3. Yawˬ ha˗euˬ mawˇ do˗ahˇ ngehˬ gʼeh

Yeˬhawˇbaˬ˗ahˇ a nehˬ dzeuˇ˗euˬ Ka li zaˬ deuˬ˗aˬ, dehꞈ ziˇ laꞈ kʼoeˇ yawˬ paw na luꞈ Yeˬhawˇbaˬ bi dehꞈ mawꞈ loꞈ˗ehˇ dehꞈ˗eu meh. Heu naˇ yawˬ ha˗euˬ mawˇ do jiˇ Miˬyehˇ˗ahˇ lawˇ nehˬ˗euˬ gaˇ duˇ˗eu meh. Loˇmaˆ 12:1, 2-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ dui yaw muiˬ jawˇ saˇ doˆ ni yawˬ ha˗euˬ mawˇ do˗ahˇ aˬ jeˬ miˇ neh ngehˬ gʼeh paˬ˗ehˇ gʼeh˗eu nga?

• Aˬ dui yaw muiˬ jawˇ saˇ doˆ ni aˬ jeˬ jeˇ jahˇ nya˗eu nga?

Jaˇliꞈ dzaw˗eu miˇ neh nawˇ Yeˬhawˇbaˬ˗euˬ gaˇ kawˆ gʼawˬ mya ni ya siˬ˗euˬ meh. Kʼoeˇ naˇ nawˬ neh ya siˬ˗euˬ jeˬ˗ahˇ mˇ caw˗eu gʼaˇ duˬ, tiˬ jeˬ na laˆ paˇ˗euˬ meh. Ehˇ kʼawꞈ, nawˇ Yeˬhawˇbaˬ˗ahˇ a nehˬ˗awˇ iˇ cuꞈ shawˇ˗eu maˬ dah laˇ nyaˬ siˬ lehˇ noeˬ luꞈ˗eu kʼawꞈ pyeuꞈ nya meh. Toˆ˗ehˇ naˇ iˇ cuꞈ maˬ shawˇ nya ni laˆ tsoeˬ˗eu aˬ jeˬ jeˇ jaˆ˗eu nga? Teu˗ahˇ aˬ joˆ˗ehˇ gʼaˬ leˇ nya˗eu nga lehˇ heu kawˆ laꞈ kʼoeˇ ja sawˇ ma.

1. Iˇ cuꞈ maˬ shawˇ mi naˆ˗ehˇ Jaˇliꞈ laꞈ kʼoeˇ˗euˬ gaˇ kawˆ aˇ naˆ ni ya siˬ nya˗eu nga?

Iˇ cuꞈ shawˇ nya˗eu gʼaˇ duˬ, ‘yaw tsaˬ yaw dawˇ jeˬ˗ahˇ ya siˬ nya’˗eu meh. (1 Tiˆmoˇseˬ 2:4) Heu naˇ Jaˇliꞈ laꞈ kʼoeˇ˗euˬ gaˇ kawˆ yawˬ jeˬ na luꞈ˗ahˇ ya siˬ nya jiˇ meh lehˇ ehˇ mawꞈ˗eu maˬ ngeuˇ˗a. Iˇ cuꞈ shawˇ˗euˬ myahˇ laˇ˗euˬ Ka li zaˬ deuˬ kʼawꞈ, Jaˇliꞈ laꞈ kʼoeˇ˗euˬ gaˇ kawˆ ya pyehˆ tseˇ daˆ leꞈ˗eu meh. (Gawˇlawˇsehˇ 1:9, 10) Nawˇ iˇ cuꞈ shawˇ nya˗eu gʼaˇ duˬ, Jaˇliꞈ laꞈ kʼoeˇ˗euˬ gaˇ kawˆ kawˆ ma deuˬ˗ahˇ ya siˬ nya˗eu meh. Aˇ muˇ˗ahˇ sheuˬ gʼeh˗eu deuˬ nawˬ neh siˬ nya taˬ˗euˬ jeˬ teu, loꞈ maˬ loꞈ lehˇ siˬ nya laˇ ni caw ba nehˬ nya meh.

2. Iˇ cuꞈ maˬ shawˇ mi naˆ˗ehˇ aˬ jeˬ jeˇ ya jahˇ˗eu nga?

Nawˇ iˇ cuꞈ maˬ shawˇ mi naˆ˗ehˇ ‘ya noeˬ poˆ ya noeˬ paˇ˗awˇ ya dehꞈ poˆ ya dehꞈ paˇ’˗eu meh. (Gʼaˬkʼehˇ 3:19-ahˇ gui.) Heu naˇ dzeuˇ laꞈ ngeh yawˬ ha neh mˇ lehˬ shaˇ ca˗euˬ yawˬ jeˬ na luꞈ˗ahˇ maˇ maˇ ni nui ma cawˆ˗awˇ, Yeˬhawˇbaˬ˗ahˇ iˬ baˇ pyehˬ nehˬ laꞈ lehˇ tahˬ shaˇ gaˇ ehˇ mawꞈ˗eu meh. Kʼoeˇ naˇ, maˬ muiˬ˗eu mˇ jeˬ shaˇ kawˆ˗ahˇ byehˇ dzeh˗awˇ, Miˬyehˇ nui kʼahˇ shiˇ˗eu jeˬ˗ehˇ dehꞈ daˆ leꞈ ma lehˇ jiˇ ya noeˬ tsehˆ˗eu meh. Kʼoeˇ uˬ taꞈ, aˬ myah luꞈ mehˬ bawˬ˗ahˇ ya iˇ˗awˇ, aˇ muˇ nehˬ˗ehˇ gm leˇ˗awˇ ya tsaꞈ gaˬ˗eu meh.

3. Guˆ˗eu nui ma neh aˬ jeˬ miˇ neh bi laˆ tsoeˬ paˬ˗ehˇ maˬ gʼeh nga?

Tiˬ deuˬ na Yeˬhawˇbaˬ˗ahˇ saˇ jaˇ dzaˬ taˬ˗euˬ loꞈ˗ehˇ maˬ mˇ nya gaˇ guˆ˗eu meh. Nawˇ tiˬ poˆ na mˇ lehˬ nya˗eu nmˇ˗aˬ ngeuˇ meh. Jaˇliꞈ laꞈ kʼoeˇ ngehˬ keuˆ taˬ˗euˬ saˇ jaˇ ziꞈ˗eu deuˬ kʼawꞈ, tiˬ poˆ na mˇ lehˬ˗eu meh. Yeˬhawˇbaˬ aˬ yawꞈ˗ahˇ uˬ duˬ tahˬ˗eu deuˬ, tiˬ jawˇ˗iˬ maˬ mˇ lehˬ˗a lehˇ maˬ noeˬ tmˬ˗a. (Ja ceuˬ 103:13, 14-ahˇ gui.) Teu miˇ neh, nawˇ kʼaˇ gʼeh nya gaˇ neh leh jeh gaˇ Miˬyehˇ nui kʼahˇ shiˇ˗awˇ, nawˬ˗ahˇ caw ba nehˬ meh. Yeˬhawˇbaˬ ‘aˬ yawꞈ˗euˬ gʼoeˇ˗eu gaˬ˗eu jeˬ˗ahˇ aˬ dui ya gʼawˬ˗iˇ ni laˆ pyaˆ laˇ nya˗eu tiˬ jeˬ˗iˬ maˬ jaˆ˗a’ lehˇ kamˬ taˬ˗euˬ meh.—Loˇmaˆ 8:38, 39-ahˇ gui.

Naꞈ suiˇ ni dzaw

4. Yeˬhawˇbaˬ˗ahˇ heu naˆ maˬ tseˇ siˬ nya laˇ ni leh jeh

Iˇ cuꞈ shawˇ˗eu gʼaˇ duˬ Yeˬhawˇbaˬ˗euˬ gaˇ kawˆ aˇ naˆ ni ya siˬ nya˗eu nga? Aˬ yawꞈ˗ahˇ gaˬ laˇ˗awˇ aˬ yawꞈ nui kʼahˇ shiˇ˗eu jeˬ mˇ mawꞈ˗eu nui ma ahˇ laˇ gaˇ keuˆ ni ya siˬ nya˗eu meh. Miˇ kʼahˬ doe ni jawˇ˗eu Jaˇliꞈ dzaw zaˬ deuˬ aˬ joˆ˗ehˇ jahˇ˗euˬ nga lehˇ haw˗eu gʼaˇ duˬ, biˬdiˬoˬ pah. Kʼoeˇ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Iˇ cuꞈ shawˇ˗eu aˇ tiˆ˗ahˇ le keuˆ nya˗eu gaˇ ma (3:56)

• Biˬdiˬoˬ heu˗ahˇ haw ngeh, tiˬ gʼaˬ na iˇ cuꞈ shawˇ nya˗eu gʼaˇ duˬ aˬ jeˬ jahˇ˗euˬ nga?

Loˇmaˆ 12:2-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Nawˬ˗ahˇ Jaˇliꞈ mehˬ˗eu jeˬ, maˬ ngeuˇ naˇ Yeˬhawˇbaˬ˗euˬ Saˇ kiˇ deuˬ neh mehˬ˗euˬ jeˬ, tsaˬ˗eu maˬ siˬ ngaˇ lehˇ noeˬ miˇ˗a laˬ?

• Noeˬ naˇ nawˇ aˬ jeˬ jahˇ paˬ˗ehˇ gʼeh˗eu nga?

5. Iˇ cuꞈ maˬ shawˇ nya ni laˆ tsoeˬ laˇ˗eu jeˬ˗ahˇ gʼaˬ leˇ nya ni leh jeh

Aˬ dui Yeˬhawˇbaˬ˗ahˇ a nehˬ˗awˇ iˇ cuꞈ shawˇ˗eu lehˇ noeˬ tsehˆ ngeh, shaˬ zahˬ tiˬ jeˬ na˗ahˇ ya tahˬ puˬ˗eu meh. Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Yeˬhawˇbaˬ˗ahˇ gaˬ˗eu jeˬ laˆ tsoeˬ laˇ˗eu jeˬ˗ahˇ gʼaˬ leˇ nya (5:22)

• Biˬdiˬoˬ heu˗ahˇ haw ngeh, Naˬlaˬgaˬ˗leˬ Yeˬhawˇbaˬ˗euˬ gaˇ mˇ nya laˇ˗eu gʼaˇ duˬ aˬ jeˬ jeˇ jahˇ˗euˬ nga?

• Yeˬhawˇbaˬ˗ahˇ gaˬ˗eu jeˬ, laˆ tsoeˬ laˇ˗eu jeˬ˗ahˇ gʼaˬ leˇ nya ni aˬ yawꞈ˗ahˇ aˬ joˆ˗ehˇ caw ba nehˬ˗euˬ nga?

Dawˬdaˬ 29:25 hawˇ˗eu 2 Tiˆmoˇseˬ 1:7-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Laˆ tsoeˬ laˇ˗eu jeˬ˗ahˇ gʼaˬ leˇ nya ni, aˬ dui˗ahˇ nui kʼaˬ bi ahˇ laˇ˗eu aˬ jeˬ nga?

6. Yeˬhawˇbaˬ caw ba nehˬ laꞈ meh lehˇ nui ma taˬ

Yeˬhawˇbaˬ nawˬ˗ahˇ aˬ yawꞈ nui kʼahˇ shiˇ˗eu jeˬ mˇ nya ni caw ba nehˬ laꞈ meh. Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Yeˬhawˇbaˬ Miˬyehˇ nawˬ˗ahˇ caw ba meh (2:50)

• Biˬdiˬoˬ laꞈ kʼoeˇ˗euˬ Jaˇliꞈ dzaw zaˬ heu gʼaˬ, iˇ cuꞈ maˬ shawˇ ni aˬ jeˬ miˇ nyi naˬ˗eu nga?

• Aˬ yawꞈ aˬ jeˬ˗ahˇ ya siˬ˗euˬ miˇ neh, Yeˬhawˇbaˬ˗ahˇ nui ma taˬ dzehˬ laˇ˗euˬ nga?

Iˇsaˬyaˇ 41:10, 13-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Miˬyehˇ˗ahˇ a nehˬ ngeh nawˬ neh saˇ jaˇ dzaˬ taˬ˗euˬ loꞈ˗ehˇ mˇ byah nya meh lehˇ aˬ jeˬ miˇ neh jah nya˗eu nga?

7. Yeˬhawˇbaˬ˗euˬ nui gaˬ˗ahˇ aˇ poeˬ taˬ baw˗eu nui ma bi myaˬ laˇ

Yeˬhawˇbaˬ nawˬ˗ahˇ aˇ naˆ ni gaˬ˗eu lehˇ ngehˬ˗ehˇ shaˇ noeˬ naˇ ngehˬ˗ehˇ, nawˇ aˬ yawꞈ˗ahˇ guiˬ lahˬ huiˬ dzehˬ laˇ˗awˇ, aˬ yawꞈ˗euˬ gaˇ jiˇ maˬ shiˇ tiˬ ziˇ mˇ mawꞈ laˇ˗eu meh. Ja ceuˬ 40:5-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬhawˇbaˬ neh biꞈ nehˬ laꞈ˗euˬ jeˬ laꞈ kʼoeˇ neh, nawˬ˗ahˇ kʼaˇ ya leˇ˗eu aˬ jeˬ nya?

Bawˇlawˇpeh Yeˬlaˬmiˇ Yeˬhawˇbaˬ hawˇ˗eu aˬ yawꞈ˗euˬ dawˬ˗ahˇ gaˬ˗awˇ, Yeˬhawˇbaˬ˗euˬ tsawˇ myahˇ ya zmˬ gaˇ jiˇ aˇ poeˬ taˬ baw dui dui˗eu meh. Yeˬlaˬmiˇ ‘Yeˬhawˇbaˬ Miˬyehˇ˗oˇ, ngaˇ nawˬ˗euˬ zaˬ pyeuꞈ˗awˇ, nawˬ˗euˬ dawˬ baˬ da neh ngaˬ˗euˬ nui ma laꞈ kʼoeˇ laˬ kʼaˬ cehˇ˗eu jeˬ byah˗eu ma’ lehˇ ehˇ˗eu meh. (Yeˬlaˬmiˇ 15:16) Naˇ haˬ˗eu jeˬ heu deuˬ˗ahˇ dawˬ kʼoꞈ biꞈ.

• Yeˬhawˇbaˬ˗euˬ Saˇ kiˇ tiˬ gʼaˬ ya pyeuꞈ˗eu heu naˇ, aˬ jeˬ miˇ neh muiˬ dui dui˗eu jeˬ pyeuꞈ nga?

• Yeˬhawˇbaˬ˗euˬ Saˇ kiˇ pyeuꞈ laˇ˗eu gʼaˇ duˬ, nawˬ˗ahˇ iˇ cuꞈ shawˇ mawꞈ miˇ˗a loˇ?

• Iˇ cuꞈ maˬ shawˇ nya ni nawˬ˗ahˇ laˆ tsoeˬ˗eu tiˬ jeˬ na jaˆ miˇ˗a laˬ?

• Iˇ cuꞈ shawˇ ma lehˇ nawˬ neh noeˬ tsoˆ taˬ˗euˬ loꞈ˗ehˇ jahˇ nya˗eu gʼaˇ duˬ, nawˇ aˬ jeˬ ya jahˇ nga lehˇ noeˬ nya?

Kawˆ shawˆ

Nawˬ˗ahˇ Yeˬhawˇbaˬ caw ba˗eu miˇ neh, nawˇ iˇ cuꞈ shawˇ gaˇ laˆ tsoeˬ laˇ˗eu yawˬ jeˬ na luꞈ˗ahˇ gʼaˬ leˇ nya meh.

Ja sawˇ poˆ˗eu

• Iˇ cuꞈ shawˇ nya˗eu gʼaˇ duˬ, Jaˇliꞈ laꞈ kʼoeˇ˗euˬ gaˇ kawˆ aˇ naˆ ni ya siˬ nya˗eu nga?

• Iˇ cuꞈ maˬ shawˇ mi naˆ˗ehˇ aˬ jeˬ jeˇ ya laˆ paˇ˗eu nga?

• Guˆ˗eu nui ma neh aˬ jeˬ miˇ neh bi laˆ tsoeˬ paˬ˗ehˇ maˬ gʼeh nga?

Haw lahˬ

Nawˇ iˇ cuꞈ shawˇ˗eu heu naˇ, aˬ jeˬ˗euˬ baˬ da neh shawˇ paˬ˗ehˇ gʼeh˗eu nga lehˇ haw.

“Nawˇ iˇ cuꞈ shawˇ˗eu dah laˇ maˬ loˇ?” (Loꞈ˗eu nymˇgoˇ, 2020 Smˇ siˬ ba la)

Nawˬ˗ahˇ iˇ cuꞈ maˬ bi shawˇ ni laˆ tsoeˬ˗eu jeˬ˗ahˇ aˬ joˆ˗ehˇ gʼaˬ leˇ nya˗eu nga lehˇ haw.

“Ngaˇ iˇ cuꞈ shawˇ gaˇ laˆ tsoeˬ˗eu aˬ jeˬ nga?” (Loꞈ˗eu nymˇgoˇ, 2019 Smˇ siˬ ba la)

Iˇ cuꞈ shawˇ nya˗eu gʼaˇ duˬ, zaˬ yo aˬ li tiˬ gʼaˬ shaˬ dui dui˗eu jeˬ˗ahˇ aˬ joˆ˗ehˇ gʼaˬ leˇ nya˗euˬ nga lehˇ haw.

‘Nawˇ iˇ cuꞈ maˬ shawˇ ni aˬ jeˬ miˇ nyi naˬ de?’ (1:10)

Dahˬ beh ngeh iˇ cuꞈ maˬ shawˇ ni nyi naˬ˗euˬ zaˬ yo aˬ li tiˬ gʼaˬ, aˬ jeˬ miˇ neh iˇ cuꞈ shawˇ˗euˬ nga lehˇ haw.

Heu ngaˬ nehˬ˗ehˇ maˇ diˇ geuˇ˗a laˬ? (7:21)