Yeˬsuˇ “Miˬyehˇ˗euˬ ehˇ dawˬ naˇ haˬ”

Yeˬsuˇ aˬ myah luꞈ Yeˬhawˇbaˬ˗euˬ ehˇ dawˬ naˇ haˬ˗eu meh. (Yoˇhaˬ 8:29) Toˆ˗ehˇ naˇ, Jaˇliꞈ˗ahˇ aˬ jeˬ miˇ neh Yeˬsuˇ “shaˬ˗eu zahˬ˗eu jeˬ˗ahˇ daˬ˗eu laꞈ kʼoeˇ, Miˬyehˇ˗euˬ ehˇ dawˬ naˇ haˬ˗eu jeˬ˗ahˇ siˬ nya laˇ˗euˬ meh” lehˇ ehˇ taˬ˗euˬ nga?—Heˬbyehˇ 5:8.

Yeˬsuˇ miˇ tsaˬ kʼoeˇ taˆ jawˇ ngeh, mˬ kʼoeˇ taˆ maˬ ya tahˬ puˬ˗eu jeˬ˗ahˇ ya tahˬ puˬ˗euˬ meh. Yaw jeˬ ma jeˬ, Yeˬsuˇ Miˬyehˇ˗ahˇ yaw zeu baw˗eu aˬ da aˬ ma nehˬ˗ehˇ huiˬ laˇ˗euˬ kʼawꞈ, aˬ yawꞈ maꞈ maˬ byah kuꞈ˗eu tsawˇ haˬ pyeuꞈ meh. (Luˇkaꞈ 2:51) Yeˬsuˇ zahˇ˗euˬ aˬ yuiꞈ deuˬ hawˇ˗eu uˆ lahˇ˗eu sahˬ paˬ sahˬ ma deuˬ neh kʼehˬ nehˬ kʼaˆ nehˬ gaˇ ya daˬ˗euˬ meh. (Maꞈtehˬ 26:59; Maˬkuˆ 15:15) Kʼoeˇ naˇ aˬ yawꞈ naˇ naˇ gawˇ gawˇ˗ehˇ ya shiˇ˗euˬ meh. Jaˇliꞈ˗ahˇ aˬ yawꞈ ‘yawˬ ha˗ahˇ taˬ nyiˇ dui dui˗awˇ, shiˇ gaˇ keuˆ ni, Miˬyehˇ ehˇ dawˬ naˇ haˬ˗euˬ meh’ lehˇ ehˇ taˬ˗euˬ meh.—Piˇliˇpiˆ 2:8.

Yeˬsuˇ aˬ yawꞈ neh ya daˬ˗euˬ jeˬ baˬ da neh, ehˇ dawˬ naˇ haˬ˗eu jeˬ nehˬ˗ehˇ taꞈ leˇ˗awˇ, mˬ kʼoeˇ taˆ jawˇ ngeh maˬ ya dzaw˗euˬ jeˬ ya dzaw˗euˬ lehˇ ehˇ nya meh. Teu miˇ neh aˬ yawꞈ aˬ dui˗euˬ nui noeˬ nui ma˗ahˇ yaw muiˬ˗ehˇ gʼoˆ shaw nehˬ nya˗awˇ, gʼawˬ shaˬ gaˬ nya˗eu byah kuꞈ˗eu Sahˬ paˬ hawˇ˗eu Piˇ ma pyeuꞈ laˇ˗euˬ meh. (Heˬbyehˇ 4:15; 5:9) Yeˬsuˇ shaˬ˗eu zahˬ˗eu jeˬ˗ahˇ daˬ˗eu laꞈ kʼoeˇ Miˬyehˇ˗euˬ ehˇ dawˬ naˇ haˬ˗eu jeˬ˗ahˇ siˬ nya laˇ gʼaˬ ngeh, Yeˬhawˇbaˬ˗euˬ mehˬ shi aˇ poeˬ paˇ baw dzehˬ laˇ˗euˬ meh. Teu gaˇ duˇ ni aˬ dui jiˇ shaˬ˗eu zahˬ˗eu jeˬ˗ahˇ ya puˬ kʼawꞈ, aˬ myah luꞈ Yeˬhawˇbaˬ˗euˬ ehˇ dawˬ naˇ haˬ naˇ, aˬ dui Yeˬhawˇbaˬ˗euˬ mehˬ shi aˇ poeˬ paˇ baw dzehˬ laˇ˗awˇ, aˬ dui˗ahˇ aˬ jeˬ˗euˬ gaˇ˗ahˇ maˬ kaˬ zmˬ nya dzehˬ laˇ˗eu meh.—Yaˬkoˆ 1:4.

(Taiˬ hawˇ˗eu Mam dawˬ˗ahˇ haw nya meh.)