Apotruwo Dɔwawawo
25 Fɛstusi vaɖo Ʒude ju ci ejikɔ akpa nɔ mɛ yí tɔ dɔ ji. Eyi le ŋkeke amɛtɔn goduɔ, éso le Sezare yí yi Ʒerusalɛmu. 2 Eyi avɔnsatɔwo gawo koɖo Ʒuifuwo mɛganwo nu Pɔlu nyɔ nɔ Fɛstusi. Eyi taɖo wotɔ kuku ɖeɖe ni 3 mɔ yɛ le wa xomɛvu nɔ yewo keŋ adɔ amɛ ɖaɖa Pɔlu nɔ ava Ʒerusalɛmu, vɔ woɖui mɔ yewoado xa ɖɛ ni keŋ awui le emɔ lɔ ji. 4 Vɔ Fɛstusi nu do nu nɔ wo mɔ, Pɔlu le nɔ Sezare yí yeŋtɔ can jikɔ agbɔ sabaɖe yɛ. 5 Fɛstusi nu mɔ, “Míwo gawo ayi koɖoŋ yí nɔ ŋsu cɛ wa enudɔndɔn ɖe nyaoɔ, woado hwɛ yi.”
6 Eyi ci ewa ŋkeke amɛnyi alo amɛ́wo han le wo gbɔɔ, éso vayi Sezare yí le yi ŋkegbuɔ, énɔ nyinɔnɔ do fini aɖo kojo le yí ɖe gbe mɔ wo le kplɔ Pɔlu vɛ. 7 Ci Pɔlu vaɖoɔ, Ʒuifu ciwo yí so Ʒerusalɛmu trɔdi yí dodoɔ ehwɛ gangan sugbɔwo yi, gan wodesun ji yí dasɛ mɔ enyɔ ciwo yí wonukɔ lɔwo nyi nyɔnɔnwi o.
8 Vɔ Pɔlu hwlɛn ta nɔ yiɖeki yí mɔ: “Ŋdeda le Ʒuifuwo Se lɔ ji alo xo ɖyi gbedoxɔ lɔ alo wa nuvwin ɖe do Seza o.” 9 Ci Fɛstusi ji mɔ ye nu le kpe nɔ Ʒuifuwoɔ, ébiɔ Pɔlu se mɔ: “Èji mɔ yeayi Ʒerusalɛmu keŋ nɔ woaɖo kojo nɔ eo so ŋcɛwo nu le nɔa?” 10 Vɔ Pɔlu nu mɔ: “Seza kojoɖoɖo ʒinkpin ŋkɔ ŋle te le, fini woɖo aɖo kojo nɔŋ le. Ŋdewu hwɛ ɖe do Ʒuifuwo o, shigbe lé eoŋtɔ can vakpɔkpɔɛ petii yɛ nɛ. 11 Nɔ nuvwinwatɔ ŋnyi nyao yí wa ŋci yí na woɖo awuŋ ɔ, ŋdegbe eku o. Vɔ nɔ enyi ehwɛ ciwo wododoɔŋ ɖekɛ denyi nyɔnɔnwiɔ, mɛɖekɛ deɖogbe asɔŋ do alɔ̀ mɛ nɔ wo nɔ ajɔ ji nɔ wo o. Seza yí aɖo kojo nɔŋ!” 12 Ci Fɛstusi xo nuxu koɖo mɛ ciwo yí ɖenɔ susu koɖi ɖegbɔɔ, énu mɔ: “Èmɔ Seza yí aɖo kojo nɔ ye; taɖo Seza gbɔ àyi.”
13 Le ŋkeke ɖewo goduɔ, efyɔ Agripa koɖo Bɛnisi va Sezare mɔ yewoayɔ Fɛstusi kpɔ. 14 Ci wonɔ nɔtɔxu na nɔ ŋkeke sugbɔɔ, Fɛstusi sɔ Pɔlu nyɔ lɔ ɖo ŋmɛ nɔ wo mɔ:
“Felisi gbe ŋsu ɖeka do gakpa mɛ 15 yí ci ŋyi Ʒerusalɛmu ɔ, avɔnsatɔwo gawo koɖo Ʒuifu mɛganwo va je yi hwɛ nɔŋ yí mɔ nyɛ le dɔn to ni. 16 Vɔ ŋnu nɔ wo mɔ, nɔ mɛ ciwo yí dodoɔ hwɛ amɛ dedo go koɖo mɛ lɔ ŋmɛŋmɛ yí yiŋtɔ xo nuxu yí sɔ hwlɛn ta nɔ yiɖeki le nyɔ lɔ mɛɔ, Rɔma se lɔ delɔn mɔ wo le sɔ jo nɔ wo keŋ nɔ ajɔ ji nɔ wo o. 17 Eyi taɖo ci wova lɛɔ, ŋso do nyɔ lɔ ji zeɖeka, eyi le yi ŋkegbu kakaɔ, ŋnɔ nyinɔnɔ do fini ŋɖonɔ kojo le yí ɖe gbe mɔ wo le kplɔ ŋsu lɔ vɛ. 18 Vɔ ci mɛ ciwo yí dokɔ hwɛwo yi so yí nukɔ nyɔwo so nuɔ, wodenu mɔ yɛwa nuvɔn ɖe le ŋciwo nyɛŋbu sa mɔ yɛwa mɛ o. 19 Ŋci wowa kpoŋ yí nyi mɔ, wodɔn nyɔ koɖi so wowoŋtɔwo sɛnsɛn* koɖo ŋsu ɖeka ci yí tɔ mɔ Yesu yí ku nu. Vɔ Pɔlu yɛtɛtɛ gbe do ji mɔ, yɛle agbe. 20 Ci ŋdan lé nakpɔ nyɔ cɛ gbɔ doɔ, ŋbiɔɛ se mɔ yɛji mɔ yeayi Ʒerusalɛmu nɔ woaɖo kojo ni so enyɔ cɛwo nu le nɔ ma. 21 Vɔ Pɔlu nu mɔ, yeanɔ gakpa mɛ keke ana nɔ hwenu Efyɔ Gangantɔ* avaso kojo nɔ ye. Eyi taɖo ŋɖe gbe mɔ wo le gluin ɖɛ keke aje hwenu navaɖui ɖaɖa Seza gbɔ.”
22 Agripa nu nɔ Fɛstusi mɔ: “Ŋji mɔ ŋsu lɔ ŋtɔ axo nuxu nase.” Fɛstusi nu do nu mɔ, “Esɔ àse yiŋtɔ numɛgbi.” 23 Eyi taɖo yi ŋkegbuɔ, Agripa koɖo Bɛnisi va koɖo acɔ gangan yí enyi enukpɔkpɔ. Ahwagawo koɖo amɛkpɛnkpin ciwo yí le ejuɔ mɛ va yí wobɔ yí yi kojoɖoxu lɔ. Eyi Fɛstusi ɖe gbe mɔ wo le kplɔ Pɔlu vɛ. 24 Fɛstusi nu mɔ: “Efyɔ Agripa koɖo míwo ciwo pleŋ yí le lɛ koɖo mì, míkpɔ ŋsu cɛa? Ʒuifuwo pleŋ yí nu yi nyɔ nɔŋ le Ʒerusalɛmu koɖo lɛtɔxu. Wole axwa ji mɔ yɛdegbeɖo anɔ agbe o. 25 Vɔ ŋdekpɔ mɔ yɛwu hwɛ ɖe keke woawui o. Ci yiŋtɔ nu mɔ Efyɔ Gangantɔ lɔ yí aso kojo nɔ yeɔ, ŋsɔ gbeta mɔ naɖui ɖaɖa gbɔ. 26 Vɔ ŋdekpɔ ŋɖe koŋ keke aŋwlɛ so nu ɖaɖa anyi Xwetɔ o. Eyi taɖo ŋkplɔɛ va ŋkɔ nɔ mí pleŋ, taŋtaŋ eo Efyɔ Agripa keŋ nɔ míbiɔ enyɔwo yi se ɖegbɔɔ, matɛnŋ akpɔ enyɔ ci naŋwlɛ so nu. 27 Ðo ŋkpɔ mɔ desɔgbe mɔ masɔ gakpamɛnɔtɔ ɖe ɖaɖa yí ŋdagɔnma ŋwlɛ enyɔ ciwo wodo hwɛ yi nɔ o.”