Gaˇ hawˇ˗eu pyuˇ nehˬ˗ehˇ taꞈ leˇ˗awˇ Jaˇliꞈ aˬ joˆ˗ehˇ ehˇ˗eu nga?

Nawˇ mˇ dzaˬ kʼawꞈ dawˇ˗eu gaˇ kawˆ˗ahˇ maˬ ehˇ, pyuˇ˗euˬ gaˇ kawˆ˗ahˇ maˬ ehˇ, noeˬ shaˬ kʼahˬ lahˇ haw maˬ loˇ? Aˬ dui yawˬ ha loˬ˗eu jeˬ˗ahˇ kʼawꞈ poˆ paˬ˗ehˇ gʼeh, Yeˬhawˇbaˬ˗ahˇ kʼawꞈ uˬ duˬ tahˬ paˬ˗ehˇ gʼeh˗eu miˇ neh, yaw awˬ maˬ ngeuˇ nya lehˇ noeˬ laˇ nya˗eu meh. Jaˇliꞈ aˬ dui˗ahˇ teu loꞈ˗ehˇ aˬ joˆ˗ehˇ jahˇ nya˗eu nga lehˇ mehˬ nehˬ taˬ˗euˬ meh.

1. Gaˇ mˇ˗eu gaˇ kawˆ nehˬ˗ehˇ taꞈ leˇ˗awˇ Jaˇliꞈ aˬ joˆ˗ehˇ ehˇ taˬ˗euˬ nga?

Miˬyehˇ aˬ dui˗ahˇ gaˇ mˇ gaˇ laˬ kʼaˬ bi cehˇ mawꞈ˗eu meh. “Yawˬ ha neh mˇ˗euˬ gaˇ˗ahˇ nui kʼahˇ shiˇ˗eu naˆ maˬ tseˇ muiˬ dzehˬ˗eu tiˬ jeˬ˗iˬ maˬ paˇ jaˆ meh” lehˇ Jaˇliꞈ ehˇ˗eu meh. (Dawˬtsoˆ 3:22) Yeˬhawˇbaˬ gaˇ˗ahˇ leh jeh dui dui˗eu meh. Teu miˇ neh aˬ dui Yeˬhawˇbaˬ˗ahˇ dzaw geuꞈ˗eu laꞈ kʼoeˇ gaˇ˗ahˇ yaw kʼaˆ˗ehˇ leh jeh naˇ, Yeˬhawˇbaˬ aˬ dui˗ahˇ nui kʼahˇ shiˇ˗awˇ, aˬ dui jiˇ yawˬ ha˗ahˇ nui kʼahˇ shiˇ˗eu meh.

Gaˇ mˇ˗eu heu naˇ aˇ yeˇ huiˬ˗eu meh. Ehˇ kʼawꞈ Yeˬhawˇbaˬ˗ahˇ uˬ duˬ tahˬ˗eu jeˬ naˆ maˬ tseˇ aˇ yeˇ taˬ huiˬ dzehˬ paˬ˗ehˇ maˬ gʼeh˗a. (Yoˇhaˬ 6:27) Yeˬhawˇbaˬ yawˬ jeˬ yawˬ˗ahˇ naˆ maˬ tseˇ, aˬ yawꞈ˗euˬ gaˇ˗ahˇ naˬ ba tiꞈ taˬ naˇ, aˬ dui˗euˬ dehꞈ ziˇ laꞈ kʼoeˇ loˬ˗eu jeˬ˗ahˇ ngehˬ gʼeh nehˬ ma lehˇ saˇ jaˇ dzaˬ taˬ˗euˬ meh.

2. Pyuˇ˗ahˇ yaw tsaˬ tsaˬ˗ehˇ aˬ joˆ˗ehˇ haw nya˗eu nga?

Pyuˇ ‘aˬ dui˗ahˇ haw piˇ nya˗eu meh’ lehˇ Jaˇliꞈ ehˇ˗eu meh. Ehˇ kʼawꞈ pyuˇ jaˆ˗awˇ neh tehꞈ˗ehˇ laˬ kʼaˬ cehˇ˗eu maˬ ngeuˇ˗a lehˇ saˇ tiˇ biꞈ taˬ˗euˬ meh. (Dawˬtsoˆ 7:12) Kʼoeˇ naˇ pyuˇ shuiˇ myawˬ gahˬ˗ahˇ maˬ gaˬ ni “yawˬ ha kʼaˇ jaˆ˗eu myaˆ ni nui kʼahˇ shiˇ˗awˬ” lehˇ jiˇ ehˇ taˬ˗euˬ meh. (Heˬbyehˇ 13:5-ahˇ gui.) Aˬ dui yawˬ ha jaˆ˗eu jeˬ˗ahˇ nui kʼahˇ shiˇ naˇ, maˬ loꞈ leˇ nyaˬ siˬ lehˇ noeˬ noeˬ˗ehˇ nui ma maˬ ya cawˆ˗a. Maˬ loˬ gaˇ dziˇ dzoˆ maˬ laˆ daˆ ni jiˇ yahˇ nya˗eu meh. (Dawˬdaˬ 22:7) Kʼoeˇ naˇ paiˬ daˬ˗eu baˬ da neh maˬ ehˇ, pyuˇ yaw kawˇ ma˗ehˇ za laˇ˗eu gaˇ mˇ˗eu baˬ da neh maˬ ehˇ, lehˬ laˇ ca laˇ˗eu jeˬ˗ahˇ yahˇ nya˗eu meh.

3. Pyuˇ˗ahˇ yawˬ ha˗euˬ gʼaˇ duˬ tehꞈ˗ehˇ maˬ ngeuˇ˗eu aˬ joˆ˗ehˇ zmˬ nya˗eu nga?

Yeˬhawˇbaˬ tsawˇ tsiˇ maˬ tsiˇ˗eu Miˬyehˇ pyeuꞈ meh. Aˬ dui “tsawˇ tsiˇ maˬ tsiˇ ni aˬ cawˬ˗ahˇ caw ba nehˬ˗eu” heu naˇ, Miˬyehˇ˗ahˇ dzaw geuꞈ˗eu jeˬ pyeuꞈ meh. (1 Tiˆmoˇseˬ 6:18) Aˬ dui yawˬ ha˗euˬ gʼaˇ duˬ tehꞈ˗ehˇ maˬ shaˇ noeˬ ni pyuˇ zmˬ˗eu gʼaˇ duˬ, aˇ muˇ laꞈ kʼoeˇ pyuˇ damˬ dawˆ nya˗awˇ, loˬ˗eu deuˬ˗ahˇ caw ba nehˬ nya˗eu uˬ taꞈ, nui jah taꞈ˗eu mehˇ nmˇ deuˬ˗ahˇ ngehˬ˗ehˇ dzehˬ caw ba nehˬ nya meh. Yeˬhawˇbaˬ aˬ dui aˇ myaˆ ni biꞈ˗euˬ lehˇ maˬ haw˗a, aˬ dui aˬ jeˬ˗euˬ baˬ da neh biꞈ˗euˬ nga lehˇ haw˗eu meh. Aˬ dui nui ma keuˆ˗eu laꞈ kʼoeˇ tsawˇ tsiˇ maˬ tsiˇ ni biꞈ naˇ, aˬ dui kʼawꞈ laˬ kʼaˬ cehˇ˗awˇ, Yeˬhawˇbaˬ jiˇ nui kʼahˇ shiˇ˗eu meh.—Gʼaˬkʼehˇ 20:35-ahˇ gui.

Naꞈ suiˇ ni dzaw

4. Gaˇ mˇ˗eu jeˬ neh Yeˬhawˇbaˬ˗ahˇ ciˬ huiˬ

Biˬdiˬoˬ: Yeˬbawˇbaˬ˗euˬ gʼaˇ duˬ kʼaˇ gʼeh nya gaˇ neh leh jeh˗awˇ mˇ (4:39)

• Nawˬ˗ahˇ biˬdiˬoˬ heu laꞈ kʼoeˇ˗euˬ Jeˇsahˬ neh aˬ joˆ˗ehˇ noeˬ gaˇ mˇ gaˇ ya leˇ nya?

• Gaˇ˗ahˇ aˬ yawꞈ jeˬ yawꞈ˗ehˇ bi jaˆ nya ni, Jeˇsahˬ aˬ jeˬ jahˇ˗euˬ nga?

Gawˇlawˇsehˇ 3:23, 24-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Gaˇ nehˬ˗ehˇ taꞈ leˇ˗awˇ aˬ dui noeˬ˗eu jeˬ, aˬ jeˬ miˇ neh aˇ yeˇ huiˬ˗eu nga?

Gaˇ mˇ˗eu heu naˇ aˇ yeˇ huiˬ˗eu jeˬ pyeuꞈ meh. Ehˇ kʼawꞈ aˬ dui gaˇ mˇ˗eu jeˬ˗ahˇ Yeˬhawˇbaˬ˗ahˇ uˬ duˬ tahˬ˗eu jeˬ naˆ maˬ tseˇ aˇ yeˇ maˬ ya taˬ huiˬ˗a

5. Yawˬ ha jaˆ˗eu jeˬ˗ahˇ nui kʼahˇ shiˇ˗eu heu naˇ, aˬ dui˗ahˇ gaˇ dahˇ tsoeˬ

Tsawˇ haˬ deuˬ pyuˇ gʼawˬ mya ni jaˆ laˇ˗eu gʼaˇ duˬ, leh jeh dui dui luꞈ˗eu meh. Ehˇ kʼawꞈ Jaˇliꞈ teu loꞈ˗ehˇ jahˇ gaˇ gʼaˬ maˬ biꞈ˗a. 1 Tiˆmoˇseˬ 6:6-8-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Jaˇliꞈ aˬ dui˗ahˇ aˬ jeˬ jahˇ lehˇ gʼaˬ biꞈ˗eu nga?

Biˬdiˬoˬ: ‘Yawˬ ha jaˆ˗eu jeˬ˗ahˇ nui kʼahˇ shiˇ’ (3:20)

• Pyuˇ yaw kʼaˆ˗ehˇ maˬ jaˆ kʼawꞈ, nymˇ jiˇ heu deuˬ aˬ jeˬ miˇ neh laˬ kʼaˬ cehˇ˗eu nga?

Aˬ dui pyuˇ jaˆ luꞈ gaˇ neh heu naˆ maˬ tseˇ paˇ jaˆ mawꞈ naˇ tawˇ neh? Teu loꞈ˗ehˇ noeˬ˗eu teu naˇ, bi lehˬ bi ca laˇ nya meh lehˇ Yeˬsuˇ yaw jeˬ ma jeˬ tiˬ hmˬ˗ahˇ zmˬ˗awˇ mehˬ˗euˬ meh. Luˇkaꞈ 12:15-21-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬsuˇ neh ja˗euˬ yaw jeˬ ma jeˬ˗ahˇ neh, aˬ dui aˬ jeˬ dzaw geuꞈ nya˗eu nga?—Aˇ deuˆ 15˗ahˇ haw.

Dawˬdaˬ 10:22 hawˇ˗eu 1 Tiˆmoˇseˬ 6:10-ahˇ gui˗awˇ sheu cehˆ haw. Kʼoeˇ naˇ, naˇ haˬ˗eu jeˬ heu˗ahˇ ja sawˇ.

• Nawˬ˗ahˇ aˬ geu jeˬ aˇ yeˇ huiˬ dzehˬ nga lehˇ noeˬ nya, Yeˬhawˇbaˬ nehˬ˗ehˇ cawˬ cawˬ˗eu jeˬ laˬ, pyuˇ gʼawˬ mya ni jaˆ˗eu jeˬ laˬ? Aˬ jeˬ miˇ neh?

• Pyuˇ poˆ gaˇ tehꞈ˗ehˇ aˇ dzehˬ˗ehˇ leh jeh naˇ, aˬ jeˬ jeˇ˗euˬ gaˇ kawˆ doˆ laˇ nya˗eu nga?

6. Yeˬhawˇbaˬ aˬ dui loˬ˗eu jeˬ ngehˬ gʼeh nehˬ

Biˬdiˬoˬ: Yeˬhawˇbaˬ aˬ dui loˬ˗eu jeˬ˗ahˇ ngehˬ gʼeh nehˬ (6:21)

• Biˬdiˬoˬ laꞈ kʼoeˇ˗euˬ mehˇ nmˇ heu gʼaˬ, aˬ jeˬ˗euˬ shaˬ zahˬ˗ahˇ ya tahˬ puˬ˗euˬ nga?

• Shaˬ zahˬ teu˗ahˇ daˬ dzeuˇ oˇ dzeuˇ nya˗eu gʼaˇ duˬ, aˬ yawꞈ aˬ jeˬ jeˇ jahˇ˗euˬ nga?

Maꞈtehˬ 6:25-34-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬhawˇbaˬ aˬ yawꞈ˗ahˇ naˬ ba tiꞈ taˬ˗eu deuˬ˗ahˇ aˬ jeˬ biꞈ ma lehˇ saˇ jaˇ dzaˬ taˬ˗euˬ nga?

Kawˆ shawˆ

Pyuˇ hawˇ˗eu gaˇ heu naˇ, aˇ yeˇ huiˬ˗eu jeˬ pyeuꞈ meh. Ehˇ kʼawꞈ teu neh aˬ dui Yeˬhawˇbaˬ˗euˬ gaˇ mˇ˗eu jeˬ˗ahˇ maˬ ya bi laˆ tsoeˬ˗a.

Ja sawˇ poˆ˗eu

• Gaˇ˗ahˇ yaw tsaˬ tsaˬ˗ehˇ haw nya ni aˬ dui˗ahˇ caw ba nehˬ˗eu aˬ jeˬ nga?

• Yawˬ ha jaˆ˗eu jeˬ˗ahˇ nui kʼahˇ shiˇ˗eu heu naˇ, aˬ joˆ˗ehˇ gaˇ dahˇ tsoeˬ˗eu nga?

• Aˬ dui Yeˬhawˇbaˬ aˬ yawꞈ˗euˬ tsawˇ haˬ deuˬ˗ahˇ loˬ˗eu jeˬ biꞈ nehˬ ma lehˇ saˇ jaˇ dzaˬ taˬ˗euˬ dawˬ˗ahˇ, jah˗eu lehˇ aˬ joˆ˗ehˇ mˇ doˆ laꞈ nya˗eu nga?

Haw lahˬ

Pyuˇ heu naˇ yaw haiˬ jeˬ pyeuꞈ˗eu lehˇ Jaˇliꞈ ehˇ ngaˇ laˬ lehˇ haw.

“Pyuˇ heu naˇ yaw haiˬ jeˬ dawˬ tawˆ luꞈ˗euˬ dawˬ pehˬ duˬ puˇ nga laˬ?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Aˬ dui Miˬyehˇ nui kʼahˇ shiˇ˗eu jeˬ˗ehˇ pyuˇ aˬ joˆ˗ehˇ zmˬ nya˗eu nga lehˇ haw.

“Biꞈ˗eu jeˬ nehˬ˗ehˇ taꞈ leˇ˗awˇ Jaˇliꞈ aˬ joˆ˗ehˇ ehˇ˗eu nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Paiˬ daˬ˗eu heu naˇ tiˬ jeˬ˗iˬ maˬ deuˬ laˇ˗eu, niˇ gʼa˗eu jeˬ pyeuꞈ nga laˬ?

“Paiˬ daˬ˗eu jeˬ˗ahˇ Jaˇliꞈ aˬ joˆ˗ehˇ ehˇ taˬ˗euˬ nga?” (Noeˬlaˇ˗awˬ!, 2015 Smˇ siˬ ba la)

Paiˬ kʼawꞈ daˬ smˇ kʼoeˬ kʼawꞈ kʼoeˬ˗euˬ zaˬ yo aˬ li tiˬ gʼaˬ, aˬ jeˬ miˇ neh dehꞈ poˆ dehꞈ paˇ˗euˬ nga?

“Jaˇliꞈ tsawˇ haˬ˗euˬ dehꞈ ziˇ˗ahˇ laˆ paˇ” (Loꞈ˗eu nymˇgoˇ, 2011 Tseˇ tiꞈ siˬ ba la 1)