Jaˇliꞈ nawˬ˗ahˇ aˬ joˆ˗ehˇ caw ba nehˬ nya˗eu nga?

Aˬ dui yawˬ gʼaˬ na luꞈ dehꞈ ziˇ hawˇ˗eu shaˬ˗eu zahˬ˗eu jeˬ˗ahˇ maˬ ehˇ, shiˇ˗eu jeˬ hawˇ˗eu mehˬ hu paw pyeuꞈ laˇ˗eu jeˬ˗ahˇ maˬ ehˇ, siˬ nya mawꞈ˗eu meh. Aˬ dui aˬ yawꞈ nah yawꞈ mˇ dzaˬ kʼawꞈ dawˇ˗eu gaˇ kawˆ hawˇ˗eu nymˇ jiˇ laˬ kʼaˬ cehˇ ni aˬ joˆ˗ehˇ ya jahˇ˗eu gaˇ kawˆ˗ahˇ jiˇ kʼahˬ lahˇ nya˗eu meh. Jaˇliꞈ dehꞈ ziˇ nehˬ˗ehˇ taꞈ˗eu aˇ yeˇ huiˬ˗eu gaˇ kawˆ deuˬ˗ahˇ ehˇ nehˬ taˬ˗euˬ tehꞈ˗ehˇ maˬ gʼaˬ ni, aˬ yawꞈ nah yawꞈ yaw dehꞈ dehꞈ gaˇ zmˬ˗iˇ nya˗eu jeˬ jiˇ mehˬ nehˬ taˬ ngaˇ lehˇ gʼawˬ mya gʼaˬ ya mawˇ˗euˬ meh. Jaˇliꞈ yawˬ gʼaˬ na luꞈ˗ahˇ gaˇ dahˇ tsoeˬ ngaˇ laˬ? Nawˬ˗ahˇ aˬ joˆ˗ehˇ noeˬ nya?

1. Jaˇliꞈ laꞈ kʼoeˇ aˬ jeˬ jeˇ˗euˬ gaˇ kawˆ ehˇ nehˬ taˬ˗euˬ nga?

Jaˇliꞈ aˇ yeˇ huiˬ˗eu gaˇ kawˆ heu deuˬ˗ahˇ ehˇ nehˬ taˬ˗euˬ meh. Dehꞈ˗eu jeˬ aˬ joˆ˗ehˇ dahˬ beh˗euˬ nga? Aˬ dui aˬ jeˬ˗euˬ gʼaˇ duˬ yaw dehꞈ dehꞈ luꞈ˗eu nga? Aˬ jeˬ miˇ neh shaˬ zahˬ˗ahˇ ya tahˬ puˬ˗eu nga? Tsawˇ haˬ shiˇ naˇ aˬ gaˇ iˇ˗eu nga? Aˬ dui yawˬ gʼaˬ na luꞈ nui saˇ oꞈ˗eu jeˬ geuꞈ mawꞈ kʼawꞈ, guiˇ deuˆ˗eu jeˬ aˬ jeˬ miˇ neh heu myaˆ myaˆ˗ehˇ myaˬ˗eu nga? Mehˬ hu paw miˇ tsaˬ heu siˬ˗ahˇ aˬ jeˬ pyeuꞈ laˇ˗eu nga? Jaˇliꞈ naˇ haˬ˗eu jeˬ heu deuˬ˗euˬ dawˬ kʼoꞈ˗ahˇ poˆ˗awˬ lehˇ gʼaˬ biꞈ taˬ˗euˬ meh. Yaw myaˬ lam gʼaˬ nui kʼahˇ shiˇ laˇ paˬ˗ehˇ gʼeh˗eu dawˬ kʼoꞈ˗ahˇ poˆ mawˇ˗euˬ meh.

2. Aˬ yawꞈ nah yawꞈ laˬ kʼaˬ cehˇ nya ni Jaˇliꞈ aˬ joˆ˗ehˇ caw ba nehˬ˗eu nga?

Jaˇliꞈ laꞈ kʼoeˇ gʼawˬ mya jeˬ˗euˬ gaˇ kawˆ mehˬ nehˬ taˬ˗euˬ meh. Yaw jeˬ ma jeˬ, nymˇ jiˇ laꞈ kʼoeˇ laˬ kʼaˬ cehˇ ni aˬ joˆ˗ehˇ ya jahˇ˗eu nga? Noeˬ shaˬ kʼahˬ lahˇ ngeh aˬ jeˬ ya jahˇ˗eu nga? Gaˇ˗ahˇ laˬ kʼaˬ tiˬ cehˇ mˇ nya ni aˬ jeˬ ya jahˇ˗eu nga? Jaˇliꞈ gaˇ kawˆ heu deuˬ nehˬ˗ehˇ taꞈ leˇ˗awˇ aˬ jeˬ mehˬ taˬ˗euˬ nga lehˇ nawˇ ya siˬ˗awˇ, nawˇ dzaw daˆ leꞈ ngeh gaˇ kawˆ nui deuˬ˗ahˇ jiˇ ya siˬ duˬ meh. Toˆ˗ehˇ naˇ nawˇ ‘Jaˇliꞈ dawˬ kawˬ dawˬ tawˆ luꞈ gaˇ dahˇ tsoeˬ dui dui˗eu meh’ lehˇ ehˇ˗eu dawˬ˗ahˇ nui ma tsaˬ˗eu yaw duˬ baw meh.—2 Tiˆmoˇseˬ 3:16.

Naꞈ suiˇ ni dzaw

Jaˇliꞈ dehꞈ ziˇ muiˬ daˆ laˇ ni aˬ joˆ˗ehˇ caw ba˗eu nga? Jaˇliꞈ gui gaˇ laˬ kʼaˬ cehˇ ni aˬ joˆ˗ehˇ ya jahˇ˗eu nga? Jaˇliꞈ˗ahˇ gʼoˆ shaw laˇ ni tiˬ gʼaˬ paˬ neh aˬ jeˬ miˇ neh ya bi caw ba˗eu nga? Gaˇ kawˆ heu deuˬ˗ahˇ ja sawˇ.

3. Jaˇliꞈ aˬ dui˗ahˇ gaˇ ma mehˬ nehˬ nya

Jaˇliꞈ˗aˬ gaˇ ma˗ahˇ bya˗eu yaw shehꞈ˗ahˇ duˇ˗eu meh. Jaˇliꞈ aˬ dui˗ahˇ yaw muiˬ˗ehˇ noeˬ tsehˆ nya ni maˬ ehˇ, mehˬ hu paw˗euˬ gaˇ kawˆ˗ahˇ siˬ nya ni maˬ ehˇ, caw ba nehˬ˗eu meh.

Ja ceuˬ 119:105-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Ja ceuˬ sahˬ boꞈ boꞈ˗euˬ heu gʼaˬ Jaˇliꞈ˗ahˇ aˬ joˆ˗ehˇ noeˬ˗eu nga?

• Nawˇ tawˇ neh, Jaˇliꞈ˗ahˇ aˬ joˆ˗ehˇ noeˬ nya?

4. Jaˇliꞈ aˬ dui siˬ nya mawꞈ˗eu jeˬ ehˇ nehˬ nya

Biˬdiˬoˬ: Noeˬ tmˬ˗eu jeˬ taˬ bi byoˆ˗iˇ (1:48)

• Biˬdiˬoˬ heu laꞈ kʼoeˇ˗euˬ zaˬ miˬ aˬ buˇ heu gʼaˬ, aˬ jeˬ jeˇ˗euˬ gaˇ kawˆ˗ahˇ siˬ nya mawꞈ˗eu nga?

• Jaˇliꞈ dzaw˗eu teu aˬ yawꞈ˗ahˇ aˬ joˆ˗ehˇ caw ba nehˬ˗euˬ nga?

Jaˇliꞈ aˬ dui siˬ nya mawꞈ˗eu gaˇ kawˆ˗ahˇ poˆ˗awˬ lehˇ gʼaˬ biꞈ˗eu meh. Maꞈtehˬ 7:7-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Nawˇ aˬ jeˬ jeˇ˗euˬ gaˇ kawˆ siˬ nya mawꞈ nya? Jaˇliꞈ dawˬ kʼoꞈ biꞈ nya paˬ˗ehˇ gʼeh ngaˇ laˬ?

5. Nawˇ Jaˇliꞈ gui gaˇ laˬ kʼaˬ cehˇ nya

Biˬdiˬoˬ: Jaˇliꞈ gui˗eu (2:05)

• Biˬdiˬoˬ heu laꞈ kʼoeˇ˗euˬ zaˬ guˬ deuˬ, sahˬ boꞈ gui gaˇ aˬ joˆ˗ehˇ noeˬ˗eu nga?

• Aˬ yawꞈ maꞈ sahˬ boꞈ gui gaˇ maˬ ya leˇ kʼawꞈ, aˬ jeˬ miˇ neh Jaˇliꞈ gui gaˇ ya leˇ˗eu nga?

Jaˇliꞈ laꞈ kʼoeˇ aˬ dui˗ahˇ gʼaˬ hawˇ˗eu noeˬ tmˬ˗eu jeˬ biꞈ˗eu dawˬ deuˬ ahˇ˗eu meh. Loˇmaˆ 15:4-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ dui˗ahˇ gʼaˬ hawˇ˗eu noeˬ tmˬ˗eu jeˬ biꞈ˗eu, Jaˇliꞈ laꞈ kʼoeˇ˗euˬ saˇ jaˇ dawˬ˗ahˇ nawˇ siˬ nya mawꞈ miˇ˗a laˬ?

6. Aˬ cawˬ nawˬ˗ahˇ Jaˇliꞈ˗ahˇ gʼoˆ shaw nya ni caw ba nehˬ nya

Jaˇliꞈ˗ahˇ yawˬ ha tiˬ gʼaˬ tehꞈ˗ehˇ gui kʼawꞈ, aˬ cawˬ neh bi caw ba naˇ gʼoˆ shaw dzehˬ laˇ miˇ˗a lehˇ gʼawˬ mya gʼaˬ ehˇ˗eu meh. Gʼaˬkʼehˇ 8:26-31-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Jaˇliꞈ˗ahˇ gʼoˆ shaw nya laˇ ni aˬ joˆ˗ehˇ ya jahˇ˗eu nga?—Aˇ deuˆ 30 hawˇ˗eu 31-ahˇ haw.

Kawˆ shawˆ

Jaˇliꞈ laꞈ kʼoeˇ aˬ yawꞈ nah yawꞈ yaw dehꞈ dehꞈ gaˇ zmˬ˗iˇ nya˗eu jeˬ mehˬ nehˬ taˬ˗awˇ, aˇ yeˇ huiˬ˗eu gaˇ kawˆ ehˇ nehˬ taˬ˗euˬ uˬ taꞈ, gʼaˬ hawˇ˗eu noeˬ tmˬ˗eu jeˬ biꞈ˗eu dawˬ deuˬ jiˇ ahˇ˗eu meh.

Ja sawˇ poˆ˗eu

• Jaˇliꞈ aˬ yawꞈ nah yawꞈ yaw dehꞈ dehꞈ gaˇ taꞈ˗eu aˬ jeˬ jeˇ˗euˬ gaˇ kawˆ mehˬ nehˬ taˬ˗euˬ nga?

• Jaˇliꞈ aˬ jeˬ jeˇ˗euˬ naˇ haˬ˗eu jeˬ˗ahˇ dawˬ kʼoꞈ biꞈ nehˬ taˬ˗euˬ nga?

• Nawˇ Jaˇliꞈ laꞈ kʼoeˇ˗euˬ aˬ geu kawˆ˗ahˇ siˬ nya mawꞈ nya?

Haw lahˬ

Jaˇliꞈ mehˬ˗eu jeˬ nymˬ˗mˇ iˬ nah keuˆ ni aˬ jeˬ miˇ neh zmˬ nya nga lehˇ haw.

“Jaˇliꞈ mehˬ˗eu jeˬ aˬ myah luꞈ gaˇ dahˇ tsoeˬ” (Loꞈ˗eu nymˇgoˇ, 2018 Dahˬ beh˗eu dmˬ)

Yawˬ haˇ yawˬ ha aˇ poeˬ maˬ baw nya lehˇ noeˬ˗euˬ zaˬ yo aˬ li tiˬ gʼaˬ˗ahˇ, Jaˇliꞈ aˬ joˆ˗ehˇ caw ba˗euˬ nga lehˇ haw.

Ngaˬ˗euˬ laˬ kʼaˬ cehˇ˗eu dehꞈ ziˇ dahˬ beh laˇ (2:53)

Nymˇ jiˇ nehˬ˗ehˇ taꞈ leˇ˗awˇ Jaˇliꞈ mehˬ˗eu jeˬ˗ahˇ haw.

“Nymˇ jiˇ laˬ kʼaˬ cehˇ ni caw ba nehˬ˗eu 12 jeˬ” (Noeˬ laˇ˗awˬ!, 2018 Nyiˬ dmˬ aˬ yawꞈ dmˬ)

Miˇ tsaˬ˗ahˇ uˆ lahˇ˗eu gʼaˬ nehˬ˗ehˇ taꞈ leˇ˗awˇ, tsawˇ haˬ deuˬ gʼoˆ shaw bahˬ taˬ˗euˬ jeˬ˗ahˇ Jaˇliꞈ aˬ joˆ˗ehˇ ehˇ shaw nehˬ laꞈ nga lehˇ haw.

Aˬ dui aˬ jeˬ miˇ neh Jaˇliꞈ dzaw paˬ˗ehˇ gʼeh˗eu nga?—Tiˬ byah (3:14)

1. Jaˇliꞈ˗ahˇ tsawˇ haˬ neh boꞈ˗euˬ gaˇ neh, Miˬyehˇ˗euˬ nui noeˬ pyeuꞈ˗eu lehˇ aˬ jeˬ miˇ ehˇ nya nga?

Jaˇliꞈ˗ahˇ tsawˇ haˬ 40 gʼaˬ ehˇ gʼaˬ ni boꞈ˗euˬ meh. B.C. 1513-ahˇ neh A.D. 98 heu kaˬ˗ahˇ boꞈ˗awˇ, aˇ yamˬ 1,600 kʼoꞈ ehˇ gʼaˬ ni ga leˇ˗euˬ meh. Jaˇliꞈ boꞈ˗euˬ tsawˇ haˬ deuˬ yaw myaˬ jeˬ beu gaˇ kʼawꞈ, aˬ yawꞈ maꞈ neh boꞈ˗euˬ jeˬ tiˬ gaˇ tsaˬ leˇ jiˇ˗eu meh. Aˬ joˆ˗ehˇ pyeuꞈ leˇ nya˗eu nga? Jaˇliꞈ˗aˬ Miˬyehˇ˗euˬ dawˬ pyeuꞈ˗eu miˇ neh meh. (1 Teˇsaˬloˇni 2:13-ahˇ gui.) Jaˇliꞈ boꞈ˗euˬ deuˬ yawˬ ha˗euˬ nui noeˬ boꞈ˗euˬ maˬ ngeuˇ˗a, ‘aˬ yawꞈ maꞈ˗ahˇ muiˬ˗eu shawˇ˗eu yaw sahˇ uˆ lahˇ˗awˇ bi ngehˬ˗euˬ meh.’a (2 Beˬtuˆluˆ 1:21) Miˬyehˇ aˬ yawꞈ˗euˬ muiˬ˗eu shawˇ˗eu yaw sahˇ˗ahˇ zmˬ˗awˇ, tsawˇ haˬ deuˬ˗ahˇ bi noeˬ doˆ leˇ˗awˇ aˬ yawꞈ˗euˬ nui noeˬ bi boꞈ˗euˬ meh.—2 Tiˆmoˇseˬ 3:16.