Apotruwo Dɔwawawo
26 Agripa nu nɔ Pɔlu mɔ: “Ecɛyɛɔ, nù enu ci hwɛ wododoɔ eo nɔŋ.” Eyi Pɔlu kɔ alɔ̀ yi ji yí nu mɔ:
2 “Efyɔ Agripa, ejɔ ji nɔŋ mɔ ŋle ŋkɔ nɔ eo gbɛ keŋ axo nuxu asɔ hwlɛn ta nɔ nyɛɖeki le ehwɛ ciwo pleŋ Ʒuifuwo dodoɔŋ mɛ. 3 Ŋci koŋ yí na taɖo ejɔ ji nɔŋ yí nyi mɔ, èjeshi Ʒuifuwo kɔnuwo pleŋ koɖo enyɔ ciwo wodɔnnɔ le wowoɖeɖewo mɛ nywiɖe. Eyi taɖo ŋɖe kuku, gbɔn ji ɖɛ yí ase enyɔ ciwo nanu.
4 “Le nyɔnɔnwi mɛɔ, Ʒuifuwo pleŋ nya lé ŋnɔ agbe do so vihwɛ mɛ le anyi mɛwo* mɛ koɖo le Ʒerusalɛmu nywiɖe. 5 Mɛ ciwo yí jeshiŋ ɖɛ xoxoxo atɛnŋ aɖe kunu so ŋnu mɔ, Farizitɔ ŋnyi sa yí nɔnɔ agbe esɔnɔ koɖo mìwo sɛnsɛn lɔ nukplakplawo pɛpɛpɛ. Sɛnsɛn cɛ sɛnŋ sɔwu Ʒuifuwo sɛnsɛn kpɛtɛwo. 6 Vɔ ci ŋkando ji mɔ, Mawu awa do egbe ci eɖo nɔ mìwo tɔgbiwo ji yí na taɖo ŋle ehwɛ ŋkɔ gbɛ. 7 Gbeɖu cɛ lɔ ke ji yí mìwo kɔta 12 lɔwo kando mɔ yɛavamɛ keŋ yí le sɛnsɛndɔ wakɔ nɔ Mawu veviɖe ezan koɖo kede. Oo, Efyɔ, ci ŋkando gbeɖu cɛ ji yí na taɖo Ʒuifuwo dodoɔ hwɛŋ.
8 “Nyi yí taɖo míbubuiɛ* mɔ wodatɛnŋ akando ji mɔ Mawu afɔn amɛkukuwo do agbeɔ? 9 Enyɛɔ, ŋbui sa mɔ ŋɖo awa ŋɖekpokpui ci ji ŋkpe yí asɔ fɔn gu do Yesu Nazarɛtitɔ lɔ ŋkɔ nu. 10 Ŋcɛ pɛɛ yí ŋwa le Ʒerusalɛmu, ŋcu amɛkɔkɔɛ sugbɔ do gakpa mɛ, ɖo avɔnsatɔwo gawo na gbeŋ. Eyi nɔ womɔ woawu woɔ, ŋxɔnɔ gbe do ji. 11 Ŋdɔnnɔ eto nɔ wo le Ʒuifuwo nukplaxuwo pleŋ, ŋjenɔ agbla keke nɔ woagbe xɔse. Eyi ci ŋle dɔmɛzi ji do wo nu sugbɔɔ, ŋyinɔ eju buwo mɛ ŋtɔkpu yí cinɔ yumɛ nɔ wo.
12 “Eyi lɔ ji ŋle yí avɔnsatɔwo gawo na gbeŋ yí gbena acɛŋ yí ŋso kpe Damasi. 13 Gawive mɛ han yɔ. Eyi, oo Efyɔ, ŋkpɔ klɛnklɛn ɖeka ci yí klɛn wu klɛnklɛn ewe tɔ yí eso jeŋkwi mɛ yí va trɔdo nyɛ koɖo mɛ ciwo yí zɔn mɔ yikɔ. 14 Eyi mì pleŋ juin yí ŋse egbe ɖeka nu nɔŋ le Ebregbe mɛ mɔ: ‘Sɔlu, Sɔlu, nyi yí taɖo èciciɛ yumɛ nɔŋ ɔ? Èwakɔ nu koɖo eoɖeki ci èsɔ eoɖeki tɔtɔ acinugbɔngbwin.’* 15 Vɔ ŋbiɔ se mɔ: ‘Axwetɔ, mi ènyiɔ?’ Eyi Axwetɔ lɔ nu nɔŋ mɔ: ‘Enyɛ Yesu ci ècikɔ yumɛ nɔ yɔ. 16 Vɔ sò je te. Enu ci yí taɖo ŋdasɛ nyɛɖeki nɔ eo yí nyi mɔ, ŋsɔ eo yí nànyi anyi dɔwavi keŋ adra enu ciwo èkpɔ koɖo ŋciwo nadasɛ nɔ eo so nyɛŋtɔ nu. 17 Eyi nahwlɛn eo gan le mɛ cɛwo koɖo jukɔn ciwo gbɔ nadɔ eo ɖaɖa lɔ̀ mɛ 18 keŋ yí ahun wowo ŋkuviwo yí atrɔ wo so vinvin mɛ hɛn gbɛ va klɛnklɛn mɛ. Naɖe wo so Satana ŋsɛn gɔnmɛ yí ahɛn wo gbɛ va Mawu gbɔ nɔ woasɔ wowo nuvɔnwo ke wo yí woagbeɖu cinɔ koɖo amɛjɔjɔɛ ciwo yí xɔŋ ji se.’
19 “Eyi taɖo Efyɔ Agripa, ŋdegbe mɔ ŋdawa do ŋtegannu ci yí so jeŋkwi mɛ yí ŋkpɔ lɔ ji o. 20 Vɔ ŋsɔ ŋɛdu lɔ yi nɔ mɛ ciwo yí le Damasi doŋkɔ. Yi goduɔ, ŋsɔɛ yi nɔ mɛ ciwo yí le Ʒerusalɛmu koɖo mɛ ciwo yí le Ʒude juwo pleŋ mɛ sɔ kpe nɔ jukɔn bu mɛ tɔwo mɔ, woɖo atrɔ ji mɛ keŋ ava Mawu gbɔ yí awa ŋciwo yí dasɛ mɔ wotrɔ ji mɛ nyao. 21 Eyi na taɖo yí Ʒuifuwo léŋ le gbedoxɔ lɔ mɛ yí tekpɔ mɔ yewoawuŋ. 22 Vɔ Mawu kpedo ŋnu yí ŋkpɔtɔ drakɔ enyɔ lɔ nɔ amɛgbaliwo koɖo amɛkpɛnkpinwo keke je egbɛ. De enyɔ bu ɖe ŋnukɔ o, ŋciwo Enyɔnuɖɛtɔwo koɖo Moizi nu mɔ woajɔ yí nyɛ can ŋnukɔ 23 mɔ, Kristo akpe fun yí ci enyi eyi anyi amɛ ŋkɔtɔ ci woafɔn so ekuɔ, ádra klɛnklɛn ŋɛdu nɔ mɛ cɛwo koɖo jukɔn bu mɛ tɔwo.”
24 Hwenu Pɔlu le enyɔ cɛwo nukɔ yí sɔ hwlɛnkɔ eta nɔ yiɖekiɔ, Fɛstusi do axwa sɛnsinɖe mɔ: “Pɔlu, èjejeɛ suku! Wema sugbɔ ci èkpla na yí èle suku jekɔ.” 25 Vɔ Pɔlu nu mɔ: “Mɛgan Bubutɔ Fɛstusi, ŋje suku go, vɔ enyɔ ciwo ŋnukɔ nyi nyɔnɔnwi yí gbeɖo gɔnmɛsese. 26 Le nyɔnɔnwi mɛɔ, efyɔ ci ŋvoŋ yí xokɔ nuxu nɔ nya ŋcɛwo nywiɖe. Ŋkando ji mɔ dedan ŋcɛwo ɖe o, ɖo wodewa ɖekɛ le bebemɛ o. 27 Efyɔ Agripa, èkando Enyɔnuɖɛtɔwo jia? Ŋnya mɔ èkando wo ji.” 28 Vɔ Agripa nu nɔ Pɔlu mɔ: “Ekpɔtɔ hwɛɖeka yí àna yí natrɔ Kristotɔ.” 29 Eyi Pɔlu nu mɔ: “Nɔ agbenyi le hwenu kleŋ ɖe godu alo ajinjin can ɔ, ŋji mɔ Mawu le wɛ nɔ nàle shigbe enyɛ nɛ. De eoɖekɛ ŋbiɔbiɔɛ nɔ o, vɔ ŋbiɔbiɔɛ nɔ míwo ciwo pleŋ yí ɖokɔ toŋ gbɛ, gan ŋdeji mɔ wo le do ga míwo shigbe enyɛ nɛ o.”
30 Eyi efyɔ lɔ so, ejujikpɔtɔ lɔ koɖo Bɛnisi sɔ kpe nɔ mɛ ciwo pleŋ yí le nyinɔnɔ can so. 31 Vɔ ci woɖedoɔ, wotɔ nunu nɔ wowonɔnɔwo mɔ: “Ŋsu cɛ dewa ŋɖe keke woawui alo acui do gakpa mɛ o.” 32 Eyi Agripa nu nɔ Fɛstusi mɔ: “Nɔ denyi Seza yí ŋsu cɛ mɔ eyi aɖo kojo nɔ ye saɔ, woajui dru.”