7. Miˬyehˇ Miˇkʼahˬ˗euˬ zahˇ sahˇ kʼoꞈ, tsawˇ haˬ zaˬ˗euˬ zahˇ sahˇ kʼoꞈ naˆ maˬ tseˇ muiˬ dzehˬ

Sahˬ paˬ sahˬ ma deuˬ zaˬ lahˇ deuˬ˗ahˇ ngehˬ gʼeh haw piˇ nehˬ˗eu zahˇ sahˇ kʼoꞈ deuˬ jahˇ doˆ taˬ˗euˬ loꞈ˗ehˇ, Miˬyehˇ Miˇkʼahˬ jiˇ zaˬ lahˇ deuˬ ya mˇ caw˗eu zahˇ sahˇ kʼoꞈ deuˬ jaˆ˗eu meh. 1 Gawˇliˬtu 6:9-11-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Tsawˇ haˬ yawˬ gʼaˬ na luꞈ Miˬyehˇ˗euˬ zahˇ dawˬ˗ahˇ mˇ caw naˇ, miˇ tsaˬ heu siˬ aˬ joˆ˗ehˇ pyeuꞈ paˬ˗ehˇ gʼeh˗eu nga?a

• Yeˬhawˇbaˬ Miˬyehˇ Miˇkʼahˬ uˆ lahˇ˗eu uˬ moˆ jawˇ˗eu deuˬ˗ahˇ zahˇ dawˬ kʼoꞈ dawˬ heu deuˬ˗ahˇ mˇ caw lehˇ ehˇ˗eu aˬ kawˬ˗aˬ jaˆ ngaˇ lehˇ noeˬ miˇ˗a laˬ? Aˬ jeˬ miˇ neh?

• Zahˇ dawˬ kʼoꞈ dawˬ heu deuˬ˗ahˇ maˬ dehꞈ caw˗euˬ deuˬ, paˇ laˇ nya˗eu lehˇ aˬ joˆ˗ehˇ siˬ laˇ˗eu nga?—Aˇ deuˆ 11˗ahˇ haw.

Tsawˇ haˬ gʼawˬ mya gʼaˬ yuꞈ taꞈ jawˇ taꞈ˗eu gaˇ kawˆ˗ahˇ maˬ ngehˬ keuˆ shaꞈ˗a. Ehˇ kʼawꞈ Jaˇliꞈ laꞈ kʼoeˇ gaˇ kawˆ heu˗ahˇ bya cehˆ ni yaw zeu baw laˇ paˬ˗ehˇ ehˇ taˬ˗euˬ meh. Jaˇliꞈ mehˬ˗eu jeˬ, aˬ dui˗ahˇ gaˇ dahˇ tsoeˬ meh. Jaˇliꞈ˗aˬ Beh˗euˬ yaw sahˇ pyeuꞈ˗eu Yeˬhawˇbaˬ jawˇ gaˇ neh oe˗eu miˇ neh, aˬ yawꞈ aˬ dui˗euˬ gʼaˇ duˬ aˬ jeˬ muiˬ dzehˬ˗eu lehˇ siˬ nya meh. Aˬ yawꞈ aˬ dui˗ahˇ aˬ yawꞈ nui kʼahˇ shiˇ ni aˬ joˆ˗ehˇ ya dehꞈ˗eu lehˇ mehˬ nehˬ˗awˇ, aˬ dui mˬ maˬ maˬ byaˆ zaˇ ziˇ laˬ kaˬ tiˬ cehˇ dehꞈ nya˗eu gʼaˇ duˬ, aˬ jeˬ ya jahˇ˗eu lehˇ jiˇ mehˬ nehˬ taˬ˗euˬ meh.

1. Yeˬhawˇbaˬ yuꞈ taꞈ jawˇ taꞈ˗eu jeˬ˗ahˇ aˬ joˆ˗ehˇ noeˬ˗eu nga?

Yuꞈ taꞈ jawˇ taꞈ˗eu jeˬ˗aˬ, Yeˬhawˇbaˬ neh biꞈ˗euˬ laꞈ sawˬ pyeuꞈ meh. Aˬ yawꞈ sheuˬ dahˬ dzaˬ dzeuˇ˗euˬ zaˬ miˬ zaˬ hawˇ˗eu kʼaˬ dzeˇ zaˬ˗ahˇ laˬ kʼaˬ bi cehˇ mawꞈ˗eu meh. Laꞈ sawˬ heu zaˬ bi jawˇ le˗eu gʼaˇ duˬ tehꞈ maˬ ngeuˇ˗a. Tiˬ gʼaˬ tiˇ gʼaˬ nui gaˬ bi mˇ mawˇ˗eu gʼaˇ duˬ jiˇ pyeuꞈ meh. Teu miˇ neh Jaˇliꞈ˗ahˇ “nawˬ neh sheuˬ dahˬ dzaˬ˗euˬ gʼaˬ nehˬ˗ehˇ byawˬ gʼa˗awˬ” lehˇ ehˇ taˬ˗euˬ meh. (Dawˬdaˬ 5:18, 19) Yeˬhawˇbaˬ sheuˬ dahˬ dzaˬ dzeuˇ˗euˬ Ka li zaˬ deuˬ˗ahˇ yawˬ ha˗euˬ nymˇ dahˬ˗ahˇ saˇ jaˇ bi ziꞈ mawꞈ˗eu meh. Teu miˇ neh aˬ yawꞈ maꞈ aˬ cawˬ nehˬ˗ehˇ maˬ ya bahˬ˗a.—Heˬbyehˇ 13:4-ahˇ gui.

2. Dehꞈ bahˬ dehꞈ muˆ˗eu heu naˇ, aˬ jeˬ˗ahˇ ehˇ mawꞈ˗eu nga?

‘Dehꞈ bahˬ dehꞈ muˆ˗eu tsawˇ haˬ Miˬyehˇ Miˇkʼahˬ laꞈ kʼoeˇ maˬ ya uˇ leˇ˗a’ lehˇ Jaˇliꞈ ehˇ˗eu meh. (1 Gawˇliˬtu 6:9, 10) Jaˇliꞈ boꞈ˗euˬ deuˬ dehꞈ bahˬ dehꞈ muˆ˗eu lehˇ ehˇ˗eu dawˬ heu dawˬ˗ahˇ Gaˬliˇ dawˬ, pawˇneˬ˗yaˬ lehˇ geuꞈ taˬ˗euˬ meh. Dawˬ heu naˇ, (1) maˬ sheuˬ dahˬ dzaˬ˗euˬ gaˇ yuꞈ taꞈ jawˇ taꞈ˗eua (2) aˬ li aˬ buˇ cawˬ cawˬ yuꞈ taꞈ jawˇ taꞈ˗eu (3) jeˬ zaˬ nehˬ˗ehˇ yuꞈ taꞈ jawˇ taꞈ˗eu, heu deuˬ˗ahˇ ehˇ mawꞈ˗eu meh. Aˬ dui “maˬ bahˬ maˬ muˆ ni dehꞈ” naˇ, Yeˬhawˇbaˬ aˬ dui˗ahˇ nui kʼahˇ shiˇ˗awˇ yawˬ ha˗ahˇ jiˇ gaˇ dahˇ tsoeˬ meh.—1 Teˇsaˬloˇni 4:3.

Naꞈ suiˇ ni dzaw

3. Dehꞈ bahˬ dehꞈ muˆ˗eu jeˬ˗ahˇ yahˇ

Saˇ jaˇ ziꞈ˗eu Yoˇsehˆ yaw muiˬ yaw shawˇ shawˇ˗ehˇ dehꞈ nya ni leh jeh˗euˬ meh. Aˇdahˬbeh˗eu 39:1-12-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yoˇsehˆ aˬ jeˬ miˇ neh coeˬ doˆ gʼeh˗euˬ nga?—Aˇ deuˆ 9˗ahˇ haw.

• Yoˇsehˆ neh mˇ˗euˬ teu tsaˬ ngaˇ lehˇ noeˬ miˇ˗a laˬ? Aˬ jeˬ miˇ neh?

Biˬdiˬoˬ: Dehꞈ bahˬ dehꞈ muˆ˗eu jeˬ˗ahˇ yahˇ (5:06)

Yeˬhawˇbaˬ aˬ dui˗ahˇ dehꞈ bahˬ dehꞈ muˆ˗eu yawˬ jeˬ na luꞈ˗ahˇ bi yahˇ mawꞈ˗eu meh. 1 Gawˇliˬtu 6:18-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Tsawˇ haˬ tiˬ gʼaˬ aˬ jeˬ jeˇ˗euˬ baˬ da neh dehꞈ bahˬ dehꞈ muˆ laˇ nya˗eu nga?

• Aˬ dui dehꞈ bahˬ dehꞈ muˆ˗eu jeˬ˗ahˇ aˬ joˆ˗ehˇ yahˇ nya˗eu nga?

4. Aˬ dui lawˬ haw laˇ˗eu jeˬ˗ahˇ gʼaˬ leˇ nya

Biˬdiˬoˬ: Lawˬ haw laˇ˗eu jeˬ˗ahˇ gʼaˬ leˇ nya˗eu gʼaˇ duˬ Jaˇliꞈ gui (3:02)

• Biˬdiˬoˬ heu laꞈ kʼoeˇ˗euˬ mehˇ nmˇ heu gʼaˬ, aˬ yawꞈ neh noeˬ˗awˇ mˇ˗euˬ jeˬ aˬ yawꞈ˗euˬ miˬ zaˬ˗ahˇ saˇ jaˇ peuˬ˗eu jeˬ pyeuꞈ˗iˇ nya˗eu lehˇ ya siˬ ngeh aˬ jeˬ jahˇ˗euˬ nga?

Saˇ jaˇ ziꞈ˗eu Ka li zaˬ deuˬ kʼawꞈ, yawˬ ha˗euˬ nui noeˬ bi muiˬ bi shawˇ˗eu gʼaˇ duˬ ya leh jeh˗eu meh. Dehꞈ bahˬ dehꞈ muˆ˗eu jeˬ˗ahˇ maˬ shaˇ noeˬ ni aˬ joˆ˗ehˇ yahˇ nya˗eu nga? Piˇliˇpiˆ 4:8-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ dui aˬ jeˬ˗euˬ gaˇ kawˆ shaˇ noeˬ paˬ˗ehˇ gʼeh˗eu nga?

• Jaˇliꞈ gui˗eu hawˇ˗eu Miˬyehˇ˗euˬ gaˇ˗ahˇ leh jeh˗awˇ mˇ˗eu heu naˇ, iˬ baˇ mˇ ni lawˬ haw laˇ˗eu jeˬ˗ahˇ gʼaˬ leˇ nya ni aˬ joˆ˗ehˇ caw ba nehˬ nya˗eu nga?

5. Yeˬhawˇbaˬ˗euˬ zahˇ dawˬ aˬ dui˗ahˇ gaˇ dahˇ tsoeˬ

Biˬdiˬoˬ: Maˬ noeˬ siˬ nya˗eu tsawˇ haˬ (9:31)

• Aˬ li zaˬ guˬ teu gʼaˬ, aˬ yawꞈ˗ahˇ lawˬ haw laˇ paˬ˗ehˇ gʼeh˗eu jawˇ duˬ˗ahˇ aˬ joˆ˗ehˇ iˇ keuˆ˗euˬ nga?—Dawˬdaˬ 7:8, 9-ahˇ haw.

• Dawˬdaˬ 7:23, 26-ahˇ haw ngeh, dehꞈ bahˬ dehꞈ muˆ˗eu teu naˇ aˬ dui˗ahˇ maˬ muiˬ˗eu doeˇ dui dui˗eu jeˬ bi keuˆ le nya˗eu lehˇ siˬ laˇ˗eu meh. Aˬ dui yaw muiˬ yaw shawˇ shawˇ˗ehˇ dehꞈ naˇ, aˬ jeˬ jeˇ˗euˬ shaˬ zahˬ˗ahˇ yahˇ pyawˇ nya˗eu nga?

• Yaw muiˬ yaw shawˇ shawˇ˗ehˇ dehꞈ˗eu heu naˇ, aˬ dui˗ahˇ mˬ maˬ maˬ byaˆ zaˇ ziˇ laˬ kʼaˬ tiˬ cehˇ dehꞈ nya ni aˬ joˆ˗ehˇ caw ba nehˬ˗eu nga?

Tiˬ gʼaˬ na aˬ li aˬ buˇ cawˬ cawˬ kʼaˬ miˬ sheu˗eu jeˬ nehˬ˗ehˇ taꞈ leˇ˗awˇ Jaˇliꞈ mehˬ˗eu jeˬ teu aˇ dzehˬ dzeuˇ nya lehˇ noeˬ˗eu meh. Ehˇ kʼawꞈ gʼoeˇ˗eu gaˬ˗eu jeˬ pyeuꞈ˗eu Miˬyehˇ Yeˬhawˇbaˬ, aˬ dui yawˬ gʼaˬ na luꞈ˗ahˇ mˬ maˬ maˬ byaˆ zaˇ ziˇ laˬ kʼaˬ tiˬ cehˇ bi dehꞈ mawꞈ˗eu meh. Aˬ dui teu loꞈ˗ehˇ dehꞈ nya˗eu gʼaˇ duˬ, Miˬyehˇ˗euˬ zahˇ dawˬ˗ahˇ ya mˇ caw˗eu meh. 1 Gawˇliˬtu 6:9-11-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Miˬyehˇ˗euˬ mehˬ shi maˬ tsaˬ˗eu jeˬ naˇ, aˬ li aˬ buˇ cawˬ cawˬ kʼaˬ miˬ sheu˗eu heu tiˬ jeˬ tehꞈ nga laˬ?

Miˬyehˇ aˬ dui˗ahˇ nui kʼahˇ bi shiˇ˗eu gʼaˇ duˬ, aˬ dui yawˬ gʼaˬ na luꞈ ya dehꞈ poˆ ya dehꞈ paˇ˗eu meh. Teu naˇ leh jeh poeˬ kʼoꞈ ngaˇ laˬ? Ja ceuˬ 19:8, 11-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yuꞈ taꞈ jawˇ taꞈ˗eu jeˬ nehˬ˗ehˇ taꞈ leˇ˗awˇ Yeˬhawˇbaˬ˗euˬ zahˇ dawˬ heu naˇ tsaˬ ngaˇ lehˇ noeˬ miˇ˗a laˬ? Aˬ jeˬ miˇ neh?

Kawˆ shawˆ

Yuꞈ taꞈ jawˇ taꞈ˗eu jeˬ heu naˇ, kʼaˬ dzeˇ zaˬ hawˇ˗eu miˬ zaˬ˗ahˇ laˬ kʼaˬ bi cehˇ˗eu gʼaˇ duˬ, Yeˬhawˇbaˬ neh biꞈ˗euˬ laꞈ sawˬ pyeuꞈ meh.

Ja sawˇ poˆ˗eu

• Deh bahˬ dehꞈ muˆ˗eu heu naˇ, aˬ jeˬ jeˇ˗ahˇ ehˇ mawꞈ˗eu nga?

• Dehꞈ bahˬ dehꞈ muˆ˗eu jeˬ˗ahˇ aˬ joˆ˗ehˇ yahˇ nya˗eu nga?

• Yuꞈ taꞈ jawˇ taꞈ˗eu jeˬ nehˬ˗ehˇ taꞈ leˇ˗awˇ Yeˬhawˇbaˬ˗euˬ zahˇ dawˬ˗ahˇ mˇ caw˗eu heu naˇ, gaˇ dahˇ aˬ joˆ˗ehˇ tsoeˬ˗eu nga?

Haw lahˬ

Miˬyehˇ tiˬ kawˆ loꞈ˗ehˇ dehꞈ gʼeh mawꞈ˗eu zaˬ yo aˬ li hawˇ˗eu zaˬ miˬ aˬ buˇ deuˬ˗ahˇ aˬ jeˬ miˇ neh bi sheuˬ dahˬ dzaˬ mawꞈ˗eu nga lehˇ haw.

“Maˬ sheuˬ dahˬ dzaˬ˗euˬ gaˇ tiˬ kawˆ loꞈ˗ehˇ jawˇ˗eu jeˬ˗ahˇ Jaˇliꞈ aˬ joˆ˗ehˇ ehˇ˗eu nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Aˬ li aˬ buˇ cawˬ cawˬ kʼaˬ miˬ sheu˗eu deuˬ˗ahˇ bye lehˇ Jaˇliꞈ ehˇ ngaˇ laˬ?

“Aˬ li aˬ buˇ cawˬ cawˬ kʼaˬ miˬ sheu˗eu heu naˇ, yaw lehˬ ngaˇ laˬ?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Yuꞈ taꞈ jawˇ taꞈ˗eu jeˬ nehˬ˗ehˇ taꞈ˗eu Miˬyehˇ˗euˬ zahˇ dawˬ heu naˇ, aˬ dui˗ahˇ aˬ joˆ˗ehˇ haw piˇ nehˬ˗eu nga lehˇ haw.

“Kʼaˬ meh paw neh yuꞈ taꞈ jawˇ taꞈ˗eu heu naˇ, yuꞈ taꞈ˗eu jeˬ pyeuꞈ ngaˇ laˬ?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Aˬ li cawˬ cawˬ kʼaˬ miˬ sheu haw˗euˬ zaˬ yo aˬ li tiˬ gʼaˬ Miˬyehˇ nui kʼahˇ shiˇ ni aˬ jeˬ miˇ neh dehꞈ poˆ dehꞈ paˇ˗euˬ nga lehˇ haw˗eu gʼaˇ duˬ, “Aˬ yawꞈ maꞈ ngaˬ˗ahˇ yaw zeu baw nehˬ laꞈ˗euˬ meh” lehˇ ehˇ˗eu gaˇ kawˆ˗ahˇ haw.

“Jaˇliꞈ tsawˇ haˬ˗euˬ dehꞈ ziˇ˗ahˇ laˆ paˇ” (Loꞈ˗eu nymˇgoˇ, 2011 Oeˬ siˬ ba la 1)

Aˬ dui Yeˬhawˇbaˬ˗ahˇ gaˬ dui dui˗awˇ aˬ yawꞈ˗euˬ nui ma˗ahˇ bi deuˬ leˇ˗eu jeˬ maˬ mˇ lehˇ noeˬ taˬ˗euˬ kʼawꞈ, tiˬ poˆ na mˇ lehˬ shaˇ ca laˇ nya˗eu meh. Tiˬ poˆ na teu naˆ naˆ˗ehˇ lehˬ˗eu maˬ ngeuˇ kʼawꞈ, tiˬ poˆ na naˇ huiˬ˗eu iˬ baˇ mˇ laˇ nya˗eu meh. (1 Gawˇliˬtu 6:9, 10) Aˬ dui huiˬ˗eu iˬ baˇ mˇ˗euˬ kʼawꞈ Yeˬhawˇbaˬ aˬ dui˗ahˇ gaˬ luꞈ˗a siˬ. Aˬ yawꞈ aˬ dui˗ahˇ nui ma keuˆ˗eu laꞈ kʼoeˇ iˬ baˇ pyehˬ nehˬ mawꞈ˗awˇ aˬ dui˗ahˇ caw ba nehˬ mawꞈ˗eu meh.

1. Aˬ dui mˇ lehˬ ngeh Yeˬhawˇbaˬ neh iˬ baˇ bi pyehˬ˗eu gʼaˇ duˬ aˬ jeˬ ya jahˇ˗eu nga?

Yeˬhawˇbaˬ˗ahˇ gaˬ˗eu deuˬ huiˬ˗eu iˬ baˇ mˇ ngeh nui ma cawˆ dui dui˗eu meh. Aˬ yawꞈ maꞈ Yeˬhawˇbaˬ neh aˬ yawꞈ˗euˬ tsawˇ haˬ deuˬ˗ahˇ “Naw maꞈ˗euˬ iˬ baˇ neˇ tseuˆ ni gʼeh kʼawꞈ, saˬ laˬ naˆ maˬ tseˇ pyuˇ laˇ tehꞈ˗a” lehˇ saˇ jaˇ dzaˬ taˬ˗euˬ dawˬ˗ahˇ ya siˬ˗euˬ miˇ neh nui ma saˇ nya meh. (Iˇsaˬyaˇ 1:18) Aˬ dui maˇ maˇ ni noeˬ poˆ noeˬ paˇ naˇ, Yeˬhawˇbaˬ aˬ dui˗ahˇ iˬ baˇ pyehˬ nehˬ˗eu yaw duˬ baw meh. Aˬ joˆ˗ehˇ ya noeˬ poˆ ya noeˬ paˇ˗eu nga? Aˬ dui yawˬ ha neh mˇ lehˬ˗euˬ jeˬ˗ahˇ nui ma cawˆ dui dui˗awˇ teu loꞈ˗ehˇ maˬ paˇ ya mˇ kʼoꞈ˗iˇ˗eu uˬ taꞈ, Yeˬhawˇbaˬ˗ahˇ iˬ baˇ pyehˬ nehˬ laꞈ lehˇ ya tahˬ shaˇ˗eu meh. Kʼoeˇ naˇ kʼaˇ gʼeh nya gaˇ neh leh jeh˗eu laꞈ kʼoeˇ aˬ dui˗ahˇ bi mˇ bahˬ laˇ˗eu nui noeˬ hawˇ˗eu mˇ jeˬ shaˇ kawˆ˗ahˇ laˆ poˆ laˆ paˇ˗awˇ, Yeˬhawˇbaˬ˗euˬ muiˬ˗eu shawˇ˗eu zahˇ dawˬ˗ahˇ ya dehꞈ caw˗eu meh.—Iˇsaˬyaˇ 55:6, 7-ahˇ gui.

2. Yeˬhawˇbaˬ aˇ muˇ˗ahˇ sheuˬ gʼeh˗eu deuˬ˗ahˇ zmˬ˗awˇ iˬ baˇ mˇ˗euˬ gʼaˬ˗ahˇ aˬ joˆ˗ehˇ caw ba nehˬ˗eu nga?

Aˬ dui huiˬ˗eu iˬ baˇ mˇ˗euˬ naˇ Yeˬhawˇbaˬ aˬ dui˗ahˇ ‘aˇ muˇ˗euˬ aˬ yuiꞈ aˬ tsu deuˬ˗ahˇ kuˇ˗awˬ’ lehˇ maˇ jawˆ ni ehˇ taˬ˗euˬ meh. (Yaˬkoˆ 5:14, 15-ahˇ gui.) Aˇ muˇ˗ahˇ sheuˬ gʼeh˗eu deuˬ Yeˬhawˇbaˬ hawˇ˗eu aˬ yawꞈ˗euˬ gaˇ mˇ˗eu deuˬ˗ahˇ gaˬ˗eu meh. Aˬ yawꞈ maꞈ aˬ dui Yeˬhawˇbaˬ nehˬ˗ehˇ cawˬ cawˬ˗eu jeˬ paˇ muiˬ kʼoꞈ laˇ ni caw ba nehˬ nya˗eu meh.—Gaˬlaˬtiˆ 6:1.

Aˇ muˇ˗ahˇ sheuˬ gʼeh˗eu deuˬ huiˬ˗eu iˬ baˇ mˇ˗euˬ gʼaˬ˗ahˇ aˬ joˆ˗ehˇ caw ba nehˬ˗eu nga? Sheuˬ gʼeh˗eu nyiˬ gʼaˬ maˬ ngeuˇ naˇ smˇ gʼaˬ, Jaˇliꞈ˗ahˇ dawˬ pehˬ taˬ˗awˇ mehˬ nehˬ tsoˆ nehˬ˗eu meh. Kʼoeˇ naˇ, iˬ baˇ maˬ paˇ bi mˇ poˆ˗eu gʼaˇ duˬ, nui noeˬ nui duˇ biꞈ˗awˇ gʼaˬ jiˇ biꞈ˗eu meh. Aˇ muˇ laꞈ kʼoeˇ˗euˬ deuˬ˗ahˇ maˬ muiˬ˗eu nui noeˬ maˬ bi nyawˬ˗iˇ˗eu gʼaˇ duˬ, sheuˬ gʼeh˗eu deuˬ noeˬ poˆ noeˬ paˇ maˬ mˇ˗eu huiˬ˗eu iˬ baˇ mˇ˗euˬ gʼaˬ˗ahˇ aˇ muˇ laꞈ kʼoeˇ neh teh doˆ˗eu meh.

Naꞈ suiˇ ni dzaw

3. Yawˬ ha˗euˬ iˬ baˇ ja doˆ˗eu heu naˇ, Yeˬhawˇbaˬ nehˬ˗ehˇ bi gʼoeˇ kʼoꞈ laˇ nya

Aˬ dui neh mˇ lehˬ shaˇ ca˗euˬ yawˬ jeˬ na luꞈ Yeˬhawˇbaˬ˗euˬ nui ma˗ahˇ bi deuˬ leˇ˗eu miˇ neh, aˬ dui aˬ jeˬ mˇ bahˬ˗euˬ lehˇ aˬ yawꞈ˗ahˇ ya ehˇ nehˬ˗eu meh. Ja ceuˬ 32:1-5-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yawˬ ha˗euˬ iˬ baˇ laˆ zaꞈ˗eu lehˇ leh jeh ngeh to˗aˬ, Yeˬhawˇbaˬ˗ahˇ ja doˆ nehˬ naˇ aˬ jeˬ miˇ neh muiˬ˗eu nga?

Biˬdiˬoˬ: ‘Yeˬhawˇbaˬ aˬ yawꞈ gaˬ˗eu deuˬ˗ahˇ mehˬ paˇ tsoˆ paˇ nehˬ’ (3:01)

• Biˬdiˬoˬ laꞈ kʼoeˇ˗euˬ Kehˇnahˬ˗ahˇ Yeˬhawˇbaˬ jawˇ gaˇ gʼoꞈ kʼoꞈ laˇ nya ni, sheuˬ gʼeh˗eu deuˬ aˬ joˆ˗ehˇ caw ba nehˬ˗euˬ nga?

Aˇ muˇ˗ahˇ sheuˬ gʼeh˗eu deuˬ aˬ dui˗ahˇ caw ba nehˬ mawꞈ˗eu miˇ neh, aˬ yawꞈ maꞈ˗ahˇ maˬ laˆ zaꞈ ni kʼaˇ ngeuˇ˗eu loꞈ˗ehˇ ya ehˇ nehˬ˗eu meh. Yaˬkoˆ 5:16-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Sheuˬ gʼeh˗eu deuˬ˗ahˇ kʼaˇ ngeuˇ˗eu loꞈ˗ehˇ ehˇ nehˬ naˇ, aˬ dui˗ahˇ caw ba˗eu aˬ jeˬ miˇ neh awˬ dzehˬ laˇ˗eu nga?

4. Yeˬhawˇbaˬ iˬ baˇ mˇ-euˬ deuˬ-ahˇ g’awˬ shaˬ gaˬ-eu jeˬ mˇ mawˇ

Huiˬ˗eu iˬ baˇ mˇ˗euˬ gʼaˬ Yeˬhawˇbaˬ˗euˬ zahˇ dawˬ˗ahˇ maˬ mˇ caw naˇ, aˬ yawꞈ-ahˇ aˇ muˇ laꞈ k’oeˇ neh ya teh doˆ meh. Aˬ dui aˬ yawꞈ nehˬ-ehˇ cawˬ maˬ cawˬ. 1 Gawˇliˬtu 5:6, 11-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Dehˬ tseˬ kaˬ muˇ˗ahˇ bi poˬ laˇ˗eu loꞈ˗ehˇ iˬ baˇ maˬ noeˬ poˆ maˬ noeˬ paˇ˗eu deuˬ nehˬ˗ehˇ cawˬ cawˬ˗eu heu naˇ aˇ muˇ˗ahˇ aˬ joˆ˗ehˇ bi deuˬ laˇ˗eu nga?

• Teh doˆ˗eu jeˬ heu naˇ Yeˬhawˇbaˬ gaˇ kahˇ dahˇ˗eu Miˬyehˇ pyeuꞈ˗awˇ, aˬ dui˗ahˇ gaˬ˗eu lehˇ aˬ joˆ˗ehˇ bi siˬ laꞈ˗eu nga?

5. Aˬ dui iˬ baˇ noeˬ poˆ noeˬ paˇ naˇ, Yeˬhawˇbaˬ iˇ baˇ pyehˬ nehˬ

Tsawˇ haˬ tiˬ gʼaˬ iˬ baˇ noeˬ poˆ noeˬ paˇ ngeh Yeˬhawˇbaˬ˗ahˇ aˬ joˆ˗ehˇ gʼeh leˇ˗eu lehˇ bi siˬ˗eu gʼaˇ duˬ, Yeˬsuˇ yaw jeˬ ma jeˬ tiˬ hmˬ ja˗euˬ meh. Luˇkaꞈ 15:1-7-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yaw jeˬ ma jeˬ heu Yeˬhawˇbaˬ nehˬ˗ehˇ taꞈ leˇ˗awˇ aˬ dui˗ahˇ aˬ jeˬ bi siˬ laꞈ˗eu nga?

Yeˬsaˬgeˬlaˇ 33:11-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ dui iˬ baˇ noeˬ poˆ noeˬ paˇ˗euˬ lehˇ bi mawˇ˗eu gʼaˇ duˬ, aˬ jeˬ ya jahˇ˗eu nga?

Kawˆ shawˆ

Aˬ dui huiˬ˗eu iˬ baˇ mˇ kʼawꞈ maˇ maˇ ni nui ma cawˆ˗awˇ iˬ baˇ teu˗ahˇ maˬ paˇ mˇ kʼoꞈ˗iˇ˗eu lehˇ leh jeh naˇ, Yeˬhawˇbaˬ aˬ dui˗ahˇ iˬ baˇ pyehˬ nehˬ laꞈ meh.

Ja sawˇ poˆ˗eu

• Aˬ dui˗euˬ iˬ baˇ Yeˬhawˇbaˬ˗ahˇ ja doˆ nehˬ˗eu heu naˇ aˬ jeˬ miˇ neh yaw muiˬ nga?

• Yeˬhawˇbaˬ iˬ baˇ bi pyehˬ˗eu gʼaˇ duˬ, aˬ dui aˬ jeˬ ya jahˇ˗eu nga?

• Aˬ dui huiˬ˗eu iˬ baˇ mˇ naˇ, aˬ jeˬ miˇ neh aˇ muˇ˗ahˇ sheuˬ gʼeh˗eu deuˬ neh ya bi caw ba˗eu nga?

Haw lahˬ

Iˇsaˬyaˇ 1:18-ahˇ ehˇ taˬ˗euˬ loꞈ˗ehˇ Yeˬhawˇbaˬ zaˬ yo aˬ li tiˬ gʼaˬ˗ahˇ gʼawˬ shaˬ aˬ joˆ˗ehˇ gaˬ nehˬ˗euˬ nga lehˇ haw.

Yeˬhawˇbaˬ gʼawˬ shaˬ gaˬ nehˬ laꞈ˗eu jeˬ˗ahˇ maˬ jah coeˇ ni taˬ gʼeh (5:02)

Aˬ muˇ-ahˇ sheuˬ g’eh-eu deuˬ huiˬ-eu iˬ baˇ mˇ-euˬ deuˬ-ahˇ caw ba-eu g’aˇ duˬ aˬ joˆ-ehˇ leh jeh-eu nga?

“Mˇ bahˬ˗euˬ deuˬ˗ahˇ nui gaˬ hawˇ˗eu gʼawˬ shaˬ gaˬ˗eu jeˬ mˇ mawˇ nehˬ” (Loꞈ˗eu nymˇgoˇ, 2024 Yehꞈ siˬ ba la)

Maˬ noeˬ poˆ maˬ noeˬ paˇ-euˬ deuˬ-ahˇ nui gaˬ hawˇ-eu g’awˬ shaˬ gaˬ-eu jeˬ aˬ joˆ-ehˇ mˇ mawˇ nya-eu nga lehˇ haw.

Aˇ muˇ˗ahˇ neh bi teh doˆ˗euˬ deuˬ˗euˬ gʼaˇ duˬ caw ba˗eu jeˬ (Loꞈ-eu nymˇgoˇ, 2024 Yehꞈ siˬ ba la)

Yaw tsaˬ yaw dawˇ˗ahˇ neh cah gʼawˬ˗euˬ tiˬ gʼaˬ Yeˬhawˇbaˬ aˬ yawꞈ˗ahˇ kuˇ kʼoꞈ luꞈ nya lehˇ aˬ jeˬ miˇ noeˬ˗eu lehˇ haw˗eu gʼaˇ duˬ, “Ngaˇ Yeˬhawˇbaˬ jawˇ gaˇ ya gʼoꞈ laˇ nya” lehˇ ehˇ˗eu gaˇ kawˆ˗ahˇ haw.

“Jaˇliꞈ tsawˇ haˬ˗euˬ dehꞈ ziˇ˗ahˇ laˆ paˇ” (Loꞈ˗eu nymˇgoˇ, 2012 Oeˬ siˬ ba la 1)