Wema Ŋkɔtɔ ci Woŋwlɛ Ðaɖa Korɛntitɔwo

4 Amɛwo ɖo akpɔ mì mɔ mìnyi mɛ ciwo yí wanɔ dɔ nɔ Kristo yí gbenyi axwejikpɔtɔ ciwo yí Mawu sɔ enyɔwlawla kɔkɔɛwo nɔ. 2 Vɔ enu ci wojijiɛ so axwejikpɔtɔwo gbɔ yí nyi mɔ, woanyi egbejinɔtɔwo. 3 Ecɛyɛ, nɔ enyi míwo alo kojoɖotɔwo* yí aɖo kojo nɔŋ ɔ, yɛdenyi nyɔ ɖe nɔ nyɛ o, ɖo nyɛŋtɔ ŋdeɖonɔ kojo nɔ nyɛɖeki o. 4 Anyi yexa dedokɔ hwɛŋ mɔ ŋwa enudɔndɔn ɖe o. Vɔ dedasɛ mɔ ŋnyi amɛjɔjɔɛ o. Mɛ ci yí ɖonɔ kojo nɔŋ yí nyi Yehowa.* 5 Eyi taɖo keke je hwenu Axwetɔ lɔ avaɔ, míŋgbeɖo kojo nɔ mɛɖe doŋkɔ nɔ gamɛ ci woɖo ɖɛ o. Ásɔ enu ci yí be do vinvin mɛ va klɛnklɛn mɛ yí adasɛ susu ciwo yí amɛwo ɖo le eji mɛ gbajɛɛ yí mɛɖekamɛɖeka axɔ kanfukanfu yitɔ so Mawu gbɔ.

6 Nɔviwo, ŋsɔ nyɛ koɖo Apolosu sɔ wa kpɔwɛ nɔ mí nɔ míwo nyɔna keŋ nɔ míakpla ŋcɛ so mì gbɔ mɔ: “Míŋgbewa nu zeto enu ciwo yí woŋwlɛ ɖɛ nu o,” nɔ míŋgbevagangan míwoɖekiwo yí awa nu do mɛɖe nu nywiɖe sɔwu mɛbu o. 7 Ðo mi yí na èto akpo nɔ mɛbuɔ? Le nyɔnɔnwi mɛ ɖe, nyi èɖo yí denyi na wona eoɔ? Nɔ enyi wona eo yɔ ɖe, nyi yí taɖo èyikɔ go shigbe denyi na wona eo nɛɔ?

8 Xodu ɖɔ mí vɔa? Míje dɔku vɔa? Mítɔ efyɔ ɖuɖu le ŋgbe nɔ mìwoa? Naji veviɖe mɔ míatɔ efyɔ ɖuɖu, nɔ mìwo can mìatɛnŋ aɖu fyɔ koɖo mí. 9 Éwa nɔŋ shigbe mɔ Mawu sɔ mìwo ciwo yí nyi apotruwo da do enukpɔxu shigbe gbɛbɔbɔ kpɛtɛkpɛtɛtɔ ci woɖo kojo nɔ mɔ woawu hannɛ. Eyi mìtrɔ enukpɔkpɔ nɔ xexe lɔ pleŋ, mawudɔlawo koɖo agbetɔwo can. 10 Mìnyi xlunɔwo do Kristo ŋci, vɔ míwo nyi ŋɖɛnyatɔwo le Kristo mɛ; mìwo gbɔjɔ, vɔ míwo ɖo ŋsɛn; wona bubu míwo, vɔ wogbali mìwo. 11 Keke vaɖo evyɛɔ, shive kpɔtɔ cikɔ mì, shikɔ can cikɔ mì, mìdekpɔ ŋɖe ado do gbaza o,* woxonɔ mì* yí axwe dele mì shi o. 12 Mìsɔ mìwo lɔ̀wo wanɔ dɔ sɛnsinɖe. Nɔ wozu mìɔ, mìbiɔnɔ shicu nɔ wo; nɔ woci yumɛ nɔ mìɔ, mìdo ji yí tonɔ mɛ. 13 Nɔ wonu enyɔvɔnwo so mì nuɔ, mìɖonɔ ŋci koɖo fafa.* Keke vaɖo evyɛɔ, amɛwo kpɔkpɔ mì do nukplɔ koɖo kɔlu ji le xexe lɔ mɛ.

14 Ŋdeŋwlɛkɔ ŋcɛwo nɔ mí keŋ asɔ do ŋkpɛn mí o. Vɔ ŋŋwlɛkɔ wo yí asɔ kpla nu míwo ciwo yí nyi anyi vi veviwo. 15 Taŋfuin nɔ míɖo enukplamɛtɔ 10 000 ciwo yí kplakpla mí lé míawɛ akplɔ Kristo do can ɔ, mídeɖo eda sugbɔ o. Ðo le Kristo Yesu mɛɔ, ŋvatrɔ míwo da ci ŋkplakɔ eŋɛnywi lɔ mí. 16 Eyi taɖo ŋɖekɔ kuku nɔ mí mɔ míwo le wanɔ kinyɛtɔ han. 17 Eyi na ŋdɔdɔ Timɔte ci yí nyi anyi vi vevi koɖo egbejinɔtɔ le Axwetɔ lɔ mɛ ɖaɖa mí. Áɖo ŋwi lé ŋwanɔ nuwo do shigbe lé Kristo Yesu jikɔ do nɛ nɔ mí, ágbeɖo ŋwi lé ŋkplanɔ nu amɛwo do le fishiafi le hamɛ ɖeshiaɖe mɛ nɔ mí.

18 Mɛɖewo gangankɔ wowoɖekiwo, ɖo wobukɔ mɔ ŋdegbegbɔkɔ mí gbɔ o. 19 Nɔ edro Yehowa* ɔ, nava mí gbɔ le majinjinɖe mɛ, ŋdegbɔgbɔ ava se enyɔ ciwo yí mɛ ciwo yí gangankɔ wowoɖekiwo nukɔ o, vɔ nɔ makpɔ ŋsɛn ci woɖo. 20 Ðo Mawu Fyɔɖuxu lɔ denyi nuxuxoxo nyɔ ɖe o, vɔ ŋsɛn nyɔ yɔ. 21 Ci yí anyɔ nɔ mí wuɔ? Mava mí gbɔ koɖo bayɛa, alo mava mí gbɔ koɖo lɔnlɔn koɖo xomɛfafa?