Ka li zaˬ neh nahˬ yu ni mˇ nehˬ˗euˬ tiˬ jeˬ

1950 kʼoꞈ jiˇ leˇ ngeh Iˇdiˬ˗yaˬ miˇ kʼahˬ Guˇlaꞈ meuˬ˗euˬ pu pu zaˬ tiˬ pu˗ahˇ Jawˬ˗euˬ aˬ da iˇ cuꞈ shawˇ˗awˇ Yeˬhawˇbaˬ˗euˬ Saˇ kiˇ pyeuꞈ laˇ˗euˬ meh. Ehˇ kʼawꞈ Jawˬ˗euˬ aˬ ma hawˇ˗eu aˬ yawꞈ˗euˬ mehˇ nmˇ 5 gʼaˬ naˇ Koꞈ dawˬ zaˬ lahˇ pyeuꞈ˗awˇ zahˇ ziꞈ dah ni tawˬ˗eu miˇ neh aˬ yawꞈ˗euˬ aˬ da neh jah˗eu jeˬ˗ahˇ laˆ tsoeˬ˗eu meh.

Tiˬ nah keuˆ laˇ ngeh Jawˬ˗euˬ aˬ da aˇ muˇ˗ahˇ jawˇ˗eu mehˇ nmˇ tiˬ gʼaˬ˗ahˇ sahˬ boꞈ tiˬ poˆ bi ha iˇ nehˬ laꞈ lehˇ Jawˬ˗ahˇ shaˇ˗euˬ meh. Ehˇ kʼawꞈ uˬ shawˬ paw Jawˬ iˇ cuꞈ bawˬ keuˆ pah ngeh laꞈ noeˇ˗ahˇ zawˇ˗ehˇ laˆ naˇ˗euˬ meh. Teu loꞈ˗ehˇ gʼeh kʼawꞈ aˬ yawꞈ aˬ da˗euˬ ehˇ dawˬ naˇ haˬ mawꞈ˗eu miˇ neh shiˬ yoeˇ luꞈ˗eu laꞈ noeˇ˗ahˇ saˬ paˇ paꞈ tawꞈ˗awˇ sahˬ boꞈ biꞈ ha iˇ˗euˬ meh.

Jawˬ aˬ yawꞈ da˗euˬ cawˬ pehˬ kahˇ iˇ keuˆ ngeh aˬ yawꞈ˗euˬ aˬ da˗euˬ cawˬ maˬ jawˇ˗a miˬ zaˬ gʼaˬ tehꞈ˗ehˇ jawˇ˗eu meh. Teu gʼaˬ kʼawꞈ ni Yeˬhawˇbaˬ˗euˬ Saˇ kiˇ tiˬ gʼaˬ pyeuꞈ meh. Aˇ yuiꞈ heu gʼaˬ Jawˬ laꞈ noeˇ naˇ luꞈ gaˇ ya mawˇ˗awˇ caw ba nehˬ˗euˬ meh. Aˬ yawꞈ jaˆ gʼaˬ yuˇ laꞈ˗awˇ maˇ naˇ˗ahˇ tsiˬ shawˇ nehˬ˗awˇ saˬ paˇ neh paꞈ tawꞈ nehˬ˗eu meh. Kʼoeˇ naˇ lawˇ bawˬ caꞈ nehˬ˗awˇ Jawˬ kʼaˇ jawˇ˗euˬ kʼoeˇ keuˆ ni Jaˇliꞈ˗euˬ gaˇ kawˆ yaw gʼoeˇ gʼoeˇ lehˇ ja nehˬ˗euˬ meh.

Aˇ yuiꞈ heu gʼaˬ nahˬ yu ni gʼeh˗eu miˇ neh Jawˬ neh Yeˬhawˇbaˬ˗euˬ Saˇ kiˇ deuˬ˗ahˇ noeˬ taˬ˗euˬ jeˬ paˇ iˇ˗euˬ meh. Teu miˇ neh Koꞈ dawˬ zaˬ lahˇ deuˬ jah˗eu jeˬ nehˬ˗ehˇ beu gaˇ˗eu Yeˬhawˇbaˬ˗euˬ Saˇ kiˇ deuˬ jah˗eu jeˬ nyiˬ kawˆ naˇ haˬ˗euˬ meh. Aˬ yawꞈ Yeˬsuˇ Miˬyehˇ pyeuꞈ meh laˬ? Maˬliˇ˗ahˇ uˬ duˬ ya tahˬ meh laˬ? lehˇ naˇ haˬ˗euˬ meh. Aˇ yuiꞈ gʼaˬ Jawˬ˗ahˇ Jaˇliꞈ neh dawˬ kʼoꞈ biꞈ˗awˇ “Miˬyehˇ Miˇkʼahˬ˗euˬ guiˬ lahˬ dawˬ” lehˇ kuˇ˗eu paˇ dmˬ biꞈ nehˬ˗euˬ meh.

Jawˬ paˇ dmˬ heu˗ahˇ ya gui ngeh maˇ maˇ ni gʼeh˗eu jeˬ pyeuꞈ nya lehˇ siˬ leˇ˗euˬ miˇ neh aˬ da koꞈ dawˬ jawˇ gaˇ iˇ˗awˇ gaˇ kawˆ nyiˬ kawˆ naˇ haˬ iˇ˗eu meh. Koꞈ dawˬ nui ma pehˇ dui dui˗awˇ aˬ yawꞈ˗ahˇ Jaˇliꞈ neh biˬ˗euˬ uˬ taꞈ “Nawˇ˗aˬ Saˬdaˬ nga! Yeˬsuˇ Miˬyehˇ maˬ pyeuꞈ˗eu lehˇ Jaˇliꞈ aˬ geu deuˆ ehˇ nga lehˇ bi haw laꞈ sheˇ Maˬliˇ˗ahˇ uˬ duˬ taˬ tahˬ lehˇ aˬ geu gaˇ ehˇ taˬ nga lehˇ bi haw sheˇ” lehˇ guˇ˗eu meh. Aˬ da koꞈ dawˬ teu loꞈ˗ehˇ jahˇ gaˇ Jawˬ tsawˬ guˆ iˇ˗awˇ nyaˆ taꞈ naˇ Koꞈ dawˬ˗euˬ Uˬ duˬ tahˬ nymˇ˗ahˇ maˬ paˇ laˇ ma lehˇ ehˇ nehˬ˗euˬ meh. Kʼoeˇ gaˇ neh naˇ maˬ paˇ iˇ tsehˆ˗euˬ meh.

Jawˬ Yeˬhawˇbaˬ˗euˬ Saˇ kiˇ deuˬ nehˬ˗ehˇ Jaˇliꞈ dzaw laˇ˗awˇ yaw tsaˬ yaw dawˇ˗ahˇ ha geuꞈ˗awˇ Yeˬhawˇbaˬ˗euˬ gaˇ mˇ laˇ˗euˬ meh. Teu ngeh nymˇ jiˇ laꞈ kʼoeˇ jawˇ˗eu deuˬ kʼawꞈ teu loꞈ˗ehˇ jahˇ˗euˬ meh. 60 kʼoꞈ byah laˇ ngeh Jawˬ˗euˬ aˬ laꞈ˗ahˇ jaˆ˗eu maˇ byawꞈ aˬ yawꞈ Yeˬhawˇbaˬ˗ahˇ a nehˬ˗awˇ aˬ yawꞈ˗euˬ gaˇ mˇ laˇ ni laˆ noeˬ nehˬ˗euˬ Ka li zaˬ˗euˬ nahˬ yu ni gʼeh˗eu jeˬ˗ahˇ noeˬ luꞈ˗a siˬ.—2 Gawˇliˬtu 6:4, 6.