Apotruwo Dɔwawawo
22 “Kinyɛwo, nɔvinyɛwo koɖo danyɛwo, míɖo to ase nyɔ ci ŋjikɔ anu keŋ asɔ dre nyɔ lɔ mɛ nɔ mí.” 2 Ci wose yí enyi Ebregbe edo yí sɔ xokɔ nuxu nɔ woɔ, eɖa gbeɖo nɔ wo doji. Eyi enu mɔ: 3 “Ʒuifu yí ŋnyi yí wojiŋ le Tarsi ci yí le Silisi, vɔ Gamaliɛli ŋtɔ yí kpla nuŋ le eju cɛ mɛ yí wokpla Moizi Se lɔŋ mɔ nyɛ le wa do ji pɛpɛpɛ yí ŋdesɔ Mawu sɛnsɛn munɔ munu ɖeeɖe o, shigbe lé míwo pleŋ can wɛkɔ do gbɛ nɛ. 4 Ŋci yumɛ nɔ mɛ ciwo yí le Axwetɔ Mɔ cɛ ji keke yí ji ku nɔ wo, ŋblanɔ ŋsuwo koɖo nyɔnuwo yí cunɔ wo do gakpa mɛ. 5 Avɔnsatɔ gangantɔ lɔ koɖo jumɛgawo gbɛbɔbɔ lɔ pleŋ atɛnŋ aɖe kunu so nyɔ cɛ nu. Wowo gbɔ ŋxɔ wemawo le hɛnnɛ nɔ nɔvi ciwo yí le Damasi, eyi ŋje mɔ keŋ ayi bla mɛ ciwo yí le nɔ hɛn gbɛ va Ʒerusalɛmu nɔ woadɔn to nɔ wo.
6 “Vɔ ci ŋle emɔ lɔ ji yikɔ yí gogokɔ Damasi le gawive mɛ han ɔ, klɛnklɛn gangan ɖeka klɛn so jeŋkwi mɛ yí trɔdoŋ zeɖeka. 7 Eyi ŋjuin yí se yí egbe ɖeka nu nɔŋ mɔ: ‘Sɔlu, Sɔlu, nyi yí taɖo èciciɛ yumɛ nɔŋ ɔ?’ 8 Eyi ŋmɔ: ‘Axwetɔ, mi ènyiɔ?’ Eyi enu nɔŋ mɔ: ‘Enyɛ Yesu Nazarɛtitɔ ci ècikɔ yumɛ nɔ yɔ.’ 9 Ŋsu ciwo yí zɔn koɖoŋ kpɔ klɛnklɛn lɔ, vɔ wodemɔŋje nyɔ ci yí mɛ ci yí xokɔ nuxu koɖoŋ nukɔ mɛ o. 10 Eyi ŋbiɔ se mɔ: ‘Axwetɔ, nyi ŋɖo awaɔ?’ Axwetɔ lɔ nu nɔŋ mɔ: ‘Sò je te keŋ ayi Damasi ju mɛ yí le nɔɔ, woanu ŋciwo pleŋ èɖo awa nɔ eo.’ 11 Vɔ ci klɛnklɛn gangan lɔ na yí ŋdegbetɛnŋ yí kpɔkpɔ ŋɖeɔ, mɛ ciwo yí zɔn koɖoŋ le alɔ̀ nɔŋ yí kplɔŋ hɛn yi Damasi.
12 “Yi goduɔ, ŋsu ɖeka ci yí tɔ mɔ Ananiasi yí wa ɖaŋ sɛnnɔ Mawu shigbe lé Ese lɔ nui do nɛ yí Ʒuifu ciwo pleŋ yí le nɔ xonɔ nuxu nywi so nu 13 va ŋgbɔ. Énɔ te le axa nɔŋ yí nu nɔŋ mɔ: ‘Sɔlu, nɔvinyɛ, gbètɔ enu kpɔkpɔ!’ Eyi zeɖeka tɔntɔn ɔ, ŋfɔn ta yi ji yí kpɔɛ. 14 Eyi enu mɔ: ‘Mìwo tɔgbiwo Mawu can eo nɔ nàvajeshi edro yitɔ keŋ akpɔ amɛjɔjɔɛ lɔ yí ase yi gbemɛ. 15 Ðo éle mɔ àɖe kunu so nu yí anu ŋciwo èkpɔ yí gbese nyɔ nɔ amɛwo pleŋ. 16 Ecɛyɛ ɖe, nyi yí taɖo èdɔndɔn gamɛɔ? Sò nɔ woaʒin eo do shi mɛ, eyi nàyɔ yi ŋkɔ keŋ nɔ woaklɔ ao nuvɔnwo si.’
17 “Vɔ ci ŋtrɔ vayi Ʒerusalɛmu yí dokɔ gbe ɖaɖa le gbedoxɔ lɔ mɛɔ, ŋkpɔ ŋtegannu ɖeka, 18 ŋkpɔ Axwetɔ lɔ yí enu nɔŋ mɔ: ‘Kaba, ɖè blɛ aso le Ʒerusalɛmu ju lɔ mɛ, ɖo wodalɔn do enyɔ ciwo èjikɔ anu so ŋnu ji o.’ 19 Eyi ŋnu mɔ: ‘Axwetɔ, wowoŋtɔwo nya nywiɖe mɔ sasaɔ, ŋyinɔ Ʒuifuwo nukplaxu ɖekaɖeka yí lénɔ mɛ ciwo yí xɔ eo ji se cu do gakpa mɛ yí xonɔ wo. 20 Eyi hwenu wowukɔ ao kunuɖetɔ Etiɛni ɔ, ŋle nɔtɔxu yí lɔn do enu ci wowakɔ lɔ ji yí xɔ mɛ ciwo yí wuikɔ lɔwo wuwo ɖɛ nɔ wo.’ 21 Vɔ énu nɔŋ mɔ: ‘Sò yi, ɖo nadɔ eo ɖaɖa jukɔn ciwo yí le jinjintɔxuwo mɛ.’”
22 Wokpɔtɔ ɖokɔ to yi keke vaɖo nyɔ cɛwo ji. Eyi vɔɔ, wotɔ axwa dodo yí nukɔ mɔ: “Míwu ŋsu cɛ swi, ɖo denyi nu yí anɔ agbe o!” 23 Eyi ci wole axwa dokɔ yí dɔdɔ awu jitɔ wowotɔwo ɖaɖa eji yí gbelɔlɔ ekɔ ɖaɖa aya mɛɔ, 24 ahwaga lɔ ɖe gbe mɔ wo le kplɔ Pɔlu yi fini sɔja lɔwo nɔnɔ yí axui koɖo lanŋba nɔ ato nyɔnɔnwi, keŋ nɔ yeatɛnŋ anya ŋci teŋ yí dɔ wole axwa dokɔ do ta ni ahan. 25 Vɔ ci wobla Pɔlu yí jikɔ atɔ xuixuiɔ, ébiɔ sɔjawo ga ci yí le te le nɔ se mɔ: “Ese na gbe mí mɔ míwo le xo mɛ ci yí nyi Rɔmatɔ nɔ wodedo hwɛ yia?”* 26 Ci sɔjawo ga lɔ se nyɔ cɛɔ, évayi nui nɔ ahwaga lɔ keŋ yí biɔɛ se mɔ: “Nyi èjikɔ awaɔ? Ðo Rɔmatɔ yí ŋsu cɛ nyi.” 27 Eyi taɖo ahwaga lɔ gbosɔ Pɔlu yí biɔɛ se mɔ: “Rɔmatɔ ènyia?” Eyi emɔ: “Ɛɛ.” 28 Ahwaga lɔ nu mɔ: “Eho sugbɔ ŋcu gbɔxwe yí trɔ Rɔmatɔ.” Eyi Pɔlu nu mɔ: “Rɔma vijiji nyɛŋnyi.”
29 Eyi ŋsu ciwo yí jikɔ atre fun ni keŋ nɔ ato nyɔnɔnwi so le gbɔ zeɖeka. Eyi ci ahwaga lɔ vanya mɔ Rɔmatɔ yɛnyi gbɔxwe yeblɛ koɖo awlɛgawoɔ, vɔnvɔn li.
30 Yi ŋkegbu ci ahwaga lɔ ji mɔ yeanya ŋci yí dɔ teŋ yí Ʒuifuwo dodoɔ hwɛ Pɔlu ɔ, énu yí wocu awlɛga lɔwo ni. Eyi eɖe gbe mɔ avɔnsatɔwo gawo koɖo Sanhedrɛn lɔ pleŋ le va bɔ. Yi goduɔ, ékplɔ Pɔlu va dodomɛ nɔ wo.