Dzaw deuˆ 4

Jaˇliꞈ aˇ deuˆ˗ahˇ nui ma ahˇ ni laˆ noeˬ nehˬ

Maꞈtehˬ 22:41-45

Aˇ yeˇ huiˬ˗eu jeˬ: Jaˇliꞈ aˇ deuˆ maˬ gui mi naˆ˗ehˇ naˇ haˬ luꞈ˗eu deuˬ˗euˬ nui ma˗ahˇ jeˬ hu bi lehˬ hmˬ.

Mˇ paˬ˗ehˇ gʼeh˗eu jeˬ:

Jaˇliꞈ teu deuˆ aˬ jeˬ miˇ neh gui de lehˇ shaˇ noeˬ. Jaˇliꞈ aˇ deuˆ maˬ gui mi naˆ˗ehˇ naˇ haˬ luꞈ˗eu deuˬ˗ahˇ aˬ dui bi siˬ mawꞈ˗eu aˇ yeˇ huiˬ˗eu tsahˇ˗ahˇ bi mawˇ leˇ˗eu gʼaˇ duˬ, Jaˇliꞈ teu deuˆ˗ahˇ nui ma ahˇ ni laˆ noeˬ nehˬ.

Jaˇliꞈ aˇ deuˆ teu deuˆ˗euˬ laꞈ oˆ laꞈ taˆ ehˇ taˬ˗euˬ jeˬ˗ahˇ noeˬ keuˆ. Jaˇliꞈ teu deuˆ˗ahˇ aˇ suˇ gʼaˬ neh ngehˬ˗awˇ, aˬ suˇ gʼaˬ neh boꞈ˗euˬ lehˇ ehˇ nehˬ mawꞈ naˇ, yaw duˬ duˬ˗ehˇ ehˇ nehˬ.
Jaˇliꞈ˗ahˇ taˬ huiˬ. Miˬyehˇ˗ahˇ jah˗eu tsawˇ haˬ deuˬ nehˬ˗ehˇ ngehˬ cawˬ ngeh, Jaˇliꞈ˗aˬ “Miˬyehˇ˗euˬ dawˬ kawˬ” pyeuꞈ meh lehˇ yaw kaˆ˗ehˇ ngehˬ keuˆ. Heu loꞈ˗ehˇ jahˇ˗eu heu naˇ, aˬ dui neh mehˬ˗eu jeˬ Miˬyehˇ˗euˬ nui noeˬ pyeuꞈ˗eu lehˇ aˬ yawꞈ maꞈ˗ahˇ siˬ leˇ.
Jaˇliꞈ teu deuˆ˗ahˇ nui ma ahˇ leˇ ni laˆ noeˬ nehˬ. Jaˇliꞈ teu deuˆ neh dawˬ kʼoꞈ biꞈ nya˗eu jeˬ naˇ haˬ, maˬ ngeuˇ naˇ Jaˇliꞈ teu deuˆ caw ba nya˗eu shaˬ zahˬ˗ahˇ ngehˬ keuˆ, maˬ ngeuˇ naˇ Jaˇliꞈ teu deuˆ aˬ yawꞈ maꞈ˗ahˇ yaw tsaˬ yaw dawˇ tiˬ jeˬ˗ahˇ gʼoˆ shaw leˇ ni caw ba meh lehˇ ehˇ nehˬ.

Naˇ haˬ luꞈ˗eu deuˬ Jaˇliꞈ teu deuˆ hawˇ˗eu aˬ dui ngehˬ˗eu gaˇ kawˆ nehˬ˗ehˇ taꞈ leˇ˗awˇ, aˬ jeˬ jeˇ siˬ nya taˬ˗euˬ nga lehˇ shaˇ noeˬ haw. Aˬ yawꞈ maꞈ Jaˇliꞈ teu deuˆ˗ahˇ siˬ nya dzeuˇ˗euˬ kʼawꞈ, nui ma ahˇ laˇ paˬ˗ehˇ ngehˬ dahˬ beh. Aˬ yawꞈ maꞈ˗ahˇ Jaˇliꞈ teu deuˆ˗ahˇ tiˬ poˆ paˇ shaˇ noeˬ ni maˬ ehˇ, duˬ yawˇ ni gʼoˆ shaw leˇ ni maˬ ehˇ, aˇ yeˇ huiˬ˗eu yawˬ tsahˇ yawˬ˗ahˇ mawˇ leˇ ni maˬ ehˇ, caw ba nehˬ.