Wema ci Woŋwlɛ Ðaɖa Titu
1 Enyɛ Pɔlu, ŋnyi hwashi Mawu tɔ koɖo apotru Yesu Kristo tɔ. Anyi xɔse sɔgbe koɖo Mawu mɛcancanwo xɔse sɔ kpe nɔ enumɛmɔŋje adodwitɔ lɔ ci yí kan nyɔnɔnwi ci mɛ yí egbejinɔnɔ nɔ Mawu can le. 2 Enu cɛwo yí dɔ yí emɔkpɔkpɔ li nɔ agbe mavɔ ci gbe Mawu ci yí datɛnŋ akan ŋsu ɖo so gbeɖegbe ɖii. 3 Vɔ le mìwo Hwlɛngantɔ Mawu ŋtɔ gamɛ jiɔ, éna yí wojeshi yi nyɔ lɔ to eŋɛnywidradradɔ ci esɔ do alɔ̀ mɛ nɔŋ ji sɔgbe koɖo yi gbeɖeɖe. 4 Enyɛ yí ŋwlɛkɔ wema cɛ ɖaɖa Titu ci yí nyi evi vevi nɔŋ le xɔse ɖekɛ lɔ ci mìbɔ ɖo mɛ:
Mawu Eda koɖo Kristo Yesu, mìwo Hwlɛngantɔ le wa xomɛvu gangan nɔ eo yí agbena fafa eo.
5 Ŋtashi eo ɖɛ do Krɛti nɔ nàdra enu ciwo yí dahɛn do yí aɖo hamɛmɛshinshinwo le eju ɖekaɖeka mɛ shigbe lé ŋkpla eo do nɛ mɔ: 6 hamɛmɛshinshin ɖo anyi mɛ ci wodedo hwɛ ɖe o, mɛ ci yí ɖe nyɔnu kuɖeka yí eviɛwo nyi xɔsetɔwo yí wodedo hwɛ wo mɔ wonɔkɔ agbe dɔndɔn alo wonyi egufɔntɔwo o. 7 Ðo ci enujikpɔtɔ nyi Mawu xwejikpɔtɔɔ, éɖo anyi mɛ ci amɛwo dedodoɔ hwɛ o, danyi ŋtashintɔ o, dadonɔ dɔmɛzi kabakaba o, danyi ahanumutɔnɔ o, danyi danuwatɔ* o, dasɔ ŋbia tafunɔ amɛwo do keŋ akpɔ ho o, 8 vɔ ányi mɛ ci yí xɔnɔ mɛdru, enunywiwawa ajɔnɔ ji ni, susu ale te ni,* áwanɔ enujɔjɔɛ, ánɔnɔ gbeji, álenɔ yiɖeki domɛ, 9 ákunɔ do nyɔnɔnwi nyɔ* lɔ nu goŋgoŋ le lé ekplanɔ nu amɛwo do mɛ keŋ nɔ atɛnŋ asun ji asɔ enukplakpla adodwi* lɔ donɔ ŋsɛn amɛwo yí agbegbenɔ enyɔ nɔ mɛ ciwo yí dodoɔ ɖyika enukplakpla lɔ.
10 Ðo amɛ sugbɔ li yí nyi egufɔntɔwo, nuxu gbali xotɔwo, amɛbletɔwo, taŋtaŋ mɛ ciwo yí nunɔ mɔ woɖo aso vo nɔ amɛ dandan. 11 Éle mɔ woabɔ enu cu nɔ mɛ cɛwo, ɖo wokpɔtɔ le xomu blebuwo blekɔ domɛ to enu ciwo yí wodeɖo akpla amɛwo ji yí sɔ le amɛwo tafukɔ keŋ akpɔ eho. 12 Mɛɖeka le wo mɛ yí nyi wowoŋtɔwo nyɔnuɖɛtɔ nu mɔ: “Ŋsu yí Krɛtitɔwo kannɔ tɛgbɛɛ, wonyi gbemɛlan nyinashuwo koɖo sukanuɖutɔ ɖyiɖɔnɔwo.”
13 Nyɔnɔnwi yí nyɔ cɛ nyi. Susu cɛ koŋ yí dɔ taɖo àkpɔtɔ agbegbeɛ enyɔ nɔ wo koɖo ŋkuvi biabia keŋ nɔ woatɛnŋ anɔ nywiɖe le xɔse lɔ mɛ 14 yí wodaɖonɔ to Ʒuifuwo nyɔkpakpawo koɖo mɛ ciwo yí trɔ gbeɖe nyɔnɔnwi lɔ ɖɛ sewo o. 15 Enuwo pleŋ le kɔkɔɛɖe nɔ amɛkɔkɔɛwo, vɔ ŋɖekɛ dele kɔkɔɛɖe nɔ mɛ ciwo yí xo ɖyi yí wodeɖo xɔse o, ɖo wowo susuwo koɖo wowo yexawo xo ɖyi. 16 Wonunɔ le amɛwo mɛ mɔ yewojeshi Mawu, vɔ wotonɔ wowo nuwanawo ji yí danasɛ mɔ yewogbi, ɖo wowo nu nyɔŋ, wodesenɔ tonu o yí wodenyi nu yí awa edɔ nywi ɖekpokpui hɛnnɛ o.