Tsaꞈ gaˬ˗eu jeˬ˗ahˇ neh laꞈ kʼaˬ cehˇ˗eu jeˬ za

Tsaꞈ gaˬ iˇ˗eu yaw shaˬ nya lehˇ nawˇ noeˬ haw˗euˬ ma laˬ? eu ngeuˇ ma lehˇ yaw myaˬ gʼaˬ ehˇ kʼoꞈ˗eu meh. Tsaꞈ gaˬ duˬ˗ahˇ nui ma maˬ ahˇ˗eu deuˬ, maˬ ngehˬ cawˬ mawꞈ˗eu deuˬ ya mawˇ˗eu uˬ taꞈ, aˬ dui maˬ siˬ nya˗eu deuˬ˗ahˇ maˬ ngehˬ cawˬ peuˬ ni kʼawꞈ pyeuꞈ nya meh. Gaˇ kawˆ heu deuˬ˗euˬ baˬ da neh aˬ dui laꞈ kʼaˬ cehˇ˗eu jeˬ cuiˆ iˇ nya˗eu meh. Ehˇ kʼawꞈ, aˬ dui laꞈ kʼaˬ cehˇ˗eu Miˬyehˇ˗ahˇ uˬ duˬ tahˬ luꞈ˗eu miˇ neh, aˬ dui aˬ yawꞈ˗euˬ gaˇ˗ahˇ laꞈ kʼaˬ tiˬ cehˇ bi mˇ mawꞈ˗eu meh. (Ceuˬ 100:2; 1Tiˆ 1:11) Aˬ dui tsaˬ gaˬ iˇ ngeh laꞈ kʼaˬ cehˇ paˬ˗ehˇ gʼeh˗eu 3 kawˆ jaˆ meh. Teu aˬ jeˬ nga?

Tiꞈ, nymˇ iˬ nahˬ noeˬ tmˬ˗eu jeˬ byoˆ iˇ luꞈ˗eu kʼawꞈ aˬ dui noeˬ tmˬ nya˗eu gaˇ kawˆ tsaꞈ gaˬ˗eu ma. “Nui saˇ” biꞈ˗eu dawˬ deuˬ neh aˬ dui aˬ cawˬ˗euˬ nui ma˗ahˇ gʼaˬ biꞈ nehˬ nya˗eu meh. (Yaˇ 52:7) Miˬyehˇ Miˇkʼahˬ˗euˬ gaˇ kawˆ aˬ dui˗ahˇ jiˇ ni laꞈ kʼaˬ bi cehˇ˗eu meh. Tsaꞈ gaˬ iˇ˗eu lehˇ gʼeh ngeh, Miˬyehˇ Miˇkʼahˬ neh miˇ tsaˬ˗ahˇ bi pyeuꞈ laˇ˗eu lehˇ gʼeh˗eu jeˬ˗ahˇ shaˇ noeˬ shaˇ sawˇ haw.

Nyiꞈ, aˬ dui neh tsaꞈ gaˬ˗eu muiˬ˗eu gaˇ kawˆ siˬ shaˬ jiˇ paw hawˇ˗eu nui jah paw gaˇ dahˇ tsoeˬ˗eu meh. Maˬ muiˬ˗eu jeˬ maˬ mˇ ni byehˇ dzeh˗awˇ, mˬ maˬ maˬ byaꞈ za ziˇ dehꞈ˗eu jeˬ˗ahˇ dawˬ˗eu lehˇ aˬ yawꞈ maꞈ ya dzaw˗eu meh. (Yaˇ 48:17, 18; Maˆ 1:16) Aˬ dui aˬ cawˬ˗ahˇ caw ba˗eu gaˇ mˇ luꞈ le lehˇ shaˇ noeˬ nya˗eu meh. Tiˬ gʼaˬ na aˬ dui neh maˬ bi caw ba mawꞈ kʼawꞈ, caw ba˗eu jeˬ geuꞈ mawꞈ˗eu deuˬ˗ahˇ aˬ dui poˆ daˆ leꞈ˗eu ma.—Tehˬ 10:11-14.

Smˇ, aˇ yehˇ huiˬ dzehˬ˗eu jeˬ naˇ, aˬ dui tsaꞈ gaˬ˗eu jeˬ Yeˬhawˇbaˬ˗ahˇ ciˬ huiˬ ci mahˇ˗eu meh. Aˬ yawꞈ aˬ dui neh mˇ˗eu gaˇ˗ahˇ aˇ poeˬ taˬ baw dui dui˗eu meh. (Yaˇ 43:10; Heˬ 6:10) Kʼoeˇ tehꞈ˗ehˇ maˬ gʼaˬ ni, gaˇ heu˗ahˇ mˇ pyeuꞈ nya˗eu gʼaˇ duˬ, aˬ yawꞈ nui ma keuˆ˗awˇ muiˬ˗eu shawˇ˗eu yaw sahˇ biꞈ nehˬ meh. Teu miˇ neh, Miˬyehˇ baoˬ laꞈ kʼoeˇ laꞈ kʼaˬ bi cehˇ laˇ˗eu jeˬ shaˇ˗awˬ. (Gaˬ 5:22) Aˬ yawꞈ neh caw ba˗eu miˇ neh, shaˬ zahˬ naꞈ˗eu jeˬ˗ahˇ gʼaˬ leˇ˗awˇ kʼaˬ duˬ ni tsaꞈ gaˬ peuˬ˗eu meh. (Kʼehˇ 4:31) Teu miˇ neh, aˬ dui tsaꞈ gaˬ iˇ gaˇ aˬ cawˬ aˬ joˆ˗ehˇ gʼeh˗eu kʼawꞈ, Miˬyehˇ neh biꞈ nehˬ laꞈ˗euˬ gaˇ˗ahˇ ya mˇ˗euˬ laꞈ kʼaˬ cehˇ miˇ˗a.—Yeˬ 3:3.

Jaˇliꞈ dzaw˗awˇ shaˇ noeˬ shaˇ sawˇ˗eu heu neh, laꞈ kʼaˬ tiˬ poˆ paˇ cehˇ laˇ lehˇ kuˇ˗eu biˬ diˬ oˬ haw gʼaˬ naˇ, naˇ haˬ˗eu jeˬ heu deuˬ neh naˇ haˬ:

• Aˬ dui yawˬ siˬ na luꞈ tsaꞈ gaˬ iˇ gaˇ aˇ yamˬ yaw myaꞈ zmˬ˗eu kʼawꞈ, aˬ jeˬ miˇ neh yawˬ haˇ yawˬ ha Jaˇliꞈ pyehˆ tseˇ˗eu jeˬ jeˬ huˬ ya bi jaˆ˗eu nga?

• Mehˬliˇ˗ahˇ aˬ dui aˬ joˆ˗ehˇ dzaw geuꞈ nya˗eu mga?

• Nawˇ Miˬyehˇ˗euˬ dawˬ˗ahˇ shaˇ noeˬ shaˇ sawˇ˗eu gʼaˬ duˬ, aˇ yamˬ aˬ geu ngeh biˇ taˬ leˬ?

• Nawˇ muiˬ˗eu gaˇ kawˆ tsaꞈ gaˬ ngeh, nawˬ˗ahˇ laꞈ kʼaˬ bi cehˇ laˇ˗eu aˬ jeˬ nga?