Ka li zaˬ maˇ diˇ deuˬ˗ahˇ aˬ joˆ˗ehˇ tseˇ paˆ nya˗eu nga?

Tsawˇ haˬ gʼawˬ mya lam gʼaˬ yawˬ haˇ yawˬ ha Ka li zaˬ ma lehˇ ehˇ˗eu meh. Ehˇ kʼawꞈ aˬ yawꞈ maꞈ jah˗eu jeˬ hawˇ˗eu mehˬ˗eu jeˬ maˬ duˇ leˇ˗a. Toˆ˗ehˇ naˇ, aˬ dui Ka li zaˬ maˇ diˇ deuˬ˗ahˇ aˬ joˆ˗ehˇ tseˇ paˆ nya˗eu nga?

1. Ka li zaˬ lehˇ ehˇ˗eu heu naˇ, aˬ jeˬ˗ahˇ ehˇ mawꞈ˗eu nga?

Ka li zaˬ lehˇ ehˇ˗eu heu naˇ, Yeˬsuˇ Ka li˗euˬ zaˬ lahˇ, maˬ ngeuˇ naˇ aˬ yawꞈ˗euˬ mehˬ nah caw teh˗eu deuˬ lehˇ ehˇ mawꞈ˗eu meh. (Gʼaˬkʼehˇ 11:26-ahˇ gui.) Aˬ geu deuˬ Yeˬsuˇ˗euˬ zaˬ lahˇ pyeuꞈ˗eu lehˇ aˬ joˆ˗ehˇ siˬ laˇ˗eu nga? Yeˬsuˇ “Naw maꞈ ngaˬ neh mehˬ nehˬ tsoˆ nehˬ˗euˬ dawˬ deuˬ˗ahˇ naˇ haˬ geuꞈ naˇ, maˇ maˇ ni ngaˬ˗euˬ zaˬ lahˇ ma” lehˇ ehˇ˗eu meh. (Yoˇhaˬ 8:31) Ka li zaˬ maˇ diˇ deuˬ Yeˬsuˇ neh mehˬ˗euˬ jeˬ˗ahˇ ya caw teh˗eu meh. Yeˬsuˇ Jaˇliꞈ˗ahˇ dawˬ pehˬ taˬ˗awˇ mehˬ˗euˬ loꞈ˗ehˇ, Ka li zaˬ maˇ diˇ deuˬ jiˇ aˬ yawꞈ maꞈ˗euˬ jah˗eu jeˬ Jaˇliꞈ˗ahˇ dawˬ pehˬ taˬ˗eu meh.—Luˇkaꞈ 24:27-ahˇ gui.

2. Ka li zaˬ maˇ diˇ deuˬ gaˬ˗eu jeˬ aˬ joˆ˗ehˇ mˇ doˆ laꞈ˗eu nga?

Yeˬsuˇ aˬ yawꞈ˗euˬ mehˬ nah caw teh˗eu deuˬ˗ahˇ “Ngaˇ naw maꞈ˗ahˇ gaˬ˗eu loꞈ˗ehˇ, naw maꞈ tiˬ gʼaˬ tiˇ gʼaˬ gaˬ˗awˬ” lehˇ ehˇ nehˬ˗euˬ meh. (Yoˇhaˬ 15:12) Yeˬsuˇ aˬ yawꞈ˗euˬ zaˬ lahˇ deuˬ˗ahˇ gaˬ˗eu lehˇ aˬ joˆ˗ehˇ siˬ laˇ˗eu nga? Aˬ yawꞈ zaˬ lahˇ deuˬ˗ahˇ aˇ yamˬ hawˇ˗eu gʼaˬ biꞈ˗awˇ caw ba nehˬ˗euˬ tehꞈ˗ehˇ maˬ gʼaˬ ni, aˬ yawꞈ maꞈ˗euˬ gʼaˇ duˬ shiˇ dah nehˬ˗euˬ meh. (1 Yoˇhaˬ 3:16) Teu gaˇ duˇ ni Ka li zaˬ maˇ diˇ deuˬ jiˇ nui gaˬ˗euˬ gaˇ kawˆ mehˬ˗eu tehꞈ˗ehˇ maˬ gʼaˬ ni, aˬ yawꞈ maꞈ ngehˬ˗eu jeˬ hawˇ˗eu mˇ˗eu jeˬ neh tiˬ gʼaˬ tiˇ gʼaˬ gaˬ˗eu lehˇ mˇ doˆ laꞈ˗eu meh.

3. Ka li zaˬ maˇ diˇ deuˬ aˬ jeˬ˗euˬ gaˇ˗ahˇ yaw kʼaˆ˗ehˇ leh jeh˗eu nga?

Yeˬsuˇ zaˬ lahˇ deuˬ˗ahˇ ‘Miˬyehˇ Miˇkʼahˬ gaˇ kawˆ dawˬ mehˬ mehˬ˗eu gʼaˇ duˬ kʼehˇ gʼeh˗euˬ meh.’ (Luˇkaꞈ 9:2) Dahˬ beh˗euˬ Ka li zaˬ deuˬ aˬ yawꞈ maꞈ˗euˬ uˬ duˬ tahˬ duˬ˗ahˇ tehꞈ˗ehˇ maˬ ngeuˇ˗eu, tsawˇ haˬ uiˬ gaˇ maˬ ehˇ, iˇ kahˇ doe ni maˬ ehˇ, tsaꞈ gaˬ˗euˬ meh. (Gʼaˬkʼehˇ 5:42; 17:17-ahˇ gui.) Nymˬ˗mˇ iˬ nah˗euˬ Ka li zaˬ maˇ diˇ deuˬ jiˇ tsawˇ haˬ kʼaˇ jawˇ gaˇ Jaˇliꞈ laꞈ kʼoeˇ˗euˬ yaw tsaˬ yaw dawˇ jeˬ tsaꞈ gaˬ˗eu meh. Aˬ yawꞈ maꞈ tsawˇ haˬ deuˬ˗ahˇ gaˬ˗eu miˇ neh, gʼaˬ hawˇ˗eu aˇ yamˬ zmˬ˗awˇ noeˬ tmˬ˗eu jeˬ hawˇ˗eu nui saˇ oꞈ˗eu jeˬ biꞈ˗eu, Miˬyehˇ˗euˬ dawˬ kawˬ laˬ kʼaˬ tiˬ cehˇ tsaꞈ gaˬ˗eu meh.—Maˬkuˆ 12:31.

Naꞈ suiˇ ni dzaw

4. Ka li zaˬ maˇ diˇ deuˬ maˇ maˇ ni Jaˇliꞈ mehˬ˗eu jeˬ˗ahˇ poˆ

Yawˬ haˇ yawˬ ha Ka li zaˬ ma lehˇ ehˇ˗eu yawˬ gʼaˬ na luꞈ, Jaˇliꞈ mehˬ˗eu jeˬ˗ahˇ dehꞈ caw˗eu maˬ ngeuˇ˗a. Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Ka li zaˬ˗euˬ zahˇ aˇ naˆ ni cawˆ˗iˇ taˬ˗euˬ nga? (5:11)

• Yawˬ haˇ yawˬ ha Ka li zaˬ ma lehˇ ehˇ˗eu zahˇ tiˬ deuˬ na, tsawˇ haˬ deuˬ˗ahˇ Yeˬsuˇ neh mehˬ˗euˬ jeˬ˗ahˇ maˬ bi siˬ˗eu gʼaˇ duˬ, aˬ jeˬ jeˇ jahˇ˗euˬ nga?

Yeˬsuˇ Jaˇliꞈ laꞈ kʼoeˇ˗euˬ yaw tsaˬ yaw dawˇ jeˬ mehˬ˗euˬ meh. Yoˇhaˬ 18:37-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬsuˇ˗euˬ dawˬ heu˗ahˇ haw ngeh, ‘yaw tsaˬ yaw dawˇ jeˬ˗ahˇ taꞈ˗eu’ Ka li zaˬ deuˬ˗ahˇ aˬ joˆ˗ehˇ tseˇ paˆ nya˗eu nga?

5. Ka li zaˬ maˇ diˇ deuˬ Jaˇliꞈ laꞈ kʼoeˇ˗euˬ yaw tsaˬ yaw dawˇ jeˬ tsaꞈ gaˬ

Yeˬsuˇ mˬ kʼoeˇ taˆ gʼoꞈ daˆ leˇ˗eu lehˇ gʼeh ngeh, aˬ yawꞈ˗euˬ mehˬ nah caw teh˗eu deuˬ˗ahˇ nymˬ˗mˇ iˬ nah keuˆ ni mˇ luꞈ˗eu gaˇ tiˬ hmˬ biꞈ nehˬ˗euˬ meh. Maꞈtehˬ 28:19, 20 hawˇ˗eu Gʼaˬkʼehˇ 1:8-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Tsaꞈ gaˬ˗eu gaˇ˗ahˇ aˇ naˆ ni mˇ huiˬ gʼeh˗eu nga?

6. Ka li zaˬ maˇ diˇ deuˬ, aˬ yawꞈ maꞈ mehˬ˗eu loꞈ˗ehˇ mˇ

Taw lehˇ kuˇ˗eu zaˬ yo aˬ li tiˬ gʼaˬ Ka li zaˬ maˇ diˇ deuˬ˗ahˇ mawˇ maˬ lehˇ aˬ jeˬ miˇ neh jah˗eu nga? Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Ngaˇ zahˇ tiˬ zahˇ˗iˬ maˬ paˇ tawˬ mawꞈ ni nui ma jiˇ haw˗euˬ ma (5:20)

• Biˬdiˬoˬ laꞈ kʼoeˇ˗euˬ Taw, aˇ hu aˬ jeˬ miˇ neh zahˇ maˬ paˇ tawˬ mawꞈ ni nui ma jiˇ laˇ˗euˬ nga?

• Aˬ yawꞈ yaw tsaˬ yaw dawˇ jeˬ˗ahˇ mawˇ maˬ lehˇ aˬ jeˬ miˇ neh jah˗eu nga?

Mˇ˗eu jeˬ˗aˬ, ngehˬ˗eu jeˬ naˆ maˬ tseˇ aˇ yeˇ huiˬ dzehˬ˗eu meh. Maꞈtehˬ 7:21-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬsuˇ˗euˬ gʼaˇ duˬ aˇ yeˇ huiˬ dzehˬ˗eu aˬ jeˬ nga, jah ma lehˇ ehˇ˗eu jeˬ laˬ, maˬ ngeuˇ naˇ mˇ doˆ shaˇ doˆ laꞈ˗eu jeˬ laˬ?

7. Ka li zaˬ maˇ diˇ deuˬ tiˬ gʼaˬ tiˇ gʼaˬ gaˬ

Ka li zaˬ maˇ diˇ deuˬ nui jah taꞈ˗eu mehˇ nmˇ deuˬ˗euˬ gʼaˇ duˬ shiˇ dah peuˬ ngaˇ laˬ? Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Aˬ yawꞈ ngaˬ˗euˬ gʼaˇ duˬ shiˇ dah nehˬ ma lehˇ ehˇ (2:55)

• Biˬdiˬoˬ laꞈ kʼoeˇ˗euˬ mehˇ nmˇ Loˬiˬ, aˬ jeˬ miˇ neh mehˇ nmˇ Yoˇhaˬsahˬ˗euˬ gʼaˇ duˬ shiˇ dah peuˬ˗eu nga?

• Aˬ yawꞈ neh jahˇ˗euˬ jeˬ˗ahˇ haw ngeh, Ka li zaˬ maˇ diˇ deuˬ jahˇ˗eu jeˬ pyeuꞈ ngaˇ laˬ?

• Yeˬsuˇ˗euˬ zaˬ lahˇ deuˬ (Ka li zaˬ maˇ diˇ deuˬ) yawˬ ha˗euˬ tsawˇ jeuˬ˗ahˇ tehꞈ˗ehˇ gaˬ nga laˬ? Aˬ jeˬ miˇ neh nga?

• Guiˇ deuˆ˗eu jeˬ jaˆ ngeh, tiˬ gʼaˬ tiˇ gʼaˬ maˇ maˇ ni gaˬ˗eu lehˇ aˬ joˆ˗ehˇ mˇ doˆ laꞈ˗eu nga?

Kawˆ shawˆ

Ka li zaˬ maˇ diˇ deuˬ naˇ Jaˇliꞈ mehˬ˗eu jeˬ˗ahˇ mˇ caw˗awˇ, yawˬ ha˗euˬ gʼaˇ duˬ maˬ shaˇ noeˬ ni tiˬ gʼaˬ tiˇ gʼaˬ gaˬ˗eu uˬ taꞈ, Jaˇliꞈ laꞈ kʼoeˇ˗euˬ yaw tsaˬ yaw dawˇ jeˬ tsaꞈ gaˬ˗eu meh.

Ja sawˇ poˆ˗eu

• Ka li zaˬ maˇ diˇ deuˬ˗euˬ nui jah aˬ jeˬ˗ahˇ dawˬ pehˬ taˬ˗eu nga?

• Ka li zaˬ maˇ diˇ deuˬ pyeuꞈ˗eu lehˇ aˬ jeˬ˗ahˇ haw˗awˇ siˬ laˇ˗eu nga?

• Ka li zaˬ maˇ diˇ deuˬ aˬ jeˬ˗euˬ gaˇ˗ahˇ yaw kʼaˆ˗ehˇ leh jeh˗eu nga?

Haw lahˬ

Yeˬsuˇ Ka li neh mehˬ˗euˬ jeˬ hawˇ˗eu mˇ˗euˬ jeˬ˗ahˇ caw teh nya ni leh jeh luꞈ˗eu, aˇ muˇ tiˬ muˇ˗euˬ gaˇ kawˆ˗ahˇ haw.

Nga maꞈ Yeˬhawˇbaˬ˗euˬ Saˇ kiˇ deuˬ, aˬ suˇ gʼaˬ nga? (1:13)

Naˇ ha geuꞈ haw˗euˬ tiˬ gʼaˬ, “Miˬyehˇ˗euˬ gaˇ˗ahˇ maˇ maˇ ni mˇ luꞈ˗eu aˇ muˇ”˗ahˇ aˬ joˆ˗ehˇ poˆ mawˇ˗euˬ nga?

“Aˬ yawꞈ maꞈ nga neh kʼaˇ naˇ haˬ˗euˬ jeˬ Jaˇliꞈ˗ahˇ neh ehˇ kʼoꞈ nehˬ laꞈ” (Loꞈ˗eu nymˇgoˇ, 2014 Oeˬ siˬ ba la 1)

Ka li zaˬ maˇ diˇ deuˬ uˬ jeˬ jaˬ lehˇ˗euˬ baˬ da neh shaˬ luꞈ˗eu nui jah taꞈ˗eu mehˇ nmˇ deuˬ˗ahˇ aˬ joˆ˗ehˇ caw ba˗eu nga lehˇ haw.

Uˬ jeˬ jaˬ lehˇ˗euˬ shaˬ zahˬ˗ahˇ ya tahˬ puˬ˗euˬ mehˇ nmˇ deuˬ˗ahˇ caw ba—Tiˬ tsahˇ na (3:57)

Dahˬ beh˗euˬ Ka li zaˬ deuˬ hawˇ˗eu nymˬ˗mˇ iˬ nah˗euˬ Ka li zaˬ maˇ diˇ deuˬ, Yeˬsuˇ neh mehˬ˗euˬ jeˬ˗ahˇ aˬ joˆ˗ehˇ mˇ caw˗eu nga?

“Ka li zaˬ maˇ diˇ deuˬ˗ahˇ aˬ joˆ˗ehˇ tseˇ paˆ nya˗eu nga?” (Loꞈ˗eu nymˇgoˇ, 2012 Smˇ siˬ ba la 1)