Yaw haiˬ yaw doeˇ jeˬ hawˇ˗eu shaˬ˗eu zahˬ˗eu jeˬ aˬ jeˬ miˇ neh jaˆ˗eu nga?

Doeˇ dui dui˗eu gaˇ kawˆ tiˬ jeˬ na˗ahˇ ya tahˬ puˬ ngeh, tsawˇ haˬ deuˬ “Aˬ jeˬ miˇ neh heu loꞈ˗ehˇ pyeuꞈ laˇ daˬ?” lehˇ siˬ nya mawꞈ˗eu meh. Gaˇ kawˆ heu nehˬ˗ehˇ taꞈ leˇ˗awˇ Jaˇliꞈ laꞈ kʼoeˇ ehˇ nehˬ taˬ˗euˬ jeˬ aˬ dui˗ahˇ nui ma bi saˇ laˇ˗eu meh.

1. Saˬdaˬ aˬ jeˬ jahˇ˗euˬ baˬ da neh miˇ tsaˬ kʼoeˇ taˆ yaw haiˬ yaw doeˇ jeˬ jaˆ laˇ˗euˬ nga?

Saˬdaˬ Miˬyehˇ˗ahˇ saˇ jaˇ puiˬ˗euˬ meh. Aˬ yawꞈ aˬ cawˬ˗euˬ kʼoeˇ taˆ uˆ lahˇ mawꞈ˗eu miˇ neh, dahˬ beh˗euˬ nyiˬ dzeˇ zaˬ pyeuꞈ˗eu Aˬdaˬ hawˇ˗eu Eˇbaˆ aˬ yawꞈ nehˬ˗ehˇ gm laˇ ni, Eˇbaˆ˗ahˇ muˇ juˇ juˇ˗euˬ meh. (Aˇdahˬbeh˗eu 3:1-5) Saˬdaˬ Eˇbaˆ˗ahˇ Miˬyehˇ yaw muiˬ tiˬ jeˬ na maˬ biꞈ ni zaꞈ taˬ nga lehˇ noeˬ leˇ ni jahˇ˗awˇ, tsawˇ haˬ zaˬ Miˬyehˇ˗euˬ ehˇ dawˬ maˬ naˇ haˬ ni dehꞈ naˇ, laˬ kʼaˬ cehˇ dzehˬ meh lehˇ noeˬ leˇ ni jahˇ˗euˬ meh. Saˬdaˬ Eˇbaˆ˗ahˇ nawˇ maˬ ya shiˇ˗a lehˇ ehˇ nehˬ˗euˬ heu naˇ, jaˬ myawꞈ myawꞈ beh beh˗euˬ poˆ pyeuꞈ meh. Teu miˇ neh Jaˇliꞈ Saˬdaˬ˗ahˇ “jaˬ myawꞈ myawꞈ˗eu deuˬ dawˬ tawˆ luꞈ˗euˬ aˬ da yaw dzahˇ gʼaˬ” lehˇ kuˇ taˬ˗euˬ meh.—Yoˇhaˬ 8:44.

2. Aˬdaˬ hawˇ˗eu Eˇbaˆ aˬ jeˬ jahˇ˗eu lehˇ tseˇ˗euˬ nga?

Yeˬhawˇbaˬ Aˬdaˬ hawˇ˗eu Eˇbaˆ˗ahˇ yawˬ jeˬ na luꞈ tiˬ byah tiˬ loꞈ biꞈ nehˬ˗euˬ meh. Eˬdeˬ ya kmˇ laꞈ kʼoeˇ˗euˬ aˇ bawˇ tiˬ bawˇ˗euˬ aˇ siˬ maˬ ngeuˇ naˇ aˇ bawˇ aˬ geu bawˇ˗euˬ aˇ siˬ maˬ kaˬ dzaˬ nya meh lehˇ aˬ yawꞈ nyaꞈ˗ahˇ ehˇ nehˬ˗euˬ meh. (Aˇdahˬbeh˗eu 2:15-17) Ehˇ kʼawꞈ aˬ yawꞈ nyaꞈ Miˬyehˇ neh taˬ dzaˬ lehˇ ehˇ˗euˬ aˇ bawˇ kʼoeˇ bawˇ˗euˬ aˇ siˬ dzaˬ˗eu lehˇ tseˇ˗euˬ meh. Eˇbaˆ “aˇ siˬ ui cuiˆ pyaˆ˗awˇ dzaˬ haw˗euˬ meh.” Kʼoeˇ naˇ, Aˬdaˬ jiˇ “dzaˬ˗euˬ” meh. (Aˇdahˬbeh˗eu 3:6) Nyiˬ gʼaˬ luꞈ Miˬyehˇ˗euˬ ehˇ dawˬ˗ahˇ maˬ naˇ haˬ˗aˬ. Maˇ diˇ naˇ aˬ yawꞈ nyaꞈ byah kuꞈ˗eu miˇ neh, aˬ yawꞈ nyaꞈ˗euˬ gʼaˇ duˬ yaw muiˬ jeˬ mˇ˗eu maˬ shaˬ˗a. Aˬ yawꞈ nyaꞈ diˇ daˬ˗ehˇ Miˬyehˇ˗euˬ ehˇ dawˬ maˬ naˇ haˬ˗eu heu naˇ, iˬ baˇ mˇ˗eu jeˬ pyeuꞈ˗awˇ, Miˬyehˇ uˆ lahˇ˗eu jeˬ˗ahˇ laˬ maˬ daˬ lehˇ tseˇ˗euˬ jeˬ jiˇ pyeuꞈ meh. Aˬ yawꞈ nyaꞈ teu loꞈ˗ehˇ tseˇ˗euˬ baˬ da neh, huiˬ dui dui˗eu shaˬ zahˬ keuˆ le˗euˬ meh.—Aˇdahˬbeh˗eu 3:16-19.

3. Aˬdaˬ hawˇ˗eu Eˇbaˆ neh tseˇ˗euˬ jeˬ aˬ dui˗ahˇ aˬ joˆ˗ehˇ deuˬ˗eu nga?

Aˬdaˬ hawˇ˗eu Eˇbaˆ iˬ baˇ mˇ˗euˬ miˇ neh maˬ byah kuꞈ˗eu tsawˇ haˬ pyeuꞈ˗iˇ˗euˬ meh. Teu miˇ neh aˬ yawꞈ nyaꞈ˗ahˇ neh dehꞈ le˗euˬ zaˬ deuˬ jiˇ maˬ byah kuꞈ˗eu tsawˇ haˬ pyeuꞈ˗eu meh. “Tsawˇ haˬ tiˬ gʼaˬ baˬ da neh miˇ tsaˬ kʼoeˇ taˆ iˬ baˇ keuˆ le˗awˇ, iˬ baˇ kʼoeˇ baˬ da neh shiˇ˗eu jeˬ keuˆ le˗euˬ meh. Shiˇ˗eu jeˬ kʼoeˇ, tsawˇ haˬ zaˬ dawˬ tawˆ luꞈ kʼoeˇ taˆ keuˆ le˗euˬ meh” lehˇ Aˬdaˬ nehˬ˗ehˇ taꞈ leˇ˗awˇ Jaˇliꞈ ehˇ˗eu meh.—Loˇmaˆ 5:12.

Aˬ dui gʼawˬ mya jeˬ baˬ da neh ya shaˬ˗eu meh. Tiˬ poˆ na yawˬ ha neh noeˬ tsehˆ lehˬ˗euˬ baˬ da neh ya shaˬ˗awˇ, tiˬ poˆ na naˇ aˬ cawˬ neh noeˬ tsehˆ lehˬ˗euˬ baˬ da neh ya shaˬ˗eu meh. Kʼoeˇ naˇ jawˇ paˬ˗ehˇ maˬ gʼeh˗eu jawˇ duˬ hawˇ˗eu jawˇ paˬ˗ehˇ maˬ gʼeh˗eu aˇ yamˬ˗ahˇ jawˇ luꞈ˗eu miˇ neh kʼawꞈ, shaˬ zahˬ keuˆ le nya˗eu meh.—Dawˬtsoˆ 9:12-ahˇ gui.

Naꞈ suiˇ ni dzaw

4. Shaˬ˗eu zahˬ˗eu jeˬ aˬ suˇ gʼaˬ baˬ da neh pyeuꞈ laˇ˗euˬ nga?

Tsawˇ haˬ gʼawˬ mya ni Miˬyehˇ miˇ tsaˬ heu siˬ˗ahˇ uˆ lahˇ luꞈ meh lehˇ noeˬ meh. Teu maˇ diˇ ngeuˇ ngaˇ laˬ? Biˬdiˬoˬ pah.

Biˬdiˬoˬ: Miˇ tsaˬ heu siˬ˗ahˇ aˬ suˇ gʼaˬ uˆ lahˇ luꞈ˗eu nga? (1:24)

Yaˬkoˆ 1:13 hawˇ˗eu 1 Yoˇhaˬ 5:19-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yaw haiˬ yaw doeˇ jeˬ hawˇ˗eu shaˬ˗eu zahˬ˗eu jeˬ Miˬyehˇ neh bi pyeuꞈ laˇ˗euˬ nga laˬ?

5. Saˬdaˬ uˆ lahˇ˗eu baˬ da neh aˬ jeˬ jeˇ pyeuꞈ laˇ˗euˬ nga?

Biˬdiˬoˬ: Miˬyehˇ aˬ jeˬ miˇ neh shaˬ zahˬ˗ahˇ bi jaˆ˗euˬ nga?—Tiˬ tsahˇ na (3:07)

Aˇdahˬbeh˗eu 3:1-6-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Saˬdaˬ aˬ jeˬ lehˇ jaˬ myawꞈ myawꞈ˗euˬ nga?—Aˇ deuˆ 4 hawˇ˗eu 5˗ahˇ haw.

• Yeˬhawˇbaˬ tsawˇ haˬ zaˬ˗ahˇ yaw muiˬ tiˬ jeˬ na maˬ biꞈ ni zaꞈ taˬ ngaˬ lehˇ noeˬ leˇ ni, Saˬdaˬ aˬ joˆ˗ehˇ ngehˬ˗euˬ nga?

• Tsawˇ haˬ zaˬ laˬ kʼaˬ tiˬ cehˇ dehꞈ nya˗eu gʼaˇ duˬ, Yeˬhawˇbaˬ uˆ lahˇ˗eu jeˬ˗ahˇ maˬ loˬ˗a lehˇ Saˬdaˬ aˬ joˆ˗ehˇ gaˇ jaw jaw˗awˇ ehˇ˗euˬ nga?

Dawˬtsoˆ 8:9-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬhawˇbaˬ maˬ uˆ lahˇ luꞈ˗eu miˇ tsaˬ heu siˬ aˬ joˆ˗ehˇ gʼeh˗eu nga?

1. 1. Aˬdaˬ hawˇ˗eu Eˇbaˆ byah kuꞈ˗eu laꞈ kʼoeˇ Baˬlaˬdiˇsuˆ˗ahˇ ya jawˇ˗euˬ kʼawꞈ, Saˬdaˬ˗euˬ ehˇ dawˬ naˇ haˬ˗awˇ Yeˬhawˇbaˬ˗ahˇ saˇ jaˇ puiˬ˗euˬ meh

2. 2. Miˬyehˇ˗ahˇ saˇ jaˇ puiˬ˗euˬ miˇ neh, miˇ tsaˬ kʼoeˇ taˆ iˬ baˇ hawˇ˗eu shaˬ˗eu zahˬ˗eu jeˬ uˬ taꞈ, shiˇ˗eu jeˬ jiˇ jaˆ laˇ

3. 3. Yeˬhawˇbaˬ gʼawˬ myahˇ maˬ gʼeh˗ehˇ iˬ baˇ hawˇ˗eu shaˬ˗eu zahˬ˗eu jeˬ uˬ taꞈ, shiˇ˗eu jeˬ˗ahˇ jiˇ laˆ byoˆ jiˇ˗eu meh. Tsawˇ haˬ zaˬ tiˬ poˆ paˇ byah kuꞈ laˇ˗awˇ miˇ tsaˬ Baˬlaˬdiˇsuˆ˗ahˇ ya jawˇ˗eu meh

6. Shaˬ zahˬ˗ahˇ ya tahˬ puˬ luꞈ˗eu deuˬ˗ahˇ Yeˬhawˇbaˬ ngehˬ gʼeh

Aˬ dui shaˬ˗eu zahˬ˗eu jeˬ˗ahˇ ya tahˬ puˬ luꞈ ngeh, Yeˬhawˇbaˬ haw cawˬ nehˬ laꞈ ngaˇ laˬ? Sahˬ paˬ Daˬbiˇ hawˇ˗eu gʼaˬ kʼehˇ Beˬtuˆluˆ gaˇ kawˆ heu nehˬ˗ehˇ taꞈ leˇ˗awˇ aˬ joˆ˗ehˇ ehˇ taˬ˗euˬ nga? Ja ceuˬ 31:7 hawˇ˗eu 1 Beˬtuˆluˆ 5:7-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ dui˗euˬ shaˬ zahˬ˗ahˇ Yeˬhawˇbaˬ siˬ luꞈ mawˇ luꞈ˗awˇ ngehˬ gʼeh nehˬ laꞈ˗eu lehˇ ya siˬ˗eu heu naˇ, nawˬ˗ahˇ aˬ joˆ˗ehˇ gʼeh laˇ nya?

Kawˆ shawˆ

Miˇ tsaˬ kʼoeˇ taˆ pyeuꞈ luꞈ˗eu yaw haiˬ yaw doeˇ jeˬ Saˬdaˬ hawˇ˗eu dahˬ beh˗euˬ nyiꞈ dzeˇ zaˬ baˬ da neh pyeuꞈ laˇ˗euˬ meh. Yeˬhawˇbaˬ shaˬ zahˬ˗ahˇ ya tahˬ puˬ luꞈ˗eu deuˬ˗ahˇ ngehˬ gʼeh˗awˇ, gʼawˬ myahˇ maˬ gʼeh˗ehˇ shaˬ zahˬ dawˬ tawˆ luꞈ˗ahˇ laˆ byoˆ jiˇ˗eu meh.

Ja sawˇ poˆ˗eu

• Saˬdaˬ Eˇbaˆ˗ahˇ aˬ jeˬ lehˇ jaˬ myawꞈ myawꞈ˗euˬ nga?

• Aˬdaˬ hawˇ˗eu Eˇbaˆ neh saˇ jaˇ puiˬ˗euˬ jeˬ, aˬ dui˗ahˇ aˬ joˆ˗ehˇ deuˬ˗eu nga?

• Yeˬhawˇbaˬ aˬ dui shaˬ zahˬ˗ahˇ ya tahˬ puˬ ngeh, ngehˬ gʼeh luꞈ˗eu lehˇ aˬ joˆ˗ehˇ siˬ laˇ˗eu nga?

Haw lahˬ

Jaˇliꞈ iˬ baˇ nehˬ˗ehˇ taꞈ leˇ˗awˇ aˬ joˆ˗ehˇ ehˇ˗eu nga lehˇ haw.

“Iˬ baˇ heu naˇ aˬ jeˬ nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Saˬdaˬ Eˬdeˬ yaˇ kmˇ laꞈ kʼoeˇ aˬ jeˬ˗euˬ gaˇ kawˆ laˆ doˆ˗euˬ nga lehˇ haw.

“Miˬyehˇ aˬ jeˬ miˇ neh shaˬ zahˬ˗ahˇ bi jaˆ˗euˬ nga?” (Loꞈ˗eu nymˇgoˇ, 2014 Tiˬ siˬ ba la 1)

Tsawˇ haˬ deuˬ siˬ nya mawꞈ dui dui˗eu gaˇ kawˆ˗ahˇ, gʼaˬ ahˇ laˇ paˬ˗ehˇ aˬ joˆ˗ehˇ ehˇ taˬ˗euˬ nga lehˇ haw.

“Miˇ tsaˬ Guiˇ nyiˬ poˆ aˬ yawꞈ poˆ aˬ jeˬ miˇ neh pyeuꞈ laˇ˗euˬ nga? Miˬyehˇ teu˗ahˇ aˬ jeˬ miˇ maˬ laˆ tsoeˬ˗eu nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Zaˬ yo aˬ li tiˬ gʼaˬ shaˬ˗eu zahˬ˗eu jeˬ nehˬ˗ehˇ taꞈ leˇ˗awˇ aˬ jeˬ ya siˬ˗euˬ nga lehˇ haw.

Nymˬ˗mˇ ngaˇ tiˬ gʼaˬ tehꞈ maˬ paˇ ngeuˇ maˬ (5:09)

Dahˬ beh˗euˬ nyiˬ dzeˇ zaˬ pyeuꞈ˗eu Aˬdaˬ hawˇ˗eu Eˇbaˆ Miˬyehˇ˗euˬ ehˇ dawˬ leuˇ˗euˬ miˇ neh, miˇ tsaˬ kʼoeˇ taˆ iˬ baˇ hawˇ˗eu shaˬ˗eu zahˬ˗eu jeˬ uˬ taꞈ, shiˇ˗eu jeˬ jiˇ jaˆ laˇ˗euˬ meh.a Ehˇ kʼawꞈ aˬ dui noeˬ tmˬ˗eu jeˬ jaˆ luꞈ meh siˬ. Yeˬhawˇbaˬ aˬ dui˗ahˇ iˬ baˇ hawˇ˗eu shiˇ˗eu jeˬ˗ahˇ neh bi buˬ˗iˇ˗eu gʼaˇ duˬ, aˬ yawꞈ˗euˬ Zaˬmaˇ Yeˬsuˇ Ka li bi shiˇ dah le˗euˬ meh. Yeˬsuˇ aˬ dui˗ahˇ ka kʼoꞈ˗eu gʼaˇ duˬ, aˬ yawꞈ˗euˬ dehꞈ ziˇ lawˇ nehˬ˗euˬ meh lehˇ Jaˇliꞈ ehˇ˗eu meh. Ka kʼoꞈ˗eu jeˬ heu naˇ, tiˬ gʼaˬ paˬ˗ahˇ bi pyehˬ˗eu gʼaˇ duˬ ya biꞈ˗eu aˇ poeˬ pyeuꞈ meh. Yeˬsuˇ aˬ yawꞈ˗euˬ byah kuꞈ˗eu dehꞈ ziˇ neh aˬ dui˗ahˇ zeuˇ kʼoꞈ˗euˬ meh. (Maꞈtehˬ 20:28-ahˇ gui.) Yeˬsuˇ miˇ tsaˬ kʼoeˇ taˆ mˬ maˬ maˬ byaˆ zaˇ ziˇ dehꞈ nya kʼawꞈ nui ma keuˆ˗eu laꞈ kʼoeˇ aˬ yawꞈ˗euˬ dehꞈ ziˇ lawˇ nehˬ˗euˬ miˇ neh, aˬ dui Aˬdaˬ hawˇ˗eu Eˇbaˆ neh laˆ smˇ˗euˬ yawˬ jeˬ na luꞈ˗ahˇ za kʼoꞈ˗eu gaˇ ma dahˇ laˇ˗euˬ meh. Yeˬsuˇ aˬ yawꞈ hawˇ˗eu Yeˬhawˇbaˬ aˬ dui˗ahˇ aˇ naˆ ni gaˬ˗eu lehˇ jiˇ bi mawˇ laꞈ˗euˬ meh. Heu kawˆ naˇ aˬ dui˗ahˇ Yeˬsuˇ neh shiˇ˗euˬ jeˬ˗ahˇ aˇ poeˬ taˬ baw mawꞈ dzehˬ laˇ ni caw ba nehˬ˗eu meh.

1. Yeˬsuˇ neh shiˇ˗euˬ jeˬ nymˬ˗mˇ aˬ dui˗ahˇ gaˇ dahˇ aˬ joˆ˗ehˇ tsoeˬ˗eu nga?

Aˬ dui iˬ baˇ zaˬ pyeuꞈ˗eu miˇ neh Yeˬhawˇbaˬ maˬ ya leˇ˗eu gʼawˬ mya jeˬ mˇ˗eu meh. Ehˇ kʼawꞈ, aˬ dui yawˬ ha neh mˇ˗euˬ jeˬ˗ahˇ nui ma cawˆ˗awˇ, Yeˬsuˇ Ka li˗ahˇ gʼoe˗eu laꞈ kʼoeˇ Yeˬhawˇbaˬ˗ahˇ iˬ baˇ shaˇ pyehˬ˗eu uˬ taꞈ, iˬ baˇ teu˗ahˇ maˬ mˇ poˆ˗iˇ ni kʼaˇ gʼeh nya gaˇ neh leh jeh naˇ, Yeˬhawˇbaˬ nehˬ˗ehˇ cawˬ cawˬ nya˗eu meh. (1 Yoˇhaˬ 2:1) “Tsawˇ haˬ zaˬ˗euˬ iˬ baˇ gʼaˇ duˬ Ka li tiˬ poˆ tehꞈ˗ehˇ kamˇ shiˇ˗euˬ meh. Aˬ yawꞈ kamˇ shiˇ˗euˬ kʼoeˇ˗aˬ, iˬ baˇ zaˬ deuˬ˗ahˇ Miˬyehˇ jawˇ gaˇ sheuˬ gʼeh˗eu gʼaˇ duˬ, iˬ baˇ maˬ ahˇ˗eu tsawˇ haˬ tiˬ gʼaˬ iˬ baˇ zaˬ deuˬ˗euˬ dah zaˇ kamˇ shiˇ˗euˬ jeˬ pyeuꞈ” meh lehˇ Jaˇliꞈ ehˇ˗eu meh.—1 Beˬtuˆluˆ 3:18.

2. Yeˬsuˇ neh shiˇ˗euˬ jeˬ mehˬ hu paw aˬ dui˗ahˇ gaˇ dahˇ aˬ joˆ˗ehˇ tsoeˬ˗eu nga?

Yeˬhawˇbaˬ Yeˬsuˇ˗ahˇ byah kuꞈ˗eu dehꞈ ziˇ bi lawˇ nehˬ le˗euˬ miˇ neh, “Zaˬmaˇ˗ahˇ kʼaˇ jah˗eu tsawˇ haˬ maˬ ya cawˆ˗iˇ˗eu uˬ taꞈ, mˬ maˬ maˬ byaˆ zaˇ ziˇ dehꞈ˗eu jeˬ za˗eu meh.” (Yoˇhaˬ 3:16) Yeˬsuˇ neh mˇ nehˬ laꞈ˗euˬ jeˬ baˬ da neh, Yeˬhawˇbaˬ gʼawˬ myahˇ maˬ gʼeh˗ehˇ Aˬdaˬ ehˇ dawˬ leuˇ˗euˬ miˇ neh pyeuꞈ laˇ˗euˬ maˬ muiˬ˗eu jeˬ dawˬ tawˆ luꞈ˗ahˇ laˆ byoˆ jiˇ˗eu meh. Teu miˇ neh aˬ dui Yeˬsuˇ neh ka kʼoꞈ˗euˬ jeˬ˗ahˇ jah naˇ, miˇ tsaˬ Baˬlaˬdiˇsuˆ˗ahˇ mˬ maˬ maˬ byaˆ zaˇ ziˇ laˬ kʼaˬ tiˬ cehˇ ya dehꞈ gʼeh meh.—Iˇsaˬyaˇ 65:21-23.

Naꞈ suiˇ ni dzaw

3. Yeˬsuˇ neh shiˇ˗euˬ jeˬ aˬ dui˗ahˇ iˬ baˇ hawˇ˗eu shiˇ˗eu jeˬ˗ahˇ neh bi buˬ˗iˇ

Biˬdiˬoˬ: Yeˬsuˇ aˬ jeˬ miˇ neh ya shiˇ˗euˬ nga?—Aˇ tsehˆ 1 (2:01)

• Aˬdaˬ Miˬyehˇ˗euˬ ehˇ dawˬ˗ahˇ maˬ naˇ haˬ˗euˬ miˇ neh, aˬ jeˬ ya smˇ˗euˬ nga?

Loˇmaˆ 5:12-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬdaˬ neh mˇ˗euˬ iˬ baˇ aˬ cawˬ˗ahˇ aˬ joˆ˗ehˇ deuˬ˗eu nga?

Yoˇhaˬ 3:16-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬhawˇbaˬ aˬ yawꞈ˗euˬ Zaˬmaˇ˗ahˇ miˇ tsaˬ kʼoeˇ taˆ aˬ jeˬ miˇ neh bi oe˗euˬ nga?

1. 1. Byah kuꞈ˗eu tsawˇ haˬ pyeuꞈ˗eu Aˬdaˬ Miˬyehˇ ehˇ dawˬ maˬ naˇ haˬ˗eu miˇ neh, tsawˇ haˬ zaˬ˗ahˇ iˬ baˇ hawˇ˗eu shiˇ˗eu jeˬ keuˆ le

2. 2. Byah kuꞈ˗eu tsawˇ haˬ pyeuꞈ˗eu Yeˬsuˇ Miˬyehˇ˗euˬ ehˇ dawˬ naˇ haˬ˗eu miˇ neh, tsawˇ haˬ zaˬ byah kuꞈ˗eu dehꞈ ziˇ hawˇ˗eu mˬ maˬ maˬ byaˆ zaˇ ziˇ dehꞈ˗eu jeˬ za nya

4. Yeˬsuˇ neh shiˇ˗euˬ jeˬ˗ahˇ neh tsawˇ haˬ zaˬ yawˬ gʼaˬ na luꞈ gaˇ dahˇ tsoeˬ jeˬ za nya

Biˬdiˬoˬ: Yeˬsuˇ aˬ jeˬ miˇ neh ya shiˇ˗euˬ nga?—Aˇ tsehˆ 2 (2:00)

• Tsawˇ haˬ tiˬ gʼaˬ neh shiˇ˗euˬ jeˬ, tsawˇ haˬ yawˬ gʼaˬ na luꞈ˗ahˇ aˬ joˆ˗ehˇ gaˇ dahˇ tsoeˬ nya˗eu nga?

1 Tiˆmoˇseˬ 2:5, 6-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Byah kuꞈ˗eu tsawˇ haˬ pyeuꞈ˗eu Aˬdaˬ tsawˇ haˬ zaˬ˗ahˇ iˬ baˇ hawˇ˗eu shiˇ˗eu jeˬ bi keuˆ le˗euˬ meh. Yeˬsuˇ jiˇ byah kuꞈ˗eu tsawˇ haˬ pyeuꞈ˗eu meh. Teu miˇ neh aˬ yawꞈ aˬ jeˬ jahˇ nya˗eu nga?

5. Ka kʼoꞈ˗eu jeˬ nawˬ˗ahˇ Yeˬhawˇbaˬ neh biꞈ˗euˬ laꞈ sawˬ pyeuꞈ

Yeˬhawˇbaˬ˗euˬ cawˬ deuˬ ka kʼoꞈ˗eu jeˬ˗ahˇ yawˬ ha neh za˗euˬ laꞈ sawˬ lehˇ sawˇ˗eu meh. Yaw jeˬ ma jeˬ tiˬ hmˬ˗ahˇ haw˗eu gʼaˇ duˬ, Gaˬlaˬtiˆ 2:20-ahˇ gui. Kʼoeˇ naˇ naˇ haˬ˗eu jeˬ heu˗ahˇ ja sawˇ.

• Gʼaˬ kʼehˇ Pawˇluˆ ka kʼoꞈ˗eu jeˬ˗ahˇ Miˬyehˇ neh biꞈ˗euˬ laꞈ sawˬ pyeuꞈ˗eu lehˇ sawˇ˗eu lehˇ aˬ joˆ˗ehˇ siˬ laˇ˗eu nga?

Aˬdaˬ iˬ baˇ mˇ˗euˬ miˇ neh, aˬ yawꞈ tehꞈ˗ehˇ maˬ ngeuˇ˗eu aˬ yawꞈ˗euˬ oeˬ paˬ oeˬ ma dawˬ tawˆ luꞈ ya shiˇ˗eu meh. Ehˇ kʼawꞈ Yeˬhawˇbaˬ aˬ dui˗euˬ gʼaˇ duˬ, aˬ yawꞈ˗euˬ Zaˬmaˇ bi shiˇ dah le˗euˬ miˇ neh, aˬ dui mˬ maˬ maˬ pyaˆ zaˇ ziˇ laˬ kʼaˬ tiˬ cehˇ dehꞈ gʼeh nya˗eu meh.

Jaˇliꞈ aˇ deuˆ heu deuˬ˗ahˇ gui ngeh, Yeˬhawˇbaˬ aˬ yawꞈ˗euˬ Zaˬmaˇ naˇ dui dui luꞈ gaˇ ya mawˇ ngeh aˬ yawꞈ˗ahˇ aˬ joˆ˗ehˇ gʼeh leˇ paˬ nga lehˇ shaˇ noeˬ haw. Yoˇhaˬ 19:1-7, 16-18-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬhawˇbaˬ hawˇ˗eu Yeˬsuˇ nawˬ˗euˬ gʼaˇ duˬ heu naˆ ni mˇ nehˬ laꞈ˗euˬ lehˇ ya siˬ ngeh, nawˬ˗ahˇ aˬ joˆ˗ehˇ gʼeh laˇ nya?

Kawˆ shawˆ

Yeˬsuˇ aˬ dui˗euˬ gʼaˇ duˬ shiˇ dah nehˬ laꞈ˗euˬ miˇ neh, Yeˬhawˇbaˬ aˬ dui˗ahˇ iˬ baˇ pyehˬ nehˬ laꞈ nya˗awˇ, aˬ dui mˬ maˬ maˬ byaˆ zaˇ ziˇ laˬ kʼaˬ tiˬ cehˇ dehꞈ gʼeh nya˗eu aˬ kawˬ˗aˬ za˗euˬ ma.

Ja sawˇ poˆ˗eu

• Yeˬsuˇ aˬ jeˬ miˇ neh ya shiˇ˗euˬ nga?

• Yeˬsuˇ byah kuꞈ˗eu tsawˇ haˬ pyeuꞈ˗eu miˇ neh, tsawˇ haˬ zaˬ˗euˬ gʼaˇ duˬ aˬ jeˬ jahˇ nehˬ nya˗eu nga?

• Yeˬsuˇ neh shiˇ˗euˬ jeˬ, nawˬ˗ahˇ gaˇ dahˇ aˬ joˆ˗ehˇ tsoeˬ˗eu nga?

Haw lahˬ

Yeˬsuˇ˗euˬ byah kuꞈ˗eu dehꞈ ziˇ˗ahˇ aˬ jeˬ miˇ neh ka kʼoꞈ˗eu jeˬ lehˇ kuˇ˗eu nga lehˇ haw.

“Yeˬsuˇ neh lawˇ nehˬ˗euˬ jeˬ tsawˇ haˬ gʼawˬ mya ni˗ahˇ aˬ joˆ˗ehˇ ka kʼoꞈ˗eu nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Iˬ baˇ hawˇ˗eu shiˇ˗eu jeˬ˗ahˇ neh buˬ˗iˇ nya˗eu gʼaˇ duˬ, aˬ dui aˬ jeˬ ya jahˇ˗eu nga lehˇ haw.

“Yeˬsuˇ aˬ joˆ˗ehˇ ka kʼoꞈ˗euˬ nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Yeˬhawˇbaˬ huiˬ˗eu iˬ baˇ˗ahˇ pyehˬ nehˬ ngaˇ laˬ?

“Jaˇliꞈ gaˇ kawˆ naˇ haˬ˗eu jeˬ˗euˬ dawˬ kʼoꞈ” (Loꞈ˗eu nymˇgoˇ, 2013 Ngaˬ siˬ ba la 1)

Zaˬ yo aˬ li tiˬ g’aˬ Yeˬsuˇ neh lawˇ nehˬ-euˬ jeˬ˗ahˇ dzaw geuꞈ-euˬ baˬ da neh aˬ yawꞈ-euˬ dehꞈ ziˇ aˬ joˆ-ehˇ dehꞈ poˆ dehꞈ paˇ nya˗euˬ nga lehˇ haw.

“Ngaˇ diˬ˗eu ceh˗eu jeˬ˗euˬ zaˬ kʼaˆ maˬ paˇ pyeuꞈ” (Iˇteuꞈnehꞈ laꞈ kʼoeˇ˗euˬ gaˇ kawˆ)