Wema ci Woŋwlɛ Ðaɖa Titu
3 Kpɔ̀tɔ aɖonɔ ŋwi nɔ wo mɔ wo le sɔ wowoɖekiwo hwenɔ nɔ acɛkpatɔwo koɖo egawo yí asenɔ tonu nɔ wo, wo le le gbesɔsɔ awanɔ edɔ nywi ɖeshiaɖe, 2 woŋgbexonɔ nuxu vwin so mɛɖe nu o, woŋgbehwlɛnnɔ aɖe o, vɔ wo le nyi enugɔnmɛsetɔwo yí afanɔ xomɛ do amɛwo pleŋ nu. 3 Ðo sasaɔ, mìwo can mìnyi xlunɔwo, tonumasetɔwo, mɛ ciwo yí bu emɔ yí nyi hwashiwo nɔ edro koɖo agbeɖuɖu hamɛhamɛwo, mìwanɔ enudɔndɔnwo, enu cinɔ ŋmɛ nɔ mì, mìwo nu nyɔŋ yí mìxanɔ mìwonɔnɔwo.
4 Vɔ hwenu mìwo Hwlɛngantɔ Mawu dasɛ mɔ yewanɔ xomɛvu yí gbelɔn agbetɔwo pleŋ ɔ, 5 éhwlɛn mì gan to eshilele ci yí na mìkpɔ agbe ji, ésɔ mì wa amɛ yoyuwo to gbɔngbɔn kɔkɔɛ lɔ ji. (Denyi enujɔjɔɛ ɖe ci mìwa nu yí ekpɔ do o, vɔ yiŋtɔ yí ku ŋshishi nɔ mì.) 6 Éto Yesu Kristo mìwo Hwlɛngantɔ ji yí kɔ gbɔngbɔn cɛ do mì ji sugbɔ haan* 7 keŋ nɔ wokpɔ mì do amɛjɔjɔɛwo ji to xomɛvu gangan yitɔ ji ɖegbɔɔ, mìavanyi cinɔɖutɔwo nɔ agbe mavɔ ci mìkpɔkɔ emɔ nɔ.
8 Kankandoji le enyɔ cɛwo nu yí ŋji mɔ, àkpɔtɔ atɛtɛ gbe do wo ji keŋ nɔ mɛ ciwo yí kando Mawu ji akpɔtɔ asɔ susu ɖo edɔ nywiwo wawa ji. Enu cɛwo nyɔ yí nyɔna le wo mɛ nɔ amɛ.
9 Vɔ ŋgbedɔnnɔ exlunyɔwo, adodoɔ nu tɔgbitɔgbiwo ŋkɔwo hlɛnhlɛn, aɖehwlɛnhwlɛn koɖo evuwawa do Ese lɔ nyɔwo ji mɛ o, ɖo ele ɖekɛ dele wo mɛ o yí wonyi enugbaliwo. 10 Nɔ mɛɖe ɖoɖoɔ sɛnsɛn bu ɖe do akpo yí ègbe nyɔ ni* ŋkɔtɔ koɖo zevetɔ yí desiɔ, gbè ha ni. 11 Nyà mɔ mɛ cɛ bu emɔ yí le nuvɔn wakɔ keŋ yí dokɔ ehwɛ yiɖeki.
12 Nɔ ŋdɔ Artemasi alo Tishiku ɖaɖa eoɔ, jè agbla keke ava ŋgbɔ le Nikopolisi, ɖo enɔtɔxu ŋji mɔ nanɔ le vuvɔ hwenu nɛ. 13 Jè agbla akpedo Zenasi ci yí jeshi Ese lɔ ɖɛ nywiɖe koɖo Apolosu nu nɔ ŋɖe ŋgbehwedo wo le emɔzɔnzɔn wowotɔ lɔ mɛ o. 14 Vɔ nà nɔ mìwo mɛwo can akpla lé woawanɔ edɔ nywiwo do keŋ atɛnŋ akpedo mɛ ciwo yí le eʒan mɛ nu, eyi woanyi mɛ ciwo yí sɛnnɔ ku hweɖekpokpuinu.
15 Mɛ ciwo pleŋ yí le koɖoŋ do gbe ɖaɖa eo. Dò gbe nɔ mɛ ciwo yí lɔn mì yí nyi mìwo nɔviwo le xɔse mɛ.
Mawu le wa xomɛvu gangan nɔ mí pleŋ.