Lé àwɛ ate gogo Mawuɔ?

1. Gbedoɖawo pleŋ Mawu ɖonɔ toa?

Mawu yɔkɔ amɛshiamɛ le nɔnɔmɛ ɖekpokpui mɛ mɔ wo le te gogo ye to gbedodoɖa ji. (Ehajiji Wema 65:2) Ganŋke, déɖonɔ to gbedoɖawo pleŋ o. Le kpɔwɛ mɛ, ŋsu ci yí venɔ xomɛ do ashiɛ axe mɔ nɔ yi gbedoɖawo. (1 Piɛ 3:7) Gbesɔ wuɔ, hwecinu yí Izraɛliviwo sɔ nuvɔnwawa ɖo dɔɔ, Mawu gbe mɔ yedase wowo gbedoɖawo o. Eze petii mɔ gbedodoɖa nyi mɔnukpɔkpɔ vevi ɖeka. Ele ahan gan, Mawu atɛnŋ ase mɛ ciwo yí wa nuvɔn ganganwo gbedodoɖa nɔ wotrɔ jimɛ.—Hlɛn Ezai 1:15; 55:7.

Kpɔ video ci yí nyi Mawu ɖonɔ to gbedoɖawo pleŋ a?

2. Lé mìado gbe ɖaɖa doɔ?

Mìwo sɛnsɛn kpaxwe ɖe yí gbedoɖa nyi, eyi taɖo enyi Yehowa mìwo Watɔ ɖekɛ kpaŋ mìado gbe ɖaɖa nɔ. (Matie 4:10; 6:9) Ci mìdele blebuɔ, ele mɔ mìado gbe ɖaɖa to Yesu ŋkɔ mɛ, ɖoɔ éku do mìwo nuvɔnwo ta. (Ӡan 14:6) Yehowa deji mɔ mìale gbedoɖawo do susumɛ anukɔ alo ahlɛnkɔ le wema ji o. Éji mɔ mìwo le nu mìwo jimɛ nyɔwo koɖo mìwo seselelanmɛwo nɔ ye to gbedoɖa ji.—Hlɛn Matie 6:7; Filipitɔwo 4:6, 7.

Mìwo Watɔ senɔ susumɛ gbedoɖawo. (1 Samiɛli 1:12, 13) Éyɔkɔ mì mɔ mìwo le do gbe ɖaɖa nɔ ye le nɔnɔmɛ ɖeshiaɖe mɛ, shigbe mɔ tɔtɔmɛ koɖo vɔvɔnu nɔ ŋkeke, enuɖuɖu hwenu koɖo nɔ mìle cukaɖawo mɛ.—Hlɛn Ehajiji Wema 55:23; Matie 15:36.

3. Nyi yí taɖo Kristotɔwo bɔnɔ dojuɔ?

Ate gogo Mawu defa o, ɖoɔ mìle agbe le dodomɛ nɔ mɛ ciwo yí dexɔ Mawu ji se o, yí gbegbanɔli yi gbeɖu ci yí nyi mɔ yeahɛn fafa va nyigban ji. (2 Timɔte 3:1, 4; 2 Piɛ 3:3, 13) Eyi taɖo mìӡan kpekpedonu haxɔsetɔwo tɔ yí wowo can ӡan mìwo tɔ.​—Hlɛn Ebretɔwo 10:24, 25.

Ejunɔnɔ koɖo mɛ ciwo yí lɔn Mawu akpedo mì nu mìate gogwi. Yehowa Kunuɖetɔwo bɔbɔwo nyi emɔ nywi ci ji mìato ado ŋsɛn mìwo xɔse to mɛbuwo tɔ ji.—Hlɛn Rɔmatɔwo 1:11, 12.

4. Lé àwɛ ate gogo Mawuɔ?

Àtɛnŋ ate gogo Yehowa nɔ èyinɔ susumɛ so enu ciwo èkplanɔ so yi Nyɔ mɛ nu. Bunɔ tamɛ kpɔ so yi dɔwawa, yi ɖaŋɖoɖo koɖo yi gbeɖuwo nu. Susumɛyiyi koɖo gbedodoɖa nanɔ mìkpɔnɔ jijɔ so jimɛ do Mawu lɔnlɔn koɖo yi nunya nu.​—Hlɛn Ӡozue 1:8; Ehajiji Wema 1:1-3.

Àtɛnŋ ate gogo Mawu nɔ èkando ji yí gbexɔɛ ji se. Vɔ, shigbe le hanci enu leagbuwo ӡan enuɖuɖu nɛɔ, ahanke eӡan mɔ woadonɔ ŋsɛn xɔse nɛ. Àtɛnŋ ado ŋsɛn ao xɔse nɔ ètrɔ yí bunɔ tamɛ kpɔ so enu ciwo ji ao xɔse nɔ te do nu.—Hlɛn Matie 4:4; Ebretɔwo 11:1, 6.

5. Nyɔna ciwo àkpɔ nɔ ète gogo Mawuɔ?

Yehowa sɔnɔ eɖe le mɛ nɔ mɛ ciwo yí luiin. Écɔnnɔ ashi wo ji so enushianu ci yí atɛnŋ adahɛn wowo xɔse koɖo wowo gbe mavɔ mɔkpɔkpɔ mɛ. (Ehajiji Wema 91:1, 2, 7-10) Éɖonɔ afɔ afɔta nɔ mì so enu ciwo yí atɛnŋ agble nu le mìwo lanmɛsɛn koɖo mìwo jijɔkpɔkpɔ nu. Yehowa kplanɔ agbenɔnɔ mɔ nywitɔ mì.​—Hlɛn Ehajiji Wema 73:27, 28; Ӡaki 4:4, 8.