawꞈ, dawˬ peh taˬ yawꞈ’ lehˇ ehˇ mawꞈ˗eu meh. Aˬ yawꞈ˗euˬ dawˬ tsuiꞈ maˇ diˇ hmˬ˗ahˇ nmˇ gʼoˆ shaw˗eu yaw shaˬ meh” lehˇ ehˇ taˬ˗euˬ meh.

Nui gahˇ ahˇ˗eu tiˬ gʼaˬ na dawˬ teu dawˬ˗ahˇ “Naw maꞈ yaˇ kʼaˬ daˇ ngeh, yaw sui yaw dawˇ laꞈ kʼoeˇ, yaw tsaˬ yaw dawˇ dawˇ˗ehˇ daˇ˗awˬ. Yaw shaˬ zaˬ paw gʼaˬ baꞈ baꞈ˗eu maˬ ehˇ, smˇ muiˬ smˇ baw˗ahˇ guˆ˗eu maˬ ehˇ, taˬ bi pyeuꞈ” lehˇ ehˇ taˬ˗euˬ dawˬ nehˬ˗ehˇ taꞈ˗eu kʼawꞈ pyeuꞈ nya meh lehˇ ehˇ˗eu meh. (Uˬduˬtahˬ˗eu 19:15) Toˆ˗ehˇ naˇ yaw nyiˇ 16 laꞈ kʼoeˇ ngehˬ taˬ˗euˬ dawˬ heu naˇ, Iˇsaˬleˬlaˆ deuˬ saˇ naˇ˗ahˇ maˬ ehˇ, nymˇ jiˇ laꞈ kʼoeˇ maˬ ehˇ, jeˬ gaꞈ jeˬ ka mˇ gaˇ maˬ ehˇ, aˬ geu gaˇ maˬ kaˬ, maˬ tsaˬ maˬ dawˇ˗eu jeˬ˗ehˇ maˬ mˇ ni yaw sui yaw dawˇ dawˇ˗ehˇ ya mˇ meh lehˇ ehˇ mawꞈ˗eu kʼawꞈ pyeuꞈ nya meh. Yaw nyiˇ 16 laꞈ kʼoeˇ˗euˬ dawˬ heu naˇ, ehˇ mawꞈ˗eu dzaˇ˗i tiˬ jeˬ paˇ jaˆ˗a siˬ.

Yaw nyi ˇ16 dahˬ beh laˇ dzaˬ˗ahˇ Yeˬhawˇbaˬ Iˇsaˬleˬlaˆ deuˬ˗ahˇ aˬ cawˬ gaˇ kawˆ jaˬ myawꞈ myawꞈ˗eu laꞈ kʼoeˇ taˬ ja bu lehˇ ehˇ taˬ˗euˬ meh. Aˬ cawˬ˗ahˇ ja kʼoeˬ˗eu heu naˇ gaˇ kawˆ gʼawˬ mya jeˬ bi doˆ laˇ nya kʼawꞈ ni, aˬ cawˬ˗ahˇ ja bu˗eu heu naˇ ja kʼoeˬ˗eu naˆ maˬ tseˇ doeˇ dzehˬ˗eu meh. (Dawˬdaˬ 10:19; Dawˬtsoˆ 10:12-14; 1 Tiˆmoˇseˬ 5:11-15; Yaˬkoˆ 3:6) Ja bu˗eu deuˬ naˇ, tiˬ gʼaˬ gʼaˬ˗euˬ tsawˇ myahˇ laˆ cawˆ˗eu gʼaˇ duˬ, aˬ yawꞈ maꞈ˗euˬ gaˇ kawˆ˗ahˇ maˬ ngeuˇ gaˇ ja˗eu meh. Kʼoeˇ naˇ ja bu˗eu deuˬ naˇ, aˬ cawˬ˗ahˇ shiˇ kʼawˇ keuˆ le nya meh lehˇ siˬ nya kʼawꞈ, maˬ ngeuˇ gaˇ saˇ kiˇ kamˬ˗eu meh. Naˬboˆ˗euˬ gaˇ kawˆ˗ahˇ shaˇ noeˬ haw sheˇ. Tsawˇ haˬ nyiˬ gʼaˬ aˬ yawꞈ˗euˬ gaˇ kawˆ˗ahˇ maˬ ngeuˇ gaˇ saˇ kiˇ kamˬ˗euˬ baˬ da neh, aˬ yawꞈ kʼaˬ lo neh bi biˬ sehꞈ˗euˬ meh. (1 Sahˬpaˬ 21:8-13) Heu gaˇ haw ngeh, ja bu˗eu jeˬ heu naˇ Uˬduˬtahˬ˗eu 19:16 laꞈ kʼoeˇ ehˇ taˬ˗euˬ loꞈ˗ehˇ aˬ cawˬ˗ahˇ sehꞈ˗eu lehˇ jawˬ˗eu loꞈ˗ehˇ bi pyeuꞈ iˇ nya˗eu meh.

Tiˬ gʼaˬ gʼaˬ˗ahˇ ja bu˗eu heu naˇ, aˬ yawꞈ˗ahˇ bye˗eu miˇ neh kʼawꞈ pyeuꞈ nya meh. 1 Yoˇhaˬ 3:15-ahˇ “Yawˬ ha˗euˬ cawˬ pyeuꞈ˗eu Ka li zaˬ deuˬ˗ahˇ bye˗eu tsawˇ haˬ˗aˬ, aˬ cawˬ˗ahˇ sehꞈ gaˇ duˇ˗eu meh. Aˬ cawˬ˗ahˇ sehꞈ˗eu tsawˇ haˬ˗aˬ, yawˬ ha laꞈ kʼoeˇ mˬ maˬ maˬ byaˆ zaˇ ziˆ dehꞈ˗eu jeˬ˗ahˇ maˬ za nya˗a lehˇ naw maꞈ siˬ nya meh” lehˇ ehˇ˗eu meh. Miˬyehˇ Uˬduˬtahˬ˗eu 19:16-ahˇ ehˇ gʼaˬ ngeh, “Aˬ cawˬ kʼoeˇ taˆ nui ma taˬ laˆ jaˆ” lehˇ jiˇ paˇ ehˇ˗eu meh.—Uˬduˬtahˬ˗eu 19:17.

Uˬduˬtahˬ˗eu 19:16 laꞈ kʼoeˇ ahˇ˗eu dawˬ heu naˇ, Ka li zaˬ deuˬ˗ahˇ saˇ tiˇ biꞈ˗eu jeˬ pyeuꞈ meh. Aˬ dui aˬ cawˬ˗ahˇ yaw doeˇ maˬ ya noeˬ˗eu uˬ taꞈ, maˬ ya ja bu˗a. Aˬ dui tiˬ gʼaˬ gʼaˬ˗ahˇ maˬ ya leˇ˗eu miˇ neh maˬ ehˇ, myaˆ naˆ˗eu miˇ neh maˬ ehˇ, ja bu˗eu heu naˇ aˬ yawꞈ˗ahˇ bye gaˇ duˇ˗eu meh. Ka li zaˬ deuˬ aˬ cawˬ˗ahˇ maˬ ya bye˗a.—Maꞈtehˬ 12:36, 37.