3. Yeˬhawˇbaˬ aˬ yawꞈ˗euˬ cawˬ deuˬ˗ahˇ aˬ jeˬ bi jahˇ mawꞈ˗eu nga?

Yeˬhawˇbaˬ yawˬ gʼaˬ na luꞈ˗ahˇ gaˬ kʼawꞈ ni, aˬ yawꞈ˗euˬ ehˇ dawˬ naˇ haˬ˗eu tsawˇ haˬ deuˬ nehˬ˗ehˇ tehꞈ˗ehˇ cawˬ cawˬ˗eu meh. (Ja ceuˬ 25:14) Yeˬhawˇbaˬ aˬ yawꞈ˗euˬ cawˬ deuˬ˗ahˇ aˬ yawꞈ neh yaw muiˬ meh lehˇ ehˇ˗eu jeˬ˗ahˇ bi mˇ mawꞈ˗awˇ, maˬ muiˬ˗a lehˇ ehˇ˗euˬ jeˬ˗ahˇ bi yahˇ mawꞈ˗eu meh. Tiˬ deuˬ na Miˬyehˇ˗euˬ zahˇ dawˬ˗ahˇ maˬ dehꞈ caw nya nya lehˇ noeˬ˗eu meh. Ehˇ kʼawꞈ Yeˬhawˇbaˬ gʼoˆ shaw nehˬ nya meh. Aˬ yawꞈ˗ahˇ gaˬ˗awˇ kʼaˇ gʼeh nya gaˇ neh aˬ yawꞈ ya leˇ˗eu jeˬ˗ahˇ leh jeh˗awˇ mˇ˗eu deuˬ˗ahˇ ha geuꞈ˗eu meh.—Ja ceuˬ 147:11; Gʼaˬkʼehˇ 10:34, 35.

Yawˬ gʼaˬ na luꞈ yaw sui yaw dawˇ deuˬ nehˬ˗ehˇ cawˬ cawˬ mawꞈ˗eu meh. Yeˬhawˇbaˬ jiˇ aˬ yawꞈ˗euˬ cawˬ deuˬ˗ahˇ yaw sui yaw dawˇ dawˇ˗ehˇ bi dehꞈ mawꞈ˗eu meh. Ehˇ kʼawꞈ aˬ dui maˬ sui maˬ dawˇ˗eu tsawˇ haˬ deuˬ tehꞈ˗ehˇ byah jiˇ taˬ˗euˬ miˇ tsaˬ˗ahˇ dehꞈ luꞈ˗eu miˇ neh, teu loꞈ˗ehˇ jahˇ˗eu yaw awˬ maˬ ngeuˇ˗a. Yawˬ jeˬ na luꞈ yaw sui yaw dawˇ dawˇ˗ehˇ mˇ˗eu heu naˇ, aˬ joˆ˗ehˇ gaˇ dahˇ tsoeˬ˗eu nga?

1. Aˬ dui yaw sui yaw dawˇ dawˇ˗ehˇ dehꞈ paˬ˗ehˇ gʼeh˗eu aˇ yeˇ kʼaˇ huiˬ˗eu jeˬ naˇ aˬ jeˬ nga?

Aˬ dui yaw sui yaw dawˇ dawˇ˗ehˇ dehꞈ naˇ, Yeˬhawˇbaˬ˗ahˇ gaˬ˗awˇ aˬ yawꞈ˗ahˇ yaw zeu baw˗eu lehˇ mˇ mawˇ˗eu jeˬ pyeuꞈ meh. Yeˬhawˇbaˬ aˬ dui noeˬ luꞈ mˇ luꞈ˗eu yawˬ jeˬ na luꞈ˗ahˇ siˬ nya˗eu meh. (Heˬbyehˇ 4:13) Aˬ yawꞈ aˬ dui yaw sui yaw dawˇ dawˇ˗ehˇ dehꞈ luꞈ gaˇ haw mawˇ˗awˇ, aˇ poeˬ taˬ baw˗eu meh. ‘Yawˬ haiˬ jeˬ mˇ˗eu tsawˇ haˬ˗ahˇ Yeˬhawˇbaˬ nui daˆ daˆ˗awˇ, yaw tsaˬ yaw dawˇ tsawˇ haˬ˗ahˇ aˬ yawꞈ jah coeˇ˗eu meh’ lehˇ Jaˇliꞈ ehˇ˗eu meh.—Dawˬdaˬ 3:32.

2. Aˬ dui aˬ geu ngeh ya sui ya dawˇ˗eu nga?

Yeˬhawˇbaˬ aˬ dui˗ahˇ ‘tiˬ gʼaˬ tiˇ gʼaˬ yaw tsaˬ yaw dawˇ jeˬ bi ngehˬ bi tmˇ’ mawꞈ˗eu meh. (Zaˬkaˬliˇ 8:16, 17) Heu aˬ jeˬ˗ahˇ ehˇ mawꞈ˗eu nga? Heu naˇ, aˬ dui nymˇ jiˇ laꞈ kʼoeˇ˗euˬ deuˬ hawˇ˗eu gaˇ mˇ cawˬ deuˬ nehˬ˗ehˇ ngehˬ cawˬ ngeh maˬ ehˇ, mehˇ nmˇ deuˬ hawˇ˗eu miˇ kʼahˬ˗ahˇ uˆ lahˇ˗eu aˬ yuiꞈ deuˬ nehˬ˗ehˇ ngehˬ cawˬ ngeh maˬ ehˇ, jaˬ myawꞈ maˬ myawꞈ˗eu uˬ taꞈ, maˬ ngeuˇ˗eu gaˇ kawˆ maˬ ehˇ nehˬ gaˇ ehˇ mawꞈ˗eu meh. Yaw sui yaw dawˇ tsawˇ haˬ deuˬ smˇ kʼoeˬ maˬ kʼoeˬ˗a, aˬ cawˬ˗ahˇ mehˇ shuiˇ maˬ shuiˇ dzaˬ˗a. (Uˬduˬtahˬ˗eu 19:11 hawˇ˗eu Eˇpeˇsu 4:28-ahˇ gui.) Kʼoeˇ naˇ aˬ yawꞈ maꞈ zahˇ sahˇ kʼoꞈ kʼaˇ jaˆ˗eu loꞈ˗ehˇ kawˬ doˆ˗eu meh. (Loˇmaˆ 13:5-7) Aˬ geu jeˬ mˇ˗eu maˬ kaˬ “aˬ myah luꞈ yaw muiˬ jeˬ tehꞈ˗ehˇ” mˇ˗eu meh.—Heˬbyehˇ 13:18.

3. Yaw sui yaw dawˇ dawˇ˗ehˇ dehꞈ˗eu heu naˇ, gaˇ dahˇ aˬ joˆ˗ehˇ tsoeˬ˗eu nga?

Aˬ dui yaw sui yaw dawˇ dawˇ˗ehˇ dehꞈ˗eu lehˇ aˬ cawˬ deuˬ siˬ nya taˬ naˇ, aˬ yawꞈ maꞈ aˬ dui˗ahˇ nui ma taˬ˗eu meh. Aˇ muˇ laꞈ kʼoeˇ jiˇ nymˇ jiˇ laꞈ kʼoeˇ˗euˬ deuˬ˗ahˇ nui ma taˬ˗eu loꞈ˗ehˇ tiˬ gʼaˬ tiˇ gʼaˬ nui ma taˬ coeˇ˗eu meh. Kʼoeˇ naˇ aˬ dui˗euˬ siˬ nya˗eu nui ma jiˇ shawˇ jehˆ ni gʼeh˗eu uˬ taꞈ, “aˬ dui˗euˬ ka kʼoꞈ˗eu gʼaˬ pyeuꞈ˗eu Miˬyehˇ˗euˬ gaˇ kawˆ mehˬ˗eu tsoˆ˗eu heu aˇ naˆ ni muiˬ˗eu jeˬ pyeuꞈ˗eu” gaˇ kawˆ aˬ cawˬ deuˬ˗ahˇ mawˇ leˇ˗awˇ, aˬ yawꞈ maꞈ jiˇ Yeˬhawˇbaˬ˗ahˇ uˬ duˬ tahˬ mawꞈ laˇ˗eu kʼawꞈ pyeuꞈ nya meh.—Tiˇtuˆ 2:10.

Naꞈ suiˇ ni dzaw

4. Yeˬhawˇbaˬ yaw sui yaw dawˇ dawˇ˗ehˇ dehꞈ˗eu deuˬ˗ahˇ nui kʼahˇ shiˇ

Ja ceuˬ 44:21 hawˇ˗eu Maˬlaˬkiˇ 3:16-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ dui Yeˬhawˇbaˬ˗ahˇ maˬ bi siˬ ni laˆ zaꞈ taˬ nya ma lehˇ aˬ jeˬ miˇ neh maˬ ya noeˬ˗eu nga?

• Tiˬ poˆ na yaw awˬ maˬ ngeuˇ kʼawꞈ, aˬ dui kʼaˇ ngeuˇ˗eu loꞈ˗ehˇ dawˇ coe ni ngehˬ gaˇ Yeˬhawˇbaˬ aˬ joˆ˗ehˇ noeˬ˗eu nga?

5. Aˬ myah luꞈ yaw sui yaw dawˇ dawˇ˗ehˇ mˇ

Biˬdiˬoˬ: Aˬ dui˗ahˇ laˬ kʼaˬ bi cehˇ˗eu aˬ geu jeˬ nga?—Siˬ nya˗eu nui ma shawˇ˗eu (2:32)

Heˬbyehˇ 13:18-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ dui nymˇ jiˇ laꞈ kʼoeˇ, yaw sui yaw dawˇ dawˇ˗ehˇ aˬ joˆ˗ehˇ mˇ nya˗eu nga?

• Aˬ dui gaˇ mˇ duˬ maˬ ngeuˇ naˇ sahˬ boꞈ dzaw nymˇ˗ahˇ jawˇ ngeh, yaw sui yaw dawˇ dawˇ˗ehˇ aˬ joˆ˗ehˇ mˇ nya˗eu nga?

• Aˬ dui aˬ geu ngeh yaw sui yaw dawˇ dawˇ˗ehˇ paˇ mˇ nya nga siˬ?

6. Yaw sui yaw dawˇ dawˇ˗ehˇ dehꞈ˗eu heu naˇ, aˬ dui˗ahˇ gaˇ dahˇ tsoeˬ

Yaw sui yaw dawˇ dawˇ˗ehˇ dehꞈ˗eu baˬ da neh shaˬ zahˬ ya puˬ˗eu kʼawꞈ pyeuꞈ nya meh. Ehˇ kʼawꞈ, aˇ nah naˇ heu loꞈ˗ehˇ dehꞈ˗eu heu kʼaˇ muiˬ˗eu jeˬ pyeuꞈ ngaˇ lehˇ ya mawˇ meh. Ja ceuˬ 34:12-16-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yaw sui yaw dawˇ dawˇ˗ehˇ dehꞈ˗eu heu, dehꞈ ziˇ˗ahˇ aˬ joˆ˗ehˇ bi muiˬ daˆ laˇ nya˗eu nga?

1. 1. Kʼaˬ dzeˇ zaˬ hawˇ˗eu miˬ zaˬ yaw sui yaw dawˇ dawˇ˗ehˇ dehꞈ naˇ, nymˇ jiˇ ziꞈ dah ni gʼeh laˇ

2. 2. Yaw sui yaw dawˇ dawˇ˗ehˇ dehꞈ˗eu gaˇ mˇ zaˬ deuˬ˗ahˇ baw leˬ deuˬ nui ma taˬ coeˇ

3. 3. Yaw sui yaw dawˇ dawˇ˗ehˇ dehꞈ˗eu zaˬ lahˇ deuˬ, miˇ kʼahˬ˗ahˇ uˆ lahˇ˗eu aˬ yuiꞈ deuˬ˗euˬ mehˬ shi tsawˇ myahˇ muiˬ

Kawˆ shawˆ

Yeˬhawˇbaˬ aˬ yawꞈ˗euˬ cawˬ deuˬ˗ahˇ aˬ geu ngeh maˬ kaˬ, yaw sui yaw dawˇ dawˇ˗ehˇ bi ngehˬ bi mˇ mawꞈ˗eu meh.

Ja sawˇ poˆ˗eu

• Aˬ dui aˬ jeˬ jeˇ˗ahˇ ya sui ya dawˇ˗eu nga?

• Aˬ dui gaˇ kawˆ tiˬ jeˬ na˗ahˇ laˆ zaꞈ taˬ nya ma lehˇ aˬ jeˬ miˇ neh noeˬ paˬ˗ehˇ maˬ gʼeh˗eu nga?

• Nawˬ˗ahˇ aˬ jeˬ miˇ neh aˬ myah luꞈ yaw sui yaw dawˇ dawˇ˗ehˇ dehꞈ mawꞈ nya?

Haw lahˬ

Zaˬ deuˬ yaw sui yaw dawˇ dawˇ˗ehˇ dehꞈ nya ni, aˬ da aˬ ma deuˬ aˬ joˆ˗ehˇ mehˬ nehˬ nya˗eu nga?

Kʼaˇ ngeuˇ˗eu loꞈ˗ehˇ ngehˬ (1:44)

Ehˇ taˬ˗euˬ loꞈ˗ehˇ jaˆ˗eu heu naˇ, aˬ joˆ˗ehˇ gaˇ dahˇ tsoeˬ˗eu nga?

Saˇ jaˇ dzaˬ taˬ˗euˬ loꞈ˗ehˇ mˇ˗eu deuˬ guiˬ lahˬ za (9:09)

Pyuˇ˗ahˇ maˬ tsaˬ maˬ dawˇ gaˇ zmˬ˗iˇ kʼawꞈ, aˬ dui aˬ jeˬ miˇ neh kawˬ ya doˆ˗eu nga lehˇ haw.

“Kawˬ ya doˆ ngaˇ laˬ?” (Loꞈ˗eu nymˇgoˇ, 2011 Gʼoeˬ siˬ ba la 1)

Aˬ cawˬ˗ahˇ myawꞈ dzaˬ shuiˇ dzaˬ yaꞈ˗euˬ tsawˇ haˬ tiˬ gʼaˬ, aˬ jeˬ miˇ neh yaw sui yaw dawˇ dawˇ˗ehˇ dehꞈ laˇ˗euˬ nga lehˇ haw.

“Yeˬhawˇbaˬ gʼawˬ shaˬ gaˬ˗awˇ iˬ baˇ pyehˬ nehˬ laꞈ˗eu lehˇ ngaˇ ya siˬ˗euˬ ma” (Loꞈ˗eu nymˇgoˇ, 2015 Ngaˬ siˬ ba la 1)

2. Aˬ dui cawˬ tseˇ˗eu jeˬ, Yeˬhawˇbaˬ˗ahˇ aˬ joˆ˗ehˇ gʼeh leˇ˗eu nga?

Yeˬhawˇbaˬ aˬ suˇ gʼaˬ nehˬ˗ehˇ cawˬ cawˬ˗eu lehˇ yaw muiˬ˗ehˇ tseˇ˗eu meh. ‘Miˬyehˇ˗euˬ dawˬ naˇ haˬ˗eu deuˬ˗aˬ Miˬyehˇ˗euˬ cawˬ pyeuꞈ’ meh. (Ja ceuˬ 25:14) Aˬ dui Yeˬhawˇbaˬ˗ahˇ maˬ gaˬ˗eu deuˬ nehˬ˗ehˇ cawˬ cawˬ naˇ, Yeˬhawˇbaˬ˗ahˇ aˬ joˆ˗ehˇ gʼeh leˇ paˬ nga? Aˬ yawꞈ nui ma cawˆ dui dui˗eu yaw duˬ baw meh. (Yaˬkoˆ 4:4-ahˇ gui.) Ehˇ kʼawꞈ aˬ dui maˬ muiˬ˗eu cawˬ deuˬ˗ahˇ yahˇ˗awˇ Yeˬhawˇbaˬ nehˬ˗ehˇ gʼoeˇ leˇ ni leh jeh˗eu uˬ taꞈ, aˬ yawꞈ˗ahˇ gaˬ˗eu deuˬ nehˬ˗ehˇ cawˬ cawˬ naˇ, aˬ yawꞈ nui kʼahˇ shiˇ˗awˇ aˬ dui˗ahˇ aˬ yawꞈ˗euˬ cawˬ bi pyeuꞈ˗eu meh.—Ja ceuˬ 15:1-4.