Apotruwo Dɔwawawo

27 Ci wosɔ gbeta mɔ mìaɖo tɔjihun ayi Itali ɔ, wosɔ Pɔlu koɖo gakpamɛnɔtɔ ɖewo do alɔ̀ mɛ nɔ sɔjawo ga ci yí tɔ mɔ Ʒuliusi. Ényi Oguisto hwakɔn sɔja ɖeka. 2 Mìɖo tɔjihun ɖeka ci yí so Adramitiɔmu yí aci te do texwe vovovowo le Azi kan lɔ mɛ. Eyi mìso ɖedo. Aristaki ci yí nyi Maseduanitɔ yí so Tɛsaloniki can zɔn koɖo mì. 3 Yi ŋkegbuɔ, mìci te do Sidɔn. Eyi Ʒuliusi wa xomɛvu nɔ Pɔlu yí lɔn mɔ yɛ le yi yi xlɔwo gbɔ nɔ woale bu ni.

4 Ci mìso le enɔɔ, mìto axa nɔ Shipru tɔdomɛnyigban nɔ axe aya nɔ mì. Ðo aya sɛnŋsɛnŋ ɖeka xoxoɔ yí dokɔ go mì. 5 Eyi mìto axa nɔ Silisi koɖo Panfili tɔdomɛnyigban yí vaci te do Mira le Lisi. 6 Le enɔɔ, sɔjawo ga lɔ kpɔ tɔjihun ɖeka ci yí so Alɛsandri yí yikɔ Itali yí emɔ mìwo le ɖo mɛ. 7 Eyi mìzɔnzɔn ɖɔɖɔɖɔ yí le ŋkeke sugbɔ goduɔ, egbɔnnu nɔ mì gbɔxwe mìvaɖo Kinidi. Eyi ci aya sɛnŋsɛnŋ lɔ delɔn yí tɔjihun lɔ ayi ŋkɔɔ, mìto axa nɔ Krɛti tɔdomɛnyigban keŋ nɔ axe jihɔn lɔ nɔ mì yí mìvaci te do Salmɔne. 8 Eyi mìteteɛ kliklikli le axu lɔ ji keke vaɖo texwe ci woyɔnɔ mɔ Tɔjihundrexu Nywi ci yí gogo Lase jugan.

9 Azan sugbɔ vayi yí ecɛyɛɔ, afɔku le axu ji mɔzɔnzɔn mɛ, ɖo Evuɖaɖa ŋkeke nublabla lɔ ŋtɔkpu can vayi. Eyi taɖo Pɔlu nu nɔ 10 mɛ lɔwo mɔ: “Kinyɛwo, ŋkpɔ mɔ enuwo adahɛn le emɔ cɛ ci mìjikɔ azɔn mɛ yí enu sugbɔ abu. Denyi mìwo gbanwo ɖekɛ yí abu yí tɔjihun lɔ agban kpoŋ o, vɔ mìtɛnŋ ku hɛnnɛ.” 11 Gan sɔjawo ga lɔ se enyɔ ci tɔjihunkutɔ lɔ koɖo mɛ ci tɔ tɔjihun lɔ nyi nukɔ yí gbe mɔ yedase Pɔlu tɔ o. 12 Ci tɔjihundrexu lɔ danya nɔnɔ le vuvɔ hwenuɔ, amɛ sugbɔtɔ ɖe susu mɔ mìaso kpɔ mɔ taŋfuin mìavayi ɖo tɔjihundrexu ci yí le Krɛti ma. Tɔjihundrexu cɛ kpanŋkɔ tagbewezexu koɖo fɔdewezexu.

13 Eyi ci fɔde jihɔn xoxoɔ blɛwu blɛwuɔ, wobukɔ mɔ yewo susu lɔ aje ji. Eyi woɖe sege lɔ yí mìɖedo yí to axa nɔ Krɛti xu lɔ. 14 Eyi saba vɔɔ, jihɔn sɛnŋsɛnŋ ɖeka ci yí tɔ mɔ Erakilɔn* tɔ xoxo. 15 Ci jihɔn sɛnŋsɛnŋ lɔ xoxoɔ yí dokɔ go tɔjihun lɔɔ, mìdetɛnŋ kui kpanŋkɔ yi o. Eyi mìtashi mìwoɖekiwo yí esɔ mì ɖedo fini yí drui. 16 Yi goduɔ, mìto axa nɔ tɔdomɛnyigban hwɛhwɛ ɖeka ci yí tɔ mɔ Koda yí exe jihɔn lɔ nɔ mì hwɛɖeka. Vɔ defa gbɔxwe yí mìtɛnŋ dɔn aklo* ci yí le godu nɔ tɔjihun lɔ o. 17 Vɔ ci wokɔ aklo lɔ do tɔjihun lɔ mɛ ɖegbɔɔ, wosɔ ekawo do gɔnmɛ nɔ tɔjihun lɔ yí blɛ trɔdo nɔ ŋgbegban o. Eyi ci wovɔnvɔn mɔ tɔjihun lɔ avayi do ta axukɔ ci yí le Sirti* mɛɔ, woɖyiɖyi avɔn ci yí xɔnɔ aya nɔ tɔjihun lɔ va gɔnmɛ yí jihɔn lɔ sɔ mì ɖedo. 18 Yi ŋkegbu ci jihɔn gangan lɔ xo yí dodoɔ go mì sɛnŋsɛnŋɖe yí mìdandan le axu lɔ jiɔ, wotɔ agban ciwo yí le tɔjihun lɔ mɛ lɔlɔ kɔŋgbe ɖaɖa axu lɔ mɛ nɔ afoɖa hwɛɖeka. 19 Eyi le ŋkeke amɛtɔn goduɔ, wowoŋtɔwo ɖe tɔjihun lɔ dɔwanuwo yí sɔ wo kɔŋgbe.

20 Ci ewe alo wleciviwo degbeto na nɔ ŋkeke sugbɔ o yí jihɔnshi sɛnŋsɛnŋ* lɔ cucuɔ nu koɖo mì le axu lɔ jiɔ, mìdegbekando ji ɖeeɖe mɔ mìagan o. 21 Eyi ci mɛ lɔwo nɔ shive hwenu jinjinɖe goduɔ, Pɔlu so je te le dodomɛ nɔ wo yí nu mɔ: “Kinyɛwo, nɔ anyitɔ yí míse sa yí mìdeso le Krɛti ɔ, ŋcɛwo dakpekpeɛ mì yí enuwo abu nɔ mì ahan o. 22 Vɔ ecɛyɛɔ, ŋdokɔ ŋsɛn mí mɔ míwo le gbe dɔn, ɖo mɛɖekɛ* daku le mì mɛ o. Tɔjihun lɔ ɖekɛ yí agban. 23 Ðo le ezan cɛ mɛɔ, Mawu, mɛ ci tɔ ŋnyi yí gbewanɔ sɛnsɛndɔ kɔkɔɛ nɔ dɔdɔla ɖeka va nɔ te le axa nɔŋ 24 yí nu mɔ: ‘Pɔlu, ŋgbevɔn o, woɖo akplɔ eo hɛn yi ŋkɔ nɔ Seza. Eyi kpɔ ɖa, Mawu kpɔ do eo nu yí hwlɛn mɛ ciwo pleŋ yí ɖo tɔjihun lɔ koɖo eo do agbe.’ 25 Eyi taɖo kinyɛwo, mígbe dɔn, ŋkando Mawu ji mɔ áwɛ shigbe lé enui nɔŋ do pɛpɛpɛ nɛ. 26 Gan tɔjihun lɔ avayi gban do tɔdomɛnyigban ɖeka ji.”

27 Eyi le yi ŋkeke 14 mɛ le ezandomɛ, hwenu jihɔn sɛnŋsɛnŋ lɔ sɔ mì dandan to Adria xu lɔ jiɔ, tɔjihunkutɔ lɔwo bukɔ mɔ mìdegbejinjin do agogbe o. 28 Eyi wodɔ enudreka ɖaɖa axu lɔ mɛ yí kpɔ mɛta 36 han.* Wote yi ŋkɔ hwɛɖeka yí gbedɔ enudreka lɔ do axu lɔ mɛ yí kpɔ mɛta 27 han.* 29 Eyi ci wovɔnvɔn mɔ tɔjihun lɔ avalɔ ekpewoɔ, wodɔ sege amɛnɛ ɖaɖa do godu age keŋ yí sɔ le te nɔ eŋ ake. 30 Vɔ hwenu yí tɔjihunkutɔ lɔwo ji mɔ yewoashi yí cucu aklo lɔ ɖaɖa axu lɔ ji yí wa shigbe mɔ sege yí wojikɔ adɔ ɖaɖa ŋkɔ age nɔ tɔjihun lɔ nɛɔ, 31 Pɔlu nu nɔ sɔjawo ga koɖo sɔja lɔwo mɔ: “Nɔ ŋsu cɛwo denɔ tɔjihun lɔ mɛɔ, mídagan o.” 32 Eyi sɔja lɔwo so kawo nɔ aklo lɔ yí axu lɔ sɔɛ yi.

33 Fɔnfɔnmɛɔ, Pɔlu nu nɔ wo pleŋ mɔ wo le ɖu nu yí nu nɔ wo mɔ: “Egbɛ yí nyi ŋkeke 14 ke yí míloloɔ yí mídeɖu ŋɖekɛ o. 34 Eyi taɖo, ŋɖe kuku nɔ mí, míɖu nu; áwa nywi nɔ mí, ɖo eɖakwi kuɖeka kpetii dabu le eta nɔ mɛɖe le mí mɛ o.” 35 Ci enu nyɔ cɛ ɖegbɔɔ, yiŋtɔ sɔ kpɔnnɔ yí do akpe nɔ Mawu le ŋmɛ nɔ wo pleŋ yí ŋi mɛ yí tɔ ɖuiɖui. 36 Eyi wo pleŋ mi vɔnvɔn yí tɔ enu ɖuɖu. 37 Mìwo ciwo pleŋ yí le tɔjihun lɔ mɛ nyi agbetɔ* 276. 38 Ci woɖu nu yí xodu ɖɔ wo ɖegbɔɔ, wolɔ jinukugban ciwo wodo kɔŋgbe do axu lɔ mɛ nɔ tɔjihun lɔ afoɖa.

39 Ci eŋ keɔ, wokpɔ agogbe ɖaɖa, vɔ wodejeshi texwe lɔ o; gan ci wokpɔ ekɔ le axu tu ɖaɖaaɔ, wosɔ gbeta mɔ nɔ anya wawaɔ, yewoaku tɔjihun lɔ yi nɔ keŋ aci te. 40 Eyi taɖo woso ka nɔ sege lɔwo yí tashi wo do axu lɔ mɛ, wocu tɔjihunkuci lɔwo hɛnnɛ yí ci wovlu avɔn ci yí xɔnɔ aya nɔ tɔjihun lɔ kpanŋkɔ jihɔn lɔ ɖegbɔɔ, wokpe axu lɔ tu. 41 Eyi ci tɔjihun lɔ yikɔ yí cu ekɔ ɖeka ci yí fɔn kpo le axu lɔ mɛɔ, nusɔvi xa ci ekɔ lɔ mɛ ni yí detɛnŋ gbeyikɔ o, vɔ axublabla ciwo yí le adan ji tɔ tɔjihun lɔ gbangban do godu hannyahannya. 42 Eyi sɔja lɔwo ɖui mɔ, yewoawu gakpamɛnɔtɔ lɔwo nɔ eɖe ŋgbexu tɔ ashi o. 43 Vɔ sɔjawo ga lɔ ɖui mɔ, yeahwlɛn Pɔlu gan nɔ ŋɖe ŋgbewɛ o yí gbe nɔ sɔja lɔwo mɔ woŋgbewa ŋci wodrɔ lɔ o. Énu mɔ mɛ ciwo yí asun ji axu tɔ le zo je axu lɔ mɛ keŋ ayi ɖo agogbe doŋkɔ 44 yí mɛkpɛtɛwo le kutɔ tɔjihun fɛnfɛn alo tɔjihun kankanwo yí akplɔ wo do. Eyi mɛshiamɛ va agogbe yí ŋɖe dewa mɛɖe o.