Ngaˇ lawˬ liˬ yeuꞈ paˬ˗eh gʼeh ngaˇ siˬ laˬ?

Tsawˇ mawˬ tiˬ gʼaˬ lawˬ liˬ yeuꞈ laꞈ˗euˬ gʼawˬ mya kʼoꞈ byah laˇ˗eu meh. Yawˬ ha kʼaˇ iˇ mawꞈ gaˇ yawˬ ha iˇ mawꞈ˗eu aˇ yamˬ, yawˬ ha˗euˬ lawˬ liˬ ngeh ya iˇ gaˇ ya leˇ dui dui˗eu meh. Ehˇ kʼawꞈ nymˇ jiˇ laꞈ kʼoeˇ˗euˬ deuˬ hawˇ˗eu cawˬ deuˬ aˬ yawꞈ˗ahˇ kʼahˬ lahˇ˗eu miˇ neh lawˬ liˬ yeuꞈ paˬ˗ehˇ maˬ paˇ gʼeh ngaˇ lehˇ ehˇ nehˬ˗euˬ meh. Teu ngeh aˬ yawꞈ tsawˇ haˬ heu deuˬ aˬ jeˬ miˇ neh kʼahˬ lahˇ˗eu nga lehˇ noeˬ˗eu meh.

Nawˇ jiˇ gaˇ kawˆ teu˗ahˇ ya puˬ luꞈ ma laˬ? Ya puˬ luꞈ naˇ, nawˇ lawˬ liˬ yeuꞈ daˆ leꞈ paˬ˗ehˇ gʼeh maˬ gʼeh˗eu aˬ joˆ˗ehˇ noeˬ tsehˆ nya˗eu nga?

Miˇ kʼahˬ tiˬ deuˬ na˗ahˇ tsawˇ mawˬ mawˬ laˇ˗euˬ deuˬ˗ahˇ lawˬ liˬ yeuꞈ˗eu li ma jahˇ tawꞈ nehˬ˗eu gʼaˇ duˬ, lawˬ liˬ yeuꞈ˗eu gaˇ kawˆ nehˬ˗ehˇ taꞈ leˇ˗eu saˬ laˬ gʼoˬ deuˬ neh aˬ kawˬ˗aˬ biꞈ nehˬ˗euˬ li ma jaˆ˗eu loˬ meh. Teu loꞈ˗ehˇ gʼeh˗eu miˇ kʼahˬ deuˬ˗ahˇ jawˇ˗eu mehˇ nmˇ deuˬ naˇ, zahˇ sahˇ kʼoꞈ teu˗ahˇ caw teh˗eu meh. (Loˇmaˆ 13:1) Ehˇ kʼawꞈ nawˬ˗euˬ jawˇ kʼahˬ˗ahˇ toˆ˗ehˇ gʼeh˗eu zahˇ sahˇ kʼoꞈ deuˬ maˬ jahˇ doˆ taˬ˗euˬ naˇ kʼawꞈ, maˬ bi lehˬ maˬ bi ca laˇ ni, lawˬ liˬ yaw muiˬ˗ehˇ yeuꞈ nya˗eu gʼaˇ duˬ haw piˇ nehˬ˗eu nui noeˬ nui duˇ biꞈ nehˬ˗eu deuˬ jawˇ˗eu meh.

Yawꞈ ha aˬ joˆ˗ehˇ yeuꞈ nya lehˇ shaˇ noeˬ

Laꞈ oˆ paw jaˆ˗eu naˇ haˬ˗eu jeˬ heu deuˬ neh pyehˆ tseˇ haw lehˇ, tsawˇ mawˬ deuˬ˗euˬ gʼaˇ duˬ aˇ maꞈ aˇ muˇ tiˬ hmˬ nui noeˬ nui duˇ biꞈ taˬ˗euˬ meh.

Gaˇ ma˗ahˇ saˇ tiˇ biꞈ taˬ˗euˬ sahˬ boꞈ deuˬ˗ahˇ haw mawˇ nya miˇ˗a siˬ laˬ? Uˬ ciꞈ paw yaw muiˬ˗ehˇ mawˇ laˇ miˇ˗a siˬ laˬ?
Mehˬ shi naˇ kʼah, gaˇ dahˬ gaˇ dzeˇ, uˬ duˬ yaw muiˬ˗ehˇ zeuˆ pyawˇ zeuˆ pyawˇ˗ehˇ haw nya miˇ˗a siˬ laˬ?
Luˆ laˆ˗eu yaw kawˇ miˇ˗a siˬ laˬ? Yaw jeˬ ma jeˬ, yeuꞈ kʼaˆ yeuꞈ gahˇ taˬ˗euˬ gaˇ neh, nawˬ naˬ gaˇ yaw kawˇ ma˗ehˇ nawˬ paˇ nya miˇ˗a laˬ?
Lawˬ liˬ yeuꞈ˗eu yaw myaꞈ miˇ neh aˬ cawˬ˗euˬ gaˇ ma˗ahˇ tsoeˬ nga laˬ? Maˬ myahˇ laˇ˗euˬ heu kaˬ˗ahˇ ui cuiˆ neh maˬ ngeuˇ nmˇ tahˬ˗eu keuˆ laˇ de laˬ?
Tiˬ jeˬ jeˬ˗ahˇ tahˬ jeˬ iˇ˗awˇ, lawˬ liˬ tahˬ kuˬ tahˬ byawꞈ taˬ˗euˬ jaˆ de laˬ?
Yehˇ deuˬ deh naˬ laˇ˗a laˬ?
Lawˬ liˬ yeuꞈ ngeh yuꞈ kʼaˆ yoeˇ nya laˬ?
Lawˬ liˬ yeuꞈ ngeh deuˬ˗eu jaˆ gʼaˬ deuˬ dzaˬ luꞈ de laˬ?
Nawˇ lawˬ liˬ yeuꞈ gaˇ nymˇ jiˇ laꞈ kʼoeˇ˗euˬ deuˬ hawˇ˗eu cawˬ deuˬ kʼahˬ lahˇ nya lehˇ ehˇ nga laˬ?

Nawˬ˗euˬ laꞈ kʼoeˇ heu gaˇ naˇ haˬ taˬ˗euˬ tiˬ kawˆ nyiˬ kawˆ pyeuꞈ luꞈ naˇ, nawˇ laˆ poˆ laˆ paˇ mˇ paˬ˗ehˇ tsaˬ laˇ taˬ˗euˬ meh. Yaw jeˬ ma jeˬ, lawˬ liˬ yaw kʼaˆ˗ehˇ maˬ paˇ yeuꞈ˗eu gʼaˇ duˬ, uˬ ciꞈ paw ngehˬ˗ehˇ dzehˬ yaw kʼaˆ˗ehˇ maˬ yeuꞈ˗eu gʼaˇ duˬ, noeˬ tsehˆ nya meh. Yawˬ ha lawˬ liˬ yeuꞈ nya miˇ˗a siˬ laˬ lehˇ yaw muiˬ˗ehˇ ya pyehˆ tseˇ˗eu meh. Maˬ ngeuˇ naˇ, yawˬ ha nymˇ jiˇ laꞈ kʼoeˇ˗euˬ tiˬ gʼaˬ gʼaˬ neh maˬ ehˇ, cawˬ tiˬ gʼaˬ gʼaˬ neh maˬ ehˇ, bi pyehˆ tseˇ nya meh. Maˬ lehˬ maˬ ca laˇ ni yeuꞈ nya˗eu gʼaˇ duˬ mehˬ˗eu dzaw nymˇ˗ahˇ jiˇ daˆ˗iˇ nya meh. Ehˇ kʼawꞈ heu gaˇ laꞈ taˆ naˇ haˬ taˬ˗euˬ gaˇ kawˆ heu nawˬ˗euˬ laꞈ kʼoeˇ gʼawˬ mya kawˆ pyeuꞈ luꞈ naˇ, lawˬ liˬ maˬ paˇ yeuꞈ naˇ muiˬ dzehˬ meh.a

Jaˇliˬ zahˇ˗ahˇ caw teh

Lawˬ liˬ yaw kʼaˆ˗ehˇ maˬ paˇ yeuꞈ nya ni pyeuꞈ laˇ˗euˬ gaˇ yawˬ ha maˬ haw mawˇ nya˗eu kʼawꞈ pyeuꞈ nya meh. Lawˬ liˬ maˬ paˇ ya yeuꞈ˗eu gaˇ kawˆ˗ahˇ maˬ ngehˬ nahˇ˗eu kʼawꞈ pyeuꞈ nya meh. Toˆ˗ehˇ naˇ, yawˬ ha˗euˬ gaˇ kawˆ nehˬ˗ehˇ taꞈ leˇ˗awˇ yaw tsaˬ tsaˬ˗ehˇ haw nya ni hawˇ˗eu yaw muiˬ˗ehˇ noeˬ tsehˆ nya ni caw ba nehˬ˗eu Jaˇliꞈ zahˇ nyiˬ hmˬ˗ahˇ haw ma.

Dui dui baw˗eu siˬ nya˗awˬ. (Dawˬdaˬ 11:2) Aˇ kʼoꞈ kʼawˆ laˇ ngeh mawˇ laˇ gaˬ laˇ˗eu jeˬ yaw kʼaˆ˗ehˇ maˬ muiˬ ni pyeuꞈ˗iˇ˗awˇ, shaˬ guˬ shaˬ laˬ yaw kʼaˆ˗ehˇ maˬ dehꞈ ni pyeuꞈ˗iˇ˗eu meh. Yaw jeˬ ma jeˬ, aˇ kʼoꞈ kʼawˆ laˇ ngeh gʼaˬ doeˇ doeˇ laˇ˗eu yaw kawˇ miˇ neh, tsawˇ mawˬ deuˬ myaˬ tiˬ paˆ mui niˇ gʼa˗eu tiˬ jeˬ na byehˇ dzeh˗euˬ meh. Lawˬ liˬ yeuꞈ˗eu gaˇ kawˆ jiˇ teu gaˇ duˇ meh. Yawˬ ha˗euˬ dui dui baw˗eu jeˬ siˬ nya˗eu deuˬ naˇ, yawˬ ha˗ahˇ maˬ bi lehˬ maˬ bi ca laˇ˗eu gʼaˇ duˬ lawˬ liˬ maˬ paˇ yeuꞈ˗eu lehˇ noeˬ tsehˆ˗euˬ meh. (Dawˬdaˬ 22:3) Kʼoeˇ naˇ aˬ cawˬ kʼahˬ lahˇ˗eu miˇ neh ehˇ laˇ gaˇ, nui ma keuˆ˗eu laꞈ kʼoeˇ yaw muiˬ˗ehˇ naˇ haˬ geuꞈ˗eu meh.—2 Saˬmeuˬlaˆ 21:15-17 nehˬ˗ehˇ sheu cehˆ.

Tiˬ gʼaˬ˗ahˇ˗iˬ taˬ laˆ tahˬ taˬ laˆ sehꞈ. (Dawˬmehˬmehˬ˗eu 22:8) Lawˬ liˬ yeuꞈ˗eu gʼaˬ yaw muiˬ˗ehˇ maˬ yeuꞈ nya naˇ, yawˬ ha yeuꞈ˗eu lawˬ liˬ aˬ cawˬ˗ahˇ laˆ sehꞈ˗eu myawˬ pyeuꞈ˗iˇ nya meh. Lawˬ liˬ maˬ paˇ yeuꞈ coeˇ˗euˬ kʼawꞈ yeuꞈ daˆ leꞈ naˇ, yawˬ ha˗euˬ ziˇ hawˇ˗eu aˬ cawˬ˗euˬ ziˇ˗ahˇ lehˬ laˇ ca laˇ nya meh. Yawˬ ha baˬ da neh tiˬ gʼaˬ gʼaˬ˗ahˇ maˬ yehꞈ maˇ yehꞈ˗ehˇ laˆ sehꞈ naˇ, yawˬ ha˗ahˇ doˇ˗eu meh.

Nawˇ lawˬ liˬ maˬ paˇ yeuꞈ coeˇ ngeh, aˬ cawˬ deuˬ nawˬ˗ahˇ yaw zeu maˬ baw gaˇ taˬ kʼahˬ lahˇ. Yeˬhawˇbaˬ nawˇ taˬ aw˗eu jeˬ, dui dui baw˗eu jeˬ, aˬ cawˬ˗euˬ gʼaˇ duˬ noeˬ kawˆ nehˬ˗eu jeˬ, muiˬ˗eu seuˆ dzeuꞈ aˇ gʼehˇ heu deuˬ ahˇ gaˇ aˇ poeˬ taˬ baw dui dui˗eu meh. Aˬ yawꞈ nawˬ˗ahˇ caw ba nehˬ˗awˇ ngehˬ gʼeh nehˬ ma lehˇ saˇ jaˇ dzaˬ taˬ˗euˬ meh. (Iˇsaˬyaˇ 46:4) Aˬ yawꞈ nawˬ˗ahˇ tiˬ jawˇ˗iˬ maˬ byehˇ dzeh˗a. Teu miˇ neh nawˇ lawˬ liˬ yeuꞈ˗eu naˬ leˇ paˬ nga laˬ lehˇ noeˬ tsehˆ nya˗eu gʼaˇ duˬ, zaˬ siˬ nui gahˇ hawˇ˗eu Jaˇliꞈ zahˇ˗ahˇ gʼoˆ shaw nya ni caw ba nehˬ laꞈ lehˇ Yeˬhawˇbaˬ˗ahˇ guiˬ lahˬ shaˇ.

Aˬ cawˬ deuˬ caw ba nehˬ nya˗eu jeˬ

Tsawˇ mawˬ deuˬ lawˬ liˬ yeuꞈ˗eu gaˇ kawˆ nehˬ˗ehˇ taꞈ leˇ˗awˇ, yawˬ ha nymˇ jiˇ laꞈ kʼoeˇ˗euˬ deuˬ nui noeˬ nui duˇ biꞈ naˇ, muiˬ dzehˬ meh. Maˬ ngeuˇ naˇ, nawˇ tsawˇ mawˬ teu gʼaˬ nehˬ˗ehˇ gʼoeˇ˗eu cawˬ pyeuꞈ˗awˇ, aˬ yawꞈ lawˬ liˬ yeuꞈ gaˇ kʼahˬ lahˇ nya lehˇ aˬ cawˬ deuˬ ehˇ gaˇ ya gaˬ ngeh tawˇ neh? Aˬ cawˬ ehˇ gaˇ tehꞈ˗ehˇ maˬ naˇ haˬ ni, aˬ yawꞈ nehˬ˗ehˇ dziˬ haw˗iˇ˗awˬ. Loˬ naˇ ja cawˬ˗awˬ. Aˬ yawꞈ˗euˬ nui noeˬ nui ma˗ahˇ noeˬ keuˆ nehˬ˗awˇ, kʼaˇ ngeuˇ˗eu loꞈ˗ehˇ dawˇ coe ni ya ngehˬ nehˬ kʼawꞈ, gʼawˬ shaˬ gaˬ˗eu laꞈ kʼoeˇ ngehˬ nehˬ˗awˬ. Aˇ yeˇ huiˬ˗eu jeˬ naˇ, aˬ yawꞈ aˇ kʼoꞈ aˇ myaˆ kʼoꞈ kʼawˆ laˇ˗euˬ lehˇ maˬ ngeuˇ˗eu, aˬ yawꞈ lawˬ liˬ yeuꞈ˗eu aˬ joˆ˗ehˇ nga lehˇ haw˗eu heu pyeuꞈ meh lehˇ taˬ ngehˇ. “Nawˇ lawˬ liˬ yeuꞈ˗eu teu˗aˬ, lehˬ laˇ ca laˇ nya nga de” lehˇ gʼeh˗eu dawˬ maˬ ya ngehˬ˗a. “Nawˬ˗ahˇ lehˬ laˇ ca laˇ gaˇ kʼahˬ lahˇ nya” lehˇ ngehˬ paˬ˗ehˇ gʼeh˗eu meh. Aˬ yawꞈ˗ahˇ heu kawˆ laꞈ kʼoeˇ ngehˬ keuˆ taˬ˗euˬ Jaˇliꞈ zahˇ nyiˬ hmˬ˗ahˇ noeˬ doˆ leˇ ni caw ba nehˬ.

Tsawˇ mawˬ deuˬ lawˬ liˬ maˬ paˇ ya yeuꞈ ngeh, aˬ yawꞈ maꞈ˗euˬ nui ma˗ahˇ aˬ joˆ˗ehˇ gʼeh leˇ˗eu nga lehˇ yaw muiˬ˗ehˇ gʼoˆ shaw nehˬ nya ni aˬ dui yawˬ gʼaˬ na luꞈ leh jeh paˬ˗ehˇ gʼeh˗eu meh. Aˬ yawꞈ˗ahˇ kʼaˇ iˇ mawꞈ gaˇ maˬ paˇ iˇ nya ngaˇ, aˬ cawˬ˗ahˇ tehꞈ˗ehˇ ya gʼoe ngaˇ lehˇ noeˬ leˇ nya˗eu meh. Nawˇ aˬ yawꞈ˗ahˇ aˬ joˆ˗ehˇ caw ba nehˬ nya nga? Gʼawˬ shaˬ gaˬ˗eu laꞈ kʼoeˇ yawˬ ha jawˇ paw neh caw ba nehˬ. (Dawˬdaˬ 17:17) Tiˬ gaˇ paw sheuˬ ha˗iˇ nehˬ laꞈ lehˇ shaˇ laˇ gaˇ taˬ dawˬ. Naw maꞈ˗ahˇ kʼaˆ behˆ pyeuꞈ gaˇ guˆ˗eu miˇ neh maˬ shaˇ laˇ˗eu kʼawꞈ pyeuꞈ nya meh. Nawˇ aˬ yawꞈ˗ahˇ mehˬ bawˬ˗ahˇ iˇ gaˇ, tsaꞈ gaˬ˗iˇ gaˇ, myawˬ zeuˇ˗iˇ gaˇ, saˬ laˬ gʼoˬ jawˇ gaˇ iˇ gaˇ, sheuˬ ha nehˬ˗eu gʼaˇ duˬ aˇ yamˬ laˆ baw taˬ nya meh. Nawˇ aˬ yawꞈ˗ahˇ, nawˬ˗ahˇ ya caw ba nehˬ˗eu miˇ neh, aˇ yamˬ ya biꞈ nehˬ˗eu miˇ neh, laˬ kʼaˬ cehˇ miˇ˗a lehˇ ehˇ nehˬ nya meh.—Loˇmaˆ 1:11, 12.

a Heu naˆ maˬ tseˇ siˬ nya mawꞈ naˇ, 2002 kʼoꞈ Yehꞈ siˬ ba la 8 nah˗ahˇ˗euˬ Noeˬ laˇ˗awˬ paˇ dmˬ laꞈ kʼoeˇ “Lawˬ liˬ tahˬ gaˇ neh nawˇ yahˇ luꞈ ma loˇ” lehˇ ehˇ˗eu gaˇ kawˆ˗ahˇ haw. (Aˬ kaˬ paw maˬ jaˆ)