Wema Ŋkɔtɔ ci Woŋwlɛ Ðaɖa Korɛntitɔwo

15 Ecɛyɛɔ, nɔviwo, enu ci ŋjikɔ aɖo ŋwi nɔ mí yí nyi, eŋɛnywi ci ŋdra nɔ mí yí míxɔɛ yí gbekando ji. 2 Nɔ míku do eŋɛnywi ci ŋdra nɔ mí nu gogwiɖeɔ, woahwlɛn mí gan; nɔ denyi ahan ɔ, anyi mítrɔ xɔsetɔwo do gbali mɛ.

3 Ðo enu ŋkɔtɔ ciwo ŋsɔ do ashi nɔ mí ɖeka yí nyi enu ci wokpla nyɛ can mɔ, sɔgbe koɖo Enuŋwlɛŋwlɛ lɔwoɔ, Kristo ku do ta nɔ mìwo nuvɔnwo. 4 Eyi woɖyi, ɛɛ, wofuin do agbe le ŋkeke amɛtɔntɔ lɔ gbe shigbe lé Enuŋwlɛŋwlɛ lɔwo nui nɛ. 5 Eyi edasɛ yiɖeki nɔ Sefasi.* Yi goduɔ, édasɛ yiɖeki nɔ Amɛ Wive lɔwo. 6 Égbevadasɛ yiɖeki nɔ nɔvi ciwo yí wu 500 doju, wowo sugbɔtɔ kpɔtɔ le mì mɛ yɛ, vɔ mɛɖewo ku. 7 Yɛ goduɔ, édasɛ yiɖeki nɔ Ʒaki yí vadasɛ yiɖeki nɔ apotru lɔwo pleŋ. 8 Vɔ le enu cɛwo pleŋ goduɔ, évadasɛ yiɖeki nɔ nyɛ can shigbe evi ci azan desun nɔ gbɔxwe woji nɛ.

9 Ðo enyɛ yí nyi hwɛhwɛtɔ le apotru lɔwo mɛ, ŋdenyi nu woayɔ mɔ apotru o, ɖo ŋci yumɛ nɔ Mawu hamɛ lɔ. 10 Vɔ Mawu wa xomɛvu gangan nɔŋ yí ŋvanyi ŋci ŋnyi gbɛ. Eyi xomɛvu gangan ci ewa nɔŋ denyi enugbali o, ɖo ŋwa dɔ wu wo pleŋ. Gan denyi nyɛŋtɔ yí wakɔ ŋɖe o, xomɛvu gangan Mawu tɔ ci yí le koɖoŋ yí wɛkɔ. 11 Nɔ egbenyi enyɛ alo apotru kpɛtɛwo yɔ can ɔ, ahan yí mìdradra enyɔ lɔ nɛ yí ahan ji yí míxɔɛ se do nɛ.

12 Ecɛyɛ nɔ wodrakɔ Mawu nyɔ lɔ mɔ, Kristo fɔn so amɛkukuwo mɛ ɖe, lé ewɛ yí mɛɖewo nunuɔ le mí mɛ mɔ fɔnfɔnsoku deliɔ? 13 Nɔ fɔnfɔnsoku deli nyaoɔ, anyi wodefɔn Kristo can so ku o. 14 Vɔ nɔ wodefɔn Kristo so kuɔ, anyi Mawu nyɔ ci mìnunuɔ nyi enugbali yí míwo xɔse can nyi enugbali. 15 Gbesɔ kpe niɔ, woakpɔ mì mɔ mìnyi Mawu kunuɖetɔ ŋsukantɔwo hɛnnɛ, ɖo mìɖekɔ kunu so nu mɔ yɛfɔn Kristo so ku. Vɔ nɔ fɔnfɔnsoku deli nyaoɔ, anyi defuin so ku o. 16 Nɔ wodafɔn amɛkukuwoɔ, anyi wodefɔn Kristo so ku hɛnnɛ o. 17 Gbesɔ kpe niɔ, nɔ wodefɔn Kristo so kuɔ, anyi míwo xɔse nyi enugbali yí míaci míwo nuvɔnwo mɛ. 18 Eyi mɛ ciwo yí ku le Kristo mɛ can ku yí dɔn. 19 Nɔ enyi agbe cɛ ɖekɛ yí mìɖoɖoɔ ŋkuvi le Kristo mɛɔ, anyi mìwo nu sadɔnu wu mɛshiamɛ tɔ.

20 Vɔ ecɛyɛɔ, wofɔn Kristo so ku yí enyi ekusɛnsɛn ŋkɔtɔ nɔ mɛ ciwo yí dɔn alɔn le eku mɛ. 21 Ðo shigbe lé eku to amɛ kuɖeka ji yí va nɛɔ, ahanke fɔnfɔnsoku can to amɛ kuɖeka ji yí va nɛ. 22 Shigbe lé mɛshiamɛ kukuɔ le Adamu mɛ nɛɔ, ahanke woafɔn mɛshiamɛ le Kristo mɛ hɛnnɛ nɛ. 23 Vɔ woafɔn mɛɖekamɛɖeka do toto cɛ nu: Kristo yí nyi amɛ ŋkɔtɔ,* eyi mɛ ciwo yí nyi Kristo tɔ avakplɔɛ do le yi vava hwenu. 24 Yi goduɔ, vɔvɔnu lɔ ava hwenu asɔ Fyɔɖuxu lɔ do alɔ̀ mɛ nɔ Mawu ci yí nyi Dalɔ, nɔ éɖe acɛkpakpawo pleŋ, egaɖuɖuwo pleŋ koɖo ŋsɛnwo pleŋ swi ɖegbɔ. 25 Ðo ele mɔ áɖu fyɔ keke ana nɔ hwenu Mawu asɔ ketɔnɔwo pleŋ ɖo yi fɔwo gɔnmɛ. 26 Eyi ketɔnɔ godugodutɔ ci woagu swi yí nyi eku. 27 Ðo Mawu “sɔ enuwo pleŋ ɖo yi fɔwo gɔnmɛ.” Vɔ ci womɔ wosɔ ‘enuwo pleŋ ɖo gɔnmɛ niɔ,’ édasɛ gbajɛɛ mɔ mɛ ci yí sɔ enu lɔwo pleŋ ɖo gɔnmɛ ni ŋtɔ dele mɛ o. 28 Vɔ hwenu woasɔ enuwo pleŋ do gɔnmɛ nɔ Evi lɔɔ, Evi lɔ ŋtɔ can avasɔ yiɖeki do gɔnmɛ nɔ mɛ ci yí sɔ enuwo pleŋ do gɔnmɛ ni keŋ nɔ Mawu anyi enushianu nɔ amɛshiamɛ.

29 Nɔ denyi ahan ɖe, lé mɛ ciwo yí wakɔ ʒinʒindoshimɛ ci yí akplɔ wo yi eku awɛɔ? Nɔ wodafɔn amɛkukuwo so ku nyao ɖe, nyi yí taɖo woagbewa ʒinʒindoshimɛ ŋtɔ́ɔ? 30 Nyi yí taɖo mìsɔ mìwoɖekiwo donɔ afɔku mɛ hweɖekpokpuinu* hɛnnɛɔ? 31 Eku glinɔŋ do gbeɖeka duu. Nɔviwo, jijɔ ci ŋkpɔnɔ do mí nu le Kristo Yesu mìwo Xwetɔ mɛ yí nyi kpeɖoji nɔ nyɔ cɛ. 32 Nɔ ŋwa vu koɖo gbemɛlanwo le Efezi shigbe mɛkpɛtɛwo nɛ* ɖe, nyɔna ci yí le mɛ nɔŋ ɔ? Nɔ wodafɔn amɛkukuwoɔ, “mìami haan aɖu yí anu, ɖo mìnya mɔ esɔɔ, mìaku.” 33 Míŋgbelɔn nɔ woable mí domɛ o. Egbɛdodo vwinwo danahɛn wana nywiwo.* 34 Mítrɔ míwoɖekiwo aji keŋ awa enujɔjɔɛ yí míŋgbewa nuvwin o, ɖo mɛɖewo dejeshi Mawu le mí mɛ o. Ŋnukɔ ahan keŋ nɔ ŋkpɛn awa mí yɔ.

35 Gan mɛɖe tɛnŋ biɔ se mɔ: “Lé woafɔn amɛkukuwo doɔ? Ɛɛ, gbaza ci woato koɖoɔ?” 36 Eo enugɔnmɛmasetɔ! Nɔ èdo jinukuɔ, ébenɔ* gbɔxwe yí vaminɔ. 37 Nɔ èdo jinukuɔ, denyi aci ci avato nɔ émi ɖegbɔ yí èdo o, vɔ jinuku kpoŋ yí èdo. Etɛnŋ nyi ble* alo jinuku bu ɖe. 38 Vɔ nɔ jinuku lɔ shin ɔ, Mawu yí nanɔ nɔnɔmɛ ci aɖo shigbe lé edrui do nɛ. Lé jinuku ɖekaɖeka anɔ doɔ, Mawu yí nini. 39 Gbazawo pleŋ denyi ŋɖekɛ ŋmɛ o; agbetɔ gbaza li, elanwo gbaza li, xeviwo gbaza li yí kpaviwo tɔ can li. 40 Lankpu ɖewo nyi jeŋkwi mɛ tɔ yí ebuwo nyi nyigban ji tɔ. Bubu ci yí le jeŋkwi mɛ lankpuwo nu le akpo yí ci yí le nyigban ji tɔwo nu can le akpo. 41 Lé ewe klɛnnɔ do to akpo nɔ lé wleci klɛnnɔ do yí klɛnklɛn wleciviwo tɔ can le vo. Le nyɔnɔnwi mɛɔ, wleciviwo can ɖo klɛnklɛn wowotɔwo akpoakpo.

42 Ahanke enyi nɔ fɔnfɔnsoku hɛnnɛ nɛ, woɖyi gbaza ci yí adahɛn yí fuin yí dagbedahɛn o. 43 Bubu dele nu gbɔxwe woɖyi o; wofuin yí bubu le nu. Égbɔjɔ yí woɖyi; wofuin yí eɖo ŋsɛn. 44 Agbetɔ lankpu enyi yí woɖyi, vɔ wofuin yí eɖo gbɔngbɔn mɛ lankpu. Nɔ agbetɔ lankpu liɔ, gbɔngbɔn mɛ lankpu li hɛnnɛ. 45 Ðo woŋwlɛ ɖɛ mɔ: “Amɛ ŋkɔtɔ Adamu vatrɔ amɛleagbu.”* Adamu cidutɔ vatrɔ gbɔngbɔn ci yí nanɔ agbe. 46 Denyi mɛ ci yí nyi gbɔngbɔn yí va doŋkɔ o, mɛ ci yí nyi lankpu yí va doŋkɔ; yi goduɔ, mɛ ci yí nyi gbɔngbɔn vava. 47 Nyigban ji yí amɛ ŋkɔtɔ so yí wosɔ ekɔ sɔ wɛ, vɔ jeŋkwi mɛ yí amɛ amɛvetɔ so. 48 Mɛ ciwo wosɔ ekɔ wa le shigbe mɛ ci wosɔ ekɔ sɔ wa nɛ yí mɛ ciwo yí nyi jeŋkwi mɛ tɔ le shigbe mɛ ci yí so jeŋkwi mɛ nɛ. 49 Shigbe lé mìɖyi mɛ ci wosɔ ekɔ sɔ wa yɛ nɛɔ, ahanke mìavaɖyi mɛ ci yí so jeŋkwi mɛ hɛnnɛ nɛ.

50 Vɔ nɔviwo, ŋnukɔ nyɔ cɛ nɔ mí mɔ gbaza koɖo ehun datɛnŋ aɖu cinɔ nɔ Mawu Fyɔɖuxu lɔ o, ahanke enu ci yí danahɛn datɛnŋ aɖu cinɔ nɔ enu ci yí dedanahɛn hɛnnɛ nɛ. 51 Míkpɔ ɖa! Manu enyɔwlawla kɔkɔɛ ɖeka nɔ mí: Mì pleŋ mìdaku o, vɔ woatrɔ mì pleŋ 52 zeɖeka tɔntɔn le ɖabaxoxo ɖeka mɛ, hwenu woaxu ekpɛn kpɛtɛkpɛtɛtɔ. Ðo nɔ ekpɛn lɔ ɖyiɔ, amɛkukuwo afɔn koɖo gbaza ci yí dedanahɛn o yí woatrɔ mì. 53 Ðo gbaza cɛ ci yí danahɛn dagbevadahɛn o yí gbaza cɛ ci yí kunɔ dagbeku kpɔ o. 54 Vɔ nɔ ŋci yí danahɛn vatrɔ ŋci yí dedanahɛn o yí ŋci yí kunɔ vatrɔ ŋci yí dekunɔɔ, enyɔ ci woŋwlɛ ɖɛ avamɛ mɔ: “Womi eku swi tɛgbɛɛ.” 55 “Eku, fini ejiɖuɖu aotɔ leɔ? Eku, fini ete ci èsɔ tenɔ amɛ leɔ?” 56 Ete ci yí hɛnnɔ eku vɛ yí nyi nuvɔn, eyi Ese lɔ na yí nuvɔn ɖo ŋsɛn.* 57 Vɔ akpe nɔ Mawu, ɖo éna yí mìɖu ji to mìwo Xwetɔ Yesu Kristo ji.

58 Eyi taɖo nɔvinyɛ veviwo, mílo do gogwiɖe, míŋgbehunhun o, míkpɔtɔ awanɔ sugbɔ le Axwetɔ dɔ lɔ mɛ gashiagamɛ yí anyanya mɔ, egbla ciwo mídodoɔ le Axwetɔ lɔ mɛ denyi gbali o.