Jaˇliꞈ dzaw˗eu heu naˇ, gaˇ dahˇ tsoeˬ dui dui˗eu meh. Ehˇ kʼawꞈ aˬ myah luꞈ yaw awˬ maˬ ngeuˇ˗a. Tiˬ poˆ na ‘Ngaˇ Jaˇliꞈ dzaw daˆ leꞈ nya˗eu maˬ siˬ ngaˇ’ lehˇ kʼawꞈ noeˬ laˇ nya˗eu meh. Toˆ˗ehˇ dzaw daˆ leꞈ nya ni leh jeh˗eu heu naˇ, aˬ jeˬ miˇ neh leh jeh poeˬ kʼoꞈ˗eu nga? Shaˬ˗eu jeˬ, laˆ tsoeˬ laˇ˗eu jeˬ˗ahˇ ya tahˬ puˬ kʼawꞈ, dzaw daˆ leꞈ nya ni nawˬ˗ahˇ caw ba nehˬ˗eu aˬ jeˬ nga?

1. Jaˇliꞈ dzaw˗eu teu naˇ, aˬ jeˬ miˇ neh gaˇ dahˇ tsoeˬ˗eu nga?

“Miˬyehˇ˗euˬ dawˬ˗aˬ, yaw dehꞈ dehꞈ luꞈ˗awˇ baoˬ tiˬ byah ni ahˇ˗eu” meh. (Heˬbyehˇ 4:12) Jaˇliꞈ˗aˬ Miˬyehˇ˗euˬ nui noeˬ hawˇ˗eu aˬ yawꞈ aˬ dui˗ahˇ aˇ naˆ ni gaˬ˗eu lehˇ bi siˬ laꞈ˗eu miˇ neh, gaˇ dahˇ tsoeˬ dui dui˗eu meh. Kʼoeˇ uˬ taꞈ zaˬ siˬ nui gahˇ gʼawˬ mya jeˬ bi lahˬ laˇ˗awˇ, mehˬ hu paw noeˬ tmˬ˗eu jeˬ jiˇ bi jaˆ laˇ˗eu meh. Aˇ yeˇ kʼaˇ huiˬ˗eu jeˬ naˇ, Jaˇliꞈ dzaw˗eu teu nawˬ˗ahˇ Yeˬhawˇbaˬ˗euˬ cawˬ pyeuꞈ nya laˇ ni caw ba nehˬ˗awˇ, nawˬ˗euˬ dehꞈ ziˇ jiˇ bi muiˬ daˆ laˇ˗eu meh.

2. Jaˇliꞈ laꞈ kʼoeˇ˗euˬ yaw tsaˬ yaw dawˇ jeˬ˗ahˇ aˇ poeˬ taˬ baw˗eu heu, aˬ jeˬ miˇ neh aˇ yeˇ huiˬ˗eu nga?

Jaˇliꞈ laꞈ kʼoeˇ˗euˬ yaw tsaˬ yaw dawˇ jeˬ heu naˇ, aˇ poeˬ baw dui dui˗eu pyuˇ shuiˇ myawˬ gahˬ˗ahˇ duˇ˗eu meh. Teu miˇ neh, Jaˇliꞈ aˬ dui˗ahˇ ‘yaw tsaˬ yaw dawˇ jeˬ˗ahˇ poˆ geuꞈ˗eu tsaˬ meh. Ahˬ dzeh˗eu maˬ tsaˬ˗a’ lehˇ ehˇ˗eu meh. (Dawˬdaˬ 23:23) Aˬ dui yaw tsaˬ yaw dawˇ jeˬ heu aˇ naˆ ni aˇ poeˬ baw˗eu lehˇ siˬ nya taˬ naˇ, aˬ geu jeˬ˗ahˇ ya tahˬ puˬ kʼawꞈ, kʼaˇ gʼeh nya gaˇ neh leh jeh˗awˇ Jaˇliꞈ dzaw daˆ leꞈ˗eu meh.—Dawˬdaˬ 2:4, 5-ahˇ gui.

3. Jaˇliꞈ dzaw daˆ leꞈ nya ni Yeˬhawˇbaˬ nawˬ˗ahˇ aˬ joˆ˗ehˇ caw ba nya˗eu nga?

Beh˗euˬ yaw sahˇ pyeuꞈ˗awˇ aˬ dui˗euˬ cawˬ pyeuꞈ˗eu Yeˬhawˇbaˬ, aˬ yawꞈ˗euˬ gaˇ kawˆ˗ahˇ siˬ nya laˇ ni nawˬ˗ahˇ caw ba nehˬ mawꞈ˗eu meh. Aˬ yawꞈ nawˬ˗ahˇ ‘nui ma keuˆ ni maˬ ehˇ, Miˬyehˇ˗euˬ nui kʼahˇ mˇ nya ni maˬ ehˇ’ gʼaˬ biꞈ nehˬ nya meh. (Piˇliˇpiˆ 2:13-ahˇ gui.) Yeˬhawˇbaˬ nawˬ˗ahˇ Jaˇliꞈ dzaw mawꞈ laˇ ni hawˇ˗eu nawˬ neh ya siˬ˗euˬ jeˬ˗ahˇ mˇ caw nya ni caw ba nehˬ˗awˇ, shaˬ˗eu jeˬ, laˆ tsoeˬ laˇ˗eu jeˬ˗ahˇ ya tahˬ puˬ kʼawꞈ, kamˬ daˬ coeˇ ni jiˇ caw ba nehˬ˗eu meh. Teu miˇ neh Jaˇliꞈ dzaw daˆ leꞈ nya ni caw ba nehˬ laꞈ lehˇ, Yeˬhawˇ baˬ˗ahˇ aˬ myah luꞈ guiˬ lahˬ shaˇ˗awˬ.—1 Teˇsaˬloˇni 5:17.

Naꞈ suiˇ ni dzaw

4. Jaˇliꞈ dzaw˗eu jeˬ˗ahˇ aˇ poeˬ taˬ baw

Tiˬ poˆ na dehꞈ ziˇ laꞈ kʼoeˇ gaˇ myaˬ dzaˬ myaˬ dawˇ˗eu miˇ neh, Jaˇliꞈ dzaw˗eu aˇ yamˬ maˬ jaˆ nya lehˇ kʼawꞈ noeˬ laˇ nya˗eu meh. Toˆ˗ehˇ naˇ nawˬ˗ahˇ caw ba nehˬ nya˗eu aˬ jeˬ nga? Piˇliˇpiˆ 1:10-ahˇ gui gʼaˬ naˇ, naˇ haˬ˗eujeˬ heu˗ahˇ ja sawˇ.

• Nawˬ˗euˬ dehꞈ ziˇ laꞈ kʼoeˇ “muiˬ dzehˬ˗eu jeˬ” maˬ ngeuˇ naˇ aˇ yeˇ huiˬ dzehˬ˗eu aˬ geu jeˬ nya?

• Nawˇ Jaˇliꞈ dzaw˗eu jeˬ˗ahˇ aˇ poeˬ aˬ joˆ˗ehˇ taˬ baw nya˗eu nga?

1. 1. Aˬ dui kʼaˇ shuiꞈ jeˬ hu shehˆ ahˇ˗awˇ kʼaˬ lo dawˆ ahˇ naˇ, kʼaˬ lo maˬ deˇ leˇ jiˇ˗a

2. 2. Ehˇ kʼawꞈ kʼaˬ lo jeˬ hu dawˆ ahˇ˗awˇ kʼaˇ shuiꞈ shehˆ ahˇ naˇ, dawˬ tawˆ luꞈ deˇ leˇ jiˇ˗eu meh. Teu gaˇ duˇ ni aˬ dui aˇ yeˇ huiˬ dzehˬ˗eu jeˬ˗ahˇ jeˬ hu mˇ naˇ, yawˬ jeˬ yawˬ mˇ˗eu aˇ yamˬ jiˇ doˆ laˇ meh

Jaˇliꞈ dzaw˗eu heu naˇ Miˬyehˇ˗ahˇ siˬ nya laˇ˗awˇ aˬ yawꞈ˗ahˇ uˬ duˬ tahˬ nya laˇ ni caw ba nehˬ˗eu meh. Maꞈtehˬ 4:4-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ dui Jaˇliꞈ dzaw˗eu jeˬ˗ahˇ aˇ poeˬ taˬ baw˗eu heu naˇ, aˬ joˆ˗ehˇ gaˇ dahˇ tsoeˬ˗eu nga?

5. Laˆ tsoeˬ laˇ˗eu jeˬ˗ahˇ ya tahˬ puˬ kʼawꞈ dzaw daˆ leꞈ

Biˬdiˬoˬ: Oˇ oꞈ˗eu baˬ da neh za˗euˬ laꞈ sawˬ (5:22)

• Pehˬtseˇ˗suiˬkoꞈ aˬ yawꞈ dzaw luꞈ˗eu gaˇ kawˆ, nymˇ jiˇ hawˇ˗eu cawˬ deuˬ˗ahˇ ja nehˬ ngeh, aˬ yawꞈ maꞈ˗ahˇ aˬ joˆ˗ehˇ gʼeh leˇ˗eu nga?

• Pehˬtseˇ˗suiˬkoꞈ oˇ oꞈ˗eu baˬ da neh, aˬ jeˬ˗euˬ laꞈ sawˬ za˗euˬ nga?

2 Tiˆmoˇseˬ 2:24, 25-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Nawˇ Jaˇliꞈ dzaw gaˇ nymˇ jiˇ laꞈ kʼoeˇ˗euˬ deuˬ hawˇ˗eu cawˬ deuˬ aˬ joˆ˗ehˇ noeˬ˗eu nga?

• Jaˇliꞈ aˇ deuˆ heu˗ahˇ haw ngeh, nawˇ Jaˇliꞈ dzaw gaˇ tiˬ gʼaˬ na maˬ ya leˇ naˇ aˬ joˆ˗ehˇ ya jahˇ˗eu nga? Aˬ jeˬ miˇ neh?

6. Yeˬhawˇbaˬ˗ahˇ gʼoe˗awˇ aˬ yawꞈ neh bi caw ba

Biˬdiˬoˬ: Dehꞈ poˆ dehꞈ paˇ nya ni Yeˬhawˇbaˬ caw ba nehˬ (3:56)

• Biˬdiˬoˬ laꞈ kʼoeˇ˗euˬ Jiˬ˗mˬ, Yeˬhawˇbaˬ nui kʼahˇ shiˇ ni aˬ jeˬ jeˇ laˆ paˇ˗euˬ nga?

• Aˬ yawꞈ˗euˬ gaˇ kawˆ˗ahˇ haw ngeh, nawˬ˗ahˇ aˬ geu tsahˇ˗ahˇ ya leˇ nya?

Heˬbyehˇ 11:6-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬhawˇbaˬ aˬ yawꞈ˗ahˇ siˬ nya laˇ˗awˇ aˬ yawꞈ nui kʼahˇ shiˇ˗eu jeˬ mˇ nya ni, leh jeh˗eu deuˬ˗ahˇ aˬ jeˬ biꞈ˗eu nga?

• Nawˇ leh jeh˗awˇ Jaˇliꞈ dzaw luꞈ gaˇ Yeˬhawˇbaˬ ya mawˇ ngeh, aˬ yawꞈ˗ahˇ aˬ joˆ˗ehˇ gʼeh leˇ˗eu nga?

Kawˆ shawˆ

Jaˇliꞈ dzaw˗eu teu aˬ myah luꞈ yaw awˬ maˬ ngeuˇ kʼawꞈ, nawˇ dzaw daˆ leꞈ naˇ mˬ maˬ maˬ byaˆ zaˇ ziˇ laˬ kʼaˬ tiˬ cehˇ dehꞈ gʼeh nya ni caw ba nehˬ laꞈ meh. Teu miˇ neh aˬ myah luꞈ Yeˬhawˇbaˬ˗ahˇ gʼoe˗awˬ, aˬ yawꞈ nawˬ˗ahˇ laꞈ sawˬ biꞈ nehˬ laꞈ meh.

Ja sawˇ poˆ˗eu

• Jaˇliꞈ laꞈ kʼoeˇ˗euˬ yaw tsaˬ yaw dawˇ jeˬ, nawˬ˗euˬ gʼaˇ duˬ aˬ jeˬ miˇ neh aˇ poeˬ baw˗eu nga?

• “Muiˬ dzehˬ˗eu jeˬ” maˬ ngeuˇ naˇ aˇ yeˇ huiˬ dzehˬ˗eu jeˬ˗ahˇ mˇ nya˗eu gʼaˇ duˬ, aˬ jeˬ ya jahˇ˗eu nga?

• Jaˇliꞈ dzaw daˆ leꞈ nya ni caw ba nehˬ laꞈ lehˇ, Yeˬhawˇbaˬ˗ahˇ aˬ jeˬ miˇ neh guiˬ lahˬ ya shaˇ˗eu nga?

Haw lahˬ

Gʼawˬ mya gʼaˬ˗ahˇ aˇ yamˬ yaw gahˇ gahˇ˗ehˇ zmˬ nya ni caw ba nehˬ˗eu oeˬ jeˬ˗ahˇ haw.

“Nawˬ˗euˬ aˇ yamˬ˗ahˇ yaw gahˇ gahˇ˗ehˇ aˬ joˆ˗ehˇ zmˬ nya˗eu nga?” (Noeˬlaˇ˗awˬ!, 2014 Nyiˬ siˬ ba la)

Kʼaˬ dzeˇ zaˬ maˬ gʼoˆ shaw nehˬ laꞈ kʼawꞈ, Yeˬhawˇbaˬ nui kʼahˇ shiˇ˗eu jeˬ˗ehˇ dehꞈ˗eu lehˇ leh jeh˗euˬ zaˬ miˬ zaˬ tiˬ gʼaˬ˗ahˇ, Yeˬhawˇbaˬ aˬ joˆ˗ehˇ caw ba nehˬ˗euˬ nga lehˇ haw.

Aˬ dui˗euˬ kʼaˆ behˆ˗ahˇ pi nya ni Yeˬhawˇbaˬ gʼaˬ biꞈ (5:05)

Zaˬ miˬ zaˬ gʼaˬ oˇ oꞈ˗awˇ Jaˇliꞈ dzaw daˆ leꞈ˗euˬ heu, kʼaˬ dzeˇ zaˬ gʼaˬ˗ahˇ gaˇ dahˇ aˬ joˆ˗ehˇ tsoeˬ˗eu nga lehˇ haw.

Ngaˇ yaw tsaˬ yaw dawˇ jeˬ˗ahˇ lawˬ haw˗euˬ ma (6:30)

Tiˬ deuˬ na Yeˬhawˇbaˬ˗euˬ Saˇ kiˇ deuˬ nymˇ jiˇ˗ahˇ laˆ pyaˆ nga lehˇ ehˇ˗eu meh. Teu maˇ diˇ ngeuˇ ngaˇ laˬ?

“Yeˬhawˇbaˬ˗euˬ Saˇ kiˇ deuˬ nymˇ jiˇ˗ahˇ laˆ pyaˆ nga laˬ, maˇ ngeuˇ naˇ laˆ ziꞈ nga laˬ?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Aˬ dui yawˬ gʼaˬ na luꞈ yawˬ ha ya noeˬ tsehˆ˗eu jeˬ jaˆ˗eu meh. Aˬ dui neh noeˬ tsehˆ˗euˬ jeˬ aˬ dui˗ahˇ muiˬ˗eu kʼawꞈ pyeuꞈ nya˗awˇ, aˬ dui˗ahˇ deuˬ˗eu kʼawꞈ pyeuꞈ nya˗eu meh. Kʼoeˇ naˇ, Yeˬhawˇbaˬ nehˬ˗ehˇ cawˬ cawˬ˗eu jeˬ nehˬ˗ehˇ jiˇ taꞈ˗eu meh. Yaw jeˬ ma jeˬ, aˬ dui aˬ geu gaˇ jawˇ˗eu, aˬ jeˬ˗euˬ gaˇ mˇ˗eu, sheuˬ dahˬ dzaˬ˗eu laˬ, maˬ sheuˬ dahˬ dzaˬ ni jawˇ˗eu laˬ lehˇ ya noeˬ tsehˆ˗eu meh. Aˬ dui yaw muiˬ˗ehˇ noeˬ tsehˆ nya˗euˬ naˇ, dehꞈ ziˇ laꞈ kʼoeˇ laˬ kʼaˬ cehˇ˗awˇ Yeˬhawˇbaˬ jiˇ nui kʼahˇ shiˇ˗eu meh.

1. Yaw muiˬ˗ehˇ noeˬ tsehˆ nya ni Jaˇliꞈ aˬ dui˗ahˇ aˬ joˆ˗ehˇ caw ba nehˬ nya˗eu nga?

Aˬ dui gaˇ kawˆ tiˬ jeˬ na˗ahˇ maˬ noeˬ tsehˆ mi naˆ˗ehˇ Yeˬhawˇbaˬ˗ahˇ caw ba nehˬ laꞈ lehˇ guiˬ lahˬ shaˇ˗awˇ, gaˇ kawˆ teu˗ahˇ aˬ yawꞈ aˬ joˆ˗ehˇ noeˬ˗eu nga lehˇ siˬ nya˗eu gʼaˇ duˬ, Jaˇliꞈ˗ahˇ ya poˆ tseˇ˗eu meh. (Dawˬdaˬ 2:3-6-ahˇ gui.) Yeˬhawˇbaˬ gaˇ kawˆ tiˬ jeˬ na˗ahˇ yaw duˬ duˬ lehˇ ehˇ nehˬ taˬ˗euˬ meh. Aˬ yawꞈ neh ehˇ taˬ˗euˬ loꞈ˗ehˇ noeˬ tsehˆ˗eu heu naˇ, kʼaˇ muiˬ˗eu jeˬ pyeuꞈ meh.

Ehˇ kʼawꞈ aˬ joˆ˗ehˇ ya jahˇ˗eu lehˇ Jaˇliꞈ laꞈ kʼoeˇ yaw duˬ duˬ˗ehˇ maˬ ehˇ nehˬ taˬ naˇ tawˇ neh? Yaw duˬ duˬ˗ehˇ maˬ ehˇ taˬ kʼawꞈ, Yeˬhawˇbaˬ aˬ dui “iˇ paˬ˗ehˇ gʼeh˗eu gaˇ ma mehˬ nehˬ” luꞈ˗a siˬ. (Iˇsaˬyaˇ 48:17) Aˬ joˆ˗ehˇ mehˬ nehˬ˗eu nga? Jaˇliꞈ zahˇ neh mehˬ nehˬ luꞈ˗eu meh. Jaˇliꞈ zahˇ heu naˇ gaˇ kawˆ tiˬ kawˆ na˗ahˇ Miˬyehˇ aˬ joˆ˗ehˇ noeˬ˗eu lehˇ bi siˬ laꞈ˗eu, aˇ yeˇ huiˬ˗eu yaw tsaˬ yaw dawˇ jeˬ pyeuꞈ meh. Aˬ dui Jaˇliꞈ laꞈ kʼoeˇ˗euˬ gaˇ kawˆ tiˬ kawˆ na˗ahˇ gui ngeh, Miˬyehˇ gaˇ kawˆ teu˗ahˇ aˬ joˆ˗ehˇ noeˬ˗eu lehˇ siˬ laˇ˗eu meh. Aˬ dui Yeˬhawˇbaˬ aˬ joˆ˗ehˇ noeˬ˗eu lehˇ siˬ nya taˬ naˇ, aˬ yawꞈ nui kʼahˇ shiˇ˗eu jeˬ˗ehˇ noeˬ tsehˆ nya˗eu meh.

2. Aˬ dui maˬ noeˬ tsehˆ mi naˆ˗ehˇ aˬ jeˬ jeˇ shaˇ noeˬ paˬ˗ehˇ gʼeh˗eu nga?

Jaˇliꞈ˗ahˇ “yaw gahˇ deuˬ kuiˇ toꞈ shaˇ noeˬ˗awˇ ciˬ˗eu meh” lehˇ ehˇ taˬ˗euˬ meh. (Dawˬdaˬ 14:15) Heu naˇ aˬ dui maˬ noeˬ tsehˆ mi naˆ˗ehˇ aˇ yamˬ yuˇ˗awˇ aˬ jeˬ jeˇ jahˇ nya˗eu nga lehˇ shaˇ noeˬ gaˇ ehˇ mawꞈ˗eu meh. Aˬ yawꞈ jeˬ yawꞈ˗ahˇ shaˇ noeˬ ngeh yawˬ ha˗ahˇ heu loꞈ˗ehˇ naˇ haˬ. ‘Gaˇ kawˆ heu nehˬ˗ehˇ taꞈ˗eu Jaˇliꞈ zahˇ aˬ jeˬ jeˇ jaˆ˗eu nga? Heu loꞈ˗ehˇ noeˬ tsehˆ naˇ ngaˬ˗ahˇ nui ma saˇ miˇ˗a laˬ? Ngaˬ neh noeˬ tsehˆ˗euˬ jeˬ aˬ cawˬ˗ahˇ aˬ joˆ˗ehˇ deuˬ˗eu nga? Aˇ yeˇ kʼaˇ huiˬ˗eu jeˬ naˇ, Yeˬhawˇbaˬ˗ahˇ tawˇ neh laˬ kʼaˬ bi cehˇ leˇ ngaˇ laˬ?’ lehˇ ya shaˇ noeˬ˗eu meh.—Dawˬdaˬ 27:12.

Yeˬhawˇbaˬ aˬ dui˗ahˇ aˬ jeˬ muiˬ˗eu, aˬ jeˬ maˬ muiˬ˗eu lehˇ ehˇ nehˬ˗eu aˬ kawˬ˗aˬ jaˆ meh. Aˬ dui Miˬyehˇ˗euˬ zahˇ dawˬ hawˇ˗eu Jaˇliꞈ zahˇ˗ahˇ yaw muiˬ˗ehˇ siˬ nya˗awˇ mˇ caw˗eu heu naˇ, yawˬ ha˗euˬ siˬ nya˗eu nui ma˗ahˇ dzaw nehˬ˗eu jeˬ pyeuꞈ˗eu meh. Siˬ nya˗eu nui ma heu naˇ, tsaˬ˗eu jeˬ hawˇ˗eu maˬ tsaˬ˗eu jeˬ˗ahˇ bi siˬ laꞈ˗eu aˬ dui˗euˬ laꞈ kʼoeˇ ahˇ˗eu jeˬ pyeuꞈ meh. (Loˇmaˆ 2:14, 15) Siˬ nya˗eu nui ma˗ahˇ yaw muiˬ˗ehˇ dzaw taˬ naˇ, aˬ dui yaw muiˬ˗ehˇ noeˬ tsehˆ nya˗eu meh.

Naꞈ suiˇ ni dzaw

3. Jaˇliꞈ neh bi sheuˬ gʼeh

Biˬdiˬoˬ: Jaˇliꞈ zahˇ˗ahˇ caw teh (5:54)

• Yeˬhawˇbaˬ aˬ dui˗ahˇ muiˬ dui dui˗eu aˬ jeˬ˗euˬ laꞈ sawˬ biꞈ taˬ˗euˬ nga?

• Yeˬhawˇbaˬ aˬ dui˗ahˇ aˬ jeˬ miˇ neh yawˬ ha naꞈ˗i bi tseˇ˗eu nga?

• Yeˬhawˇbaˬ aˬ dui˗ahˇ yawˬ ha naꞈ˗i yaw muiˬ˗ehˇ noeˬ tsehˆ nya ni caw ba nehˬ˗eu gʼaˇ duˬ, aˬ jeˬ biꞈ nehˬ taˬ˗euˬ nga?

Jaˇliꞈ zahˇ yaw jeˬ ma jeˬ tiˬ hmˬ˗ahˇ haw˗eu gʼaˇ duˬ, Eˇpeˇsu 5:15, 16-ahˇ gui. Kʼoeˇ naˇ, naˇ haˬ˗eu jeˬ heu˗ahˇ ja sawˇ.

• Yawˬ jawˇ na luꞈ Jaˇliꞈ gui nya˗eu gʼaˇ duˬ, ‘aˇ yamˬ˗ahˇ gaˇ dahˇ tsoeˬ ni aˬ joˆ˗ehˇ zmˬ’ nya˗eu nga?

• Muiˬ˗eu nymˇ dahˬ, muiˬ˗eu aˬ da aˬ ma hawˇ˗eu muiˬ˗eu aˬ buˇ aˬ li pyeuꞈ nya˗eu gʼaˇ duˬ, ‘aˇ yamˬ˗ahˇ gaˇ dahˇ tsoeˬ ni aˬ joˆ˗ehˇ zmˬ’ nya˗eu nga?

• Aˇ muˇ˗euˬ mehˬ bawˬ˗ahˇ iˇ nya˗eu gʼaˇ duˬ, ‘aˇ yamˬ˗ahˇ gaˇ dahˇ tsoeˬ ni aˬ joˆ˗ehˇ zmˬ’ nya˗eu nga?

4. Yaw muiˬ˗ehˇ noeˬ tsehˆ nya ni yawˬ ha˗euˬ siˬ nya˗eu nui ma˗ahˇ dzaw taˬ

Biˬdiˬoˬ: Siˬ nya˗eu nui ma aˬ myah luꞈ yaw shawˇ shawˇ˗ehˇ bi jaˆ (5:13)

• Biˬdiˬoˬ laꞈ kʼoeˇ˗euˬ mehˇ nmˇ heu gʼaˬ yawˬ ha˗euˬ siˬ nya˗eu nui ma˗ahˇ dzaw˗awˇ, Yeˬhawˇbaˬ nui kʼahˇ shiˇ˗eu jeˬ˗ehˇ noeˬ tsehˆ nya˗eu gʼaˇ duˬ, aˬ jeˬ jeˇ jahˇ˗euˬ nga?

Aˬ dui yawˬ ha ya noeˬ tsehˆ˗eu gaˇ kawˆ˗ahˇ aˬ jeˬ miˇ neh aˬ cawˬ neh bi noeˬ tsehˆ nehˬ paˬ˗ehˇ maˬ gʼeh nga? Heˬbyehˇ 5:14-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ cawˬ neh bi noeˬ tsehˆ nehˬ˗eu heu naˇ yaw awˬ gaˇ duˇ kʼawꞈ, aˬ dui aˬ jeˬ˗ahˇ tseˇ paˆ nya paˬ˗ehˇ gʼeh˗eu nga?

• Yawˬ ha˗euˬ siˬ nya˗eu nui ma˗ahˇ dzaw taˬ˗awˇ yaw muiˬ˗ehˇ noeˬ tsehˆ nya˗eu gʼaˇ duˬ, aˬ dui˗ahˇ caw ba nehˬ nya˗eu aˬ jeˬ nga?

5. Aˬ cawˬ˗euˬ siˬ nya˗eu nui ma˗ahˇ yaw zeu baw

Tiˬ gʼaˬ tiˇ gʼaˬ noeˬ tsehˆ˗eu jeˬ maˬ duˇ leˇ˗a. Aˬ dui aˬ cawˬ˗euˬ siˬ nya˗eu nui ma˗ahˇ yaw zeu aˬ joˆ˗ehˇ baw nya˗eu nga? Gaˇ kawˆ heu nyiˬ kawˆ˗ahˇ shaˇ noeˬ haw sheˇ.

Gaˇ kawˆ 1: Myaˆ pyawˬ˗ahˇ aˇ dzehˬ˗ehˇ lehꞈ dzeuˇ˗eu mehˇ nmˇ zaˬ miˬ aˬ buˇ tiˬ gʼaˬ, aˇ muˇ yawˬ muˇ yawˬ˗ahˇ jawˇ paˇ iˇ˗euˬ meh. Teu gaˇ˗euˬ mehˇ nmˇ aˬ buˇ deuˬ myaˆ pyawˬ˗ahˇ aˇ dzehˬ˗ehˇ lehꞈ gaˇ ya mawˇ ngeh, nui ma maˬ saˇ˗a.

Loˇmaˆ 15:1 hawˇ˗eu 1 Gawˇliˬtu 10:23, 24-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Jaˇliꞈ aˇ deuˆ heu deuˬ˗ahˇ haw ngeh, mehˇ nmˇ zaˬ miˬ aˬ buˇ teu gʼaˬ aˬ joˆ˗ehˇ noeˬ tsehˆ nya˗eu nga? Nawˬ neh mˇ˗euˬ tiˬ jeˬ na˗ahˇ nawˇ nui ma saˇ kʼawꞈ, nui ma maˬ saˇ˗eu deuˬ nehˬ˗ehˇ jawˇ naˇ nawˇ aˬ joˆ˗ehˇ jahˇ de?

Gaˇ kawˆ 2: Mehˇ nmˇ zaˬ yo aˬ li tiˬ gʼaˬ jiˇ baˬ ui cuiˆ na dawˇ˗eu teu naˇ, Jaˇliꞈ zahˇ˗ahˇ maˬ bahˬ˗a lehˇ siˬ nya taˬ˗euˬ kʼawꞈ, jiˇ baˬ maˬ dawˇ lehˇ noeˬ tsehˆ taˬ˗euˬ meh. Tiˬ poˆ aˬ yawꞈ mehˇ nmˇ deuˬ dzaˬ byawˬ dawˇ byawˬ gaˇ iˇ ngeh, mehˇ nmˇ deuˬ jiˇ baˬ dawˇ gaˇ ya mawˇ˗euˬ meh.

Dawˬtsoˆ 7:16 hawˇ˗eu Loˇmaˆ 14:1, 10-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Jaˇliꞈ aˇ deuˆ heu deuˬ˗ahˇ haw ngeh, mehˇ nmˇ heu gʼaˬ aˬ joˆ˗ehˇ noeˬ tsehˆ nya˗eu nga? Nawˇ nui ma maˬ saˇ˗eu jeˬ aˬ cawˬ jahˇ luꞈ gaˇ ya mawˇ naˇ, nawˇ aˬ joˆ˗ehˇ jahˇ de?

Yaw muiˬ˗ehˇ noeˬ tsehˆ nya ni aˬ jeˬ jeˇ ya jahˇ˗eu nga?

1. Yaw muiˬ˗ehˇ noeˬ tsehˆ nya˗eu gʼaˇ duˬ, Yeˬhawˇbaˬ˗ahˇ guiˬ lahˬ shaˇ.—Yaˬkoˆ 1:5.

2. Gaˇ kawˆ teu˗ahˇ Jaˇliꞈ hawˇ˗eu Jaˇliꞈ˗ahˇ dawˬ pehˬ taˬ˗eu paˇ dmˬ deuˬ˗ahˇ aˬ joˆ˗ehˇ ehˇ taˬ˗euˬ nga lehˇ poˆ tseˇ. Noeˬ dahˇ doe laˇ˗euˬ Ka li zaˬ deuˬ˗ahˇ jiˇ naˇ haˬ.

3. Nawˬ neh noeˬ tsehˆ˗euˬ jeˬ, nawˇ hawˇ˗eu aˬ cawˬ˗euˬ siˬ nya˗eu nui ma˗ahˇ deuˬ ngaˇ lehˇ shaˇ noeˬ.

Kawˆ shawˆ

Aˬ dui yaw muiˬ˗ehˇ noeˬ tsehˆ nya˗eu gʼaˇ duˬ, Yeˬhawˇbaˬ gaˇ kawˆ teu˗ahˇ aˬ joˆ˗ehˇ noeˬ˗eu nga lehˇ haw˗awˇ, aˬ dui neh mˇ˗euˬ jeˬ teu aˬ cawˬ˗ahˇ muiˬ˗eu jeˬ pyeuꞈ nga laˬ, maˬ ngeuˇ naˇ aˬ yawꞈ maꞈ˗ahˇ deuˬ˗eu jeˬ pyeuꞈ nga laˬ lehˇ ya shaˇ noeˬ˗eu meh.

Ja sawˇ poˆ˗eu

• Aˬ dui Yeˬhawˇbaˬ nui kʼahˇ shiˇ˗eu jeˬ˗ehˇ aˬ joˆ˗ehˇ noeˬ tsehˆ nya˗eu nga?

• Aˬ dui yawˬ ha˗euˬ siˬ nya˗eu nui ma˗ahˇ aˬ joˆ˗ehˇ dzaw nya˗eu nga?

• Aˬ dui aˬ cawˬ˗euˬ siˬ nya˗eu nui ma˗ahˇ yaw zeu aˬ joˆ˗ehˇ baw nya˗eu nga?

Haw lahˬ

Miˬyehˇ nehˬ˗ehˇ gʼoeˇ dzehˬ leˇ˗eu jeˬ˗ehˇ aˬ joˆ˗ehˇ noeˬ tsehˆ nya˗eu nga?

“Miˬyehˇ˗ahˇ ciˬ huiˬ ciˬ mahˇ˗eu jeˬ˗ehˇ noeˬ tsehˆ” (Loꞈ˗eu nymˇgoˇ, 2011 Oeˬ siˬ ba la 15)

Yeˬhawˇbaˬ aˬ dui˗ahˇ aˬ joˆ˗ehˇ sheuˬ gʼeh˗eu nga lehˇ yaw muiˬ˗ehˇ siˬ nya laˇ ni haw.

Yeˬhawˇbaˬ aˬ yawꞈ˗euˬ tsawˇ haˬ deuˬ˗ahˇ sheuˬ gʼeh nehˬ (9:50)

Shaˬ˗eu gaˇ kawˆ˗ahˇ ya noeˬ tsehˆ ngeh, zaˬ yo aˬ li tiˬ gʼaˬ˗ahˇ yaw muiˬ˗ehˇ noeˬ tsehˆ nya ni caw ba nehˬ˗euˬ aˬ jeˬ nga lehˇ haw.

Yeˬhawˇbaˬ aˬ myah luꞈ yaw muiˬ jeˬ biꞈ ma lehˇ kamˬ (5:46)

Aˬ dui aˬ jeˬ ya jahˇ˗eu lehˇ Jaˇliꞈ laꞈ kʼoeˇ yaw duˬ duˬ˗ehˇ maˬ ehˇ taˬ ngeh kʼawꞈ, Yeˬhawˇbaˬ nui kʼahˇ shiˇ˗eu jeˬ˗ehˇ aˬ joˆ˗ehˇ mˇ nya˗eu nga lehˇ haw.

“Aˬ jeˬ ya jahˇ˗eu lehˇ aˬ myah luꞈ Jaˇliꞈ yaw duˬ duˬ˗ehˇ ehˇ taˬ˗euˬ jeˬ˗ahˇ loˬ ngaˇ laˬ?” (Loꞈ˗eu nymˇgoˇ, 2003 Tseˇ nyiꞈ siˬ ba la 1)