Mínyaa?
Rɔmatɔwo ɖe mɔ yí woɖyinɔ mɛ ci wokan do efuntrenamɛci nu do yɔdu mɛ shigbe lé wowɛ nɔ Yesu nɛa?
AMƐ sugbɔ yí jeshi exolɔlɔ ci yí xo nuxu so Yesu ci wokan do dodomɛ nɔ flafinɔ amɛve ɖekawo do efuntrenamɛci nu. (Mt. 27:35-38) Vɔ ci Bibla mɔ wodra Yesu cɔ do yí ɖyi do yɔdu mɛɔ, mɛɖewo kando nyɔ cɛ ji yí mɛbuwo dekando ji o.—Mk. 15:42-46.
Mɛ ciwo yí donɔ ɖyika Eŋɛnywiwemawo delɔn do ji mɔ woɖyinɔ mɛ ciwo wokannɔ do efuntrenamɛci nu do yɔdu mɛ o. Wonu mɔ nubu wowanɔ koɖo wo. Enyɔjɔjɔdɔwatɔ Ariel Sabar dre enu ci yí dɔ woɖo susu ahan do wema ɖeka mɛ yí mɔ: “Amɛkankan do aci nu nyi etodɔndɔn nɔ mɛ ci yí wakɔ adanu le amɛwo mɛ, eyi taɖo eɖyi kokwi nɔ enunyatɔ ɖewo mɔ, Rɔmatɔwo ado bubu mɛ ŋtɔ́ han nu keŋ aɖyi do yɔdu mɛ.” Nɔ woso ekukojo nɔ adanuwatɔ ɖeɔ, Rɔmatɔwo jinɔ mɔ yewoado ŋkpɛn yi, ado gbazavi ni yí akin do aci nu yí atashi yi cɔ ɖɛ klansuwo aɖu. Ðukpɛtɛ lɔ yí wosɔ dɔnɔ do edu ci mɛ woɖyi amɛ sugbɔ do.
Vɔ Ʒuifu ɖewo ciwo wowu do alɔkpa ŋtɔ́ ji kuku ciwo yí kpɔtɔ yí nyigbanmɛnumɛkutɔwo kpɔ to akpo xesexese. Le exwe 1968 mɛɔ, wovayi kedo exu ŋsu ɖeka tɔ ci wokan do efuntrenamɛci nu le exwe sanŋdi ŋkɔtɔ mɛ. Ʒuifuwo yɔdu ɖeka mɛ yí wokpɔɛ le le fini yí dejinjin le Ʒerusalɛmu gbɔ o. Exu lɔwo le daka ɖeka mɛ, fɔŋgwinuxu can le mɛ. Wokin do aci kpakpa ɖeka ji koɖo flɛnŋgo ci yí jinjin sanŋtimɛta 11,5. Sabar nu mɔ: “Ŋsu ɖeka ci yí tɔ mɔ Yehochanan fɔŋgwinuxu yɔ, eyi na wovakando ji mɔ nyɔnɔnwi yí Eŋɛnywiwema lɔwo nu ci wonu mɔ woɖyi Yesu do yɔdu mɛ. Le nyɔnɔnwi mɛɔ, Yehochanan fɔŋgwinuxu ci wofɔ lɔ nyi kpeɖoji ɖeka ci yí dasɛ mɔ le Yesu hwenuɔ, Rɔmatɔwo nanɔ gbe Ʒuifuwo yí woɖyinɔ mɛ ciwo wokan do aci nu.”
Ci amɛwo kpɔ lé Yehochanan fɔŋgwinuxu lɔ le doɔ, woɖo susu vovovowo do lé wokan Yesu do aci nu do. Vɔ enyɔ ci mɛ yí kɔ petii yí nyi mɔ, woɖyinɔ nuvɔnwatɔ ci wokan do aci nu ɖewo do yɔdu mɛ yí wodesɔnɔ wo dɔnɔŋkpe do edu ci mɛ woɖyi amɛ sugbɔ do o. Eze petii mɔ kankandoji le enyɔ ci Bibla nu mɔ wosɔ Yesu cɔ do yɔdu mɛ nu. Kpeɖoji cɛ dasɛ mɔ enyɔ ci Bibla nu nyi nyɔnɔnwi.
Ci yí gbenyɔ wu ŋnɔ yí nyi mɔ, Yehowa nu ɖɛ mɔ woaɖyi Yesu do hotɔnɔwo yɔdu ɖeka mɛ. Eyi nɔ Mawu nu nyɔ ɖeɔ, ejɔnɔ do ji, ŋɖekɛ detɛnŋ xenɔ emɔ ni o.—Ezai 53:9; 55:11.