Èkpɔnɔ ele le Ŋɔŋlɔawo Me Dzodzro Gbe Sia Gbe mɛa?

Èhlɛnnɔ Bibla kpukpui koɖo numɛɖeɖe yi tɔ le Ŋɔŋlɔawo Me Dzodzro Gbe Sia Gbe mɛ ŋkeŋkea? Nɔ desun ji yí wɛni ahan ɖe, àtɛnŋ atrɔ ashi le ao totowo nu yí atɔ wɛwɛa? Mɛɖewo wɛni nyidinmɛ, keŋ yí sun ji bunɔ tamɛ kpɔ so nu le ŋkeke lɔ dɔwawawo hwenu. (Ʒoz 1:8; Eha 119:97) Lé àwɛ aɖu ele sugbɔ wu nɔ ŋkeke ɖeshiaɖe mawunyɔkpukpui lɔɔ? Hlɛn nyɔ ciwo yí trɔdo Bibla kpukpui lɔ keŋ atekpɔ ase mɛ. Tekpɔ abu tamɛ kpɔ so Bibla mɛ xolɔlɔ ɖe ci yí sɔ koɖo gɔnmɛɖose ci yí le enumɛɖeɖe lɔ mɛ nu. Le yi goduɔ, wa do gɔnmɛɖose lɔ ji le ao gbenɔnɔ mɛ. Nɔ gbeta ciwo èsɔnɔ sɔnɔ koɖo Mawu Nyɔ lɔɔ, ádanasɛ mɔ nɔ eo gashiagamɛ yí àɖu ele sugbɔ.​—Eha 119:105.

Betɛli xomumɛtɔwo le xexeɛ pleŋ mɛ gbejenɔ Ŋɔŋlɔawo Me Dzodzro Gbe Sia Gbe mɛ doju gbɔxwe yí tɔnɔ wowo dɔwo ji. Le xwe ciwo yí vayi mɛɔ, wosɔ Sɛnsɛn nyidintɔ sugbɔ ciwo wowa le Betɛli sɔ da do JW Televiʒiɔn^® ji le ÉVÈNEMENTS ET DISCOURS kpaxwe. Hwenu yí nyi godugodutɔ ci ègbekpɔ ɖeka alo ɖewo le Sɛnsɛn nyidintɔ cɛwo mɛɔ? Taŋfuin ɖewo le wo mɛ tɛnŋ nyi enu ciwo yí ʒan eo teŋ. Le kpɔwɛ mɛ, lé Loti xolɔlɔ atɛnŋ akpedo eo nu le ao gbetasɔsɔwo mɛ doɔ?

MÍKPƆ VIDEO CI YÍ NYI MÍŊGBELƆN XEXE LƆ O (1 ƷAN 2:15), KEŊ ANA ÐOŊCI NƆ ENYƆBIƆSE CIWO YÍ GBƆGBƆ:

• Bibla gɔnmɛɖose ci nu woxo nuxu so koŋ le Sɛnsɛn nyidintɔ lɔ mɛɔ?

• Lé Loti xolɔlɔ lɔ dasɛ do mɔ afɔku le lɔnlɔn ɖoɖo nɔ xexe lɔ alo nu ciwo yí le mɛɔ?​—Gɔnm 13:12; 14:12; 19:3, 12, 13, 24-26

• Lé mìdanasɛ do mɔ Yehowa mìlɔn yí denyi xexe lɔ alo nu ciwo yí le mɛ mìlɔn ɔ?