Wema ci Woŋwlɛ Ðaɖa Filemɔ
1 Enyɛ Pɔlu ci yí le gakpa mɛ do Kristo Yesu ŋci koɖo mìwo nɔvi Timɔte yí ŋwlɛkɔ wema cɛ ɖaɖa Filemɔ, mìwo kpena edɔwatɔ ci mìlɔn 2 koɖo mìwo nɔvinyɔnu Apia sɔ kpe nɔ Ashipu, mìwo kpena ci yí nyi Kristo sɔja hɛnnɛ koɖo hamɛ ci yí bɔnɔ do ao xwe mɛ:
3 Mìwo Da Mawu koɖo Axwetɔ Yesu Kristo le wa xomɛvu gangan nɔ mí yí agbena fafa mí.
4 Ŋdonɔ akpe nɔ anyi Mawu gashiagamɛ le anyi gbedoɖawo mɛ nɔ ŋɖo ŋwi eo kpɔ. 5 Ðo ŋseseɛ nyɔ so xɔse ci èɖo nu koɖo lé èlɔn Axwetɔ Yesu koɖo amɛkɔkɔɛwo pleŋ do. 6 Ŋdokɔ gbe ɖaɖa mɔ xɔse ci èɖo, ci hanci mìwo can ɖo le dɔ nɔ nàmɔŋje nunywi ciwo pleŋ mìxɔ to Kristo ji mɛ. 7 Nɔvinyɛ, ci ŋse woxo nuxu nɔŋ so ao lɔnlɔn nuɔ, ŋkpɔ jijɔ koɖo akɔnfɛ sugbɔ, ɖo èfa akɔn nɔ amɛkɔkɔɛwo.
8 Susu cɛ yí taɖo, ci ŋɖo acɛ le Kristo mɛ yí anu ŋci yí sɔgbe yí èɖo awa can ɔ, 9 ŋkpɔ do lɔnlɔn ci èɖo nu yí ɖekɔ kuku nɔ eo; ɖo enyɛ Pɔlu, ŋnyi amɛshinshin yí le gakpa mɛ yɛ do Kristo Yesu ŋci. 10 Ŋɖekɔ kuku nɔ eo do nu nɔ evinyɛ Onezimu ci ŋvatrɔ eda nɔ le gakpa mɛ.* 11 Denyi ŋɖewanu nɔ eo sa o; vɔ ecɛyɛɔ, évanyi enuwanu nɔ nyɛ koɖo eo. 12 Ŋtrɔtrɔɛ ɖaɖa eo, ɛɛ, eyɛ ci yí ŋlɔn veviɖe.
13 Ci ŋle gakpa mɛ do nyɔnɔnwi lɔ tamɛɔ, ádroŋ sa mɔ áci ŋgbɔ le lɛ yí anɔ ao dumɛ keŋ akpekpeɛdo ŋnu. 14 Vɔ ŋdeji mɔ mawa ŋɖe le godu nɔ eo o, nɔ ŋgbevanyi ʒin woʒin eo ji gbɔxwe èwa nunywi o, vɔ le nyi eoŋtɔ dro mɛ yí èwɛ le. 15 Taŋfuin, étɛnŋ nyi eyi taɖo eso le eo gbɔ na nɔ hwenu kleŋ ɖe* keŋ atrɔgbɔ va nɔ eo tɛgbɛɛ. 16 Degbenyi hwashi o, vɔ ényɔ wu mɛ ci yí nyi hwashi, ényi nɔvi vevi, taŋtaŋ nɔ nyɛ, vɔ égbenyi nɔ eo sɔwu, ɖo ényi ao hwashi koɖo nɔvio le Axwetɔ lɔ mɛ. 17 Eyi taɖo nɔ èkpɔɛ mɔ nyɛŋnyi ye xlɔɔ, xɔ̀ɛ koɖo xomɛ shigbe lé àxɔ nyɛŋtɔ hannɛ. 18 Nɔ éje agɔ do eo alo ɖu efɛn ɖe do eoɔ, drɔ̀ɛ do anyi kɔnŋta mɛ. 19 Enyɛ Pɔlu yí ŋwlɛkɔ wema cɛ koɖo anyi lɔ̀ mɔ: Nacui nɔ eo. Le nyɔnɔnwi mɛɔ, ènya mɔ èɖu eoŋtɔ kpu fɛn doŋ. 20 Ɛɛ, nɔvinyɛ, kpɔ̀ do Axwetɔ lɔ ŋci yí akpedo ŋnu le enyɔ cɛ mɛ; fà akɔn nɔŋ do Kristo ŋci.
21 Ŋkando ji mɔ àwɛ ahan, eyi na taɖo ŋŋwlɛ nu nɔ eo yí nyanya nu mɔ àwa wu enyɔ ci ŋnu. 22 Gbesɔ kpe niɔ, drà fini navanɔ do ɖɛ nɔŋ, ɖo ŋkpɔkpɔ emɔ mɔ to míwo gbedoɖawo jiɔ, woajoŋ nɔ mí.*
23 Epafrasi ci yí le gakpa mɛ koɖoŋ do Kristo Yesu ŋci do gbe ɖaɖa eo. 24 Maki, Aristaki, Demasi koɖo Luiki can do gbe ɖaɖa eo. Enyɛ koɖo wowo yí bɔ wanɔ dɔ doju.
25 Axwetɔ Yesu Kristo le wa xomɛvu gangan nɔ mí nɔ gbɔngbɔn nywi ci mídadasɛ.