Apotruwo Dɔwawawo
23 Pɔlu cu ŋkuvi do Sanhedrɛn lɔ mɛ tɔwo ji truɖuɖu yí nu mɔ: “Nɔviwo, anyi yexa mɛ vo yí dedo hwɛŋ mɔ ŋwa enudɔndɔn ɖe le ŋmɛ nɔ Mawu keke vaɖo egbɛ o.” 2 Ci enu ahan ɔ, Avɔnsatɔ gangantɔ Ananiasi nu nɔ mɛ ciwo yí le te le gbɔ mɔ wo le xo aglan ni. 3 Eyi Pɔlu nu ni mɔ: “Mawu axo eo, eo ci yí nyi egli ci woshi kalo ɣi nɔ.* Ènɔ nyinɔnɔ ɖɛ keŋ aɖo kojo nɔŋ sɔgbe koɖo Ese lɔ, gan yí mɔ wo le xo nyɛ yí sɔ gbangban Ese lɔa?” 4 Mɛ ciwo yí le te le nɔ nu mɔ: “Avɔnsatɔ gangantɔ Mawu tɔ yí èzukɔa?” 5 Eyi Pɔlu nu mɔ: “Nɔviwo, ŋnya sa mɔ avɔnsatɔ gangantɔ enyi ba. Ðo woŋwlɛ ɖɛ mɔ, ‘Dèɖo anu enyɔvɔn do ao jumɛga nu o.’”
6 Ci Pɔlu nya mɔ akpaxwe ɖeka nɔ Sanhedrɛn lɔ nyi Sadusitɔwo yí akpaxwe ɖetɔ lɔ nyi Farizitɔwoɔ, édo axwa yí nu mɔ: “Kinyɛwo, nɔviwo, Farizitɔ ŋnyi, Farizitɔwo vijiji ŋnyi. Ci ŋxɔɛ se mɔ woafɔn amɛkukuwo so ku taɖo woɖoɖoɔ kojo nɔŋ.” 7 Ci enu ahan ɔ, Farizitɔwo koɖo Sadusitɔwo tɔ enyɔ dɔndɔn yí woma do ve. 8 Ðo Sadusitɔwo nunɔ mɔ fɔnfɔnsoku deli o, mawudɔla alo gbɔngbɔn ɖe deli hɛnnɛ o. Vɔ Farizitɔwo xɔɛ se* mɔ ŋcɛwo pleŋ li. 9 Eyi axwa gangan ɖeka ɖyi hoo yí esekplamɛtɔ ciwo yí le Farizitɔwo ji ɖewo so yí tɔ adan wawa koɖo ŋsɛn mɔ: “Mìdekpɔ afɛn ɖekɛ nɔ ŋsu cɛ o, vɔ nɔ enyi gbɔngbɔn ɖe alo mawudɔla ɖe yí xo nuxu niɔ, . . .” 10 Ci axwa lɔ sɛnsɛnŋ dojiɔ, ahwaga lɔ vɔn mɔ woavadrɛn Pɔlu yakɛyakɛ, eyi taɖo eɖe gbe nɔ sɔjawo mɔ wo le yi kplɔɛ so wo mɛ keŋ ahin vayi fini sɔjawo nɔnɔ.
11 Vɔ le ezan ci yí kplɔɛ do mɛɔ, Axwetɔ lɔ va nɔ te le axa nɔ Pɔlu yí nu mɔ: “Gbe dɔn! Ðo shigbe lé èɖe kunu so ŋnu kitokito le Ʒerusalɛmu nɛɔ, ahanke èɖo aɖe kunu le Rɔma hɛnnɛ nɛ.”
12 Ci eŋ keɔ, Ʒuifuwo bla gbeju yí kan adan xu ji mɔ nɔ yewodewu Pɔlu ɔ, yewodatɔ nu ŋɖe o. 13 Ŋsu ciwo yí bla gbeju yí kan adan cɛ wu 40. 14 Ŋsu cɛwo yi avɔnsatɔwo gawo koɖo jumɛgawo gbɔ yí nu mɔ: “Mìkan adan mɔ* nɔ mìdewu Pɔlu ɔ, mìdatɔ nu ŋɖekpokpui o. 15 Eyi taɖo, míwo koɖo Sanhedrɛn lɔ míɖo anu nɔ ahwaga lɔ mɔ yɛɖo akplɔɛ va lɛtɔxu nɔ mí shigbe mɔ míjikɔ aji dwi kpɔ nɔ yi nyɔ lɔ doji hannɛ. Vɔ keke avaɖoɔ, mìagla ɖɛ keŋ awui.”
16 Vɔ Pɔlu ŋiniɛyɔvi ɖeka se gbeju ci woblabla. Éyi fini sɔjawo nɔnɔ lɔ yí fi tofi nɔ Pɔlu. 17 Eyi Pɔlu yɔ sɔjawo ga ɖeka yí nu mɔ: “Kplɔ̀ ɖajɛvi cɛ yi nɔ ahwaga lɔ, ɖo nyɔ ɖeka le shi yí anu ni.” 18 Eyi sɔjawo ga lɔ kplɔɛ yi ahwaga lɔ gbɔ yí nu mɔ: “Gakpamɛnɔtɔ Pɔlu yɔŋ yí mɔ nyɛ le kplɔ ɖajɛvi cɛ vɛ nɔ eo, ɖo enyɔ ɖeka le shi anu nɔ eo.” 19 Ahwaga lɔ le alɔ̀ ni yí kplɔɛ yi kpa keŋ yí biɔɛ se mɔ: “Nyɔ ci èjikɔ anu nɔŋ ɔ?” 20 Énu mɔ: “Ʒuifuwo bla gbeju keŋ avakpɔ eo nɔ nàkplɔ Pɔlu va Sanhedrɛn lɔ nɔ wo esɔ shigbe mɔ wojikɔ amɔŋje yi nyɔ lɔ mɛ doji hannɛ. 21 Vɔ ŋgbelɔn nɔ wo o, ɖo ŋsu ciwo yí wu 40 do xa ɖɛ ni. Wokan adan* mɔ nɔ yewodewuiɔ, yewodatɔ nu ŋɖe o. Wole gbesɔsɔ yí le te ɖɛ mɔ eɔ le na gbe.” 22 Eyi ahwaga lɔ nu nɔ ɖajɛvi lɔ mɔ: “Ŋgbenu nɔ mɛɖe mɔ yeva nu nyɔ cɛ nɔŋ o.” Yi goduɔ, énu ni mɔ yɛ le yi.
23 Eyi eyɔ sɔjawo ga amɛve yí nu mɔ: “Míbɔ sɔja 200, esɔkutɔ 70 koɖo ehwandatɔ 200 nɔ woadra do akpe Sezare le ezan gashiɖekɛ mɛ han.* 24 Mína esɔwo Pɔlu hɛnnɛ keŋ nɔ míakplɔɛ yi ejujikpɔtɔ Felisi gbɔ yí ŋɖe ŋgbewɛ le mɔ ji o.” 25 Eyi eŋwlɛ wema ɖeka ci mɛ enu do mɔ:
26 “Enyɛ Klodu Lisiasi yí ŋwlɛkɔ wema cɛ ɖaɖa eo, Mɛgan Bubutɔ Felisi, eo ci yí nyi Ejujikpɔtɔ: Ŋdo gbe nɔ eo! 27 Ʒuifuwo lé ŋsu cɛ yí jikɔ awui, vɔ ŋɖe blɛ yí va koɖo anyi sɔjawo yí hwlin gan, ɖo ŋse mɔ Rɔmatɔ yí enyi. 28 Ci ŋji mɔ nanya ŋci yí taɖo wododoɔ hwɛ yiɔ, ŋkplɔɛ yi wowo Sanhedrɛn lɔ mɛ. 29 Ŋkpɔ mɔ wowo Se lɔ nyɔwo yí wododoɔ hwɛ yi nɔ, vɔ wodedo hwɛ ɖe ni yí mɔ woɖo awui alo acui do gakpa mɛ o. 30 Vɔ ŋse mɔ wobla gbeju do nu, eyi taɖo ŋɖui ɖaɖa eo zeɖeka yí gbenu nɔ mɛ ciwo yí dodoɔ ehwɛwo yi mɔ, wo le va nu enyɔ lɔwo le ŋkɔ nɔ eo.”
31 Sɔja lɔwo wa ŋci wodɔ wo yí kplɔ Pɔlu yi Antipatrisi zanmɛ. 32 Yi ŋkegbuɔ, esɔkutɔwo kplɔ Pɔlu ɖedo, vɔ sɔja kpɛtɛwo trɔ vayi fini wonɔnɔ. 33 Esɔkutɔ lɔwo yi Sezare yí sɔ wema lɔ nɔ ejujikpɔtɔ lɔ yí gbesɔ Pɔlu dasɛ ni. 34 Eyi ehlɛn wema lɔ yí biɔ se mɔ fini Pɔlu so ma, wonu ni mɔ Silisi yí eso. 35 Énu mɔ: “Nɔ mɛ ciwo yí dodoɔ hwɛ eo vaɖo gbɔxwe yí naɖo to eo nywiɖe.” Eyi eɖe gbe mɔ wo le kplɔ Pɔlu yi efyɔ Erodi xomɛ yí acɔcɔɛ.