1. Yeˬsuˇ aˬ suˇ gʼaˬ nga?

Yeˬsuˇ mˬ kʼoeˇ taˆ jawˇ˗eu baoˬ huiˬ˗eu yaw sahˇ tiˬ gʼaˬ pyeuꞈ˗eu meh. Yeˬhawˇbaˬ tiˬ jeˬ˗ahˇ˗iˬ maˬ beh mi naˆ˗ehˇ Yeˬsuˇ˗ahˇ jeˬ hu beh˗euˬ miˇ neh, aˬ yawꞈ˗ahˇ ‘kʼaˇ beh taˬ˗euˬ jeˬ dawˬ tawˆ luꞈ kʼoeˇ taˆ dehꞈ beh beh le˗euˬ gʼaˬ’ lehˇ kuˇ˗eu meh. (Gawˇlawˇsehˇ 1:15) Yeˬhawˇbaˬ˗euˬ aˬ laꞈ neh do lehˇ beh˗euˬ gʼaˬ naˇ Yeˬsuˇ tiˬ gʼaˬ tehꞈ miˇ neh, Jaˇliꞈ Yeˬsuˇ˗ahˇ “Zaˬmaˇ tiˬ gʼaˬ tehꞈ” lehˇ jiˇ kuˇ˗eu meh. (Yoˇhaˬ 3:16) Yeˬsuˇ aˬ yawꞈ Aˬda˗euˬ dawˬ peh jawˇ˗awˇ, boeˬ boeˬ luˆ luˆ yawˬ jeˬ na luꞈ˗ahˇ beh gaˇ caw ba˗euˬ meh. (Dawˬdaˬ 8:30-ahˇ gui.) Yeˬsuˇ Yeˬhawˇbaˬ nehˬ˗ehˇ aˬ myah luꞈ gʼoeˇ˗eu meh. Aˬ yawꞈ saˇ jaˇ ziꞈ˗eu laꞈ kʼoeˇ Miˬyehˇ˗euˬ dawˬ hawˇ˗eu dawˬ mehˬ dawˬ tsoˆ tsaꞈ gaˬ˗eu miˇ neh, Yeˬsuˇ˗ahˇ “Dawˬ” lehˇ jiˇ kuˇ˗eu meh.—Yoˇhaˬ 1:14.

Dahˬ beh˗euˬ nyiˬ dzeˇ zaˬ pyeuꞈ˗eu Aˬdaˬ hawˇ˗eu Eˇbaˆ Miˬyehˇ˗euˬ ehˇ dawˬ leuˇ˗euˬ miˇ neh, miˇ tsaˬ kʼoeˇ taˆ iˬ baˇ hawˇ˗eu shaˬ˗eu zahˬ˗eu jeˬ uˬ taꞈ, shiˇ˗eu jeˬ jiˇ jaˆ laˇ˗euˬ meh.a Ehˇ kʼawꞈ aˬ dui noeˬ tmˬ˗eu jeˬ jaˆ luꞈ meh siˬ. Yeˬhawˇbaˬ aˬ dui˗ahˇ iˬ baˇ hawˇ˗eu shiˇ˗eu jeˬ˗ahˇ neh bi buˬ˗iˇ˗eu gʼaˇ duˬ, aˬ yawꞈ˗euˬ Zaˬmaˇ Yeˬsuˇ Ka li bi shiˇ dah le˗euˬ meh. Yeˬsuˇ aˬ dui˗ahˇ ka kʼoꞈ˗eu gʼaˇ duˬ, aˬ yawꞈ˗euˬ dehꞈ ziˇ lawˇ nehˬ˗euˬ meh lehˇ Jaˇliꞈ ehˇ˗eu meh. Ka kʼoꞈ˗eu jeˬ heu naˇ, tiˬ gʼaˬ paˬ˗ahˇ bi pyehˬ˗eu gʼaˇ duˬ ya biꞈ˗eu aˇ poeˬ pyeuꞈ meh. Yeˬsuˇ aˬ yawꞈ˗euˬ byah kuꞈ˗eu dehꞈ ziˇ neh aˬ dui˗ahˇ zeuˇ kʼoꞈ˗euˬ meh. (Maꞈtehˬ 20:28-ahˇ gui.) Yeˬsuˇ miˇ tsaˬ kʼoeˇ taˆ mˬ maˬ maˬ byaˆ zaˇ ziˇ dehꞈ nya kʼawꞈ nui ma keuˆ˗eu laꞈ kʼoeˇ aˬ yawꞈ˗euˬ dehꞈ ziˇ lawˇ nehˬ˗euˬ miˇ neh, aˬ dui Aˬdaˬ hawˇ˗eu Eˇbaˆ neh laˆ smˇ˗euˬ yawˬ jeˬ na luꞈ˗ahˇ za kʼoꞈ˗eu gaˇ ma dahˇ laˇ˗euˬ meh. Yeˬsuˇ aˬ yawꞈ hawˇ˗eu Yeˬhawˇbaˬ aˬ dui˗ahˇ aˇ naˆ ni gaˬ˗eu lehˇ jiˇ bi mawˇ laꞈ˗euˬ meh. Heu kawˆ naˇ aˬ dui˗ahˇ Yeˬsuˇ neh shiˇ˗euˬ jeˬ˗ahˇ aˇ poeˬ taˬ baw mawꞈ dzehˬ laˇ ni caw ba nehˬ˗eu meh.

1. Yeˬsuˇ neh shiˇ˗euˬ jeˬ nymˬ˗mˇ aˬ dui˗ahˇ gaˇ dahˇ aˬ joˆ˗ehˇ tsoeˬ˗eu nga?

Aˬ dui iˬ baˇ zaˬ pyeuꞈ˗eu miˇ neh Yeˬhawˇbaˬ maˬ ya leˇ˗eu gʼawˬ mya jeˬ mˇ˗eu meh. Ehˇ kʼawꞈ, aˬ dui yawˬ ha neh mˇ˗euˬ jeˬ˗ahˇ nui ma cawˆ˗awˇ, Yeˬsuˇ Ka li˗ahˇ gʼoe˗eu laꞈ kʼoeˇ Yeˬhawˇbaˬ˗ahˇ iˬ baˇ shaˇ pyehˬ˗eu uˬ taꞈ, iˬ baˇ teu˗ahˇ maˬ mˇ poˆ˗iˇ ni kʼaˇ gʼeh nya gaˇ neh leh jeh naˇ, Yeˬhawˇbaˬ nehˬ˗ehˇ cawˬ cawˬ nya˗eu meh. (1 Yoˇhaˬ 2:1) “Tsawˇ haˬ zaˬ˗euˬ iˬ baˇ gʼaˇ duˬ Ka li tiˬ poˆ tehꞈ˗ehˇ kamˇ shiˇ˗euˬ meh. Aˬ yawꞈ kamˇ shiˇ˗euˬ kʼoeˇ˗aˬ, iˬ baˇ zaˬ deuˬ˗ahˇ Miˬyehˇ jawˇ gaˇ sheuˬ gʼeh˗eu gʼaˇ duˬ, iˬ baˇ maˬ ahˇ˗eu tsawˇ haˬ tiˬ gʼaˬ iˬ baˇ zaˬ deuˬ˗euˬ dah zaˇ kamˇ shiˇ˗euˬ jeˬ pyeuꞈ” meh lehˇ Jaˇliꞈ ehˇ˗eu meh.—1 Beˬtuˆluˆ 3:18.

2. Yeˬsuˇ neh shiˇ˗euˬ jeˬ mehˬ hu paw aˬ dui˗ahˇ gaˇ dahˇ aˬ joˆ˗ehˇ tsoeˬ˗eu nga?

Yeˬhawˇbaˬ Yeˬsuˇ˗ahˇ byah kuꞈ˗eu dehꞈ ziˇ bi lawˇ nehˬ le˗euˬ miˇ neh, “Zaˬmaˇ˗ahˇ kʼaˇ jah˗eu tsawˇ haˬ maˬ ya cawˆ˗iˇ˗eu uˬ taꞈ, mˬ maˬ maˬ byaˆ zaˇ ziˇ dehꞈ˗eu jeˬ za˗eu meh.” (Yoˇhaˬ 3:16) Yeˬsuˇ neh mˇ nehˬ laꞈ˗euˬ jeˬ baˬ da neh, Yeˬhawˇbaˬ gʼawˬ myahˇ maˬ gʼeh˗ehˇ Aˬdaˬ ehˇ dawˬ leuˇ˗euˬ miˇ neh pyeuꞈ laˇ˗euˬ maˬ muiˬ˗eu jeˬ dawˬ tawˆ luꞈ˗ahˇ laˆ byoˆ jiˇ˗eu meh. Teu miˇ neh aˬ dui Yeˬsuˇ neh ka kʼoꞈ˗euˬ jeˬ˗ahˇ jah naˇ, miˇ tsaˬ Baˬlaˬdiˇsuˆ˗ahˇ mˬ maˬ maˬ byaˆ zaˇ ziˇ laˬ kʼaˬ tiˬ cehˇ ya dehꞈ gʼeh meh.—Iˇsaˬyaˇ 65:21-23.

Naꞈ suiˇ ni dzaw

3. Yeˬsuˇ neh shiˇ˗euˬ jeˬ aˬ dui˗ahˇ iˬ baˇ hawˇ˗eu shiˇ˗eu jeˬ˗ahˇ neh bi buˬ˗iˇ

Biˬdiˬoˬ: Yeˬsuˇ aˬ jeˬ miˇ neh ya shiˇ˗euˬ nga?—Aˇ tsehˆ 1 (2:01)

• Aˬdaˬ Miˬyehˇ˗euˬ ehˇ dawˬ˗ahˇ maˬ naˇ haˬ˗euˬ miˇ neh, aˬ jeˬ ya smˇ˗euˬ nga?

Loˇmaˆ 5:12-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬdaˬ neh mˇ˗euˬ iˬ baˇ aˬ cawˬ˗ahˇ aˬ joˆ˗ehˇ deuˬ˗eu nga?

Yoˇhaˬ 3:16-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬhawˇbaˬ aˬ yawꞈ˗euˬ Zaˬmaˇ˗ahˇ miˇ tsaˬ kʼoeˇ taˆ aˬ jeˬ miˇ neh bi oe˗euˬ nga?

1. 1. Byah kuꞈ˗eu tsawˇ haˬ pyeuꞈ˗eu Aˬdaˬ Miˬyehˇ ehˇ dawˬ maˬ naˇ haˬ˗eu miˇ neh, tsawˇ haˬ zaˬ˗ahˇ iˬ baˇ hawˇ˗eu shiˇ˗eu jeˬ keuˆ le

2. 2. Byah kuꞈ˗eu tsawˇ haˬ pyeuꞈ˗eu Yeˬsuˇ Miˬyehˇ˗euˬ ehˇ dawˬ naˇ haˬ˗eu miˇ neh, tsawˇ haˬ zaˬ byah kuꞈ˗eu dehꞈ ziˇ hawˇ˗eu mˬ maˬ maˬ byaˆ zaˇ ziˇ dehꞈ˗eu jeˬ za nya

4. Yeˬsuˇ neh shiˇ˗euˬ jeˬ˗ahˇ neh tsawˇ haˬ zaˬ yawˬ gʼaˬ na luꞈ gaˇ dahˇ tsoeˬ jeˬ za nya

Biˬdiˬoˬ: Yeˬsuˇ aˬ jeˬ miˇ neh ya shiˇ˗euˬ nga?—Aˇ tsehˆ 2 (2:00)

• Tsawˇ haˬ tiˬ gʼaˬ neh shiˇ˗euˬ jeˬ, tsawˇ haˬ yawˬ gʼaˬ na luꞈ˗ahˇ aˬ joˆ˗ehˇ gaˇ dahˇ tsoeˬ nya˗eu nga?

1 Tiˆmoˇseˬ 2:5, 6-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Byah kuꞈ˗eu tsawˇ haˬ pyeuꞈ˗eu Aˬdaˬ tsawˇ haˬ zaˬ˗ahˇ iˬ baˇ hawˇ˗eu shiˇ˗eu jeˬ bi keuˆ le˗euˬ meh. Yeˬsuˇ jiˇ byah kuꞈ˗eu tsawˇ haˬ pyeuꞈ˗eu meh. Teu miˇ neh aˬ yawꞈ aˬ jeˬ jahˇ nya˗eu nga?

5. Ka kʼoꞈ˗eu jeˬ nawˬ˗ahˇ Yeˬhawˇbaˬ neh biꞈ˗euˬ laꞈ sawˬ pyeuꞈ

Yeˬhawˇbaˬ˗euˬ cawˬ deuˬ ka kʼoꞈ˗eu jeˬ˗ahˇ yawˬ ha neh za˗euˬ laꞈ sawˬ lehˇ sawˇ˗eu meh. Yaw jeˬ ma jeˬ tiˬ hmˬ˗ahˇ haw˗eu gʼaˇ duˬ, Gaˬlaˬtiˆ 2:20-ahˇ gui. Kʼoeˇ naˇ naˇ haˬ˗eu jeˬ heu˗ahˇ ja sawˇ.

• Gʼaˬ kʼehˇ Pawˇluˆ ka kʼoꞈ˗eu jeˬ˗ahˇ Miˬyehˇ neh biꞈ˗euˬ laꞈ sawˬ pyeuꞈ˗eu lehˇ sawˇ˗eu lehˇ aˬ joˆ˗ehˇ siˬ laˇ˗eu nga?

Aˬdaˬ iˬ baˇ mˇ˗euˬ miˇ neh, aˬ yawꞈ tehꞈ˗ehˇ maˬ ngeuˇ˗eu aˬ yawꞈ˗euˬ oeˬ paˬ oeˬ ma dawˬ tawˆ luꞈ ya shiˇ˗eu meh. Ehˇ kʼawꞈ Yeˬhawˇbaˬ aˬ dui˗euˬ gʼaˇ duˬ, aˬ yawꞈ˗euˬ Zaˬmaˇ bi shiˇ dah le˗euˬ miˇ neh, aˬ dui mˬ maˬ maˬ pyaˆ zaˇ ziˇ laˬ kʼaˬ tiˬ cehˇ dehꞈ gʼeh nya˗eu meh.

Jaˇliꞈ aˇ deuˆ heu deuˬ˗ahˇ gui ngeh, Yeˬhawˇbaˬ aˬ yawꞈ˗euˬ Zaˬmaˇ naˇ dui dui luꞈ gaˇ ya mawˇ ngeh aˬ yawꞈ˗ahˇ aˬ joˆ˗ehˇ gʼeh leˇ paˬ nga lehˇ shaˇ noeˬ haw. Yoˇhaˬ 19:1-7, 16-18-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬhawˇbaˬ hawˇ˗eu Yeˬsuˇ nawˬ˗euˬ gʼaˇ duˬ heu naˆ ni mˇ nehˬ laꞈ˗euˬ lehˇ ya siˬ ngeh, nawˬ˗ahˇ aˬ joˆ˗ehˇ gʼeh laˇ nya?

Kawˆ shawˆ

Yeˬsuˇ aˬ dui˗euˬ gʼaˇ duˬ shiˇ dah nehˬ laꞈ˗euˬ miˇ neh, Yeˬhawˇbaˬ aˬ dui˗ahˇ iˬ baˇ pyehˬ nehˬ laꞈ nya˗awˇ, aˬ dui mˬ maˬ maˬ byaˆ zaˇ ziˇ laˬ kʼaˬ tiˬ cehˇ dehꞈ gʼeh nya˗eu aˬ kawˬ˗aˬ za˗euˬ ma.

Ja sawˇ poˆ˗eu

• Yeˬsuˇ aˬ jeˬ miˇ neh ya shiˇ˗euˬ nga?

• Yeˬsuˇ byah kuꞈ˗eu tsawˇ haˬ pyeuꞈ˗eu miˇ neh, tsawˇ haˬ zaˬ˗euˬ gʼaˇ duˬ aˬ jeˬ jahˇ nehˬ nya˗eu nga?

• Yeˬsuˇ neh shiˇ˗euˬ jeˬ, nawˬ˗ahˇ gaˇ dahˇ aˬ joˆ˗ehˇ tsoeˬ˗eu nga?

Haw lahˬ

Yeˬsuˇ˗euˬ byah kuꞈ˗eu dehꞈ ziˇ˗ahˇ aˬ jeˬ miˇ neh ka kʼoꞈ˗eu jeˬ lehˇ kuˇ˗eu nga lehˇ haw.

“Yeˬsuˇ neh lawˇ nehˬ˗euˬ jeˬ tsawˇ haˬ gʼawˬ mya ni˗ahˇ aˬ joˆ˗ehˇ ka kʼoꞈ˗eu nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Iˬ baˇ hawˇ˗eu shiˇ˗eu jeˬ˗ahˇ neh buˬ˗iˇ nya˗eu gʼaˇ duˬ, aˬ dui aˬ jeˬ ya jahˇ˗eu nga lehˇ haw.

“Yeˬsuˇ aˬ joˆ˗ehˇ ka kʼoꞈ˗euˬ nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Yeˬhawˇbaˬ huiˬ˗eu iˬ baˇ˗ahˇ pyehˬ nehˬ ngaˇ laˬ?

“Jaˇliꞈ gaˇ kawˆ naˇ haˬ˗eu jeˬ˗euˬ dawˬ kʼoꞈ” (Loꞈ˗eu nymˇgoˇ, 2013 Ngaˬ siˬ ba la 1)

Zaˬ yo aˬ li tiˬ g’aˬ Yeˬsuˇ neh lawˇ nehˬ-euˬ jeˬ˗ahˇ dzaw geuꞈ-euˬ baˬ da neh aˬ yawꞈ-euˬ dehꞈ ziˇ aˬ joˆ-ehˇ dehꞈ poˆ dehꞈ paˇ nya˗euˬ nga lehˇ haw.

“Ngaˇ diˬ˗eu ceh˗eu jeˬ˗euˬ zaˬ kʼaˆ maˬ paˇ pyeuꞈ” (Iˇteuꞈnehꞈ laꞈ kʼoeˇ˗euˬ gaˇ kawˆ)

1. Miˬyehˇ hawˇ˗eu Yeˬsuˇ neh aˬ dui˗euˬ gʼaˇ duˬ mˇ nehˬ laꞈ˗euˬ jeˬ˗ahˇ, guiˬ lahˬ aˬ joˆ˗ehˇ huiˬ nya˗eu nga?

‘Zaˬmaˇ˗ahˇ kʼaˇ jah˗eu tsawˇ haˬ mˬ maˬ maˬ byaˆ zaˇ ziˇ dehꞈ˗eu jeˬ za˗eu meh’ lehˇ Jaˇliꞈ laꞈ kʼoeˇ saˇ jaˇ dzaˬ taˬ˗euˬ meh. (Yoˇhaˬ 3:16) Aˬ dui jah˗eu lehˇ aˬ joˆ˗ehˇ mˇ doˆ laꞈ nya˗eu nga? Aˬ dui jah˗eu jeˬ aˬ dui neh tseˇ˗euˬ jeˬ hawˇ˗eu mˇ˗eu shaˇ˗eu jeˬ˗ahˇ neh ya bi mawˇ laˇ˗eu meh. (Yaˬkoˆ 2:17) Aˬ dui ngehˬ˗eu jeˬ hawˇ˗eu mˇ˗eu jeˬ neh jah˗eu lehˇ mˇ doˆ laꞈ ngeh tiˬ jawˇ, Yeˬhawˇbaˬ hawˇ˗eu Yeˬsuˇ nehˬ˗ehˇ gʼoeˇ dzehˬ laˇ˗eu meh.—Yoˇhaˬ 14:21-ahˇ gui.