1925​—Dzeuˇ laꞈ˗euˬ tiˬ yaˇ kʼoꞈ˗ahˇ

Noeˬ tmˬ taˬ˗euˬ jeˬ aˇ yamˬ ga leˇ ngeh

Jaˇliꞈ dzaw zaˬ deuˬ myaˬ tiˬ paˆ 1925 kʼoꞈ˗ahˇ miˇ tsaˬ heu siˬ Baˬlaˬdiˇsuˆ pyeuꞈ laˇ meh lehˇ noeˬ tmˬ˗euˬ meh. Aˬ jeˬ miˇ neh nga? Aˇ nah naˇ, uˇ lahˇ˗eu aˇ muˇ tiˬ gʼaˬ pyeuꞈ laˇ˗euˬ mehˇ nmˇ Ehˇbeuˬ Sa˗loˇdeuˬ heu loꞈ˗ehˇ ehˇ˗eu meh. “Dzeˇ luꞈ˗eu tseˇ doˆ taˬ˗euˬ deuˬ Miˬyehˇ Miˇ kʼahˬ˗ahˇ jeˬ biˇ yuˇ˗eu gʼaˇ duˬ mˬ kʼoeˇ taˆ ya le˗awˇ, kʼoeˇ naˇ Aˬbyaˬhaˬ hawˇ˗eu Daˬbiˇ maꞈ loꞈ˗ehˇ saˇ jaˇ ziꞈ˗eu deuˬ jiˇ ya gʼoꞈ dehꞈ laˇ˗awˇ, aˬ yuiꞈ aˬ tsu geuꞈ˗awˇ ya sheuˬ gʼeh meh lehˇ jah yaꞈ˗euˬ ma.” Ehˇ kʼawꞈ noeˬ taˬ˗euˬ loꞈ˗ehˇ maˬ pyeuꞈ laˇ ngeh mehˇ nmˇ tiˬ gʼaˬ na nui ma gʼaˬ baˬ iˇ˗euˬ meh.—Dawˬdaˬ 13:12.

Nui ma gʼaˬ baˬ iˇ˗euˬ kʼawꞈ Jaˇliꞈ dzaw zaˬ deuˬ myaˬ tiˬ paˆ tsaꞈ gaˬ˗eu gaˇ˗ahˇ leh jeh daˆ leꞈ˗euˬ meh. Kʼoeˇ naˇ aˬ yawꞈ maꞈ ya mˇ˗eu aˇ yeˇ huiˬ˗eu gaˇ naˇ, Yeˬhawˇbaˬ˗euˬ gaˇ kawˆ tsaꞈ gaˬ˗eu heu pyeuꞈ ngaˇ lehˇ gʼoˆ shaw laˇ˗euˬ meh. Aˬ yawꞈ maꞈ yaw tsaˬ yaw dawˇ heu aˬ joˆ˗ehˇ pyehˬ kʼawˬ˗euˬ nga lehˇ haw ma.

Leˬdiˬ˗oˬ pyehˬ kʼawˬ˗eu jawˇ duˬ tsoˆ lahˬ

Dzeuˇ yaꞈ kʼoꞈ˗ahˇ Jaˇliꞈ dzaw zaˬ deuˬ Daˬbaˬ˗yuˬ Biˬ Biˬ Aˬ (WBBR) Leˬdiˬ˗oˬ pyehˬ kʼawˬ duˬ tsoˆ gʼaˬ˗euˬ miˇ neh, aˬ yawꞈ maꞈ Iˬliˬnawˇ˗iˬ gahˬ kaˬ, Shiˬkaˬgoˬ dawˬ peh Leˬdiˬ˗oˬ dzaˇ˗iˬ tiˬ hmˬ tsoˆ˗euˬ meh. Leˬdiˬ˗oˬ pyehˬ kʼawˬ˗eu yaw shuiꞈ teu tsahˇ˗ahˇ Gʼoˆ (WORD) lehˇ tsawˇ myahˇ myahˇ nehˬ˗euˬ meh. Leˬdiˬ˗oˬ tsoˆ caw nehˬ˗euˬ Laˇ˗puiˬ Lehˇpeuˬ˗leuˬ “Tsahˬ gaˆ yamˬ˗ahˇ uˬ ciꞈ paw gaˇ mahˇ kaˬ gaˇ jawˇ˗eu tsawˇ haˬ deuˬ kʼawꞈ, Leˬdiˬ˗oˬ pyehˬ kʼawˬ duˬ heu˗ahˇ neh, Miˬyehˇ˗euˬ dawˬ kawˬ ya gaˬ˗euˬ meh” lehˇ ehˇ˗eu meh. Yaw jeˬ ma jeˬ, smˬ heˇ laˇ (5,000 kiˬloˬmiˬteuˬ) dzehˬ gaˇ jaˆ˗eu Aˬlaˇsaꞈ˗kaꞈ gahˬ kaˬ, Paiˇlawꞈ meuˬ˗ahˇ˗euˬ nymˇ jiˇ tiˬ jiˇ Leˬdiˬ˗oˬ pyehˬ kʼawˬ duˬ heu˗ahˇ neh ya gaˬ beh beh˗euˬ meh. Aˬ yawꞈ pehˬ Leˬdiˬ˗oˬ teu˗ahˇ naˇ haˬ gʼaˬ ngeh, Miˬyehˇ˗euˬ gaˇ kawˆ hawˇ˗eu Jaˇliꞈ˗euˬ gaˇ kawˆ ya siˬ nya dzehˬ laˇ˗euˬ miˇ neh, Leˬdiˬ˗oˬ pyehˬ kʼawˬ duˬ˗ahˇ mˇ˗eu deuˬ˗ahˇ guiˬ lahˬ huiˬ˗eu sahˬ boꞈ boꞈ laꞈ˗euˬ meh.

Gʼoˆ lehˇ kuˇ˗eu Leˬdiˬ˗oˬ teˇ saˇ pyehˬ kʼawˬ duˬ aˬ jeˬ miˇ neh gaˇ mahˇ kaˬ gaˇ keuˆ ni pyehˬ kʼawˬ nya˗eu gaˇ kawˆ 1925 kʼoꞈ, Tseˇ nyiꞈ siˬ ba la 1 nah˗ahˇ˗euˬ Loꞈ˗eu nymˇgoˇ laꞈ kʼoeˇ dzawˇ nehˬ taˬ˗euˬ meh. Teu laꞈ kʼoeˇ “Gʼoˆ lehˇ kuˇ˗eu Leˬdiˬ˗oˬ teˇ saˇ pyehˬ kʼawˬ duˬ heu hmˬ naˇ, Aˬmeˬliˇkaˬ˗euˬ miˇ kʼahˬ˗ahˇ neh gʼaˬ kʼaˆ dui dui˗eu Leˬdiˬ˗oˬ teˇ saˇ pyehˬ kʼawˬ duˬ tiˬ hmˬ pyeuꞈ˗eu miˇ neh meh. Aˬmeˬliˇkaˬ nahˇ ma doˆ kʼehˬ paw jawˇ˗eu deuˬ maˬ ehˇ, ga kʼehˬ paw jawˇ˗eu deuˬ maˬ ehˇ, Ki˗uˇbaˬ hawˇ˗eu Aˬlaˇsaꞈ˗kaꞈ gahˬ kaˬ kʼoeˇ dzaˬ˗ahˇ keuˆ ni ya gaˬ˗euˬ meh. Yaw tsaˬ yaw dawˇ tiˬ jawˇ˗iˬ maˬ gaˬ haw˗euˬ deuˬ kʼawꞈ Leˬdiˬ˗oˬ teˇ saˇ heu˗euˬ baˬ da neh nui ma ahˇ laˇ˗euˬ meh.”

Teu kaˬ˗ahˇ Jaˇliꞈ dzaw zaˬ deuˬ Kehˇnaˬdaˬ miˇ kʼahˬ˗ahˇ Leˬdiˬ˗oˬ pyehˬ kʼawˬ duˬ heu˗ahˇ neh, laˬ kʼaˬ cehˇ˗eu guiˬ lahˬ dawˬ tsaꞈ gaˬ˗eu leh jeh˗eu meh. 1924 kʼoꞈ˗ahˇ, Sehˬsaˬ˗kaˇciˬgʼawˬ gahˬ kaˬ, Saˇsaꞈ˗keh tu meuˬ˗ahˇ Siˬ Eˇ˗cuiˬ Yuˬ Siˬ (CHUC) Leˬdiˬ˗oˬ pyehˬ kʼawˬ˗eu saˇ naˇ tsoˆ˗euˬ meh. Teu naˇ, Kehˇnaˬdaˬ˗euˬ miˇ kʼahˬ˗ahˇ neh uˬ duˬ tahˬ˗eu zahˇ nehˬ˗ehˇ taꞈ leˇ˗awˇ pyehˬ kʼawˬ˗eu dahˬ beh˗euˬ saˇ naˇ deuˬ laꞈ kʼoeˇ neh tiˬ hmˬ pyeuꞈ meh. 1925 kʼoꞈ keuˆ laˇ ngeh, teu naˆ maˬ tseˇ huiˬ˗eu jawˇ duˬ˗ahˇ pawˇ iˇ˗eu loˬ laˇ˗euˬ meh. Teu miˇ neh, Saˇsaꞈ˗keh tu meuˬ˗ahˇ jaˆ˗eu aˇ baˇ byaˬ duˬ tiˬ tsahˇ zeuˇ˗awˇ laˆ saˆ geuꞈ˗euˬ meh.

Sehˬsaˬ˗kaˇciˬgʼawˬ gahˬ kaˬ˗ahˇ kʼoeˇ gaˇ tiˬ deuˬ, heu gaˇ tiˬ deuˬ lehˇ jawˇ luꞈ˗eu tsawˇ haˬ gʼawˬ mya ni Leˬdiˬ˗oˬ teˇ saˇ pyehˬ kʼawˬ˗eu jeˬ heu baˬ da neh, laˬ kʼaˬ cehˇ˗eu guiˬ lahˬ dawˬ˗ahˇ ya gaˬ dahˬ beh˗euˬ meh. Yaw jeˬ ma jeˬ, meuˬ gaˇ mahˇ kaˬ gaˇ jawˇ˗eu Gaˬlehˬ˗mˬ lehˇ kuˇ˗eu zaˬ miˬ aˬ buˇ tiˬ gʼaˬ, Leˬdiˬ˗oˬ pyehˬ kʼawˬ˗eu teˇ saˇ heu˗ahˇ ya gaˬ ngeh, sahˬ boꞈ boꞈ laꞈ˗awˇ Jaˇliꞈ sahˬ boꞈ deuˬ shaˇ˗euˬ meh. “Aˇ dzehˬ˗ehˇ shaˇ shaˇ teuˆ˗eu miˇ neh, Jaˇliꞈ dzaw˗eu paˇ dmˬ (Gaˬ laˬ pyuˇ dawˬ) lehˇ ehˇ˗eu jaˆ tawꞈ˗eu sahˬ boꞈ deuˬ sha nehˬ˗euˬ ma” lehˇ mehˇ nmˇ Jo˗cuiˬ Nehˬ˗cuiˬ ehˇ˗eu meh. Gaˬlehˬ˗mˬ tiˬ kʼahˬ naˇ, gaˇ mahˇ kaˬ gaˇ laˬ kʼaˬ cehˇ˗eu guiˬ lahˬ dawˬ tsaꞈ gaˬ nya dzehˬ laˇ˗euˬ meh.

Gʼoˆ shaw paˇ˗euˬ jeˬ

1925 kʼoꞈ, Smˇ siˬ ba la 1 nah˗ahˇ˗euˬ Loꞈ˗eu nymˇgoˇ˗ahˇ “Tsawˇ jeuˬ tiˬ jeuˬ baw” lehˇ uˬ dzah taˬ taˬ˗euˬ sahˬ boꞈ tiˬ kawˆ ahˇ˗eu meh. Sahˬ boꞈ teu kawˆ naˇ aˬ jeˬ miˇ neh teu naˆ naˆ˗ehˇ aˇ yeˇ huiˬ˗eu jeˬ pyeuꞈ nga? Jaˇliꞈ dzaw zaˬ deuˬ Saˬdaˬ aˇ maꞈ aˇ muˇ baw˗awˇ, mˬ taˆ jawˇ˗eu tsawˇ haˬ˗euˬ myaˆ neh maˬ mawˇ nya˗eu maˬ muiˬ˗eu mˬ taˆ gʼaˬ kʼehˇ deuˬ˗ahˇ maˬ ehˇ, miˇ tsaˬ kʼoeˇ taˆ zahˇ kʼawꞈ deuˬ hawˇ˗eu jeˬ gaꞈ jeˬ ka mˇ˗eu deuˬ˗ahˇ maˬ ehˇ, uˇ lahˇ˗eu aˬ yuiꞈ deuˬ˗ahˇ maˬ ehˇ, nyehꞈ tehˬ taˬ˗euˬ meh lehˇ siˬ nya˗eu meh. Yeˬhawˇbaˬ jawˇ paw jiˇ aˇ maꞈ aˇ muˇ baw meh. Ehˇ kʼawꞈ Yeˬhawˇbaˬ˗euˬ aˇ maꞈ aˇ muˇ naˇ, Saˬdaˬ˗euˬ aˇ maꞈ aˇ muˇ nehˬ˗ehˇ beu gaˇ dui dui meh lehˇ Jaˇliꞈ dzaw zaˬ deuˬ bi siˬ nya˗eu gʼaˇ duˬ, sahˬ boꞈ teu kawˆ˗ahˇ neh “saˇ jaˇ ziꞈ˗awˇ noeˬ dahˇ doe˗eu zaˬ kʼaˆ” dzawˇ nehˬ taˬ˗euˬ meh. (Maꞈtehˬ 24:45) Kʼoeˇ uˬ taꞈ, saˇ jaˇ ziꞈ˗awˇ noeˬ dahˇ doe˗eu zaˬ kʼaˆ, Miˬyehˇ Miˇkʼahˬ 1914 kʼoꞈ˗ahˇ uˆ lahˇ dahˬ beh˗awˇ, “mˬ kʼoeˇ taˆ guiˇ” pyeuꞈ˗awˇ, Saˬdaˬ hawˇ˗eu maˬ muiˬ˗eu mˬ taˆ gʼaˬ kʼehˇ deuˬ˗ahˇ miˇ tsa biˬ ka leꞈ˗euˬ meh lehˇ dzawˇ nehˬ taˬ˗euˬ meh.—Pah mehˬ˗eu 12:7-9.

Tiˬ deuˬ na gʼoˆ shaw paˇ˗euˬ yaw shuiꞈ jeˬ heu˗ahˇ laꞈ maˬ daˬ coeˇ˗a. Teu miˇ neh sahˬ boꞈ heu laꞈ kʼoeˇ “Gʼoˆ shaw paˇ˗euˬ jeˬ heu˗ahˇ maˬ ha geuꞈ coeˇ˗eu Loꞈ˗eu nymˇgoˇ sahˬ boꞈ gui˗eu deuˬ Yeˬhawˇbaˬ˗ahˇ nui ma gʼawˬ mahˇ ni taˬ˗awˇ nui jah taˬ˗awˇ dawˬ˗eu laꞈ kʼoeˇ Miˬyehˇ˗euˬ gaˇ˗ahˇ saˇ jaˇ ziꞈ˗eu laꞈ kʼoeˇ mˇ daˆ leꞈ” lehˇ nui noeˬ nui duˇ biꞈ taˬ˗euˬ meh.

Biˇteˬ miˇ kʼahˬ˗ahˇ˗euˬ kawˇpawˇteuˬ (nymˬ˗mˇ iˬ nah huˬ mehˬ mehˬ˗eu gʼaˬ) Taw Ehˬ lehˇ kuˇ˗eu mehˇ nmˇ tiˬ gʼaˬ, “Pah mehˬ˗eu yaw huiˬ 12 nehˬ˗ehˇ taꞈ leˇ˗awˇ dzawˇ mehˬ nehˬ taˬ˗euˬ jeˬ˗ahˇ mehˇ nmˇ deuˬ ya gaˬ ngeh, nui ma cehˇ tahˬ tahˬ dui dui˗eu meh. Aˬ yawꞈ maꞈ mˬ kʼoeˇ taˆ Miˬyehˇ Miˇkʼahˬ beh shaw˗euˬ lehˇ ya siˬ ngeh, aˬ cawˬ deuˬ˗ahˇ laˬ kʼaˬ cehˇ˗eu guiˬ lahˬ dawˬ tsaꞈ gaˬ mawꞈ dui dui laˇ taˬ˗euˬ meh. Gʼoˆ shaw paˇ˗euˬ jeˬ yaw shuiꞈ heu naˇ, tsaꞈ gaˬ˗eu gaˇ˗ahˇ yaw beh naˆ maˬ tseˇ leh jeh dzehˬ laˇ ni, mehˬ hu paw Yeˬhawˇbaˬ aˬ joˆ˗ehˇ gʼeh˗eu zahˬ leˇ paˬ˗ehˇ gʼeh˗eu jeˬ mˇ˗eu lehˇ gʼeh nga lehˇ siˬ nya ni caw ba nehˬ˗eu meh” lehˇ ehˇ˗eu meh.

Yeˬhawˇbaˬ˗euˬ gaˇ kawˆ saˇ kiˇ kamˬ

Nymˬ˗mˇ iˬ nah Yeˬhawˇbaˬ˗euˬ Saˇ kiˇ deuˬ Iˇsaˬyaˇ 43:10-ahˇ Yeˬhawˇbaˬ neh, ‘Naw maꞈ˗aˬ, ngaˬ˗euˬ saˇ kiˇ ma. Ngaˬ˗euˬ zaˬ kʼaˆ bi geuꞈ˗eu lehˇ, naw maꞈ˗ahˇ ngaˇ tseˇ doˆ˗euˬ ma’ lehˇ ehˇ˗eu dawˬ˗ahˇ siˬ nya taˬ˗euˬ meh. Ehˇ kʼawꞈ 1925 kʼoꞈ˗euˬ jeˬ hu, aˬ dui˗euˬ aˇ maꞈ aˇ muˇ˗euˬ paˇ dmˬ laꞈ kʼoeˇ Jaˇliꞈ aˇ deuˆ heu deuˬ˗ahˇ zmˬ taˬ˗euˬ yaw kʼaˆ˗ehˇ maˬ jaˆ˗a. Ehˇ kʼawꞈ 1925 kʼoꞈ keuˆ laˇ ngeh, Iˇsaˬyaˇ 43:10, 12-ahˇ Loꞈ˗eu nymˇgoˇ paˇ dmˬ 11 dmˬ byah ni ngehˬ keuˆ taˬ˗euˬ meh.

1925 kʼoꞈ, Yehꞈ siˬ ba la jiˇ taw paw Jaˇliꞈ dzaw zaˬ deuˬ Eˇdiˬ˗yaˇnaˬ gahˬ kaˬ, Eˇdiˬ˗yaˇnaˬpoˬliˬ˗suiꞈ meuˬ˗ahˇ huiˬ˗eu mehˬ bawˬ jahˇ˗euˬ meh. Mehˬ bawˬ˗euˬ gʼaˇ duˬ aˇ yamˬ biˇ taˬ˗euˬ aˇ taꞈ˗ahˇ mehˇ nmˇ Joˇsehꞈ Laˇdeuˇpawˬ “Aˬ dui huiˬ˗eu mehˬ bawˬ heu˗ahˇ oe˗euˬ heu naˇ . . . Miˬyehˇ jawˇ gaˇ neh gʼaˬ za˗eu gʼaˇ duˬ hawˇ˗eu yawˬ ha˗euˬ jawˇ kʼahˬ˗ahˇ gʼoꞈ˗iˇ ngeh, Yeˬhawˇbaˬ˗euˬ gaˇ kawˆ leh jeh˗awˇ gʼaˬ tiˬ byah ni saˇ kiˇ kamˬ˗eu gʼaˇ duˬ ma” lehˇ boꞈ taˬ˗euˬ meh. Huiˬ˗eu mehˬ bawˬ yehꞈ nah luꞈ˗ahˇ daˆ laˇ˗euˬ deuˬ˗ahˇ Yeˬhawˇbaˬ˗euˬ gaˇ kawˆ kʼaˇ gʼeh nya gaˇ neh tsaꞈ gaˬ lehˇ gʼaˬ biꞈ taˬ˗euˬ meh.

Yehꞈ siˬ ba la 29 nah, jawˇ nah dzeuˇ koꞈ nah˗ahˇ mehˇ nmˇ Laˇdeuˇpawˬ tsaꞈ gaˬ˗eu gaˇ heu naˇ, aˇ yeˇ huiˬ dui dui˗eu lehˇ kʼaˆ kʼaˆ ni ngehˬ keuˆ taˬ˗euˬ gaˇ kawˆ tiˬ kawˆ mehˬ˗euˬ meh. Aˬ yawꞈ heu loꞈ˗ehˇ ehˇ˗eu meh. “Yeˬhawˇbaˬ ehˇ˗eu ‘kʼoeˇ loꞈ˗ehˇ mˇ taˬ˗euˬ boeˇ miˬ siˬ kʼaˬ˗euˬ miˬ yehˇ maˬ jawˇ˗a. Naw maꞈ ngaˬ˗euˬ saˇ kiˇ pyeuꞈ luꞈ˗eu meh.’ Teu jiˇ naˇ mehˇ nmˇ Laˇdeuˇpawˬ, naˇ haˬ luꞈ˗eu deuˬ˗ahˇ teˇ saˇ yaw maˇ maˇ yaw tsehˆ tsehˆ lehˇ ‘Naw maꞈ tsawˇ haˬ deuˬ gʼoꞈ laˇ˗eu gʼaˇ duˬ, meuˬ laꞈ nyiˇ doˆ˗iˇ˗awˇ gaˇ ma shaˇ dahˇ nehˬ˗awˬ. Gaˇ jawˬ jawˬ ma shaˇ dahˇ nehˬ˗awˇ, kʼaˬ lo maˬ bi tsoeˬ ni ngawˬ dzeh jiˇ˗awˇ, miˇ kʼahˬ tsawˇ jeuˬ deuˬ siˬ nya ni byaꞈ byaꞈ taˬ˗awˬ’ lehˇ ehˇ nehˬ˗euˬ meh.”—Iˇsaˬyaˇ 43:12; 62:10.

Mehˇ nmˇ Laˇdeuˇpawˬ dawˬ mehˬ mehˬ gʼaˬ ngeh, aˬ yawꞈ “Noeˬ tmˬ jeˬ˗euˬ gaˇ kawˆ” lehˇ ehˇ˗eu aˇ taꞈ gui˗euˬ meh. Aˇ taꞈ teu gui gaˇ ya gaˬ˗euˬ yawˬ gʼaˬ na luꞈ Miˬyehˇ Miˇkʼahˬ tehꞈ˗ehˇ aˬ dui˗ahˇ “nui saˇ oꞈ˗eu, dehꞈ dzaˬ˗eu, yaw muiˬ jawˇ saˇ doˆ˗eu, muiˬ˗eu dehꞈ ziˇ za˗eu, buˬ˗iˇ law˗iˇ˗eu, aˬ myah luꞈ laˬ kʼaˬ cehˇ˗eu, heu deuˬ za ni mˇ nehˬ nya meh” lehˇ ehˇ gaˇ nui ma tsaˬ˗eu meh. Aˇ nah naˇ, aˇ taꞈ teu˗ahˇ gʼawˬ mya jeˬ˗euˬ tsawˇ jeuˬ dawˬ neh yuˇ paˇ taˬ˗awˇ, sahˬ boꞈ aˇ taꞈ lehˇ yaˬ doˆ laꞈ˗euˬ meh. Sahˬ boꞈ aˇ taꞈ teu˗ahˇ 40 lam ehˇ gʼaˬ ni biˇ kʼawˬ˗euˬ meh.

Teu gaˇ neh gʼawˬ mya kʼoꞈ Jaˇliꞈ dzaw zaˬ deuˬ Yeˬhawˇbaˬ˗euˬ Saˇ kiˇ lehˇ maˬ zmˬ laˇ˗euˬ siˬ kʼawꞈ, aˬ yawꞈ maꞈ Yeˬhawˇbaˬ˗euˬ gaˇ kawˆ tsaꞈ gaˬ˗eu heu naˇ, aˇ yeˇ huiˬ˗eu gaˇ pyeuꞈ˗eu lehˇ gʼoˆ shaw dzehˬ laˇ˗euˬ meh.

Nui ma ahˇ˗eu deuˬ jawˇ gaˇ gʼa kʼoꞈ˗iˇ

Miˇ kʼahˬ doe ni Jaˇliꞈ dzaw zaˬ deuˬ myaˬ laˇ luꞈ˗eu loꞈ˗ehˇ, sahˬ boꞈ biˇ kʼawˬ˗eu tehꞈ˗ehˇ maˬ ngeuˇ˗eu laˬ kʼaˬ cehˇ˗eu guiˬ lahˬ dawˬ˗ahˇ nui ma ahˇ˗eu deuˬ˗ahˇ gʼa kʼoꞈ˗iˇ lehˇ aˇ maꞈ aˇ muˇ gʼaˬ biꞈ˗eu meh. “Noeˬ tmˬ jeˬ˗euˬ gaˇ kawˆ lehˇ kuˇ˗eu sahˬ boꞈ aˇ taꞈ biꞈ˗euˬ nymˇ˗ahˇ gʼa kʼoꞈ˗iˇ” lehˇ sahˬ boꞈ aˇ taꞈ biˇ kʼawˬ˗eu aˇ yamˬ jiˇ ngeh, Dawˬ gaˬ kʼawˬ˗eu sahˬ boꞈ aˇ taꞈa laꞈ kʼoeˇ nui noeˬ nui duˇ biꞈ taˬ˗euˬ meh.

1925 kʼoꞈ, Tiˬ siˬ ba la˗euˬ Dawˬ gaˬ kʼawˬ˗eu sahˬ boꞈ aˇ taꞈ˗ahˇ Teˇsaˬ˗suiꞈ gahˬ kaˬ, Paˇ˗leˇnoˬ meuˬ˗ahˇ jawˇ˗eu Jaˇliꞈ dzaw zaˬ tiˬ gʼaˬ neh biꞈ laꞈ˗euˬ sahˬ boꞈ pah mehˬ taˬ˗euˬ meh. Teu laꞈ kʼoeˇ “Nga maꞈ˗ahˇ tsaꞈ gaˬ duˬ yaw shuiꞈ˗ahˇ tsaꞈ gaˬ iˇ˗eu naˆ maˬ tseˇ, tsaꞈ gaˬ duˬ yaw oeˇ˗ahˇ gʼawˬ mya poˆ gʼa kʼoꞈ˗iˇ˗eu heu naˇ, muiˬ dzehˬ gaˇ ya mawˇ˗eu miˇ neh zahˬ leˇ˗eu lehˇ miˇ˗a. Nga maꞈ˗euˬ tsaꞈ gaˬ duˬ˗ahˇ˗euˬ meuˬ meuˬ zaˬ tiˬ meuˬ˗ahˇ dzeuˇ laꞈ˗euˬ aˇ yamˬ 10 kʼoꞈ heu laꞈ kʼoeˇ, teu gaˇ ngaˬ poˆ tsaꞈ gaˬ iˇ˗euˬ ma. . . . Ehˇ kʼawꞈ aˇ nah naˇ, mehˇ nmˇ Heˇdeˬleꞈ˗suiꞈ hawˇ˗eu ngaˬ ma teu gaˇ dzaˇ˗iˬ tiˬ poˆ paˇ tsaꞈ gaˬ˗iˇ ngeh, nga maꞈ tsaꞈ gaˬ˗iˇ ngeh naˆ maˬ tseˇ tsawˇ haˬ deuˬ paˇ dmˬ yuˇ gaˇ ya mawˇ˗euˬ ma” lehˇ boꞈ taˬ˗euˬ meh.

Kʼoeˇ naˇ, Paˬnaˬmaˬ miˇ kʼahˬ˗ahˇ˗euˬ kawˇpawˇteuˬ tiˬ gʼaˬ jiˇ heu loꞈ˗ehˇ boꞈ laꞈ˗euˬ meh. “Dahˬ beh poˆ tsaꞈ gaˬ˗iˇ ngeh iˇ kahˇ˗ahˇ neh teh doˆ laˇ˗eu gʼawˬ mya gʼaˬ, nyiˬ poˆ smˬ poˆ paˇ gʼa kʼoꞈ˗iˇ ngeh, aˬ yawꞈ maꞈ˗euˬ nui noeˬ paˇ laˇ˗euˬ meh. Tsuiꞈ nui kʼoꞈ ngaˇ myaˬ tiˬ paˆ yaw beh tsaꞈ gaˬ˗euˬ deuˬ˗ahˇ gʼa kʼoꞈ iˇ˗euˬ ma. Kʼoeˇ naˇ, laˬ kʼaˬ cehˇ laˇ paˬ˗ehˇ gʼeh˗eu puˬ haw mawˇ haw laꞈ˗eu jeˬ gʼawˬ mya ni za˗euˬ ma.”

Mehˬ hu paw haw gʼeh

1925 kʼoꞈ jiˇ leˇ dzaˬ˗ahˇ mehˇ nmˇ Laˇdeuˇpawˬ huˬ mehˬ mehˬ˗eu mehˇ nmˇ yawˬ gʼaˬ na luꞈ˗ahˇ tsuiꞈ nui kʼoꞈ Miˬyehˇ˗euˬ gaˇ mˇ˗eu gaˇ kawˆ nehˬ˗ehˇ taꞈ leˇ˗awˇ sahˬ boꞈ boꞈ nehˬ˗euˬ meh. Kʼoeˇ naˇ teu laꞈ kʼoeˇ naꞈ yaꞈ kʼoꞈ ya mˇ˗eu gaˇ deuˬ˗ahˇ jiˇ ngehˬ keuˆ taˬ˗euˬ meh. Mehˇ nmˇ Laˇdeuˇpawˬ “Dzeuˇ laꞈ˗euˬ heu kʼoꞈ˗ahˇ naw maꞈ nui ma nyiˇ nui ma cawˆ˗eu deuˬ˗ahˇ gʼaˬ biꞈ˗eu muiˬ dui dui˗eu aˬ kawˬ˗aˬ za˗euˬ meh. Teu miˇ neh laˬ kʼaˬ ya cehˇ dui dui˗euˬ meh. . . . Naꞈ yaꞈ kʼoꞈ˗ahˇ naw maꞈ Miˬyehˇ gaˇ kawˆ hawˇ˗eu Miˬyehˇ Miˇkʼahˬ gaˇ kawˆ ya tsaꞈ gaˬ˗eu uˬ taꞈ, Miˬyehˇ˗euˬ tsawˇ haˬ deuˬ naˇ aˬ joˆ˗ehˇ gʼeh˗eu tsawˇ haˬ deuˬ pyeuꞈ˗eu lehˇ bi mawˇ˗eu aˬ kawˬ˗aˬ jiˇ gʼawˬ mya ni jaˆ˗eu meh. . . . Aˬ dui yawˬ gʼaˬ na luꞈ aˬ dui˗euˬ Miˬyehˇ hawˇ˗eu aˬ dui˗euˬ Sahˬpaˬ˗ahˇ aˬ dui˗euˬ teˇ saˇ neh ja ceuˬ daˆ leꞈ kaˇ˗euˇ” lehˇ boꞈ taˬ˗euˬ meh.

1925 kʼoꞈ jiˇ leˇ dzaˬ˗ahˇ mehˇ mnˇ deuˬ Buˇkiˬ˗liˬ Beˬdeˬlaˇ tsoˆ huiˬ˗eu lehˇ lehˬ hmˬ˗eu meh. Teu miˇ neh 1926 kʼoꞈ˗ahˇ aˇ maꞈ aˇ muˇ huiˬ dui dui˗eu tsoˆ˗eu jeˬ dahˬ beh laˇ˗euˬ meh. Teu ngeh aˇ maꞈ aˇ muˇ teu naˆ naˆ˗ehˇ huiˬ˗eu jeˬ tiˬ jawˇ˗iˬ maˬ tsoˆ haw˗aˬ siˬ.