Yaw awˬ awˬ˗ehˇ dehꞈ˗eu jeˬ maˇ diˇ laˬ kʼaˬ cehˇ˗eu jeˬ biꞈ

Daˬniˇ hawˇ˗eu Miˬleˇ 2000 kʼoꞈ gʼoeˬ siˬ ba la˗ahˇ yuˇ˗awˇ Saˬpeꞈ miˇ kʼahˬ Baˬsiˬloˬnaˬ meuˬ˗ahˇ saˇ lehˆ ni dehꞈ˗eu meh. “Nga nyaꞈ pyuˇ gʼawˬ mya ni za˗eu gaˇ mˇ˗awˇ aˇ poeˬ kʼaˆ˗eu dzaˇ dzaˬ poeˬ˗eu moeˬ tsoeˬ dm aˬ cawˬ miˇ kʼahˬ˗ahˇ dawˬ deh gʼa” lehˇ dehꞈ˗euˬ ma lehˇ Daˬniˇ ehˇ˗eu meh. Ehˇ kʼawꞈ dehꞈ ziˇ tiˬ jeˬ paˬ neh bi laˆ paˇ˗euˬ meh.

2006 kʼoꞈ huiˬ˗eu mehˬ bawˬ smˬ hmˬ˗ahˇ Daˬniˇ “‘Bi sehꞈ˗eu lehˇ gʼeh luꞈ˗eu tsawˇ haˬ˗ahˇ’ mˬ maˬ maˬ byaˆ zaˇ ziˇ dehꞈ˗eu gaˇ ma˗ahˇ bi jawˇ laˇ˗eu gʼaˇ duˬ nymˇ aˬ dui leh jeh luꞈ ma loˇ?” lehˇ ehˇ˗eu gaˇ kawˆ heu mehˬ gaˇ yaˬ gaˬ˗euˬ meh. (Dawˬdaˬ 24:11) Mehˬ˗eu gaˇ kawˆ˗eu laꞈ kʼoeˇ guiˬ lahˬ dawˬ heu tsaꞈ gaˬ nehˬ iˇ˗eu aˬ dui˗ahˇ doˇ˗eu meh. Aˬ jeˬ miˇ neh ehˇ naˇ tsawˇ haˬ deuˬ˗euˬ dehꞈ ziˇ gui lahˬ dawˬ heu ha geuꞈ gaˇ jaˆ luꞈ˗eu mi neh meh lehˇ ehˇ˗eu meh. (Gʼaˬkʼehˇ 20:26, 27) “Teu ngeh Yeˬhawˇbaˬ ngaˬ nehˬ˗ehˇ ngehˬ cawˬ gaˇ duˇ nya” lehˇ Daˬniˇ ehˇ˗eu meh. Kʼoeˇ naˇ mehˬ˗eu gʼaˬ aˬ dui Yeˬhawˇbaˬ˗euˬ gaˇ ngehˬ˗ehˇ mˇ naˇ laꞈ kʼaˬ cehˇ˗eu jeˬ kʼawꞈ ngehˬ˗ehˇ myaˬ dzehˬ laˇ˗eu meh lehˇ paˇ ehˇ˗eu meh. Daˬniˇ kʼawꞈ ni aˬ yawꞈ˗euˬ miˬ zaˬ Miˬleˇ huˬ mehˬ mehˬ˗eu gʼaˬ geuꞈ dahˬ beh iˇ ngeh laꞈ kʼaˬ yaw˗ehˇ cehˇ gaˇ mawˇ haw˗euˬ meh.

Mehˬ˗eu gaˇ kawˆ heu hmˬ naˇ Daˬniˇ˗euˬ nui ma˗ahˇ zaw leˇ˗awˇ dehꞈ poˆ yamˬ tsaˬ laˇ ngaˇ lehˇ siˬ leˇ ni caw ba nehˬ˗euˬ meh. kʼoeˇ gaˇ neh naˇ aˬ yawꞈ shiˬ shaˬ jiˇ gaˇ˗ahˇ gʼawˬ mya maˬ paˇ mˇ ni huˬ mehˬ mehˬ˗eu gʼaˬ geuꞈ iˇ˗awˇ tsaꞈ gaˬ˗eu tsawˇ haˬ loˬ˗eu jawˇ duˬ˗ahˇ jawˇ iˇ naˇ yaw byawˬ jeˬ nga lehˇ noeˬ laˇ˗euˬ meh.

Dahˬ beh ngeh shaˬ kʼawꞈ jeˬ nah laꞈ kʼaˬ cehˇ jeˬ jaˆ

2007 ngaˬ siˬ ba la˗ahˇ Daˬniˇ hawˇ Miˬleˇ gaˇ shaˇ doˆ˗awˇ aˬ yawꞈ nyaꞈ neh gʼa iˇ haw˗euˬ Paꞈnaˬmaˬ miˇ kʼahˬ˗ahˇ jawˇ iˇ˗euˬ meh. Aˬ yawꞈ maꞈ˗euˬ tsaꞈ gaˬ duˬ naˇ Paꞈnaˬmaˬ miˇ kʼahˬ˗euˬ kaˬleˇ biˬ˗yaˬ iˬ maˆ laˆ shaˆ˗ahˇ jaˆ˗eu boˬkaꞈdeˇtoˆlo lehˇ kuˇ˗eu iˇ jaw lahˇ deuˬ˗ahˇ meh. Teu gaˇ˗euˬ tsawˇ haˬ myaˬ ni Kaiˬmiˬ tsawˇ jeuˬ pyeuꞈ meh. Aˬ yawꞈ nyaꞈ neh poˆ taˬ˗euˬ pyuˇ heu neh Paꞈnaˬmaˬ miˇ kʼahˬ˗ahˇ ba la yehꞈ siˬ jaw nya ni toˆ taˬ˗euˬ meh.

Aˬ yawꞈ maꞈ iˇ jaw lahˇ doe ni lawˬ hawˇ˗eu liˇ yehˬ˗ahˇ zmˬ˗awˇ tsaꞈ gaˬ iˇ˗eu meh. Aˬ yawꞈ maꞈ noeˬ taˬ nya˗eu tsaꞈ gaˬ beh beh iˇ˗euˬ poˆ naˇ lahˇ dui dui˗awˇ 32 kiˬ loˬ miˬ teuˬ kaˬ˗eu jaw duˬ˗ahˇ gawˬ jawˬ gʼaˬ lawˬ doe liˇ yehˬ dziˬ˗awˇ iˇ˗euˬ kʼoeˇ meh. Daˬniˇ gʼaˬ doeˇ myaꞈ leˇ tsaˇ˗i doeˇ˗eu meh. Ehˇ kʼawꞈ Kaiꞈmiˬ tsawˇ haˬ deuˬ nui ma muiˬ dui dui˗awˇ aˬ yawꞈ maꞈ˗euˬ dawˬ paˇ dzaw ngeh jawˇ paˇ ha geuꞈ dzehˬ laˇ˗euˬ meh. Tiˬ kʼehˬ naˇ aˬ yawꞈ maꞈ Jaˇliꞈ dzaw zaˬ 23 gʼaˬ dzehˬ ni jawˇ laˇ˗euˬ meh.

Ehˇ kʼawꞈ tiˬ kʼehˬ naˇ aˬ yawꞈ nyaꞈ˗euˬ pyuˇ jiˇ˗euˬ meh. Aˬ joˆ˗ehˇ paˇ jahˇ˗euˬ nga? “Saˬpeꞈ miˇ kʼahˬ˗ahˇ ya gʼoꞈ iˇ˗eu noeˬ doˆ laˇ naˇ myaˆ bi doˆ le˗awˇ Jaˇliꞈ dzaw zaˬ deuˬ˗ahˇ ya byehˇ dzeh yaꞈ˗eu aˬ cawˬ˗ahˇ ya biꞈ yaꞈ˗eu gʼawˬ shaˇ shaˬ˗ehˇ gʼeh laˇ nya” lehˇ Daˬniˇ ehˇ˗eu meh. Ehˇ kʼawꞈ teu siˬ dzeuˇ iˇ ngeh yaw˗ehˇ muiˬ˗eu gaˇ kawˆ ya gaˬ˗euˬ meh. “Dzehˬ˗eu hu mehˬ mehˬ˗eu gʼaˬ bi geuꞈ˗eu lehˇ ka daˇ nehˬ laꞈ˗awˇ heu gaˇ paˇ ya jawˇ tawꞈ leꞈ˗eu miˇ neh laꞈ kʼaˬ cehˇ˗eu lehˇ miˇ˗a” lehˇ Miˬleˇ ehˇ˗eu meh.

Laꞈ kʼaˬ cehˇ dui dui

2015-ahˇ aˇ maꞈ aˇ muˇ laꞈ kʼoeˇ yaw mya jeˬ paˇ laˇ˗euˬ miˇ neh aˬ nyaꞈ dzeˇ zaˬ huˬ mehˬ mehˬ˗eu gʼaˬ maˬ paˇ ya geuꞈ˗euˬ meh. aˬ yawꞈ nyaꞈ aˬ joˆ˗ehˇ paˇ jahˇ˗eu nga? Aˬ yawꞈ nya Ja ceuˬ 37:5-ahˇ “Nawˬ˗euˬ dehꞈ jeˬ dehꞈ kawˆ dawˬ tawˆ Sahˬpaˬ Miˬyehˇ˗ahˇ a nehˬ˗awˬ. Aˬ yawꞈ˗ahˇ gʼoe˗awˇ dehꞈ gʼeh naˇ aˬ yawꞈ nawˬ˗ahˇ ngehˬ gʼeh tehꞈ˗a” lehˇ ehˇ taˬ˗euˬ saˇ jaˇ dawˬ˗ahˇ jah ziꞈ˗eu meh. Tiˬ kʼehˬ naˇ aˬ yawꞈ nyaꞈ gaˇ poˆ za˗awˇ aˬ myah luꞈ huˬ mehˬ mehˬ˗eu gʼaˬ paˇ geuꞈ nya laˇ˗euˬ meh. Nymˇ aˬ yawꞈ nyaꞈ Paꞈnaˬmaˬ miˇ kʼahˬ Gʼoeˬlaˇkaꞈ aˇ muˇ laꞈ kʼoeˇ gaˇ mˇ luꞈ meh.

“Nga nyaꞈ Saˬpeꞈ˗ahˇ neh oe ngeh yaw awˬ awˬ lehˇ dehꞈ nya ma lehˇ maˬ ehˇ duˬ kʼawꞈ nymˇ naˇ dehꞈ nya laˇ˗awˇ loˬ˗eu yawˬ jeˬ na luꞈ jaˆ kuꞈ jiˇ gaˇ duˇ miˇ˗a” lehˇ Daˬniˇ ehˇ˗eu meh. Kʼoeˇ naˇ aˬ yawꞈ nyaꞈ˗ahˇ laꞈ kʼaˬ bi cehˇ dui dui˗euˬ aˬ jeˬ nga? “Taˬ aw˗eu deuˬ˗ahˇ Yeˬhawˇbaˬ˗ahˇ siˬ nya laˇ ni ya caw ba nehˬ˗eu heu naˇ nga nyaꞈ˗ahˇ laꞈ kʼaˬ cehˇ dui dui˗eu jeˬ pyeuꞈ miˇ˗a” lehˇ aˬ yawꞈ nyaꞈ ehˇ˗eu meh.