Apotruwo Dɔwawawo
21 Egbɔnnu nɔ mì gbɔxwe mìso le wo gbɔ yí ɖo tɔjihun yí zɔn trelele yí vayi Kosu. Yi ŋkegbuɔ, mìyi Rodi yí so le enɔ yí vayi Patara. 2 Ci mìkpɔ tɔjihun ɖeka ci yí yikɔ Fenisi ɔ, mìɖo mɛ yí so ɖedo. 3 Ci mìvaɖo fiɖeka yí kpɔkpɔ Shipru tɔdomɛnyigban le emiɔ mɛ ɖaaɔ, mìze to nu yí yi Siri yí vaci te do Tiru, fini tɔjihun lɔ aɖe agban do. 4 Mìji enukplaviwo kpɔ yí kpɔ wo. Mìwa ŋkeke amadrɛ le enɔ. Vɔ gbɔngbɔn kɔkɔɛ lɔ na yí nɔvi lɔwo nu nɔ Pɔlu zenɛniɖe mɔ, yɛŋgbetɔ afɔ Ʒerusalɛmu o. 5 Eyi ci mìnɔ hunnɔ ɖegbɔɔ, mìso ɖedo. Vɔ wo pleŋ, nyɔnuwo koɖo ɖeviwo can kplɔ mì do keke vayi eju lɔ godu. Mìje klo ji do axu lɔ tu yí do gbe ɖaɖa. 6 Eyi mìklan mìwonɔnɔwo. Yi goduɔ, mìɖo tɔjihun mɛ yí wowo trɔ kpe axwe.
7 Mìsɔ tɔjihun so Tiru yí vaɖo Tolemayi. Mìdo gbe nɔ nɔviwo le enɔ yí wa ŋkeke ɖeka le wo gbɔ. 8 Yi ŋkegbuɔ, mìso yí vayi Sezare. Mìyi eŋɛnywidratɔ Filipu xomɛ. Ényi ɖeka le ŋsu amadrɛ lɔwo mɛ.* Mìze gbɔ. 9 Ŋsu cɛ ɖo evi nyɔnuvi lealɔji* amɛnɛ ciwo yí nyi enyɔnuɖɛtɔwo. 10 Vɔ mìwa ŋkeke sugbɔ le enɔ yí enyɔnuɖɛtɔ ɖeka ci yí tɔ mɔ Agabu so Ʒude yí va. 11 Éva mì gbɔ yí sɔ Pɔlu kpablanu bla afɔwo koɖo alɔ̀wo nɔ yiɖeki yí nu mɔ: “Enyɔ ci gbɔngbɔn kɔkɔɛ lɔ nu ke, ‘Ahan yí Ʒuifuwo abla ŋsu ci tɔ yí kpablanu cɛ nyi le Ʒerusalɛmu ke yí asɔ do alɔ̀ mɛ nɔ jukɔn bu mɛ tɔwo.’” 12 Ci mìse ahan ɔ, mìwo koɖo mɛ ciwo yí le enɔtɔxu tɔ kuku ɖeɖe nɔ Pɔlu mɔ yɛŋgbeyi Ʒerusalɛmu o. 13 Eyi Pɔlu nu do nu mɔ: “Nyi yí taɖo míle avin fankɔ yí teteɛkpɔ mɔ yewoadahɛn ŋci ŋɖo mɔ nawa mɛɔ?* Míŋgbevɔn o, ŋle gbesɔsɔ mɔ wo le blaŋ yí agbewuŋ le Ʒerusalɛmu do Axwetɔ Yesu ŋkɔ tamɛ.” 14 Ci mìkpɔ mɔ mìdatɛnŋ atrɔ yi susuɔ, mìtashi nyɔ lɔ* yí nu mɔ: “Yehowa* dro le nyi wawa.”
15 Le azan ŋtɔ́wo goduɔ, mìdra do nɔ emɔzɔnzɔn lɔ yí sɔ emɔ kpe Ʒerusalɛmu. 16 Enukplavi ɖewo can so Sezare yí yi koɖo mì. Wokplɔ mì yi Munasɔn ci yí so Shipru xomɛ, fini mìaze. Ŋsu cɛ nyi ɖeka le enukplavi ŋkɔtɔ lɔwo mɛ. 17 Ci mìvaɖo Ʒerusalɛmu ɔ, nɔvi lɔwo xɔ mì koɖo jijɔ. 18 Vɔ yi ŋkegbuɔ, Pɔlu yi Ʒaki gbɔ koɖo mì. Hamɛmɛshinshin lɔwo pleŋ le enɔ. 19 Eyi Pɔlu do gbe nɔ wo yí tɔ enu ciwo Mawu wa le jukɔnwo mɛ to yi kunuɖeɖedɔ lɔ ji nyɔ nunu nɔ wo hlɛnhlɛnhlɛn.
20 Ci wose enyɔ cɛ ɖegbɔɔ, wotɔ Mawu kanfukanfu. Vɔ wonu ni mɔ: “Nɔvi, èkpɔa? Amɛ kotokun nɛniɖe vatrɔ xɔsetɔwo le Ʒuifuwo mɛ yí wo pleŋ le gbeji nɔ Ese lɔ. 21 Vɔ wose yí enyɔwo ɖyikɔ so eo nu mɔ, èle enu kplakɔ Ʒuifu ciwo pleŋ yí le jukɔnwo mɛ mɔ wo le gbe wawa do Moizi Se lɔ ji yí nukɔ nɔ wo mɔ, woŋgbeso vo nɔ wowo viwo alo awa do kɔnu lɔwo ji o. 22 Ecɛyɛ ɖe, lé mìawɛ doɔ? Kokokoɔ, woavase mɔ èva. 23 Eyi taɖo, wà ŋcɛ ci mìanu nɔ eo. Ŋsu amɛnɛ ɖekawo le mì mɛ yí ɖo egbe nɔ Mawu. 24 Kplɔ̀ ŋsu lɔwo nɔ míayi klɔ míwoɖekiwo sɔgbe koɖo kɔnu lɔ yí nàcu eho ciwo woazan keŋ nɔ woaxlɔ ta nɔ wo. Eyi mɛshiamɛ anya mɔ, enyɔ ciwo wose so eo nu ɖekpokpui denyi nyɔnɔnwi o, vɔ wana aotɔwo nyɔ yí ègbewanɔ do Ese lɔ ji. 25 Mìŋwlɛ gbeta ci mìsɔ do wema ji ɖaɖa xɔsetɔ ciwo yí so jukɔn buwo mɛ mɔ, woɖo agbe enu ciwo wosɔ sa vɔn nɔ vojuwo, ehun, elan ci wobɔ hlo nɔ* koɖo mateliwawa.”*
26 Yi ŋkegbuɔ, Pɔlu kplɔ ŋsu lɔwo yí wobɔ vayi klɔ wowoɖekiwo sɔgbe koɖo kɔnu lɔ. Éyi gbedoxɔ lɔ mɛ keŋ anu hwenu amɛklɔklɔkɔnu lɔ avɔ yí woasa vɔn do ta nɔ mɛɖekaɖeka.
27 Ci ekpɔtɔ hwɛɖeka yí ŋkeke amadrɛ lɔwo avɔɔ, Ʒuifu ciwo yí so Azi kpɔ Pɔlu le gbedoxɔ lɔ mɛ. Eyi wona yí eʒin tɔn le amɛahwa lɔ pleŋ mɛ yí woli. 28 Wole axwa dokɔ mɔ: “Izraɛliviwo, míva do alɔ̀ mì! Ŋsu cɛ yí kplakpla nu mɛshiamɛ le fishiafi mɔ wo le gbali mìwo ju lɔ, mìwo Se lɔ koɖo texwe cɛ. Gbesɔ kpe niɔ, ékplɔ Grɛkitɔwo va gbedoxɔ lɔ mɛ ŋtɔkpu yí xo ɖyi texwe kɔkɔɛ cɛ.” 29 Ðo vayiɔ, wokpɔ Pɔlu koɖo Trofimu ci yí nyi Efezitɔ le eju lɔ mɛ yí wobui mɔ yɛkplɔɛ yi gbedoxɔ lɔ mɛ. 30 Eʒin tɔn le eju lɔ pleŋ mɛ yí amɛwo lɔ ju yí yi le Pɔlu yí duin ti le gbedoxɔ lɔ mɛ yí wocu ehɔn lɔwo zeɖeka. 31 Hwenu wojikɔ mɔ yewoawuiɔ, ahwaga lɔ se mɔ eʒin tɔn le Ʒerusalɛmu ju lɔ pleŋ mɛ. 32 Eyi ekplɔ sɔjawo koɖo sɔjawo gawo yí wolɔ ju yi wo gbɔ le afɔdumɛ. Ci wokpɔ ahwaga lɔ koɖo sɔjawoɔ, womi Pɔlu xoxo.
33 Eyi ahwaga lɔ gbosɔ wo yí lé Pɔlu yí ɖe gbe mɔ wo le sɔ awlɛga amɛve asɔ blɛ. Yi goduɔ, ébiɔ se mɔ, mi yɛnyi ma yí nyi ewa ma. 34 Vɔ mɛɖewo tɔ axwa dodo le amɛahwa lɔ mɛ mɔ, ahan yɔ ke. Eyi mɛbuwo nunuɔ mɔ oo ecɛ yɔ ke. Ci eʒintɔntɔn lɔ na yí desun ji yí se nyɔ ɖe teŋ ɔ, éɖe gbe mɔ wo le kplɔ Pɔlu yi fini sɔjawo nɔnɔ. 35 Vɔ ci Pɔlu ɖo afɔɖokpui ciwo ji wodenɔ gbɔxwe ayi fini sɔja lɔwo nɔnɔ jiɔ, sɔja lɔwo kɔkɔɛ, ɖo amɛahwa lɔ le adan ji. 36 Mɛ lɔwo kplɔɛ do yí dodoɔ axwa mɔ: “Míwui!”
37 Ci wojikɔ akplɔ Pɔlu ɖo sɔjawo tɔxu lɔɔ, ébiɔ ahwaga lɔ se mɔ: “Natɛnŋ axo nuxu nɔ eo drua?” Eyi ahwaga lɔ mɔ: “Èdonɔ Grɛkigbea? 38 Anyi de eo yí nyi Eʒiptitɔ ci yí na eʒin tɔn le amɛwo mɛ hweɖekanu vayi yí kplɔ amɛwutɔ 4 000 yi zogbeji nɛŋ?” 39 Eyi Pɔlu nu mɔ: “Le nyɔnɔnwi mɛɔ, Ʒuifu yí ŋnyi yí so Tarsi le Silisi, eju ci amɛwo jeshi ɖɛ nywiɖe. Eyi taɖo, ŋɖe kuku nɔ eo, nà gbeŋ nɔ maxo nuxu nɔ mɛ lɔwo.” 40 Éna gbe Pɔlu. Eyi Pɔlu yi nɔ te le afɔɖokpui lɔwo ji yí wa alɔ̀ nɔ mɛ lɔwo. Ci eɖa ɖo tototo ɖegbɔɔ, éxo nuxu nɔ wo le Ebregbe mɛ yí mɔ: