Dzaw deuˆ 39
Shiˬ nehˬ˗ehˇ taꞈ leˇ˗awˇ Miˬyehˇ aˬ jeˬ ehˇ˗eu nga?
Shiˬ˗aˬ aˇ yeˇ huiˬ dui dui meh. Shiˬ maˬ ahˇ naˇ yaw dehꞈ maˬ dehꞈ nya˗a. Miˬyehˇ˗aˬ Beh˗euˬ yaw sahˇ pyeuꞈ˗eu miˇ neh, shiˬ˗ahˇ aˬ joˆ˗ehˇ bi zmˬ˗eu lehˇ aˬ dui˗ahˇ ehˇ nehˬ˗eu aˬ kawˬ˗aˬ jaˆ˗eu meh. Shiˬ nehˬ˗ehˇ taꞈ leˇ˗awˇ Miˬyehˇ aˬ jeˬ ehˇ taˬ˗euˬ nga? Aˬ dui shiˬ dzaˬ˗eu za ngaˇ laˬ? Shiˬ dawˆ˗eu tawˇ neh za ngaˇ loˇ? Aˬ dui gaˇ kawˆ heu˗ahˇ yaw muiˬ˗ehˇ aˬ joˆ˗ehˇ noeˬ tsehˆ nya˗eu nga?
1. Yeˬhawˇbaˬ shiˬ˗ahˇ aˬ joˆ˗ehˇ noeˬ˗eu nga?
Yeˬhawˇbaˬ Jaˇliꞈ boꞈ˗euˬ saˇ ka˗ahˇ˗euˬ aˬ yawꞈ˗ahˇ uˬ duˬ tahˬ˗eu tsawˇ haˬ deuˬ˗ahˇ “Yaw dehꞈ kʼaˇ dehꞈ˗eu jeˬ dawˬ tawˆ luꞈ˗euˬ saꞈ laˇ˗aˬ, shiˬ laꞈ kʼoeˇ ahˇ˗eu meh” lehˇ ehˇ nehˬ˗euˬ meh. (Uˬduˬtahˬ˗eu 17:14) Yeˬhawˇbaˬ˗euˬ mehˬ shi, shiˬ˗aˬ dehꞈ˗eu jeˬ pyeuꞈ meh. Dehꞈ˗eu jeˬ˗aˬ aˇ poeˬ baw dui dui˗eu Miˬyehˇ neh biꞈ˗euˬ laꞈ sawˬ pyeuꞈ meh. Teu miˇ neh shiˬ jiˇ aˇ poeˬ baw dui dui˗eu meh.
2. Miˬyehˇ shiˬ˗ahˇ aˬ jeˬ maˬ bi jahˇ˗eu nga?
Yeˬhawˇbaˬ Ka li zaˬ aˇ muˇ lehˇ maˬ jaˆ laˇ ngeh neh, aˬ yawꞈ˗ahˇ uˬ duˬ tahˬ˗eu tsawˇ haˬ deuˬ˗ahˇ shiˬ taˬ dzaˬ lehˇ ehˇ nehˬ˗euˬ meh. (Aˇdahˬbeh˗eu 9:4 hawˇ˗eu Uˬduˬtahˬ˗eu 17:10-ahˇ gui.) Kʼoeˇ naˇ Ka li zaˬ aˇ muˇ jaˆ laˇ˗awˇ neh jiˇ Yeˬhawˇbaˬ aˬ yawꞈ sheuˬ gʼeh˗eu laꞈ kʼoeˇ, uˆ lahˇ˗eu aˇ muˇ neh Ka li zaˬ deuˬ˗ahˇ “shiˬ taˬ dzaˬ [shiˬ˗ahˇ yahˇ˗awˬ, Miˇ shuiꞈ dawˬ paˇ Jaˇliꞈ]” lehˇ dzaˇ˗i tiˬ poˆ paˇ bi ehˇ nehˬ˗euˬ meh.—Gʼaˬkʼehˇ 15:28, 29-ahˇ gui.
Shiˬ˗ahˇ yahˇ˗eu lehˇ ehˇ˗eu heu naˇ, aˬ jeˬ˗ahˇ ehˇ mawꞈ˗eu nga? Saˬ laˬ gʼoˬ nawˬ˗ahˇ jiˇ baˬ˗ahˇ yahˇ˗awˬ lehˇ ehˇ naˇ nawˇ jiˇ baˬ maˬ dawˇ˗eu paˬ. Ehˇ kʼawꞈ ni nawˇ jiˇ baˬ keuˬ˗eu dzaˇ dzaˬ maˇ laˬ, maˬ ngeuˇ naˇ jiˇ baˬ nawˬ˗euˬ mawˇ do˗ahˇ tsawˆ ahˇ ma loˇ? Nawˇ teu loꞈ˗ehˇ maˬ jahˇ˗eu yaw duˬ baw meh. Teu gaˇ duˇ ni Miˬyehˇ aˬ dui˗ahˇ shiˬ˗ahˇ yahˇ˗awˬ lehˇ ehˇ˗eu heu naˇ, shiˬ˗ahˇ maˬ ya dzaˬ, maˬ ya dawˇ gaˇ ehˇ mawꞈ˗awˇ, shiˬ maˬ dzeˇ˗eu shaˬ jiˇ maˬ ya dzaˬ gaˇ jiˇ ehˇ mawꞈ˗eu meh. Kʼoeˇ naˇ shiˬ ahˇ˗eu dzaˇ maˬ ya dzaˬ gaˇ jiˇ ehˇ mawꞈ˗eu meh.
Shiˬ˗ahˇ naˇ gawˇ laˆ saˆ gaˇ zmˬ naˇ tawˇ neh? Naˇ gawˇ laˆ saˆ˗eu tiˬ jeˬ na, Miˬyehˇ˗euˬ zahˇ dawˬ˗ahˇ bahˬ˗eu meh. Shiˬ dawˆ˗eu jeˬ maˬ ehˇ, shiˬ laꞈ kʼoeˇ ahˇ˗eu shiˬ shiˬ neˇ, shiˬ shiˬ pyuˇ, shiˬ shiˬ tsiˇ, shiˬ shiˬ uiˇ, heu oeˬ jeˬ laꞈ kʼoeˇ neh tiˬ jeˬ na mawˇ do˗ahˇ dawˆ˗eu heu maˬ ehˇ, Miˬyeh˗euˬ zahˇ dawˬ˗ahˇ bahˬ˗eu meh. Ehˇ kʼawꞈ Miˬyehˇ˗euˬ zahˇ dawˬ laꞈ kʼoeˇ, naˇ gawˇ laˆ saˆ˗eu tiˬ jeˬ na˗ahˇ jahˇ nya˗eu hawˇ˗eu maˬ jahˇ nya˗eu lehˇ yaw duˬ duˬ˗ehˇ maˬ ehˇ taˬ˗aˬ. Yaw jeˬ ma jeˬ, shiˬ laꞈ kʼoeˇ˗euˬ teu oeˬ jeˬ˗ahˇ neh iˇ paˆ gʼeh˗eu tiˬ jeˬ na˗ahˇ zmˬ˗awˇ laˆ saˆ˗eu lehˇ jaˆ˗eu meh. Tiˬ poˆ na yawˬ ha˗euˬ shiˬ neh naˇ gawˇ laˆ saˆ˗eu jeˬ lehˇ jiˇ jaˆ˗eu meh. Heu loꞈ˗ehˇ laˆ saˆ˗eu jeˬ˗ahˇ naˇ, aˬ dui yawˬ ha naꞈ˗i ya noeˬ tsehˆ˗eu meh.a—Gaˬlaˬtiˆ 6:5.
Naꞈ suiˇ ni dzaw
Shiˬ nehˬ˗ehˇ taꞈ leˇ˗awˇ naˇ gawˇ laˆ saˆ˗eu jeˬ˗ahˇ yaw muiˬ˗ehˇ aˬ joˆ˗ehˇ noeˬ tsehˆ nya˗eu nga lehˇ haw.
3. Naˇ gawˇ laˆ saˆ ngeh Yeˬhawˇbaˬ nui ma tsaˬ˗eu jeˬ˗ehˇ noeˬ tsehˆ
Naˇ gawˇ laˆ saˆ ngeh Yeˬhawˇbaˬ nui ma tsaˬ˗eu jeˬ˗ehˇ aˬ joˆ˗ehˇ noeˬ tsehˆ nya˗eu nga? Biˬdiˬoˬ pah gʼaˬ naˇ, laꞈ oˆ ehˇ taˬ˗euˬ aˬ yawꞈ jeˬ yawꞈ˗ahˇ mˇ caw˗eu heu, aˬ jeˬ miˇ neh aˇ yeˇ huiˬ˗eu nga lehˇ ja sawˇ.
Zaˬ siˬ nui gahˇ za˗eu gʼaˇ duˬ guiˬ lahˇ shaˇ.—Yaˬkoˆ 1:5.
Jaˇliꞈ zahˇ˗ahˇ poˆ tseˇ˗awˇ aˬ joˆ˗ehˇ zmˬ˗iˇ nya˗eu nga lehˇ shaˇ noeˬ.—Dawˬdaˬ 13:16.
Yawˬ ha˗euˬ jawˇ kʼahˬ˗ahˇ aˬ joˇ joˆ˗ehˇ laˆ saˆ nya nga siˬ lehˇ poˆ tseˇ.
Aˬ joˆ˗ehˇ gʼeh˗eu naˇ gawˇ laˆ saˆ˗eu jeˬ˗ahˇ laꞈ maˬ daˬ˗eu lehˇ laˆ duˬ taˬ.
Yawˬ ha˗euˬ siˬ nya˗eu nui ma shawˇ jehˆ ni bi gʼeh˗eu jeˬ˗ehˇ noeˬ tsehˆ.—Gʼaˬkʼehˇ 24:16.b
Yawˬ ha˗euˬ siˬ nya˗eu nui ma nehˬ˗ehˇ taꞈ˗eu gaˇ kawˆ˗ahˇ ya noeˬ tsehˆ ngeh, yawˬ ha˗euˬ nymˇ dahˬ neh maˬ ehˇ, aˇ muˇ˗ahˇ sheuˬ gʼeh˗eu deuˬ neh maˬ ehˇ, Jaˇliꞈ mehˬ laˇ˗eu gʼaˬ neh maˬ ehˇ, aˬ joˆ˗ehˇ ya jahˇ˗eu lehˇ maˬ ya bi noeˬ tsehˆ˗a.—Loˇmaˆ 14:12.
Yawˬ ha neh noeˬ tsehˆ˗euˬ jeˬ boꞈ taˬ.
4. Yeˬhawˇbaˬ˗euˬ Saˇ kiˇ deuˬ naˇ gawˇ aˬ geu jeˬ lehˇ laˆ saˆ naˇ muiˬ dzehˬ nga lehˇ poˆ tseˇ
Shiˬ nehˬ˗ehˇ taꞈ˗eu Miˬyehˇ˗euˬ zahˇ dawˬ˗ahˇ mˇ caw˗awˇ, shiˬ maˬ zmˬ ni naˇ gawˇ yaw muiˬ˗ehˇ laˆ saˆ nya˗eu meh. Biˬdiˬoˬ pah.
Tiˇtuˆ 3:2-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
Aˬ dui saˬ laˬ gʼoˬ deuˬ nehˬ˗ehˇ ngehˬ cawˬ ngeh, aˬ jeˬ miˇ neh yaw zeu ya baw˗awˇ nui ma nahˬ yu ni ya taˬ˗eu nga?
Laꞈ maˬ daˬ nya˗eu jeˬ |
Ka li zaˬ deuˬ yawˬ ha naꞈ˗i ya noeˬ tsehˆ˗eu jeˬ |
|---|---|
1. Shiˬ shiˬ uiˇ. |
Shiˬ shiˬ uiˇ˗ahˇ neh iˇ paˆ gʼeh˗euˬ jeˬ |
2. Shiˬ shiˬ pyuˇ. |
Shiˬ shiˬ pyuˇ˗ahˇ neh iˇ paˆ gʼeh˗euˬ jeˬ |
3. Shiˬ shiˬ tsiˇ. |
Shiˬ shiˬ tsiˇ˗ahˇ neh iˇ paˆ gʼeh˗euˬ jeˬ |
4. Shiˬ shiˬ neˇ. |
Shiˬ shiˬ neˇ˗ahˇ neh iˇ paˆ gʼeh˗euˬ jeˬ |
5. Shiˬ laꞈ kʼoeˇ˗euˬ oeˬ jeˬ˗ahˇ neh iˇ paˆ gʼeh˗euˬ jeˬ˗ahˇ zmˬ˗awˇ naˇ gawˇ ya laˆ saˆ ngeh
Shiˬ laꞈ kʼoeˇ shiˬ shiˬ neˇ, shiˬ shiˬ pyuˇ, shiˬ shiˬ tsiˇ, shiˬ shiˬ uiˇ lehˇ heu oeˬ jeˬ ahˇ˗eu meh. Heu oeˬ jeˬ˗ahˇ neh gʼawˬ mya jeˬ lehˇ iˇ paˆ gʼeh nya˗a siˬ. Teu˗ahˇ shiˬ˗ahˇ neh iˇ paˆ gʼeh˗euˬ jeˬ lehˇ kuˇ˗eu meh.c Shiˬ˗ahˇ neh iˇ paˆ gʼeh˗euˬ tiˬ jeˬ na, naˇ gawˇ laˆ saˆ gaˇ maˬ ehˇ, shiˬ bi tsiˇ leˇ˗eu gaˇ maˬ ehˇ, zmˬ˗eu meh.
Shiˬ laꞈ kʼoeˇ˗euˬ kʼoeˇ oeˬ jeˬ˗ahˇ neh iˇ paˆ gʼeh˗euˬ jeˬ nehˬ˗ehˇ taꞈ leˇ˗awˇ ya noeˬ tsehˆ ngeh, Ka li zaˬ deuˬ Jaˇliꞈ nehˬ˗ehˇ tsaˬ˗eu yawˬ ha˗euˬ siˬ nya˗eu nui ma˗ahˇ dawˬ pehˬ taˬ˗awˇ yawˬ ha naꞈ˗i ya noeˬ tsehˆ˗eu meh. Tiˬ deuˬ na shiˬ laꞈ kʼoeˇ˗euˬ kʼoeˇ oeˬ jeˬ˗ahˇ neh iˇ paˆ gʼeh˗euˬ jeˬ˗ahˇ zmˬ˗awˇ naˇ gawˇ laˆ saˆ gaˇ laꞈ maˬ daˬ˗eu lehˇ noeˬ tsehˆ˗euˬ meh. Ehˇ kʼawꞈ yawˬ ha˗euˬ siˬ nya˗eu nui ma shawˇ˗eu miˇ neh, laꞈ daˬ˗eu lehˇ noeˬ tsehˆ˗euˬ deuˬ jiˇ jawˇ˗eu meh.
Yawˬ ha naꞈ˗i ya noeˬ tsehˆ ngeh, naˇ haˬ˗eu jeˬ heu˗ahˇ yaw muiˬ˗ehˇ shaˇ noeˬ.
Shiˬ laꞈ kʼoeˇ˗euˬ kʼoeˇ oeˬ jeˬ˗ahˇ neh iˇ paˆ gʼeh˗euˬ jeˬ˗ahˇ ngaˇ aˬ jeˬ miˇ neh laꞈ daˬ˗eu, aˬ jeˬ miˇ neh laꞈ maˬ daˬ˗eu lehˇ saˬ laˬ gʼoˬ˗ahˇ aˬ joˆ˗ehˇ dzawˇ nehˬ paˬ nga?
Tiˬ gʼaˬ na naˇ haˬ˗eu: “Shiˬ dawˆ˗eu teu yaw bahˬ˗a laˬ?”
Nawˬ˗ahˇ aˬ joˆ˗ehˇ noeˬ nya?
Kawˆ shawˆ
Yeˬhawˇbaˬ aˬ dui˗ahˇ shiˬ˗ahˇ aˇ poeˬ bi taˬ baw mawꞈ˗eu meh.
Ja sawˇ poˆ˗eu
Yeˬhawˇbaˬ aˬ jeˬ miˇ neh shiˬ˗ahˇ aˇ poeˬ taˬ baw˗eu nga?
Shiˬ˗ahˇ yahˇ lehˇ Miˬyehˇ neh ehˇ taˬ˗euˬ dawˬ heu naˇ, shiˬ dawˆ˗eu jeˬ nehˬ˗ehˇ jiˇ taꞈ˗eu lehˇ aˬ joˆ˗ehˇ siˬ laˇ˗eu nga?
Shiˬ˗ahˇ zmˬ˗awˇ naˇ gawˇ laˆ saˆ˗eu jeˬ nehˬ˗ehˇ taꞈ leˇ˗awˇ, aˬ dui yaw muiˬ˗ehˇ aˬ joˆ˗ehˇ noeˬ tsehˆ nya˗eu nga?
Haw lahˬ
Yawˬ ha˗euˬ shiˬ neh naˇ gawˇ laˆ saˆ˗eu gaˇ kawˆ˗ahˇ maˬ noeˬ tsehˆ mi naˆ˗ehˇ, aˬ dui aˬ jeˬ jeˇ˗ahˇ shaˇ noeˬ paˬ˗ehˇ gʼeh˗eu nga?
“Gui˗eu deuˬ naˇ ha˗eu jeˬ” (Loꞈ˗eu nymˇgoˇ, 2000 Tseˇ siˬ ba la 15)
Shiˬ˗ahˇ neh iˇ paˆ gʼeh˗euˬ jeˬ˗ahˇ laꞈ daˬ˗eu laˬ, laꞈ maˬ daˬ˗eu laˬ lehˇ noeˬ tsehˆ ngeh, aˬ jeˬ jeˇ˗ahˇ shaˇ noeˬ paˬ˗ehˇ gʼeh˗eu nga?
“Gui˗eu deuˬ naˇ ha˗eu jeˬ” (Loꞈ˗eu nymˇgoˇ, 2004 Koꞈ siˬ ba la 15)
Saˬ laˬ gʼoˬ tiˬ gʼaˬ aˇ nah naˇ shiˬ nehˬ˗ehˇ taꞈ leˇ˗awˇ Yeˬhawˇbaˬ neh noeˬ˗euˬ jeˬ tsaˬ ngaˇ lehˇ aˬ jeˬ miˇ neh noeˬ laˇ˗euˬ nga?
Naˇ gawˇ laˆ saˆ˗eu paw˗euˬ gawˬmiˬtiꞈ laꞈ kʼoeˇ˗euˬ aˇ muˇ˗ahˇ sheuˬ gʼeh˗eu deuˬ, mehˇ nmˇ deuˬ˗ahˇ aˬ joˆ˗ehˇ ngehˬ gʼeh luꞈ˗eu nga lehˇ haw.
a “Aˬ dui yaw muiˬ˗ehˇ aˬ joˆ˗ehˇ noeˬ tsehˆ nya˗eu nga?” lehˇ ehˇ˗eu gaˇ kawˆ Dzaw deuˆ 35˗ahˇ haw.
b “Shiˬ laꞈ kʼoeˇ˗euˬ oeˬ jeˬ˗ahˇ neh iˇ paˆ gʼeh˗euˬ jeˬ˗ahˇ zmˬ˗awˇ naˇ gawˇ ya laˆ saˆ ngeh” lehˇ ehˇ˗eu gaˇ kawˆ aˇ deuˆ 5-ahˇ hawˇ˗eu Dzaw lahˬ 3˗ahˇ “Shiˬ nehˬ˗ehˇ taꞈ˗eu naˇ gawˇ laˆ saˆ˗eu jeˬ” lehˇ ehˇ˗eu gaˇ kawˆ˗ahˇ haw.
c Saˬ laˬ gʼoˬ tiˬ deuˬ na, shiˬ laꞈ kʼoeˇ˗euˬ kʼoeˇ oeˬ jeˬ˗ahˇ shiˬ˗ahˇ neh iˇ paˆ gʼeh˗euˬ jeˬ lehˇ sawˇ˗eu meh. Teu miˇ neh nawˇ shiˬ maˬ ehˇ, shiˬ laꞈ kʼoeˇ ahˇ˗eu shiˬ shiˬ neˇ, shiˬ shiˬ pyuˇ, shiˬ shiˬ tsiˇ, shiˬ shiˬ uiˇ teu oeˬ jeˬ˗ahˇ maˬ ehˇ, maˬ dawˆ˗eu lehˇ yaw duˬ duˬ˗ehˇ ya dzawˇ nehˬ˗eu meh.