Wema ci Woŋwlɛ aɖa Rɔmatɔwo

8 Eyi taɖo, wodado hwɛ ɖekpokpui mɛ ciwo yí le ɖekɛ koɖo Kristo Yesu o. 2 Ðo ese gbɔngbɔn lɔ tɔ ci yí nanɔ agbe Kristo Yesu dokplɔtɔwo na vovo eo yí nuvɔn se koɖo eku degbeɖo acɛ ɖe do eo ji o. 3 Enu ci Ese lɔ detɛnŋ yí wa ci gbaza na yí egbɔjɔɔ, Mawu yɛwɛ ci edɔ Eviɛ ŋtɔ ɖaɖa le nuvɔn gbaza mɛ hanci keŋ nɔ aɖe nuvɔn swi. Eyi taɖo Mawu do hwɛ nuvɔn ci yí le gbaza mɛ. 4 Eyi dɔ mìdalɔn yí mìwo gbaza nuvɔnmɛ lɔwo akplɔnɔ mì o, vɔ mìalɔn yí Mawu gbɔngbɔn akplɔnɔ mì keŋ nɔ mìatɛnŋ awanɔ enujɔjɔɛ ciwo yí Ese lɔ mɔ wo le wa. 5 Ðo mɛ ciwo yí nɔkɔ agbe sɔgbe koɖo gbaza lɔ sɔ wowo susuwo ɖonɔ gbaza mɛ nuwo ji. Vɔ mɛ ciwo yí nɔkɔ agbe sɔgbe koɖo gbɔngbɔn lɔ sɔ wowo susuwo ɖonɔ gbɔngbɔn mɛ nuwo ji. 6 Susu sɔsɔ ɖo gbaza lɔ ji hɛnnɔ eku vɛ. Vɔ susu sɔsɔ ɖo gbɔngbɔn lɔ ji nanɔ agbe koɖo fafa. 7 Susu sɔsɔ ɖo gbaza lɔ ji na wonyinɔ ketɔnɔ nɔ Mawu, ɖo nuvɔn gbaza lɔ dewanɔ do Mawu se ji o yí le nyɔnɔnwi mɛɔ, datɛnŋ awɛ hɛnnɛ o. 8 Eyi taɖo mɛ ciwo yí le agbe nɔkɔ nɔ gbaza lɔɔ, wowo nu datɛnŋ akpe nɔ Mawu o.

9 Nɔ Mawu gbɔngbɔn le mí mɛ nyɔnɔnwitɔɔ, míanɔ agbe nɔ gbɔngbɔn lɔ, vɔ mídanɔ agbe nɔ gbaza lɔ o. Vɔ nɔ Kristo gbɔngbɔn lɔ dele mɛɖe mɛɔ, anyi mɛ lɔ denyi yitɔ o. 10 Nɔ míle ɖekɛ koɖo Kristo ɔ, gbɔngbɔn lɔ ana yí míanɔ agbe do enujɔjɔɛwawa ŋci, ci nuvɔn na yí lankpu lɔ nyi enukuku can. 11 Ecɛyɛ nɔ mɛ ci yí fɔn Yesu so ku gbɔngbɔn le mí mɛɔ, eyɛ ci yí fɔn Kristo Yesu so amɛkukuwo mɛ ana yí míwo lankpu ciwo yí avaku anɔ agbe hɛnnɛ to yi gbɔngbɔn ci yí le mí mɛ ji.

12 Eyi taɖo nɔviwo, éle dandan mɛ mɔ mìɖo awa ŋɖe, vɔ denyi gbaza lɔ koɖo yi drowo yí mìɖo anɔ agbe nɔ o. 13 Ðo nɔ mínɔkɔ agbe nɔ gbaza lɔɔ, míaku dandandan. Vɔ nɔ míwu enudɔndɔn ciwo yí lankpu lɔ wanɔ to gbɔngbɔn lɔ jiɔ, míanɔ agbe. 14 Mɛ ciwo pleŋ yí Mawu gbɔngbɔn lɔ kplɔnɔ yí nyi Mawu viwo nyao. 15 Ðo denyi gbɔngbɔn ci yí asɔ mí wa hwashi yí ana míagbevɔn yí míxɔ o, vɔ gbɔngbɔn ci yí na Mawu sɔ mí wa yi viwo yí míxɔ. Gbɔngbɔn cɛ na yí mìdonɔ axwa mɔ: “Abba,* Eda!” 16 Mawu gbɔngbɔn lɔ na yí mìkannɔdo ji* mɔ mìnyi Mawu viwo. 17 Nɔ mìnyi Mawu viwoɔ, mìɖo axɔ cinɔ hɛnnɛ, ɛɛ, cinɔ ci Mawu ana. Mìaxɔ cinɔ koɖo Kristo. Nɔ mìkpe fun koɖiɔ, mìaxɔ kanfukanfu koɖi hɛnnɛ.

18 Ŋkpɔɛ mɔ, efun ciwo mìakpe le kakacɛ mɛ denyi ŋɖe nɔ wosɔ wo sɔ koɖo kanfukanfu ci mìavaxɔ o. 19 Ðo enu ciwo pleŋ Mawu wa le te yí kpɔkɔ emɔ veviɖe nɔ hwecinu yí woadasɛ Mawu viwo. 20 Wosɔ enu ciwo pleŋ Mawu wa sɔ trɔ enugbali, denyi wowoŋtɔwo dro mɛ enyi ahan le o, vɔ mɛ ci yí sɔ wo ɖo ahan dro mɛ enyi ahan le keŋ nɔ emɔkpɔkpɔ ali. 21 Emɔkpɔkpɔ lɔ yí nyi mɔ, woahwlɛn enu ciwo pleŋ Mawu wa hɛnnɛ ti le hwashi ci wonyi nɔ lankpu ci yí danahɛn mɛ yí woana vovo gangan Mawu viwo tɔ lɔ wo. 22 Ðo mìnya mɔ enu ciwo pleŋ Mawu wa le edɔ̀ nyɛkɔ yí le vevi sekɔ doju keke vaɖo evyɛ. 23 Denyi ŋtɔ́ ɖekɛ yɔ o, vɔ mìwoŋtɔwo ciwo yí xɔ ekusɛnsɛn ŋkɔtɔ ci yí nyi gbɔngbɔn kɔkɔɛ lɔ can le mɛ. Ɛɛ, mìwoŋtɔwo can nyɛnyɛ dɔ̀ le mìwoɖekiwo mɛ ci mìkpɔkɔ mɔ veviɖe mɔ woaxɔ mì shigbe eviɛwo nɛ yí ahwlɛn mì gan le mìwo lankpuwo mɛ to tafɛn lɔ ji. 24 Nɔ wohwlɛn mì gan ɔ, anyi mìkpɔ enu ci mìɖoɖoɔ ŋkuvi. Vɔ nɔ enu ci wokpɔkɔ mɔ nɔ vaɔ, wodagbekpɔ emɔ ni ke o; alo enu ci wokpɔkɔ vɔ ɖe, wogbekpɔnɔ emɔ nia? 25 Vɔ nɔ mìnɔkɔ te kpɔ enu ci mìdekpɔkpɔɔ, mìsɔ ejidodo nɔnɔ te kpɔɛ veviɖe.

26 Gbɔngbɔn kɔkɔɛ lɔ can kpenɔdo mì nu nɔ mìgbɔjɔ. Mìnyanɔ mɔ mìado gbe ɖaɖa, vɔ mìdenyanɔ enu ci mìado gbe ɖaɖa abiɔ teŋ o. Gbɔngbɔn lɔ ŋtɔ ɖenɔ kuku do nu nɔ mì nɔ mìseseɛ gbazavi yí mìdenya enyɔ ciwo koŋ mìanu o. 27 Vɔ mɛ ci yí glonɔ ejiwo mɛ kpɔ nyanɔ enyɔ ci yí gbɔngbɔn lɔ nukɔ, ɖo gbɔngbɔn lɔ ŋtɔ ɖenɔ kuku do nu nɔ amɛkɔkɔɛwo sɔgbe koɖo enu ci Mawu jijiɛ.

28 Mìnya mɔ Mawu wɛ yí yi nuwawawo pleŋ wanɔ dɔ doju alɔlealɔmɛ keŋ nɔ anyi nyɔna nɔ mɛ ciwo yí luin, mɛ ciwo eyɔ sɔgbe koɖo enu ci eji mɔ yeawa. 29 Ðo ésɔ susu ɖo mɛ cɛwo ji doŋkɔ yí sɔ gbeta ɖɛ hɛnnɛ mɔ, woavale shigbe Eviɛ ŋtɔ nɛ.* Eyi to ecɛ jiɔ, Eviɛ lɔ anyi Evi ŋkɔtɔ le nɔvi sugbɔ mɛ. 30 Gbesɔ kpe niɔ, mɛ ciwo nu esɔ gbeta so ɖɛ lɔwo yí nyi mɛ ciwo eyɔ hɛnnɛ yí mɛ ciwo eyɔ lɔwo ke yí nyi mɛ ciwo woyɔ mɔ amɛjɔjɔɛwo. Le vɔvɔnuɔ, mɛ ciwo woyɔ mɔ amɛjɔjɔɛ lɔwo ke yí wokanfu hɛnnɛ.

31 Ecɛyɛ ɖe, enyɔ ci mìanu so ŋcɛwo nuɔ? Nɔ Mawu le mì ji ɖe, mi yí atɛnŋ aɖu mì jiɔ? 32 Ŋci keke Mawu deglɔn ta nɔ Eviɛ ŋtɔ o, vɔ yí sɔ na yí eku do tamɛ nɔ mì pleŋ ɖe, dásɔ enu kpɛtɛwo pleŋ na mì xomɛvutɔ bɔdo nu ba? 33 Mi yí atɛnŋ ado hwɛ Mawu mɛcancanwoɔ? Mawu yí nyi mɛ ci yí yɔ wo mɔ amɛjɔjɔɛwo. 34 Mi yí atɛnŋ ado hwɛ woɔ? Mɛɖe deli o. Kristo Yesu yí nyi mɛ ci yí ku do ta nɔ wo yí eyi nyi mɛ ci wofɔn so amɛkukuwo mɛ. Ecɛyɛɔ, éle ɖushi mɛ nɔ Mawu yí ɖeɖeɛ kuku do nu nɔ mì.

35 Nyi yí atɛnŋ aklan mì so Kristo lɔnlɔn lɔ gbɔɔ? Efunkpekpe alo vevisese alo yumɛcici alo shive alo mamanɔnɔ alo afɔku alo ewi yɔa? 36 Enuŋwlɛŋwlɛ lɔwo nu mɔ: “Eo ŋci yí wowukɔ mì le ŋkekeɛ pleŋ mɛ; wokpɔ mì do lɛngbɔ ci wokplɔ yikɔ wuwugbe ji.” 37 Vɔ mɛ ci yí lɔn mì kpedo mì nu yí mìle eji ɖukɔ keŋkeŋ le enu cɛwo pleŋ mɛ. 38 Ðo ŋkando ji mɔ eku alo agbe, mawudɔlawo alo acɛkpakpawo alo enu ciwo yí li yɛ, alo ciwo yí gbɔgbɔ alo ŋsɛnwo 39 alo enu ci yí yi eji alo ci yí cito alo enuwawa bu ɖekpokpui datɛnŋ aklan mì so Mawu lɔnlɔn ci yí le Kristo Yesu mìwo Xwetɔ mɛ nu o.