Tiˬ paw˗iˬ gʼaˬ baꞈ maˬ baꞈ˗eu heu naˇ, aˬ jeˬ˗ahˇ ehˇ˗eu nga?

Yeˬsuˇ aˬ yawꞈ˗euˬ mehˬ nah caw teh˗eu deuˬ˗ahˇ “miˇ tsaˬ heu˗ahˇ naw maꞈ maˬ paˇ taꞈ meh” lehˇ ehˇ nehˬ˗euˬ meh. (Yoˇhaˬ 15:19) Miˇ tsaˬ nehˬ˗ehˇ maˬ taꞈ˗eu lehˇ ehˇ˗eu heu naˇ, miˇ kʼahˬ˗ahˇ uˆ lahˇ˗eu jeˬ˗ahˇ maˬ ehˇ, guiˇ deuˆ˗eu jeˬ˗ahˇ maˬ ehˇ, tiˬ paw˗iˬ gʼaˬ baꞈ maˬ baꞈ gaˇ ehˇ mawꞈ˗eu meh. Tiˬ paw˗iˬ gʼaˬ baꞈ maˬ baꞈ naˇ, aˬ cawˬ yaw doeˇ ehˇ laˇ˗eu kʼawꞈ pyeuꞈ nya˗eu miˇ neh, heu loꞈ˗ehˇ jahˇ˗eu heu naˇ yaw awˬ maˬ ngeuˇ˗a. Toˆ˗ehˇ naˇ aˬ dui Yeˬhawˇbaˬ Miˬyehˇ˗ahˇ saˇ jaˇ ziꞈ˗eu laꞈ kʼoeˇ tiˬ paw˗iˬ gʼaˬ baꞈ maˬ baꞈ ni aˬ joˆ˗ehˇ jawˇ nya˗eu nga?

1. Ka li zaˬ maˇ diˇ deuˬ miˇ kʼahˬ˗ahˇ uˆ lahˇ˗eu jeˬ˗ahˇ aˬ joˆ˗ehˇ noeˬ˗eu nga?

Ka li zaˬ deuˬ miˇ kʼahˬ˗ahˇ uˆ lahˇ˗eu sahˬ paˬ sahˬ ma deuˬ˗ahˇ yaw zeu baw˗eu meh. Aˬ dui Yeˬsuˇ neh “Loˇmaˆ sahˬ paˬ˗euˬ myawˬ Loˇmaˆ sahˬ paˬ˗ahˇ biꞈ”˗awˬ lehˇ ehˇ˗euˬ dawˬ˗ahˇ mˇ caw˗eu ma. Teu miˇ neh aˬ dui miˇ kʼahˬ˗euˬ zahˇ sahˇ kʼoꞈ˗ahˇ mˇ caw˗awˇ kawˬ lawˬ muˇ jiˇ doˆ˗eu ma. (Maˬkuˆ 12:17) Sahˬ paˬ sahˬ ma deuˬ˗aˬ, Yeˬhawˇbaˬ neh aˬ kawˬ˗aˬ biꞈ˗awˇ bi uˆ lahˇ taˬ˗euˬ meh lehˇ Jaˇliꞈ ehˇ˗eu meh. (Loˇmaˆ 13:1) Ehˇ kʼawꞈ aˬ yawꞈ maꞈ kʼaˇ ngeuˇ˗eu jeˬ jahˇ nya˗eu maˬ ngeuˇ˗a. Aˬ yawꞈ maꞈ˗euˬ baoˬ Miˬyehˇ taꞈ˗ehˇ teˬ dzehˬ meh lehˇ aˬ dui siˬ nya ma. Tsawˇ haˬ zaˬ˗euˬ shaˬ zahˬ˗ahˇ Miˬyehˇ hawˇ˗eu mˬ taˆ jaˆ˗eu Miˬyehˇ˗euˬ Miˇkʼahˬ maˬ ngeuˇ naˇ maˬ laˆ byoˆ nehˬ nya˗a lehˇ aˬ dui jah˗eu ma.

2. Aˬ dui tiˬ paw tiˇ paw gʼaˬ baꞈ maˬ baꞈ˗eu lehˇ aˬ joˆ˗ehˇ mˇ doˆ laꞈ nya˗eu nga?

Yeˬsuˇ loꞈ˗ehˇ duˇ ni aˬ dui jiˇ miˇ kʼahˬ˗ahˇ uˆ lahˇ˗eu gaˇ kawˆ˗ahˇ maˬ taꞈ maˬ gm leˇ. Tsawˇ haˬ deuˬ Yeˬsuˇ zahˬ leˇ paˬ˗ehˇ gʼeh˗eu jeˬ jahˇ nya gaˇ ya mawˇ ngeh, aˬ yawꞈ˗ahˇ sahˬ paˬ bi geuꞈ˗eu lehˇ leh jeh˗euˬ meh. Ehˇ kʼawꞈ Yeˬsuˇ maˬ geuꞈ˗aˬ. (Yoˇhaˬ 6:15) Aˬ jeˬ miˇ neh nga? Yeˬsuˇ “ngaˬ˗euˬ miˇ kʼahˬ˗aˬ, miˇ tsaˬ heu˗ahˇ maˬ taꞈ” lehˇ ehˇ˗eu meh. (Yoˇhaˬ 18:36) Aˬ dui jiˇ Yeˬsuˇ˗euˬ zaˬ lahˇ pyeuꞈ˗eu miˇ neh, tiˬ paw˗iˬ gʼaˬ baꞈ maˬ baꞈ˗eu lehˇ gʼawˬ mya paw dzeˇ dzaˬ˗ahˇ neh mˇ mawˇ˗eu ma. Yaw jeˬ ma jeˬ, aˬ dui guiˇ maˬ deuˆ˗iˇ. (Iˇsaˬyaˇ 2:4-ahˇ gui.) Aˬ dui miˇ kʼahˬ˗euˬ dah zaˇ pyeuꞈ˗eu paˇ loˬ paˇ lehˇ˗ahˇ yaw zeu baw kʼawꞈ, teu˗ahˇ maˬ taˬ huiˬ. (1 Yoˇhaˬ 5:21) Aˬ dui miˇ kʼahˬ˗ahˇ uˆ lahˇ˗eu aˬ yuiꞈ deuˬ˗ahˇ tiˬ paw˗iˬ gʼaˬ baꞈ maˬ baꞈ. Aˬ yawꞈ maꞈ˗ahˇ jiˇ maˬ laˆ tsoeˬ. Heu loꞈ˗ehˇ jahˇ˗eu heu naˇ, aˬ dui Miˬyehˇ Miˇkʼahˬ uˆ lahˇ˗eu jeˬ˗ahˇ tiˬ byah tiˬ loꞈ saˇ jaˇ ziꞈ˗eu lehˇ mˇ mawˇ˗eu jeˬ pyeuꞈ meh.

Naꞈ suiˇ ni dzaw

3. Ka li za maˇ diˇ deuˬ tiˬ paw˗iˬ gʼaˬ baꞈ maˬ baꞈ

Yeˬsuˇ hawˇ˗eu aˬ yawꞈ˗euˬ mehˬ nah caw teh˗eu deuˬ, gaˇ kawˆ heu nehˬ˗ehˇ taꞈ leˇ˗awˇ aˬ dui˗ahˇ yaw muiˬ˗ehˇ mˇ mehˬ yaꞈ˗euˬ meh. Loˇmaˆ 13:1, 5-7 hawˇ˗eu 1 Beˬtuˆluˆ 2:13, 14-ahˇ gui. Kʼoeˇ naˇ, biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Ka li zaˬ maˇ diˇ deuˬ tiˬ paw˗iˬ gʼaˬ baꞈ maˬ baꞈ—Aˇ tsehˆ 1 (4:28)

• Aˬ dui aˬ jeˬ miˇ neh miˇ kʼahˬ˗ahˇ uˆ lahˇ˗eu aˬ yuiꞈ deuˬ˗ahˇ yaw zeu ya baw˗eu nga?

• Aˬ dui aˬ yawꞈ maꞈ uˆ lahˇ˗eu jeˬ˗ahˇ laꞈ daˬ˗eu lehˇ aˬ joˆ˗ehˇ mˇ doˆ laꞈ nya˗eu nga?

Guiˇ deuˆ ngeh miˇ kʼahˬ tiˬ deuˬ na tiˬ paw˗iˬ gʼaˬ baꞈ maˬ baꞈ lehˇ ehˇ kʼawꞈ, maˇ diˇ naˇ nyiˬ paw luꞈ˗ahˇ gʼaˬ biꞈ˗eu meh. Maˇ maˇ ni gʼaˬ baꞈ maˬ baꞈ˗eu lehˇ ehˇ˗eu heu aˬ jeˬ˗ahˇ ehˇ mawꞈ˗eu nga? Yoˇhaˬ 17:16-ahˇ gui. Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Ka li zaˬ maˇ diˇ deuˬ tiˬ paw˗iˬ gʼaˬ baꞈ maˬ baꞈ—Aˇ tsehˆ 2 (3:11)

• Tiˬ paw˗iˬ gʼaˬ baꞈ maˬ baꞈ˗eu lehˇ ehˇ˗eu heu naˇ, aˬ jeˬ˗ahˇ ehˇ˗eu nga?

Miˇ kʼahˬ˗ahˇ uˆ lahˇ˗eu aˬ yuiꞈ deuˬ aˬ dui˗ahˇ Miˬyehˇ˗euˬ zahˇ dawˬ˗ahˇ bahˬ˗eu jeˬ bi mˇ laꞈ naˇ tawˇ neh? Gʼaˬkʼehˇ 5:28, 29-ahˇ gui. Kʼoeˇ naˇ, biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Ka li zaˬ maˇ diˇ deuˬ tiˬ paw˗iˬ gʼaˬ baꞈ maˬ baꞈ—Aˇ tsehˆ 3 (1:18)

• Tsawˇ haˬ˗euˬ zahˇ sahˇ kʼoꞈ Miˬyehˇ˗euˬ zahˇ dawˬ˗ahˇ bahˬ naˇ, aˬ dui aˬ suˇ gʼaˬ˗euˬ ehˇ dawˬ ya naˇ haˬ˗eu nga?

• Ka li zaˬ deuˬ miˇ kʼahˬ˗ahˇ uˆ lahˇ˗eu aˬ yuiꞈ deuˬ˗euˬ ehˇ dawˬ˗ahˇ naˇ haˬ paˬ˗ehˇ maˬ gʼeh˗eu aˬ geu ngeh nga siˬ?

4. Nui ma laꞈ kʼoeˇ maˬ ehˇ, mˇ jeˬ shaˇ kawˆ neh maˬ ehˇ, tiˬ paw˗iˬ gʼaˬ baꞈ taˬ baꞈ

1 Yoˇhaˬ 5:21-ahˇ gui. Kʼoeˇ naˇ, biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Ka li zaˬ maˇ diˇ deuˬ nui kʼaˬ aˬ jeˬ miˇ neh loˬ˗eu nga?—Gʼaˬ baꞈ maˬ baꞈ ni jawˇ daˆ leꞈ˗eu gʼaˇ duˬ (2:49)

• Biˬdiˬoˬ heu laꞈ kʼoeˇ˗euˬ Aˇyeˇge, miˇ kʼahˬ˗ahˇ uˆ lahˇ˗eu aˇ maꞈ nehˬ˗ehˇ maˬ gm leˇ˗eu uˬ taꞈ, aˬ jeˬ miˇ neh miˇ kʼahˬ˗euˬ dah zaˇ tiˬ jeˬ pyeuꞈ˗eu paˇ loˬ paˇ lehˇ˗ahˇ jiˇ maˬ taˬ huiˬ˗euˬ nga?

• Aˬ yawꞈ neh noeˬ tsehˆ˗euˬ jeˬ teu tsaˬ ngaˇ lehˇ noeˬ miˇ˗a laˬ?

Aˬ geu ngeh gʼaˬ baꞈ maˬ baꞈ ni jawˇ˗eu yaw shaˬ nga siˬ? Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Loꞈ˗eu nymˇgoˇ˗ahˇ neh ya dzaw˗euˬ jeˬ—Maˬ tsaˬ maˬ dzoeˇ leˇ˗eu miˇ tsaˬ˗ahˇ tiˬ paw tiˇ paw gʼaˬ baꞈ maˬ baꞈ ni jawˇ (5:16)

• Miˇ kʼahˬ tiˬ kʼahˬ tiˇ kʼahˬ mui ceh ceh ngeh, aˬ dui tiˬ paw tiˇ paw gʼaˬ baꞈ maˬ baꞈ ni aˬ joˆ˗ehˇ jawˇ nya˗eu nga?

• Miˇ kʼahˬ˗ahˇ uˆ lahˇ˗eu aˬ yuiꞈ deuˬ neh noeˬ tsehˆ˗euˬ jeˬ, aˬ dui˗ahˇ muiˬ laˇ˗eu jeˬ maˬ ngeuˇ naˇ deuˬ laˇ˗eu jeˬ jaˆ kʼawꞈ, aˬ dui gʼaˬ baꞈ maˬ baꞈ ni aˬ joˆ˗ehˇ jawˇ nya˗eu nga?

• Tiˬbiˬ lawˬ muˇ hawˇ˗eu cawˬ deuˬ˗ahˇ neh aˬ dui neh ya gaˬ ya mawˇ˗euˬ jeˬ, aˬ dui tiˬ paw˗iˬ gʼaˬ baꞈ maˬ baꞈ lehˇ noeˬ tsehˆ taˬ˗euˬ jeˬ˗ahˇ aˬ joˆ˗ehˇ deuˬ laˇ nya˗eu nga?

Kawˆ shawˆ

Ka li zaˬ deuˬ yawˬ ha˗euˬ nui noeˬ neh maˬ ehˇ, ngehˬ˗eu jeˬ hawˇ˗eu mˇ˗eu jeˬ neh maˬ ehˇ, miˇ kʼahˬ˗ahˇ uˆ lahˇ˗eu gaˇ kawˆ˗ahˇ tiˬ paw˗iˬ gʼaˬ baꞈ maˬ baꞈ˗eu lehˇ leh jeh dui dui˗eu meh.

Ja sawˇ poˆ˗eu

• Miˇ kʼahˬ˗ahˇ uˆ lahˇ˗eu sahˬ paˬ sahˬ ma deuˬ, aˬ dui˗ahˇ uˆ lahˇ˗eu aˬ kawˬ˗aˬ jaˆ˗eu miˇ neh, aˬ dui aˬ jeˬ ya jahˇ˗eu nga?

• Aˬ dui miˇ kʼahˬ˗ahˇ uˆ lahˇ˗eu jeˬ˗ahˇ aˬ jeˬ miˇ neh tiˬ paw˗iˬ gʼaˬ baꞈ maˬ ya baꞈ˗eu nga?

• Tiˬ paw˗iˬ gʼaˬ baꞈ maˬ baꞈ ni jawˇ˗eu aˬ geu ngeh yaw shaˬ nga?

Haw lahˬ

Tiˬ paw tiˇ paw gʼaˬ baꞈ maˬ baꞈ ni jawˇ˗eu baˬ da neh, aˬ dui aˬ jeˬ jeˇ ya smˇ˗eu kʼawꞈ pyeuꞈ nya nga?

Yeˬhawˇbaˬ aˬ dui˗ahˇ nui ma cawˆ ni tiˬ jawˇ˗iˬ maˬ jahˇ˗a (3:14)

Tiˬ paw tiˇ paw gʼaˬ baꞈ maˬ baꞈ ni jawˇ gaˇ lawˬ haw laˇ ngeh laˆ piˇ nya˗eu gʼaˇ duˬ, nymˇ jiˇ laꞈ kʼoeˇ˗euˬ deuˬ nehˬ˗ehˇ aˬ joˆ˗ehˇ lehˬ hmˬ nya˗eu nga?

Aˬ cawˬ˗euˬ mehˬ shi gʼaˬ baꞈ maˬ baꞈ ni aˬ joˆ˗ehˇ jawˇ nya˗eu nga? (4:25)

Yawˬ ha˗euˬ miˇ kʼahˬ˗ahˇ haw piˇ˗eu heu naˇ, aˬ jeˬ miˇ neh kʼaˇ ya taˬ huiˬ˗eu jeˬ maˬ ngeuˇ nga?

“Miˬyehˇ maˬ jahˇ nya˗eu tiˬ jeˬ˗iˬ maˬ baw˗a” (5:19)

Gaˇ nehˬ˗ehˇ taꞈ leˇ˗awˇ ya noeˬ tsehˆ ngeh, “miˇ tsaˬ heu˗ahˇ maˬ taꞈ” ni aˬ joˆ˗ehˇ jawˇ nya˗eu nga lehˇ haw.

“Yawˬ gʼaˬ na luꞈ yawˬ ha ya pi˗eu kʼaˆ behˆ yawˬ ha jaˆ meh” (Loꞈ˗eu nymˇgoˇ, 2006 Smˇ siˬ ba la 15)

Aˬ dui yawˬ gʼaˬ na luꞈ tiˬ poˆ maˬ ngeuˇ naˇ tiˬ poˆ laˆ tsoeˬ laˇ˗eu jeˬ hawˇ˗eu kʼehˬ˗eu kʼaˆ˗eu jeˬ˗ahˇ ya puˬ meh. Aˬ dui teu loꞈ˗ehˇ ya tahˬ puˬ gaˇ guˆ paˬ˗ehˇ gʼeh ngaˇ laˬ?

1. Kʼehˬ˗eu kʼaˆ˗eu jeˬ˗ahˇ ya tahˬ puˬ meh lehˇ aˬ jeˬ miˇ neh noeˬ taˬ paˬ˗ehˇ gʼeh˗eu nga?

“Yeˬsuˇ Ka li laꞈ kʼoeˇ Miˬyehˇ˗ahˇ yaw zeu baw baw˗ehˇ kʼaˇ dehꞈ˗eu tsawˇ haˬ yawˬ gʼaˬ na luꞈ kʼehˬ˗eu kʼaˆ˗eu jeˬ˗ahˇ ya daˬ tehꞈ˗a” lehˇ Jaˇliꞈ laꞈ kʼoeˇ maˇ jawˆ ni ehˇ taˬ˗euˬ meh. (2 Tiˆmoˇseˬ 3:12) Yeˬsuˇ Saˬdaˬ˗euˬ miˇ tsaˬ nehˬ˗ehˇ maˬ taꞈ˗eu miˇ neh, kʼehˬ˗eu kʼaˆ˗eu jeˬ˗ahˇ ya daˬ˗euˬ meh. Aˬ dui jiˇ miˇ tsaˬ heu nehˬ˗ehˇ maˬ taꞈ. Teu miˇ neh miˇ kʼahˬ˗ahˇ uˆ lahˇ˗eu aˬ yuiꞈ deuˬ hawˇ˗eu zahˇ˗euˬ aˬ yuiꞈ deuˬ kʼehˬ laˇ kʼaˆ laˇ gaˇ aˬ dui maˬ zahˬ leˇ.—Yoˇhaˬ 15:18, 19.

2. Kʼehˬ laˇ kʼaˆ laˇ˗eu jeˬ maˬ keuˆ le mi naˆ˗ehˇ, aˬ joˆ˗ehˇ lehˬ hmˬ taˬ nya˗eu nga?

Aˬ dui nymˬ˗mˇ neh Yeˬhawˇbaˬ˗ahˇ nui ma ya taˬ˗eu meh. Teu loꞈ˗ehˇ jahˇ˗eu gʼaˇ duˬ, yawˬ nah na luꞈ guiˬ lahˬ ya shaˇ˗awˇ Jaˇliꞈ gui˗eu aˇ yamˬ ya yuˇ doˆ taˬ˗eu uˬ taꞈ, yawˬ jawˇ na luꞈ aˇ muˇ˗euˬ mehˬ bawˬ˗ahˇ ya iˇ˗eu meh. Aˬ dui heu loꞈ˗ehˇ jahˇ naˇ aˬ geu jeˬ aˬ geu paw neh kʼehˬ laˇ kʼaˆ laˇ˗eu maˬ ehˇ, nymˇ jiˇ laꞈ kʼoeˇ˗euˬ deuˬ paˇ kʼehˬ paˇ kʼaˆ laˇ˗eu kʼawꞈ, kʼaˬ duˬ ni kamˬ daˬ coeˇ˗eu meh. Kʼehˬ˗eu kʼaˆ˗eu jeˬ˗ahˇ tiˬ kʼehˬ maˬ taˬ ya tahˬ puˬ˗euˬ gʼaˬ kʼehˇ Pawˇluˆ ‘Yeˬhawˇbaˬ ngaˬ˗ahˇ ngehˬ gʼeh luꞈ meh. Ngaˇ tiˬ jeˬ˗iˬ guˆ kʼaˇ maˬ za’ lehˇ ehˇ˗eu meh.—Heˬbyehˇ 13:6.

Yawˬ jawˇ na luꞈ tsaꞈ gaˬ˗eu heu jiˇ aˬ dui˗ahˇ nui kʼaˬ bi ahˇ laˇ˗eu tiˬ jeˬ pyeuꞈ meh. Tsaꞈ gaˬ˗eu heu naˇ Yeˬhawˇbaˬ˗ahˇ nui ma taˬ dzehˬ laˇ ni maˬ ehˇ, tsawˇ haˬ˗ahˇ guˆ˗eu nui ma˗ahˇ gʼaˬ leˇ nya ni maˬ ehˇ, caw ba nehˬ laꞈ˗eu meh. (Dawˬdaˬ 29:25) Aˬ dui nymˬ˗mˇ neh kʼaˬ duˬ ni tsaꞈ gaˬ peuˬ ni leh jeh naˇ, miˇ kʼahˬ˗ahˇ uˆ lahˇ˗eu aˬ yuiꞈ deuˬ aˬ dui˗euˬ gaˇ˗ahˇ paˇ laˆ tsoeˬ laˇ˗eu kʼawꞈ, kʼaˬ duˬ ni tsaꞈ gaˬ daˆ leꞈ nya˗eu meh.—1 Teˇsaˬloˇni 2:2.

3. Kʼehˬ˗eu kʼaˆ˗eu jeˬ˗ahˇ daˬ dzeuˇ oˇ dzeuˇ nya naˇ, aˬ joˆ˗ehˇ gaˇ dahˇ tsoeˬ˗eu nga?

Aˬ dui kʼehˬ˗eu kʼaˆ˗eu jeˬ˗ahˇ maˬ ya leˇ˗a. Ehˇ kʼawꞈ, kʼehˬ˗eu kʼaˆ˗eu jeˬ˗ahˇ daˬ dzeuˇ oˇ dzeuˇ nya naˇ aˬ dui˗euˬ nui jah ziꞈ˗eu taꞈ˗ehˇ ziꞈ dzehˬ laˇ˗eu meh. Kʼoeˇ naˇ, aˬ dui maˬ paˇ kamˬ daˬ coeˇ miˇ˗a lehˇ noeˬ laˇ ngeh, Yeˬhawˇbaˬ caw ba nehˬ laꞈ gaˇ ya mawˇ˗eu miˇ neh, aˬ yawꞈ nehˬ˗ehˇ gʼoeˇ dzehˬ leˇ˗eu meh. (Yaˬkoˆ 1:2-4-ahˇ gui.) Aˬ dui kʼehˬ˗eu kʼaˆ˗eu jeˬ˗ahˇ ya daˬ ngeh, Yeˬhawˇbaˬ˗euˬ nui ma˗ahˇ deuˬ leˇ˗eu meh. Ehˇ kʼawꞈ aˬ dui daˬ dzeuˇ oˇ dzeuˇ naˇ aˬ yawꞈ laˬ kʼaˬ cehˇ˗eu meh. “Naw maꞈ tsaˬ˗eu jeˬ˗ahˇ mˇ˗euˬ baˬ da neh aˬ cawˬ kʼehˬ laˇ kʼaˆ laˇ gaˇ daˬ dzeuˇ oˇ dzeuˇ naˇ, naw maꞈ˗ahˇ Miˬyehˇ guiˬ lahˬ biꞈ laꞈ tehꞈ˗a” lehˇ Jaˇliꞈ ehˇ˗eu meh. (1 Beˬtuˆluˆ 2:20) Yeˬhawˇbaˬ saˇ jaˇ ziꞈ˗eu laꞈ kʼoeˇ daˬ dzeuˇ oˇ dzeuˇ˗euˬ deuˬ˗ahˇ miˇ shuiꞈ˗ahˇ mˬ maˬ maˬ byaˆ zaˇ ziˇ bi jawˇ laꞈ˗eu meh. Teu ngeh maˇ maˇ ni uˬ duˬ tahˬ˗eu jeˬ˗ahˇ muiˇ˗eu deuˬ maˬ paˇ jawˇ meh.—Maꞈtehˬ 24:13.

Naꞈ suiˇ ni dzaw

4. Nymˇ jiˇ laꞈ kʼoeˇ˗euˬ deuˬ laˆ tsoeˬ laˇ kʼawꞈ, daˬ dzeuˇ oˇ dzeuˇ nya

Aˬ dui Yeˬhawˇbaˬ˗euˬ gaˇ mˇ˗eu lehˇ noeˬ tsehˆ ngeh, nymˇ jiˇ laꞈ kʼoeˇ˗euˬ deuˬ kʼehˬ laˇ kʼaˆ laˇ˗eu kʼawꞈ pyeuꞈ nya meh lehˇ Yeˬsuˇ ehˇ˗eu meh. Maꞈtehˬ 10:34-36-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Nymˇ jiˇ laꞈ kʼoeˇ˗euˬ tiˬ gʼaˬ na Yeˬhawˇbaˬ˗euˬ gaˇ mˇ˗eu lehˇ noeˬ tsehˆ ngeh, aˬ jeˬ˗euˬ gaˇ kawˆ doˆ laˇ nya˗eu nga?

Biˬdiˬoˬ: Yeˬhawˇbaˬ nga nyaꞈ˗ahˇ sheuˬ ahˇ laꞈ (5:13)

• Nymˇ jiˇ laꞈ kʼoeˇ˗euˬ deuˬ maˬ ngeuˇ naˇ cawˬ tiˬ gʼaˬ na, nawˬ˗ahˇ Yeˬhawˇbaˬ˗euˬ gaˇ˗ahˇ maˬ mˇ nya ni laˆ tsoeˬ laˇ naˇ nawˇ aˬ joˆ˗ehˇ jahˇ de?

Ja ceuˬ 27:10 hawˇ˗eu Maˬkuˆ 10:29, 30-ahˇ gui. Jaˇliꞈ tiˬ deuˆ˗ahˇ kʼaˇ gui gʼaˬ ngeh, naˇ haˬ˗eu jeˬ heu˗ahˇ tiˬ poˆ naˇ haˬ.

• Nymˇ jiˇ laꞈ kʼoeˇ˗euˬ deuˬ maˬ ngeuˇ naˇ cawˬ tiˬ gʼaˬ na nawˬ˗ahˇ laˆ tsoeˬ laˇ ngeh, saˇ jaˇ dawˬ heu nawˬ˗ahˇ aˬ joˆ˗ehˇ caw ba nehˬ nya˗eu nga?

5. Kʼehˬ laˇ kʼaˆ laˇ kʼawꞈ Yeˬhawˇbaˬ˗ahˇ uˬ duˬ tahˬ˗eu jeˬ˗ahˇ taˬ byehˇ

Biˬdiˬoˬ: Kʼehˬ laˇ kʼaˆ laˇ kʼawꞈ kʼaˬ duˬ ni gʼeh (6:27)

• Biˬdiˬoˬ heu˗ahˇ haw ngeh, nawˬ˗ahˇ aˬ geu tsahˇ˗ahˇ gʼaˬ za laˇ nya?

Gʼaˬkʼehˇ 5:27-29 hawˇ˗eu Heˬbyehˇ 10:24, 25-ahˇ gui. Jaˇliꞈ tiˬ deuˆ˗ahˇ kʼaˇ gui gʼaˬ ngeh, naˇ haˬ˗eu jeˬ heu˗ahˇ tiˬ poˆ naˇ haˬ.

• Miˇ kʼahˬ˗ahˇ uˆ lahˇ˗eu aˬ yuiꞈ deuˬ aˬ dui˗ahˇ maˬ paˇ bi tsaꞈ gaˬ, maˬ paˇ bi bawˬ dzaˬ kʼawꞈ, Yeˬhawˇbaˬ˗ahˇ uˬ duˬ tahˬ daˆ leꞈ˗eu aˬ jeˬ miˇ neh aˇ yeˇ huiˬ˗eu nga?

6. Daˬ dzeuˇ oˇ dzeuˇ nya ni Yeˬhawˇbaˬ caw ba nehˬ

Biˬdiˬoˬ: Yeˬhawˇbaˬ Miˬyehˇ ngaˬ˗ahˇ gʼaˬ biꞈ meh (3:40)

• Biˬdiˬoˬ laꞈ kʼoeˇ˗euˬ Saˇ kiˇ heu deuˬ aˬ jeˬ miˇ neh daˬ dzeuˇ oˇ dzeuˇ nya˗euˬ nga?

Loˇmaˆ 8:35, 37-39 hawˇ˗eu Piˇliˇpiˆ 4:13-ahˇ gui. Jaˇliꞈ tiˬ deuˆ˗ahˇ kʼaˇ gui gʼaˬ ngeh, naˇ haˬ˗eu jeˬ heu˗ahˇ tiˬ poˆ naˇ haˬ.

• Jaˇliꞈ heu deuˆ˗ahˇ haw ngeh, aˬ dui aˬ joˆ˗ehˇ kʼehˬ laˇ kʼaˆ laˇ kʼawꞈ daˬ dzeuˇ oˇ dzeuˇ nya˗eu lehˇ aˬ joˆ˗ehˇ siˬ laˇ˗eu nga?

Maꞈtehˬ 5:10-12-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Kʼehˬ laˇ kʼaˆ laˇ gaˇ ya daˬ kʼawꞈ, aˬ dui aˬ jeˬ miˇ neh laˬ kʼaˬ cehˇ nya˗eu nga?

Kawˆ shawˆ

Kʼehˬ laˇ kʼaˆ laˇ˗eu jeˬ˗ahˇ ya daˬ kʼawꞈ aˬ dui Yeˬhawˇbaˬ˗ahˇ uˬ duˬ tahˬ˗eu gʼaˇ duˬ leh jeh gaˇ, Yeˬhawˇbaˬ aˇ poeˬ taˬ baw dui dui˗eu meh. Aˬ yawꞈ caw ba˗eu miˇ neh aˬ dui aˬ geu jeˬ˗ahˇ kʼawꞈ daˬ dzeuˇ oˇ dzeuˇ nya meh.

Ja sawˇ poˆ˗eu

• Ka li zaˬ deuˬ kʼehˬ laˇ kʼaˆ laˇ˗eu jeˬ˗ahˇ ya daˬ meh lehˇ aˬ jeˬ miˇ neh noeˬ taˬ paˬ˗ehˇ gʼeh˗eu nga?

• Kʼehˬ laˇ kʼaˆ laˇ˗eu jeˬ˗ahˇ daˬ dzeuˇ oˇ dzeuˇ nya ni aˬ dui nymˬ˗mˇ neh aˬ joˆ˗ehˇ ya lehˬ hmˬ taˬ˗eu nga?

• Aˬ dui aˬ joˆ˗ehˇ gʼeh˗eu kʼehˬ laˇ kʼaˆ laˇ˗eu jeˬ˗ahˇ ya puˬ kʼawꞈ, Yeˬhawˇbaˬ˗euˬ gaˇ mˇ daˆ leꞈ nya meh lehˇ aˬ jeˬ miˇ neh jah nya˗eu nga?

Haw lahˬ

Tiˬ paw˗iˬ gʼaˬ baꞈ maꞈ baꞈ˗eu miˇ neh tawˬ˗ahˇ bi nyehꞈ ahˇ˗euˬ aˬ li zaˬ guˬ tiˬ gʼaˬ˗ahˇ Yeˬhawˇbaˬ aˬ joˆ˗ehˇ caw ba˗euˬ nga lehˇ haw.

Kʼehˬ laˇ kʼaˆ laˇ kʼawꞈ daˬ dzeuˇ oˇ dzeuˇ (2:34)

Miˬ sawˇ yo zaˬ tiˬ gu laˆ tsoeˬ laˇ˗eu jeˬ˗ahˇ ya daˬ kʼawꞈ, Yeˬhawˇbaˬ˗euˬ gaˇ˗ahˇ gʼawˬ mya kʼoꞈ aˬ joˆ˗ehˇ mˇ daˆ leꞈ nya˗euˬ nga lehˇ haw.

Poˆ laˇ paˇ laˇ˗eu aˇ yamˬ˗ahˇ Yeˬhawˇbaˬ˗euˬ gaˇ mˇ (7:11)

Kʼehˬ laˇ kʼaˆ laˇ˗eu jeˬ˗ahˇ ya tahˬ puˬ ngeh kʼaˬ duˬ ni aˬ joˆ˗ehˇ gʼeh nya˗eu nga lehˇ haw.

“Kʼehˬ˗eu kʼaˆ˗eu jeˬ˗euˬ gʼaˇ duˬ, nymˬ˗mˇ neh lehˬ hmˬ deuˇ taˬ” (Loꞈ˗eu nymˇgoˇ, 2019 Shiꞈ siˬ ba la)

Nymˇ jiˇ laꞈ kʼoeˇ˗euˬ deuˬ laˆ tsoeˬ laˇ ngeh aˬ joˆ˗ehˇ ya haw˗eu nga? Teu˗ahˇ kamˬ daˬ coeˇ ni aˬ joˆ˗ehˇ ya jahˇ˗eu nga lehˇ haw.

“Yaw tsaˬ yaw dawˇ jeˬ ‘nui saˇ oꞈ˗eu jeˬ hehˇ leꞈ˗eu maˬ ngeuˇ˗a’” (Loꞈ˗eu nymˇgoˇ, 2017 Tseˇ siˬ ba la)