Miˇ tsaˬ kʼoeˇ taˆ˗euˬ tsawˇ haˬ deuˬ jiˇ baˬ nehˬ˗ehˇ taꞈ leˇ˗awˇ noeˬ˗eu jeˬ maˬ duˇ leˇ˗a. Tiˬ deuˬ na cawˬ deuˬ nehˬ˗ehˇ jawˇ ngeh dawˇ byawˬ˗eu meh. Ehˇ kʼawꞈ tiˬ pawꞈ˗iˬ maˬ dawˇ˗eu deuˬ jiˇ jawˇ˗awˇ, dawˇ yehꞈ dawˇ boˆ˗eu deuˬ jiˇ jawˇ˗eu meh. Jiˇ baˬ nehˬ˗ehˇ taꞈ leˇ˗awˇ Jaˇliꞈ aˬ joˆ˗ehˇ ehˇ˗eu nga?

1. Jiˇ baˬ dawˇ˗eu heu naˇ, yaw lehˬ ngaˇ laˬ?

Jiˇ baˬ dawˇ˗eu heu naˇ, yaw lehˬ meh lehˇ Jaˇliꞈ laꞈ kʼoeˇ maˬ ehˇ taˬ˗aˬ. Maˇ diˇ naˇ Miˬyehˇ neh biꞈ˗euˬ laꞈ sawˬ gʼawˬ mya jeˬ˗ahˇ ngehˬ keuˆ ngeh, ‘tsawˇ haˬ zaˬ˗euˬ nui ma˗ahˇ laˬ kʼaˬ bi cehˇ˗eu aˬ gaꞈ dzaˇ uiˇ’˗ahˇ jiˇ ngehˬ keuˆ taˬ˗euˬ meh. (Ja ceuˬ 104:14, 15) Maˇ diˇ naˇ gaˇ hu Miˬyehˇ˗euˬ gaˇ mˇ zaˬ tiˬ deuˬ na jiˇ, jiˇ baˬ dawˇ˗euˬ meh.—1 Tiˆmoˇseˬ 5:23.

2. Jiˇ baˬ dawˇ˗eu deuˬ˗ahˇ Jaˇliꞈ aˬ joˆ˗ehˇ mehˬ nehˬ taˬ˗euˬ nga?

Yeˬhawˇbaˬ jiˇ baˬ aˇ dzehˬ dawˇ dzeuˇ˗eu deuˬ hawˇ˗eu dzaˬ yehꞈ dawˇ yehꞈ˗eu deuˬ˗ahˇ laꞈ maˬ daˬ˗a. (Gaˬlaˬtiˆ 5:21) ‘Jiˇ baˬ dawˇ yehꞈ˗eu deuˬ nehˬ˗ehˇ mehˬ bawˬ taˬ mˇ’ lehˇ Jaˇliꞈ ehˇ˗eu meh. (Dawˬdaˬ 23:20) Teu miˇ neh aˬ dui jiˇ baˬ dawˇ naˇ, tiˬ gʼaˬ tehꞈ˗ehˇ dawˇ˗eu kʼawꞈ ni yawˬ ha˗euˬ nui noeˬ hawˇ˗eu ngehˬ˗eu jeˬ, mˇ˗eu jeˬ˗ahˇ maˬ gʼaˬ leˇ gaˇ keuˆ ni maˬ ehˇ, yawˬ ha˗euˬ mawˇ do˗ahˇ deuˬ laˇ gaˇ keuˆ ni maˬ ehˇ, dawˇ paˬ˗ehˇ maˬ gʼeh˗a. Aˬ dui aˇ myaˆ ni tehꞈ˗ehˇ dawˇ˗eu lehˇ yawˬ ha˗euˬ nui ma˗ahˇ maˬ gʼaˬ leˇ naˇ, tiˬ pawꞈ˗iˬ maˬ dawˇ˗eu muiˬ dzehˬ meh.

3. Aˬ dui jiˇ baˬ nehˬ˗ehˇ taˬ leˇ˗awˇ aˬ cawˬ neh noeˬ tsehˆ˗euˬ jeˬ˗ahˇ yaw zeu aˬ joˆ˗ehˇ baw nya˗eu nag?

Jiˇ baˬ dawˇ˗eu laˬ, maˬ dawˇ˗eu laˬ lehˇ aˬ dui yawˬ gʼaˬ na luꞈ yawˬ ha naꞈ˗i ya noeˬ tsehˆ˗eu meh. Yawˬ ha jiˇ baˬ maˬ dawˇ naˇ, jiˇ baˬ ui cuiˆ na dawˇ˗eu deuˬ˗ahˇ kʼoeˇ heu lehˇ maˬ ya ehˇ˗a, jiˇ baˬ dawˇ˗eu deuˬ jiˇ maˬ dawˇ˗eu deuˬ˗ahˇ dawˇ˗awˬ lehˇ ka tiˇ paˬ˗ehˇ maˬ gʼeh˗a. (Loˇmaˆ 14:10) Aˬ dui jiˇ baˬ dawˇ gaˇ aˬ cawˬ nui ma maˬ saˇ naˇ jiˇ, maˬ dawˇ˗eu muiˬ dzehˬ meh. (Loˇmaˆ 14:21-ahˇ gui.) Aˬ dui˗aˬ “yawˬ ha gʼaˇ duˬ muiˬ˗eu jeˬ˗ahˇ maˬ poˆ ni, aˬ cawˬ gʼaˇ duˬ muiˬ˗eu jeˬ˗ahˇ poˆ˗eu” ma.—1 Gawˇliˬtu 10:23, 24-ahˇ gui.

Naꞈ suiˇ ni dzaw

4. Dawˇ˗eu laˬ, maˬ dawˇ˗eu laˬ lehˇ yaw muiˬ˗ehˇ noeˬ tsehˆ

Yeˬsuˇ jiˇ baˬ dawˇ˗eu gaˇ kawˆ˗ahˇ aˬ joˆ˗ehˇ noeˬ˗eu nga lehˇ siˬ nya˗eu gʼaˇ duˬ, aˬ yawꞈ neh mˇ beh beh˗euˬ zahˬ leˇ paˬ˗ehˇ gʼeh˗eu jeˬ˗ahˇ haw nya meh. Yoˇhaˬ 2:1-11-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Zahˬ leˇ paˬ˗ehˇ gʼeh˗eu jeˬ heu˗ahˇ haw ngeh, Yeˬsuˇ jiˇ baˬ hawˇ˗eu jiˇ baˬ dawˇ˗eu deuˬ˗ahˇ aˬ joˆ˗ehˇ noeˬ˗eu nga?

• Yeˬsuˇ jiˇ baˬ dawˇ˗eu deuˬ˗ahˇ tiˬ jeˬ˗iˬ maˬ ehˇ˗eu miˇ neh, Ka li zaˬ deuˬ jiˇ baˬ dawˇ˗eu deuˬ˗ahˇ aˬ joˆ˗ehˇ noeˬ paˬ˗ehˇ gʼeh˗eu nga?

Ka li zaˬ deuˬ jiˇ baˬ dawˇ nya kʼawꞈ, kʼaˇ ngeuˇ ngeh dawˇ nya˗eu maˬ ngeuˇ˗a. Dawˬdaˬ 22:3-ahˇ gui gʼaˬ naˇ, heu gaˇ ehˇ taˬ˗euˬ aˇ yamˬ heu deuˬ˗ahˇ aˬ jeˬ miˇ neh dawˇ paˬ˗ehˇ maˬ gʼeh˗eu nga lehˇ ja sawˇ.

• Lawˬ liˬ yeuꞈ ngeh hawˇ˗eu caˆ keu ka nehˬ˗ehˇ gaˇ mˇ ngeh

• Zaˬ pi luꞈ ngeh

• Saˬ laˬ gʼoˬ taˬ dawˇ lehˇ ehˇ ngeh

• Aˇ myaˆ ni tehꞈ˗ehˇ dawˇ˗eu lehˇ yawˬ ha˗euˬ nui ma˗ahˇ maˬ gʼaˬ leˇ ngeh

• Miˇ kʼahˬ˗euˬ zahˇ sahˇ kʼoꞈ jiˇ baˬ maˬ bi dawˇ ngeh

• Shaˬ dui dui˗awˇ daˇ doˆ˗euˬ miˇ neh, maˬ paˇ dawˇ ma lehˇ noeˬ tsehˆ taˬ˗euˬ deuˬ nehˬ˗ehˇ jawˇ luꞈ ngeh

Jiˇ cehˇ baˇ ngeh maˬ ehˇ, dzaˬ byawˬ dawˇ byawˬ ngeh maˬ ehˇ, jiˇ baˬ bi dawˇ paˬ˗ehˇ gʼeh ngaˇ laˬ lehˇ haw˗eu gʼaˇ duˬ, biˬdiˬoˬ pah.

Biˬdiˬoˬ: Jiˇ baˬ bi dawˇ paˬ˗ehˇ gʼeh ngaˇ laˬ? (2:41)

Loˇmaˆ 13:13 hawˇ˗eu 1 Gawˇliˬtu 10:31, 32-ahˇ gui. Jaˇliꞈ tiˬ deuˆ˗ahˇ kʼaˇ gui gʼaˬ ngeh, naˇ haˬ˗eu jeˬ heu˗ahˇ tiˬ poˆ naˇ haˬ.

• Jaˇliꞈ zahˇ heu˗ahˇ haw ngeh, Yeˬhawˇbaˬ nui kʼahˇ shiˇ˗eu jeˬ˗ehˇ aˬ joˆ˗ehˇ noeˬ tsehˆ nya˗eu nga?

5. Aˇ myaˆ ni tehꞈ˗ehˇ dawˇ˗eu lehˇ noeˬ tsehˆ

Aˬ dui jiˇ baˬ ui cuiˆ na dawˇ gaˇ Yeˬhawˇbaˬ tiˬ jeˬ˗iˬ maˬ ehˇ kʼawꞈ ni, aˇ dzehˬ dawˇ dzeuˇ gaˇ aˬ yawꞈ laꞈ maˬ daˬ˗a lehˇ taˬ ngehˇ. Aˬ jeˬ miˇ neh nga? Hawˇseˬ 4:11, 18-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Jiˇ baˬ aˇ dzehˬ dawˇ dzeuˇ naˇ, aˬ jeˬ pyeuꞈ laˇ˗eu nga?

Aˬ dui jiˇ baˬ aˇ dzehˬ˗ehˇ maˬ dawˇ dzeuˇ ni aˬ joˆ˗ehˇ yahˇ nya˗eu nga? Aˬ dui yawˬ ha aˇ myaˆ ni tehꞈ˗ehˇ dawˇ nya˗eu lehˇ ya siˬ nya˗eu meh. Dawˬdaˬ 11:2-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˇ myaˆ ni tehꞈ˗ehˇ dawˇ˗eu lehˇ laˆ duˬ taˬ˗eu heu naˇ, aˬ jeˬ miˇ neh yaw muiˬ nga?

6. Tiˬ deuˬ na jiˇ baˬ aˬ joˆ˗ehˇ daˇ nya˗euˬ nga?

Biˬdiˬoˬ: ‘Ngaˇ yawˬ ha˗euˬ dehꞈ jeˬ dehꞈ kawˆ˗ahˇ dehˆ dui dui laˇ haw˗euˬ ma’ (6:32)

• Biˬdiˬoˬ laꞈ kʼoeˇ˗euˬ Diˬmiˬtiˬ, jiˇ baˬ dawˇ yehꞈ shawˇ˗euˬ naˇ aˬ joˆ˗ehˇ gʼeh˗eu nga?

• Aˬ yawꞈ jiˇ baˬ tiˬ poˆ tehꞈ˗ehˇ taˆ lehˇ daˇ nya˗euˬ nga laˬ?

• Aˇ nah naˇ, aˬ yawꞈ jiˇ baˬ aˬ joˆ˗ehˇ daˇ nya˗euˬ nga?

1 Gawˇliˬtu 6:10, 11-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Jiˇ baˬ yehꞈ˗eu jeˬ nehˬ˗ehˇ taꞈ leˇ˗awˇ Jaˇliꞈ aˬ joˆ˗ehˇ ehˇ˗eu nga?

• Jiˇ baˬ dawˇ dzoˆ˗euˬ deuˬ dehꞈ poˆ dehꞈ paˇ nya˗eu lehˇ aˬ joˆ˗ehˇ siˬ laˇ˗eu nga?

Maꞈtehˬ 18:8-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ kuiˇ aˬ laꞈ deuˆ tsehˆ lehˇ ehˇ˗eu yaw jeˬ ma jeˬ heu naˇ, aˬ dui˗ahˇ Yeˬhawˇbaˬ nui kʼahˇ bi shiˇ˗eu gʼaˇ duˬ, aˬ dui tiˬ jeˬ na ya jahˇ gaˇ ehˇ mawꞈ˗eu meh. Nawˇ jiˇ baˬ dawˇ dzoˆ˗euˬ naˇ, jiˇ baˬ daˇ˗eu gʼaˇ duˬ aˬ jeˬ ya jahˇ˗eu nga?a

1 Gawˇliˬtu 15:33-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Jiˇ baˬ aˇ dzehˬ˗ehˇ dawˇ˗eu deuˬ nehˬ˗ehˇ cawˬ cawˬ naˇ, nawˬ˗ahˇ aˬ joˆ˗ehˇ deuˬ laˇ nya˗eu nga?

Kawˆ shawˆ

Yeˬhawˇbaˬ tsawˇ haˬ˗ahˇ laˬ kʼaˬ bi cehˇ˗eu gʼaˇ duˬ jiˇ baˬ bi jaˆ taˬ˗euˬ kʼawꞈ ni, aˇ dzehˬ dzeuˇ ni dawˇ gaˇ maˬ ehˇ, dzaˬ yehꞈ dawˇ yehꞈ gaˇ maˬ ehˇ, laꞈ maˬ daˬ˗a.

Ja sawˇ poˆ˗eu

• Jiˇ baˬ nehˬ˗ehˇ taꞈ leˇ˗awˇ Jaˇliꞈ aˬ jeˬ ehˇ˗eu nga?

• Jiˇ baˬ aˇ dzehˬ˗ehˇ dawˇ˗eu heu naˇ, aˬ jeˬ jeˇ˗ahˇ deuˬ˗eu nga?

• Jiˇ baˬ dawˇ˗eu jeˬ nehˬ˗ehˇ taꞈ leˇ˗awˇ aˬ cawˬ neh noeˬ tsehˆ˗euˬ jeˬ˗ahˇ, aˬ dui yaw zeu aˬ joˆ˗ehˇ baw nya˗eu nga?

Haw lahˬ

Zaˬ guˬ deuˬ jiˇ baˬ nehˬ˗ehˇ taꞈ leˇ˗awˇ yaw muiˬ˗ehˇ aˬ joˆ˗ehˇ noeˬ tsehˆ nya˗eu nga?

Maˬ dawˇ mi naˆ˗ehˇ yaw muiˬ˗ehˇ shaˇ noeˬ (2:31)

Jiˇ baˬ˗ahˇ gʼaˬ leˇ ni aˬ jeˬ jeˇ jahˇ nya˗eu nga lehˇ haw.

“Jiˇ baˬ˗ahˇ yaw tsaˬ tsaˬ˗ehˇ bi jaˆ” (Loꞈ˗eu nymˇgoˇ, 2010 Tiˬ siˬ ba la 1)

Ka li zaˬ deuˬ jiˇ baˬ kʼmˬ maˬ ciˬ tuˆ˗awˇ dawˬ ngehˬ gʼeh nehˬ paˬ˗ehˇ gʼeh ngaˇ laˬ?

“Gui˗eu deuˬ naˇ haˬ˗eu jeˬ” (Loꞈ˗eu nymˇgoˇ, 2007 Nyiˬ siˬ ba la 15)

Zaˬ yo aˬ li tiˬ gʼaˬ˗ahˇ jiˇ baˬ daˇ nya ni caw ba nehˬ˗eu aˬ jeˬ nga lehˇ haw˗eu gʼaˇ duˬ, “Ngaˇ jiˇ baˬ baw tsoꞈ pyeuꞈ haw˗euˬ ma” lehˇ ehˇ˗eu gaˇ kawˆ˗ahˇ haw.

“Jaˇliꞈ tsawˇ haˬ˗euˬ dehꞈ ziˇ˗ahˇ laˆ paˇ” (Loꞈ˗eu nymˇgoˇ, 2012 Ngaˬ siˬ ba la 1)

Aˬ dui yawˬ gʼaˬ na luꞈ yawˬ ha ya leˇ˗eu dm jeˬ dm kawˆ jaˆ˗eu meh. Aˬ dui yawˬ ha ya leˇ˗eu jeˬ˗ehˇ dm kʼawꞈ ni Jaˇliꞈ zahˇ˗ahˇ mˇ caw naˇ Yeˬhawˇbaˬ nui kʼahˇ shiˇ meh. Toˆ˗ehˇ naˇ dm jeˬ dm kawˆ nehˬ˗ehˇ taꞈ˗eu Jaˇliꞈ zahˇ tiˬ deuˬ na˗ahˇ haw ma.

1. Aˬ dui aˬ joˆ˗ehˇ ya dm ya gʼaˬ˗eu nga?

Aˬ dui ‘nui ma nahˬ yu ni taˬ˗awˇ, aˬ cawˬ haw muiˬ ni ya dm ya gʼaˬ˗eu’ meh. Tsawˇ haˬ deuˬ˗ahˇ aˬ dui ‘Miˬyehˇ˗ahˇ yaw zeu baw ngaˇ’ lehˇ bi mawˇ leˇ˗eu gʼaˇ duˬ, aˬ dui˗euˬ dm gʼaˬ dm lmˇ buˇ coeˆ ni ya bi gʼeh˗eu meh. (1 Tiˆmoˇseˬ 2:9, 10) Heu oeˬ jeˬ˗ahˇ shaˇ noeˬ haw sheˇ. (1) Aˬ dui ‘aˬ cawˬ haw muiˬ ni’ dm paˬ˗ehˇ gʼeh˗eu meh. Nawˇ Yeˬhawˇbaˬ˗euˬ Saˇ kiˇ deuˬ˗euˬ mehˬ bawˬ˗ahˇ oe ngeh tsawˇ haˬ deuˬ mehˬ tsoeˬ gʼawˬ mya jeˬ lehˇ dm taˬ˗euˬ gaˇ ya mawˇ˗euˬ paˬ. Aˬ yawꞈ maꞈ˗euˬ dm jeˬ dm kawˆ maˬ duˇ leˇ kʼawꞈ, aˬ yawꞈ maꞈ˗euˬ mehˬ tsoeˬ hawˇ˗eu tsehˇ kahˇ˗ahˇ haw ngeh aˬ yawꞈ maꞈ Miˬyehˇ˗ahˇ yaw zeu baw˗eu lehˇ siˬ laˇ˗eu meh. (2) ‘Nui ma nahˬ yu ni taˬ˗eu’ deuˬ naˇ, aˬ cawˬ yawˬ ha˗ahˇ haw ngeh yuꞈ taꞈ jawˇ taꞈ mawꞈ˗eu nui ma ahˇ laˇ ni maˬ ehˇ, aˬ cawˬ˗euˬ myaˆ nuiˆ˗ahˇ tsawˆ leˇ ni maˬ ehˇ, maˬ dm˗a. (3) Nui ma˗ahˇ noeˬ˗eu deuˬ naˇ, mehˬ tsoeˬ dm ngeh saˇ ka˗ahˇ miˇ ni tehꞈ˗ehˇ maˬ leh jeh˗a. (4) Aˬ dui maˇ maˇ ni gʼeh˗eu Miˬyehˇ˗ahˇ uˬ duˬ tahˬ luꞈ˗eu lehˇ aˬ cawˬ˗ahˇ bi siˬ bi mawˇ˗eu gʼaˇ duˬ, aˬ myah luꞈ “Miˬyehˇ˗ahˇ yaw zeu baw˗eu” jeˬ˗ehˇ dm˗eu meh.—1 Gawˇliˬtu 10:31.

2. Aˬ dui˗euˬ dm jeˬ dm kawˆ Ka li zaˬ mehˇ nmˇ deuˬ˗ahˇ aˬ joˆ˗ehˇ bi gʼeh leˇ nya˗eu nga?

Aˬ dui yawˬ ha kʼaˇ ya leˇ˗eu jeˬ˗ehˇ dm nya kʼawꞈ, aˬ cawˬ˗ahˇ aˬ joˆ˗ehˇ gʼeh leˇ paˬ nga lehˇ ya shaˇ noeˬ˗eu meh. Aˬ cawˬ˗ahˇ nui ma maˬ saˇ leˇ paˬ˗ehˇ dm ngeh to˗aˬ, kʼaˇ gʼeh nya˗eu gaˇ neh leh jeh˗awˇ mehˇ nmˇ deuˬ˗euˬ ‘jah˗eu jeˬ huiˬ laˇ mahˇ laˇ nya ni, aˬ yawꞈ maꞈ˗euˬ gʼaˇ duˬ muiˬ ni mˇ˗eu ma.’—Loˇmaˆ 15:1, 2-ahˇ gui.

3. Aˬ dui neh dm˗euˬ jeˬ tsawˇ haˬ deuˬ˗ahˇ Yeˬhawˇbaˬ˗ahˇ siˬ nya mawꞈ laˇ ni aˬ joˆ˗ehˇ laˆ noeˬ nehˬ nya˗eu nga?

Aˬ dui aˬ gaˇ jawˇ˗awˇ aˬ jeˬ jahˇ˗eu maˬ kaˬ, mehˬ tsoeˬ haw muiˬ paˬ˗ehˇ dm˗eu ma. Ehˇ kʼawꞈ mehˬ bawˬ˗ahˇ iˇ ngeh hawˇ˗eu tsaꞈ gaˬ˗iˇ ngeh naˇ, aˬ myah myah naˆ maˬ tseˇ saˇ tiˇ taˬ˗awˇ haw muiˬ paˬ˗ehˇ dm˗eu ma. Aˬ dui tsawˇ haˬ deuˬ˗ahˇ aˬ dui˗ahˇ maˬ ngeuˇ˗eu, laˬ kʼaˬ cehˇ˗eu guiˬ lahˬ dawˬ˗ahˇ bi haw tsoˆ mawꞈ˗eu ma. Aˬ dui mehˬ tsoeˬ haw muiˬ paˬ˗ehˇ dm naˇ tsawˇ haˬ deuˬ Yeˬhawˇbaˬ˗euˬ gaˇ kawˆ˗ahˇ siˬ nya mawꞈ laˇ˗eu kʼawꞈ pyeuꞈ nya˗awˇ, ‘aˬ dui˗euˬ Ka kʼoꞈ˗eu gʼaˬ pyeuꞈ˗eu Miˬyehˇ neh mehˬ˗euˬ jeˬ heu aˇ naˆ ni muiˬ˗eu jeˬ pyeuꞈ˗eu’ lehˇ mawˇ leˇ˗eu kʼawꞈ pyeuꞈ nya meh.—Tiˇtuˆ 2:10.

Naꞈ suiˇ ni dzaw

4. Haw muiˬ paˬ˗ehˇ dm˗eu heu naˇ, Yeˬhawˇbaˬ˗ahˇ yaw zeu baw˗eu jeˬ pyeuꞈ

Aˬ dui˗euˬ dm gʼaˬ dm lmˇ˗ahˇ saˇ tiˇ taˬ paˬ˗ehˇ gʼeh˗eu aˇ yeˇ kʼaˇ huiˬ˗eu jeˬ naˇ aˬ jeˬ nga? Pah mehˬ˗eu 4:11-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ dui neh dm˗euˬ jeˬ Yeˬhawˇbaˬ˗euˬ tsawˇ myahˇ nehˬ˗ehˇ taꞈ˗eu miˇ neh, aˬ dui aˬ joˆ˗ehˇ dm paˬ˗ehˇ gʼeh˗eu nga?

• Aˬ dui mehˬ bawˬ˗ahˇ iˇ ngeh maˬ ehˇ, tsaꞈ gaˬ˗iˇ ngeh maˬ ehˇ, aˬ joˆ˗ehˇ dm˗eu lehˇ saˇ tiˇ taˬ˗eu heu naˇ aˇ yeˇ huiˬ ngaˇ laˬ? Aˬ jeˬ miˇ neh?

5. Dm jeˬ dm kawˆ nehˬ˗ehˇ taꞈ leˇ˗awˇ yaw muiˬ˗ehˇ aˬ joˆ˗ehˇ noeˬ tsehˆ nya˗eu nga?

Biˬdiˬoˬ pah.

Biˬdiˬoˬ: “Kʼaˇ mˇ kʼaˇ shaˇ˗eu yawˬ jeˬ na luꞈ Miˬyehˇ˗euˬ yaw shehꞈ kʼahˬ sehˇ doˆ laˇ ni mˇ˗awˬ” (10:18)

Aˬ dui˗euˬ dm gʼaˬ dm lmˇ aˇ poeˬ kʼaˆ maˬ kʼaˆ kʼawꞈ, buˇ coeˆ ni ya gʼeh˗awˇ, aˬ yawꞈ gaˇ yawꞈ tsaˬ leˇ ni dm paˬ˗ehˇ gʼeh˗eu meh. 1 Gawˇliˬtu 10:24 hawˇ˗eu 1 Tiˆmoˇseˬ 2:9, 10-ahˇ gui. Kʼoeˇ naˇ, aˬ dui aˬ jeˬ miˇ neh heu loꞈ˗ehˇ gʼeh˗eu mehˬ tsoeˬ dm paˬ˗ehˇ maˬ gʼeh˗eu nga lehˇ ja sawˇ.

• Jawꞈ laꞈ ni gʼeh˗eu, yaw byuˬ yaw dawˆ˗ehˇ gʼeh˗eu

• Suꞈ ti ni gʼeh˗eu, mawˇ do˗ahˇ maˬ gʼoe˗eu, yuꞈ taꞈ jawˇ taꞈ mawꞈ˗eu nui ma˗ahˇ laˆ noeˬ˗eu

Ka li zaˬ deuˬ Moˇseˬ˗euˬ zahˇ dawˬ˗ahˇ caw teh˗eu maˬ paˇ loˬ˗euˬ kʼawꞈ, zahˇ dawˬ teu naˇ Yeˬhawˇbaˬ gaˇ kawˆ tiˬ jeˬ na˗ahˇ aˬ joˆ˗ehˇ noeˬ˗eu lehˇ bi siˬ laˇ˗eu meh. Dawˬmehˬmehˬ˗eu 22:5-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ li deuˬ aˬ jeˬ miˇ neh aˬ buˇ loꞈ˗ehˇ dm paˬ˗ehˇ maˬ gʼeh˗eu nga? Aˬ buˇ deuˬ jiˇ aˬ jeˬ miˇ neh aˬ li loꞈ˗ehˇ dm paˬ˗ehˇ maˬ gʼeh˗eu nga?

1 Gawˇliˬtu 10:32, 33 hawˇ˗eu 1 Yoˇhaˬ 2:15, 16-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ dui laꞈ nyiˇ paw˗euˬ tsawˇ haˬ deuˬ˗ahˇ maˬ ehˇ, aˇ muˇ laꞈ kʼoeˇ˗euˬ mehˇ nmˇ deuˬ˗ahˇ maˬ ehˇ, nui ma maˬ saˇ leˇ paˬ˗ehˇ aˬ jeˬ miˇ neh dm paˬ˗ehˇ maˬ gʼeh˗eu nga?

• Nawˬ˗euˬ jawˇ kʼahˬ˗ahˇ˗euˬ tsawˇ haˬ deuˬ˗euˬ dm jeˬ dm kawˆ aˬ joˆ˗ehˇ gʼeh nga?

• Ka li zaˬ deuˬ aˬ joˆ˗ehˇ gʼeh˗eu mehˬ tsoeˬ dm paˬ˗ehˇ maˬ gʼeh˗eu nga? Aˬ jeˬ miˇ neh?

Kawˆ shawˆ

Dm jeˬ dm kawˆ haw muiˬ paˬ˗ehˇ dm˗eu heu naˇ, Yeˬhawˇbaˬ hawˇ˗eu tsawˇ haˬ deuˬ˗ahˇ yaw zeu baw˗eu jeˬ pyeuꞈ meh.

Ja sawˇ poˆ˗eu

• Aˬ dui˗euˬ dm jeˬ dm kawˆ Yeˬhawˇbaˬ˗euˬ gʼaˇ duˬ aˬ jeˬ miˇ neh aˇ yeˇ huiˬ˗eu nga?

• Aˬ dui dm jeˬ dm kawˆ nehˬ˗ehˇ taꞈ leˇ˗awˇ noeˬ tsehˆ ngeh, Jaˇliꞈ zahˇ aˬ geu deuˬ˗ahˇ noeˬ keuˆ paˬ˗ehˇ gʼeh˗eu nga?

• Aˬ dui˗euˬ dm jeˬ dm kawˆ heu naˇ, tsawˇ haˬ deuˬ˗ahˇ Yeˬhawˇbaˬ˗ahˇ uˬ duˬ tahˬ˗eu jeˬ˗ahˇ aˬ joˆ˗ehˇ bi noeˬ leˇ nya˗eu nga?

Haw lahˬ

Aˬ dui neh dm˗euˬ jeˬ aˬ dui nehˬ˗ehˇ taꞈ leˇ˗awˇ aˬ jeˬ bi siˬ˗eu nga lehˇ haw.

“Ngaˇ aˬ joˆ˗ehˇ gʼeh nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Sahˬ maˬ tsawˆ mi naˆ˗ehˇ aˬ jeˬ miˇ neh yaw muiˬ˗ehˇ shaˇ noeˬ paˬ˗ehˇ gʼeh˗eu nga lehˇ haw.

“Sahˬ tsawˆ˗eu jeˬ nehˬ˗ehˇ taꞈ leˇ˗awˇ Jaˇliꞈ aˬ joˆ˗ehˇ ehˇ˗eu nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Dm jeˬ dm kawˆ nehˬ˗ehˇ taꞈ leˇ˗awˇ aˬ dui˗ahˇ yaw muiˬ˗ehˇ noeˬ tsehˆ nya ni caw ba nehˬ˗eu Jaˇliꞈ zahˇ aˬ jeˬ jeˇ paˇ jaˆ nga siˬ lehˇ haw.

“Nawˬ˗euˬ dm jeˬ dm kawˆ Miˬyehˇ˗ahˇ ciˬ huiˬ ciˬ mahˇ˗eu jeˬ pyeuꞈ ngaˇ laˬ?” (Loꞈ˗eu nymˇgoˇ, 2016 Gʼoeˬ siˬ ba la)