Nawˇ siˬ nya ma loˇ?

Iˬdiˬyoˇbyaˇ tsawˇ haˬ yaw huiˬ yaw mahˇ tiˬ gʼaˬ Piˇliˇpuˆ aˬ yawꞈ jawˇ gaˇ laˇ ngeh aˬ yawꞈ aˬ joˆ˗ehˇ gʼeh˗eu mah laˆ lawˬ dziˬ luꞈ˗eu nga?

Miˇ shuiꞈ dawˬ paˇ jaˇli˗ahˇ “mahˬ laˆ lawˬ” lehˇ ehˇ˗eu dawˬ heu dawˬ˗ahˇ aꞈ yawꞈ yaw oeˇ dawˬ zmˬ˗eu meh. Mahˬ laˆ lawˬ gʼawˬ mya jeˬ˗ahˇ ehˇ mawꞈ˗eu kʼawꞈ pyeuꞈ nya meh. (Gʼaˬkʼehˇ 8:28, 29, 38) Ehˇ kʼawꞈ Iˬdiˬyoˇbyaˇ teu gʼaˬ neh zmˬ˗euˬ mahˬ laˆ lawˬ naˇ, yehˇ deuˬ hawˇ˗eu cehˆ ceh ceh˗eu deuˬ˗euˬ mahˬ laˆ lawˬ naˆ maˬ tseˇ huiˬ gaˇ duˇ˗eu meh. Aˬ jeˬ miˇ neh teu lo˗ehˇ ehˇ nya˗eu nga lehˇ tiˬ kawˆ na˗ahˇ haw ma.

Iˬdiˬyoˇbyaˇ tsawˇ haˬ heu gʼaˬ naˇ yaw huiˬ yaw mahˇ tiˬ gʼaˬ pyeuꞈ˗awˇ, gaˇ mahˇ kaˬ dui dui gaˇ neh laˇ˗euˬ meh. Jaˇliꞈ˗ahˇ aˬ yawꞈ “Iˬdiˬyoˇbyaˇ sahˬ paˬ ma˗euˬ pyuˇ shuiˇ myawˬ gahˬ deuˬ˗ahˇ jeˬ hmˬ bo saˆ˗eu yaw huiˬ yaw mahˇ tiˬ gʼaˬ” pyeuꞈ meh lehˇ ehˇ˗eu meh. (Gʼaˬkʼehˇ 8:27) Gaˇ hu saˇ ka˗euˬ Iˬdiˬyoˇbyaˇ miˇ kʼahˬ˗euˬ pehˇ tsahˇ naˇ, nymˬ˗mˇ iˬ nah˗euˬ Iˇjiˇtuˆ miˇ kʼahˬ˗euˬ laꞈ oˆ paw dzaˬ˗ahˇ neh Suˬdaˬ miˇ kʼahˬ˗ahˇ keuˆ ni meh. Iˬdiˬyoˇbyaˇ tsawˇ haˬ heu gʼaˬ mahˬ laˆ lawˬ tiˬ mawˇ tehꞈ˗ehˇ maˬ ngeuˇ˗eu ya beˬ paˇ˗euˬ kʼawꞈ pyeuꞈ nya meh. Kʼoeˇ naˇ gaˇ mahˇ kaˬ gaˇ neh oe˗euˬ miˇ neh myawˬ gʼawˬ mya ni pi luꞈ˗eu kʼawꞈ pyeuꞈ nya meh. Dahˬ beh˗euˬ Ka li zaˬ saˇ ka˗ahˇ˗euˬ mahˬ laˆ lawˬ tiˬ jeˬ na, aˇ beuˆ oeˬ beuˆ tsoꞈ˗awˇ joe shmˇ taˬ˗euˬ meh. Gʼaˬ kʼehˇ sahˬ boꞈ dawˬ tsuiꞈ puiˇ kʼawˬ˗eu paˇ dmˬ laꞈ kʼoeˇ, (Gaˬ laˬ pyuˇ dawˬ) “Mahˬ laˆ lawˬ teu jeˬ naˇ myawˬ gʼawˬ mya ni tawˬ nya˗eu miˇ neh, gaˇ ma cah˗eu jiˇ yaw sheuˆ miˇ neh gʼawˬ mahˇ ni iˇ kaˬ nya dzehˬ˗eu meh” lehˇ ehˇ˗eu meh.

Iˬdiˬyoˇbyaˇ tsawˇ haˬ teu gʼaˬ Piˇliˇpuˆ ngehˬ cawˬ le ngeh sahˬ boꞈ paˇ yoˆ gui luꞈ. Jaˇliꞈ˗ahˇ ‘Piˇliˇpuˆ cehˆ keuˆ gʼeh ngeh, yaw huiˬ yaw mahˇ kʼoeˇ gʼaˬ Miˬyehˇ gʼaˇ duˬ ngehˬ dah˗eu Iˇsaˬyaˇ neh boꞈ taˬ˗euˬ sahˬ boꞈ˗ahˇ gui luꞈ gaˇ ya gaˬ˗euˬ meh’ lehˇ ehˇ˗eu meh. (Gʼaˬkʼehˇ 8:30) Gaˇ ma doˆ˗iˇ gaˇ zmˬ˗eu mahˬ laˆ lawˬ heu naˇ, aˇ lawˆ lawˆ˗ehˇ maˬ ngeuˇ naˇ maˬ iˇ nya˗a. Teu miˇ neh Iˬdiˬyoˇbyaˇ tsawˇ haˬ heu gʼaˬ sahˬ boꞈ gui nya˗awˇ Piˇliˇpuˆ jiˇ kuiˇ zoˬ teh miˇ˗iˇ nya˗euˬ meh.

Iˬdiˬyoˇbyaˇ tsawˇ haˬ heu gʼaˬ “Piˇliˇpuˆ˗ahˇ mahˬ laˆ lawˬ kʼoeˇ taˆ kuˇ daˆ˗awˇ, aˬ yawꞈ nehˬ˗ehˇ bi dziˬ˗euˬ meh.” (Gʼaˬkʼehˇ 8:31) Aˬ myah myah naˇ cehˆ ceh ceh gaˇ zmˬ˗eu mahˬ laˆ lawˬ naˇ, mahˬ teh˗eu gʼaˬ gawˬ yawꞈ yawꞈ˗awˇ ya dziˬ˗eu meh. Ehˇ kʼawꞈ heu naˇ gaˇ ma doˆ˗iˇ gaˇ zmˬ˗eu mahˬ laˆ lawˬ pyeuꞈ˗eu miˇ neh, nyiˬ gʼaˬ luꞈ nuiˇ˗eu jawˇ duˬ jaˆ˗eu meh.

Teu miˇ neh gʼaˬ kʼehˇ yaw huiˬ 8 hawˇ˗eu gaˇ hu˗euˬ gaˇ kawˆ nehˬ˗ehˇ taꞈ leˇ˗awˇ nymˬ˗mˇ iˬ nah˗euˬ saˇ kiˇ˗ahˇ haw˗awˇ neh, aˬ dui˗euˬ aˇ maꞈ aˇ muˇ˗euˬ paˇ dmˬ laꞈ kʼoeˇ Iˬdiˬyoˇbyaˇ tsawˇ haˬ teu gʼaˬ neh dziˬ˗euˬ mahˬ laˆ lawˬ˗ahˇ ngehˬ keuˆ ngeh, guiˇ deuˆ gaˇ hawˇ˗eu cehˆ ceh ceh gaˇ zmˬ˗eu mahˬ laˆ lawˬ naˆ maˬ tseˇ huiˬ˗eu mahˬ laˆ lawˬ zmˬ taˬ˗euˬ meh.