Cawˬ yaw gahˇ gahˇ˗ehˇ tseˇ

Gʼoeˇ˗eu cawˬ deuˬ˗aˬ, aˬ dui˗ahˇ laˬ kʼaˬ bi cehˇ laˇ˗awˇ shaˬ zahˬ˗ahˇ ya tahˬ puˬ ngeh jiˇ aˬ dui˗ahˇ gʼaˬ biꞈ˗eu meh. Ehˇ kʼawꞈ yawˬ gʼaˬ na luꞈ muiˬ˗eu cawˬ maˬ ngeuˇ˗a lehˇ Jaˇliꞈ ehˇ˗eu meh. Toˆ˗ehˇ naˇ aˬ dui muiˬ˗eu cawˬ aˬ joˆ˗ehˇ poˆ mawˇ nya˗eu nga? Gaˇ kawˆ heu˗ahˇ ja sawˇ ma.

1. Cawˬ deuˬ aˬ dui˗ahˇ aˬ joˆ˗ehˇ bi gʼeh laˇ nya˗eu nga?

Aˬ dui yawˬ ha nehˬ˗ehˇ cawˬ cawˬ˗eu deuˬ loꞈ˗ehˇ pyeuꞈ˗iˇ nya˗eu meh. Heu naˇ, laꞈ nyiˇ paw mawˇ dzoeˇ˗eu deuˬ tehꞈ˗ehˇ maˬ ngeuˇ˗eu, iˇteuꞈnehꞈ laꞈ kʼoeˇ˗euˬ deuˬ jiˇ aˬ dui˗ahˇ bi muiˬ laˇ nya˗awˇ bi cawˆ˗iˇ nya˗eu meh. ‘Zaˬ siˬ tsawˇ gahˇ byah˗eu deuˬ nehˬ˗ehˇ cawˬ˗eu tsawˇ haˬ tsawˇ gahˇ ahˇ laˇ˗awˇ, aˬ dzawˬ aˇ gah deuˬ [Yeˬhawˇbaˬ˗ahˇ maˬ gaˬ˗eu deuˬ] nehˬ˗ehˇ cawˬ cawˬ˗eu tsawˇ haˬ, ya luˬ ya seˇ˗iˇ tehꞈ˗a’ lehˇ Jaˇliꞈ ehˇ˗eu meh. (Dawˬdaˬ 13:20) Yeˬhawˇbaˬ˗ahˇ gaˬ˗awˇ aˬ yawꞈ˗ahˇ uˬ duˬ tahˬ˗eu cawˬ deuˬ naˇ, aˬ dui˗ahˇ aˬ myah luꞈ Yeˬhawˇbaˬ nehˬ˗ehˇ gʼoeˇ nya ni caw ba nehˬ˗awˇ yaw muiˬ˗ehˇ noeˬ tsehˆ nya ni jiˇ caw ba nehˬ˗eu meh. Ehˇ kʼawꞈ Yeˬhawˇbaˬ˗ahˇ maˬ gaˬ˗eu deuˬ naˇ, aˬ dui˗ahˇ Yeˬhawˇbaˬ nehˬ˗ehˇ gaˇ mahˇ bi kaˬ˗iˇ nya˗eu meh. Teu miˇ neh Jaˇliꞈ aˬ dui˗ahˇ cawˬ yaw gahˇ gahˇ˗ehˇ tseˇ lehˇ gʼaˬ biꞈ taˬ˗euˬ meh. Miˬyehˇ˗ahˇ gaˬ˗eu deuˬ nehˬ˗ehˇ cawˬ cawˬ naˇ, aˬ dui˗ahˇ kʼawꞈ gaˇ dahˇ tsoeˬ˗awˇ aˬ yawꞈ maꞈ˗ahˇ jiˇ gaˇ dahˇ tsoeˬ˗eu meh. Aˬ dui “tiˬ gʼaˬ tiˇ gʼaˬ gʼaˬ biꞈ˗awˇ caw dehˬ caw toˆ” nya˗eu meh.—1 Teˇsaˬloˇni 5:11.

2. Aˬ dui cawˬ tseˇ˗eu jeˬ, Yeˬhawˇbaˬ˗ahˇ aˬ joˆ˗ehˇ gʼeh leˇ˗eu nga?

Yeˬhawˇbaˬ aˬ suˇ gʼaˬ nehˬ˗ehˇ cawˬ cawˬ˗eu lehˇ yaw muiˬ˗ehˇ tseˇ˗eu meh. ‘Miˬyehˇ˗euˬ dawˬ naˇ haˬ˗eu deuˬ˗aˬ Miˬyehˇ˗euˬ cawˬ pyeuꞈ’ meh. (Ja ceuˬ 25:14) Aˬ dui Yeˬhawˇbaˬ˗ahˇ maˬ gaˬ˗eu deuˬ nehˬ˗ehˇ cawˬ cawˬ naˇ, Yeˬhawˇbaˬ˗ahˇ aˬ joˆ˗ehˇ gʼeh leˇ paˬ nga? Aˬ yawꞈ nui ma cawˆ dui dui˗eu yaw duˬ baw meh. (Yaˬkoˆ 4:4-ahˇ gui.) Ehˇ kʼawꞈ aˬ dui maˬ muiˬ˗eu cawˬ deuˬ˗ahˇ yahˇ˗awˇ Yeˬhawˇbaˬ nehˬ˗ehˇ gʼoeˇ leˇ ni leh jeh˗eu uˬ taꞈ, aˬ yawꞈ˗ahˇ gaˬ˗eu deuˬ nehˬ˗ehˇ cawˬ cawˬ naˇ, aˬ yawꞈ nui kʼahˇ shiˇ˗awˇ aˬ dui˗ahˇ aˬ yawꞈ˗euˬ cawˬ bi pyeuꞈ˗eu meh.—Ja ceuˬ 15:1-4.

Naꞈ suiˇ ni dzaw

3. Maˬ muiˬ˗eu cawˬ deuˬ˗ahˇ yahˇ

Miˬyehˇ hawˇ˗eu Miˬyehˇ˗euˬ zahˇ dawˬ˗ahˇ maˬ gaˬ˗eu deuˬ˗aˬ, maˬ muiˬ˗eu cawˬ pyeuꞈ meh. Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Maˬ muiˬ˗eu cawˬ cawˬ˗eu jeˬ˗ahˇ yahˇ (6:17)

• Aˬ dui maˬ noeˬ˗euˬ gaˇ maˬ muiˬ˗eu deuˬ nehˬ˗ehˇ aˬ joˆ˗ehˇ cawˬ cawˬ˗iˇ nya˗eu nga?

1 Gawˇliˬtu 15:33-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Nawˬ˗euˬ gʼaˇ duˬ maˬ muiˬ˗eu cawˬ deuˬ naˇ aˬ joˆ˗ehˇ gʼeh˗eu tsawˇ haˬ deuˬ nya? Aˬ jeˬ miˇ neh?

Ja ceuˬ 119:63-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Muiˬ˗eu cawˬ pyeuꞈ˗eu lehˇ aˬ joˆ˗ehˇ siˬ laˇ˗eu nga?

4. Aˬ dui nehˬ˗ehˇ maˬ duˇ˗eu deuˬ jiˇ muiˬ˗eu cawˬ pyeuꞈ nya

Jaˇliꞈ gaˇ hu˗euˬ Iˇsaˬleˬlaˆ˗euˬ tsawˇ haˬ pyeuꞈ˗eu Daˬbiˇ hawˇ˗eu Yawˇnaˆshaˬ˗ahˇ ngehˬ keuˆ taˬ˗euˬ meh. Yawˇnaˆshaˬ Daˬbiˇ taꞈ˗ehˇ aˇ kʼoꞈ gʼawˬ naˆ ni kʼawˆ dzehˬ˗awˇ sahˬ paˬ˗euˬ zaˬ yo pyeuꞈ kʼawꞈ ni, aˬ yawꞈ nyaꞈ gʼoeˇ dui dui˗eu meh. 1 Saˬmeuˬlaˆ 18:1-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ dui aˬ jeˬ miˇ neh yawˬ ha˗euˬ shehˆ hawˇ˗eu yawˬ ha nehˬ˗ehˇ dehꞈ˗eu aˇ tiˆ duˇ leˇ˗eu deuˬ nehˬ˗ehˇ tehꞈ˗ehˇ cawˬ cawˬ paˬ˗ehˇ maˬ gʼeh˗eu nga?

Loˇmaˆ 1:11, 12-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬhawˇbaˬ˗ahˇ gaˬ˗eu cawˬ deuˬ, tiˬ gʼaˬ tiˇ gʼaˬ aˬ joˆ˗ehˇ gʼaˬ biꞈ nya˗eu nga?

Biˬdiˬoˬ laꞈ kʼoeˇ˗euˬ mehˇ nmˇ zaˬ yo aˬ li heu gʼaˬ, maˬ noeˬ˗euˬ gaˇ cawˬ aˬ joˆ˗ehˇ za˗euˬ nga lehˇ haw. Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Maˬ noeˬ gaˇ cawˬ baw laˇ (5:06)

• Biˬdiˬoˬ heu˗ahˇ haw ngeh, Aˇkiˬ˗euˬ aˬ da aˬ ma dzaw nymˇ˗ahˇ jawˇ˗eu Aˇkiˬ˗euˬ cawˬ deuˬ nehˬ˗ehˇ taꞈ leˇ˗awˇ aˬ jeˬ miˇ neh kʼahˬ lahˇ˗eu nga?

• Dahˬ beh ngeh Aˇkiˬ aˬ jeˬ miˇ neh aˬ yawꞈ˗euˬ cawˬ deuˬ˗ahˇ ya leˇ˗eu nga?

• Aˇkiˬ muiˬ˗eu cawˬ aˬ joˆ˗ehˇ za nya˗euˬ nga?

5. Muiˬ˗eu cawˬ aˬ joˆ˗ehˇ pyeuꞈ nya˗eu nga?

Biˬdiˬoˬ: Muiˬ˗eu cawˬ deuˬ aˬ joˆ˗ehˇ gʼeh˗eu nga? (4:14)

Dawˬdaˬ 18:24 hawˇ˗eu 27:17˗ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Muiˬ˗eu cawˬ deuˬ tiˬ gʼaˬ tiˇ gʼaˬ aˬ joˆ˗ehˇ caw ba nehˬ˗eu nga?

• Nawˇ heu loꞈ˗ehˇ gʼeh˗eu cawˬ jawˇ ma laˬ? Maˬ jawˇ naˇ jiˇ jawˇ laˇ ni aˬ joˆ˗ehˇ ya jahˇ˗eu nga?

Piˇliˇpiˆ 2:4-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ dui muiˬ˗eu cawˬ jawˇ nya˗eu gʼaˇ duˬ, yawˬ ha jiˇ muiˬ˗eu cawˬ ya pyeuꞈ˗eu meh. Teu loꞈ˗ehˇ aˬ joˆ˗ehˇ jahˇ nya˗eu nga?

Kawˆ shawˆ

Aˬ dui cawˬ yaw gahˇ gahˇ˗ehˇ tseˇ naˇ, Yeˬhawˇbaˬ˗ahˇ laˬ kʼaˬ bi cehˇ leˇ˗awˇ aˬ dui˗ahˇ jiˇ gaˇ dahˇ tsoeˬ˗eu meh.

Ja sawˇ poˆ˗eu

• Aˬ dui neh cawˬ tseˇ˗euˬ jeˬ heu, aˬ jeˬ miˇ neh Yeˬhawˇbaˬ˗euˬ gʼaˇ duˬ aˇ yeˇ huiˬ˗eu nga?

• Aˬ dui aˬ joˆ˗ehˇ gʼeh˗eu cawˬ deuˬ˗ahˇ yahˇ paˬ˗ehˇ gʼeh˗eu nga?

• Muiˬ˗eu cawˬ deuˬ nehˬ˗ehˇ gʼoeˇ dzehˬ leˇ ni aˬ joˆ˗ehˇ ya jahˇ˗eu nga?

Haw lahˬ

Muiˬ˗eu cawˬ deuˬ aˬ dui shaˬ zahˬ˗ahˇ ya tahˬ puˬ ngeh aˬ joˆ˗ehˇ caw ba nehˬ nya˗eu nga lehˇ haw.

“Aˇ saˬ saˬ˗eu maˬ keuˆ le mi naˆ˗ehˇ cawˬ cawˬ˗eu jeˬ ziꞈ dah ni laˆ ziꞈ taˬ” (Loꞈ˗eu nymˇgoˇ, 2019 Tseˇ tiꞈ siˬ ba la)

Muiˬ˗eu cawˬ jawˇ laˇ nya ni aˬ jeˬ jeˇ ya jahˇ˗eu nga lehˇ haw.

“Muiˬ˗eu cawˬ jawˇ laˇ ni aˬ joˆ˗ehˇ ya jahˇ˗eu nga ?” (Zaˬ guˬ deuˬ naˇ haˬ˗eu jeˬ—Maˇ diˇ zmˬ nya˗eu dawˬ kʼoꞈ, Dmˬ 1, gaˇ kawˆ 8)

Iˇteuˬnehꞈ laꞈ kʼoeˇ cawˬ cawˬ˗eu jeˬ nehˬ˗ehˇ taꞈ leˇ˗awˇ aˬ jeˬ jeˇ˗ahˇ siˬ nya taˬ paˬ˗ehˇ gʼeh˗eu nga?

Iˇteuꞈnehꞈ laꞈ kʼoeˇ yaw gahˇ gahˇ˗ehˇ cawˬ cawˬ taꞈ (4:12)

Zaˬ yo aˬ li tiˬ gʼaˬ aˬ jeˬ miˇ neh cawˬ cawˬ˗eu jeˬ˗ahˇ tiˬ poˆ paˇ shaˇ noeˬ poˆ˗euˬ nga lehˇ haw˗eu gʼaˇ duˬ, “Ngaˬ˗ahˇ aˬ da tiˬ gʼaˬ bi jawˇ mawꞈ˗eu lehˇ miˇ˗a” lehˇ ehˇ˗eu gaˇ kawˆ˗ahˇ haw.

“Jaˇliꞈ tsawˇ haˬ˗euˬ dehꞈ ziˇ˗ahˇ laˆ paˇ” (Loꞈ˗eu nymˇgoˇ, 2012 Oeˬ siˬ ba la 1)

1. Byawˬ laˇ cehˇ laˇ˗eu jeˬ˗ahˇ tseˇ ngeh, aˬ jeˬ˗ahˇ noeˬ keuˆ paˬ˗ehˇ gʼeh˗eu nga?

Nawˇ gʼaˬ naˬ naˬ ngeh, aˬ jeˬ jahˇ gaˇ ya leˇ nya? Tiˬ deuˬ na iˇ kahˇ˗ahˇ jawˇ˗awˇ sahˬ boꞈ gui gaˇ ya leˇ˗awˇ, tiˬ deuˬ na naˇ dawˬ caˇ naˇ haˬ gaˇ, biˬdiˬoˬ haw gaˇ, iˇteuꞈnehꞈ mui gaˇ ya leˇ˗eu meh. Tiˬ deuˬ na dawˬ deh gʼa˗iˇ˗eu, iˇ diˬ diˬ niˇ gʼa˗iˇ˗eu, cawˬ deuˬ nehˬ˗ehˇ mui niˇ gʼa˗eu, heu deuˬ˗ahˇ ya leˇ˗eu meh. Aˬ dui yawˬ ha˗ahˇ byawˬ laˇ cehˇ laˇ˗eu aˬ geu jeˬ jahˇ˗eu maˬ kaˬ ‘Miˬyehˇ nui ma tsaˬ˗eu jeˬ’ ya bi pyeuꞈ meh. (Eˇpeˇsu 5:10) Aˬ jeˬ miˇ neh ehˇ naˇ, aˬ dui˗ahˇ bi byawˬ bi cehˇ laˇ˗eu gʼawˬ mya jeˬ laꞈ kʼoeˇ Yeˬhawˇbaˬ bye˗eu jeˬ ahˇ˗eu meh. Yaw jeˬ ma jeˬ, diˬ˗eu sehꞈ˗eu ceh˗eu, dehꞈ bahˬ dehꞈ muˆ˗eu, maw loˬ ja maw maw˗eu, heu deuˬ ahˇ˗eu meh. (Ja ceuˬ 11:5-ahˇ gui.) Toˆ˗ehˇ naˇ aˬ dui˗ahˇ bi byawˬ bi cehˇ laˇ˗eu jeˬ˗ahˇ yaw gahˇ gahˇ˗ehˇ aˬ joˆ˗ehˇ tseˇ nya˗eu nga?

Aˬ dui Yeˬhawˇbaˬ˗ahˇ gaˬ˗eu deuˬ nehˬ˗ehˇ cawˬ cawˬ naˇ, aˬ dui˗ahˇ bi muiˬ laˇ˗awˇ, byawˬ laˇ cehˇ laˇ˗eu jeˬ˗ahˇ yaw muiˬ˗ehˇ tseˇ ni caw ba nehˬ laꞈ˗eu meh. Aˬ dui Dzaw deuˆ 48-ahˇ ‘zaˬ siˬ tsawˇ gahˇ byah˗eu deuˬ nehˬ˗ehˇ cawˬ˗eu tsawˇ haˬ tsawˇ gahˇ ahˇ laˇ˗awˇ’ Miˬyehˇ˗euˬ zahˇ dawˬ˗ahˇ maˬ caw teh˗eu deuˬ nehˬ˗ehˇ cawˬ cawˬ˗eu tsawˇ haˬ “ya luˬ ya seˇ˗iˇ” meh lehˇ ya siˬ˗euˬ ma.—Dawˬdaˬ 13:20.