Lé àwɛ anyi Mawu xlɔɔ?

1, 2. Miwo yí nyi Yehowa xlɔ ɖewoɔ?

MI ÀJI mɔ yɛanyi ye xlɔɔ? Mɛ ci yí èlɔn. Mɛ ci nu yí jɔnɔ ji nɔ eo, yí ao nu can jɔnɔ ji ni. Mɛ ci nuwanawo koɖo nɔnɔmɛ nywiwo jɔnɔ ji nɔ eo.

² Yehowa Mawu can agbetɔ ɖewo nɔ woanyi yi xlɔwo. Le kpɔwɛ mɛ, Abraxamu nyi ɖeka le Yehowa xlɔwo mɛ. (Ezai 41:8; Ʒaki 2:23) Yehowa lɔn Davidi can. Énu so Davidi nu mɔ yɛnyi ‘ŋsu ci yelɔn.’ (Edɔwawawo 13:22) Enyɔnuɖɛtɔ Daniɛli can nyi “amɛ vevi” nɔ Yehowa.​—Daniɛli 9:​23, nwt.

3. Lé Abraxamu, Davidi koɖo Daniɛli wɛ yí nyi Yehowa xlɔwoɔ?

³ Lé Abraxamu, Davidi koɖo Daniɛli wɛ yí nyi Yehowa xlɔwoɔ? Yehowa nu nɔ Abraxamu mɔ: “E wa do Anyi sewo ji.” (Gɔnmɛjeje 22:18) Yehowa nyinɔ xlɔ koɖo mɛ ciwo yí sɔnɔ wowoɖekiwo hwe yí ɖonɔ to yi. Jukɔn blebu ɖeka mɛ tɔwo can tɛnŋ trɔ yi xlɔwo. Yehowa nu nɔ Izraɛli jukɔn lɔ mɔ: “Mí na bubu Ŋ yi Na nyi míwo Mawu, yí mí a nyi Anyi mɛwo.” (Ʒeremi 7:23) Eyi taɖo eo can, nɔ èji mɔ yeanyi Yehowa xlɔɔ, ele mɔ àɖonɔ to yi.

YEHOWA GLƆNNƆ TA NƆ YI XLƆWO

4, 5. Lé Yehowa glɔnnɔ ta nɔ yi xlɔwo doɔ?

⁴ Bibla nu mɔ, Yehowa jikɔ veviɖe mɔ yeazan ye “ŋsɛn yí ahwlɛn mɛ ciwo yí kudo nu koɖo wowo ji pleŋ.” (2 Kronika 16:​9, nwt) Le Ehajiji Wema 32:8 mɛɔ, Yehowa ɖo gbe nɔ yi sɛntɔwo mɔ: “Nana enugɔnmɛsese citocito asun eo shi, yí nakpla eo emɔ ci ji èɖo ato. Anyi ŋkuvi anɔ eo ji yí maɖo aɖaŋ nɔ eo.”

⁵ Ketɔnɔ sɛnŋ ɖeka jijiɛ mɔ, yeaxe mɔ nɔ mì nɔ mìŋgbenyi Mawu xlɔwo o. Vɔ Yehowa ji mɔ yeaglɔn ta nɔ mì. (Hlɛn Ehajiji Wema 55:22.) Ci yí mìnyi Yehowa xlɔwoɔ, mìsinni koɖo mìwo ji pleŋ. Mìnɔnɔ egbeji ni nɔ mìle nɔnɔmɛ sɛnŋsɛnŋwo mɛ can. Mìɖo kankandoji shigbe ehakpatɔ ci yí ŋwlɛn so Yehowa nu mɔ: “Ci èle ɖushimɛ nɔŋ ɔ, ŋdavɔn gbeɖe o.” (Ehajiji Wema 16:​8, nwt; 63:8) Lé Satana tenɔ kpɔ mɔ, yeaxe mɔ nɔ mì nɔ mìŋgbenyi Mawu xlɔwo doɔ?

EHWƐDOAMƐ SATANA TƆ

6. Ehwɛ ci yí Satana do agbetɔwoɔ?

⁶ Le Eta 11 tɔ lɔ mɛɔ, mìkpla mɔ, Satana sɔ nyɔ do Yehowa nu yí do hwɛ yi mɔ yinyi ŋsukantɔ koɖo enujɔjɔɛmawatɔ, ɖo dena emɔ Adamu koɖo Ɛva mɔ wowoŋtɔwo le sɔ gbeta kudo enywi koɖo evwin nu o. Job wema ci yí le Bibla mɛ kpla mì mɔ, Satana do hwɛ agbetɔ ciwo yí jikɔ mɔ yewoanyi Mawu xlɔwo hɛnnɛ. Satana nu mɔ enu ciwo yí woatɛnŋ akpɔ le Mawu gbɔ yí dɔ wosinkɔ, denyi ci woluin ŋci yɔ o. Satana nu hɛnnɛ mɔ, yeatɛnŋ ana yí amɛshiamɛ afɔn gu do Mawu nu. Na mìakpɔ enu ci yí mìatɛnŋ akpla so Job gbɔ koɖo lé Yehowa kpedo nu do.

7, 8. (a) Lé Yehowa kpɔnɔ Job doɔ? (b) Enyɔ ci yí Satana nu so Job nuɔ?

⁷ Mi yí Job nyiɔ? Ényi amɛ nywi ɖeka ci yí nɔ agbe exwe 3 600 ɖewo vayi. Yehowa nu le hwenɔnu mɔ mɛɖekɛ dele nyigban ji yí sɔ koɖo Job o. Job donɔ bubu gangan Mawu nu, yí gbe nuvɔn. (Job 1:8) Ɛɛ, Job nyi Yehowa xlɔ nyao.

⁸ Satana nu mɔ Job ŋtɔ nyɔna ci akpɔ le Mawu gbɔ taɖo yí esinkɔ. Satana nu nɔ Yehowa mɔ: “Denyi eo yí cu etaglɔnnamɛ kpa trɔ do yɛ, yi xomu koɖo yi nuwo pleŋ godogluu ba? Èyra alɔnudɔ yi tɔwo, yí yi lankuwo gban kpe do nyigban lɔ ji. Vɔ nɔ nɔnɔmɛ lɔ atrɔɔ, do ao lɔ ɖaɖa yí adahɛn enu ciwo pleŋ yí le shi, akpɔ mɔ dagbali eo le ŋmɛ nɔ eoŋtɔ ma.”​—Job 1:​10, 11, nwt.

9. Nyi Yehowa na gbe Satana mɔ yɛ le waɔ?

⁹ Satana do hwɛ Job mɔ, enu ciwo yí ekpɔnɔ so Yehowa gbɔ ɖekɛ yí na esinni. Satana gbenu hɛnnɛ mɔ, yeatɛnŋ awɛ yí Job ami Yehowa sɛnsɛn. Yehowa dexɔ gbe do Satana nyɔ lɔ ji o, vɔ éna gbe Satana mɔ yɛ le te Job kpɔ, keŋ akpɔ mɔ lɔnlɔn yí Job ɖo nɔ ye taɖo yí nyi ye xlɔ ma.

SATANA CU NU KOÐO JOB

10. Nyi yí Satana cu koɖo Job ɔ, yí lé Job wa nu doɔ?

¹⁰ Doŋkɔɔ, Satana na yí wofi alo wu Job lanwo pleŋ. Le yi goduɔ, Satana wu Job dɔwavi sugbɔtɔ. Job nuwo pleŋ bu. Le vɔvɔnuɔ, Satana zan jihɔntwi gangan ɖeka yí sɔ wu Job vi amɛwo lɔwo pleŋ. Vɔ Job kpɔtɔ le egbeji nɔ Yehowa. “Wana hunnɔwo pleŋ jɔ, vɔ Job de je agɔ o. Job de nu mɔ Mawu wa afɛn wa enu ɖe o.”​—Job 1:​12-19, 22.

11. (a) Enu bu ci yí Satana wa koɖo Job ɔ? (b) Lé Job wa nu doɔ?

¹¹ Satana dena ta o. Ékan dan yí nu nɔ Mawu mɔ: “Do ao lɔ ɖaɖa yí atɔ alɔ yi xu koɖo yi ŋcilan, yí akpɔ mɔ dagbali eo le ŋmɛ nɔ eoŋtɔ ma.” Eyi taɖo Satana do dɔ̀ vwin ɖeka Job. (Job 2:​5, 7, nwt) Job gbekpɔtɔ yí le egbeji nɔ Yehowa. Énu mɔ: “Ŋdatashi egbejinɔnɔ anyi tɔ keke va ɖo hwecinu naku o!”​—Job 27:​5, nwt.

12. Lé Job dasɛ do mɔ Satana nyi ŋsukantɔɔ?

¹² Job denya ŋɖe so ehwɛdoamɛ Satana tɔ lɔ, koɖo enu ci yí taɖo ele efun kpekɔ sugbɔ ahan nu o. Ébui mɔ Yehowa gbɔ yí efunkpekpe ye tɔwo so. (Job 6:4; 16:​11-14) Ele ahan gan, Job kpɔtɔ le gbeji nɔ Yehowa. Eze petii mɔ Job denyi amɛɖekitɔjitɔ o. Élɔn Mawu eyi taɖo enyi yi xlɔ. Ehwɛdoamɛ Satana tɔ lɔwo pleŋ nyi ŋsu teŋ!

13. Nyi yí to le egbejinɔnɔ Job tɔ mɛɔ?

¹³ Job denya enu ci yí jɔkɔ le jeŋkwimɛ o, gan ékpɔtɔ nɔ gbeji nɔ Mawu yí sɔ dasɛ mɔ Satana nyi amɛ baɖa. Yehowa cu fɛn nɔ Job ɖo ényi exlɔ ci yí nɔ gbeji ni.​—Job 42:​12-17.

LÉ SATANA DOKƆ HWƐ EO DO

14, 15. Ehwɛ ci yí Satana dokɔ agbetɔwo pleŋ ɔ?

¹⁴ Àtɛnŋ akpla enu sugbɔ so enu ci yí jɔ do Job ji nu. Le egbɛmɛɔ, Satana nukɔ mɔ nyɔna ciwo yí mìakpɔ yí dɔ mìsɛnnɔ Yehowa. Satana nu le Job 2:4 mɛ mɔ: “Agbetɔ asɔ enushianu ci yí le shi jo do ta nɔ agbe yi tɔ.” Edasɛ mɔ Satana do hwɛ agbetɔwo pleŋ mɔ wonyi amɛɖekitɔjitɔwo, denyi Job ɖekɛ yí edo hwɛ o. Exwe sanŋdi nɛniɖe le Job ku goduɔ, Satana kpɔtɔ jikɔ nyɔ le Yehowa nu yí dokɔ hwɛ yi sɛntɔwo. Le kpɔwɛ mɛ, Elododo Wema 27:11 nu mɔ: “Vinyɛ, nya ŋɖɛ keŋ ado jijɔ nɔ anyi ji, nɔ matɛnŋ aɖo enyɔ ŋci nɔ mɛ ci yí gbalikɔŋ.”

¹⁵ Àtɛnŋ asɔ gbeta ase tonu nɔ Yehowa yí anyi yi xlɔ egbejinɔtɔ asɔ dasɛ mɔ Satana nyi ŋsukantɔ. Nɔ eʒan mɔ àwa ashitrɔtrɔ ganganwo le ao gbe mɛ keŋ anyi Mawu xlɔ can ɔ, ecɛ nyi afɔɖeɖe nywitɔ ci àtɛnŋ aɖe! Ecɛ nyi afɔɖeɖe vevi ɖeka. Satana nu mɔ nɔ cukaɖawo va eo jiɔ, datɛnŋ anɔ gbeji nɔ Mawu o. Éjinɔ mɔ yeable mì nɔ mìami egbeji nɔnɔ nɔ Mawu. Lé ewɛni doɔ?

16. (a) Emɔ ciwo ji Satana tonɔ keŋ nɔ amɛwo ami Yehowa sɛnsɛn ɔ? (b) Nyi yí Legba atɛnŋ ate kpɔ mɔ yeawa keŋ nɔ nami Yehowa sɛnsɛn ɔ?

¹⁶ Satana tonɔ emɔ vovovo ji nɔ mìami exlɔnyinyi koɖo Mawu. Éjenɔ amɛ ji “shigbe janŋtan nɛ, yi jijiɛ amɛ a drɛn.” (1 Piɛ 5:8) Nɔ ao xlɔwo, ao xomumɛtɔwo alo mɛbuwo jijiɛ mɔ yewoaxe mɔ nɔ eo nɔ ŋgbekpla Bibla yí awa enunywiɔ, ŋgbekpaca eo o. Àse le eoɖeki mɛ mɔ wofɔn do ye ji.a (Ʒan 15:​19, 20) Satana gbetrɔnɔ yiɖeki shigbe mɔ “dɔdɔla klɛnklɛntɔ ɖeka” hannɛ. Eyi taɖo átɛnŋ ate kpɔ mɔ, yeable mì nɔ mìŋgbeɖo to Yehowa o. (2 Korɛntitɔwo 11:14) Emɔ bu ci ji Satana tonɔ keŋ nɔ mìami Yehowa sɛnsɛn yí nyi mɔ, éna mìsenɔ le mìwoɖekiwo mɛ mɔ mìdeje yí asɛn Mawu o.​—Elododo Wema 24:10.

WA DO YEHOWA SEWO JI

17. Nyi yí taɖo mìwanɔ do Yehowa sewo jiɔ?

¹⁷ Nɔ mìwa do Yehowa sewo jiɔ, mìadasɛ mɔ ŋsukantɔ yí Satana nyi. Nyi yí akpedo mì nu yí mìanyi tonusetɔwoɔ? Bibla nu mɔ: “Mí ɖo a lɔn [Yehowa] míwo Mawu koɖo míwo ji pleŋ, míwo gbe pleŋ koɖo míwo ŋsɛn pleŋ.” (2 Ese Wema 6:5) Mìsenɔ tonu nɔ Yehowa ɖo mìluin. Zenɛni ci yí lɔnlɔn ci mìɖo nɔ Yehowa sɛnkɔŋ dojiɔ, ahanke yí mìalɔn awa enushianu ci ebiɔ so mì shi nɛ. Apostolo Ʒan ŋwlɛn mɔ: “Enu ci yí lɔnlɔn nɔ Mawu nyi ke, mɔ mìawanɔ do yi sewo ji yí yi sewo denyi agban o.”​—1 Ʒan 5:​3, nwt.

18, 19. (a) Enu ciwo yí Yehowa nu mɔ wodenyɔ o domɛtɔ ɖewo ɖe? (b) Lé mìwɛ yí nya mɔ, Yehowa datɛnŋ abiɔ enu ci yí mìdatɛnŋ awa so mì shi gbeɖeɔ?

¹⁸ Enu ciwo yí Yehowa nu nɔ mì mɔ wodenyɔ o domɛtɔ ɖewo ɖe? Wo domɛtɔ ɖewo yí nyi ciwo yí woyɔ le dakavi ci yí nyi “Gbe enu ciwo yí Yehowa delɔnnɔ o” mɛ. Nɔ debu tamɛ kpɔ so wo nu nywiɖeɔ, àbu mɔ enu sugbɔ dedɔn le wowo domɛtɔ ɖewo nu ahan o. Vɔ nɔ èhlɛn mawunyɔkpukpui lɔwo yí bu tamɛ kpɔ so wo nu nywiɖeɔ, àkpɔɛ mɔ susu le mɛ mɔ woawa do Yehowa sewo ji. Àgbedo jeshi mɔ yi ʒan mɔ, yeawa ashitrɔtrɔ ɖewo so ye gbenɔnɔ nu. Nyɔnɔnwi enyi mɔ ecɛ wawa danɔ fafaɖe hweɖewonu o, gan nɔ èwa ashitrɔtrɔ cɛwoɔ, àkpɔ jijɔ koɖo fafa ci yí tonɔ le egbejinɔnɔ nɔ Mawu koɖo exlɔnyinyi koɖi mɛ. (Ezai 48:​17, 18) Lé mìwɛ yí nya mɔ mìatɛnŋ awa ashitrɔtrɔ cɛwoɔ?

¹⁹ Yehowa datɛnŋ abiɔ enu ci yí mìdatɛnŋ awa so mì shi gbeɖe o. (2 Ese Wema 30:​11-14) Ci enyi mìwo xlɔ adodwiɔ, éjeshi mì ɖɛ nywiɖe wu mìwoŋtɔwo, éjeshi enujikpekpe koɖo gbɔjɔgbɔjɔ mìwo tɔwo. (Ehajiji Wema 103:14) Apostolo Pɔlu do ŋsɛn lanmɛ nɔ mì mɔ: ‘Mawu nyi esejinɔ̀tɔ ci yí da ɖe emɔ mɔ wo a te míwo kpɔ sɔwugan míwo ŋsɛnwo o. Vɔ, le tetekpɔ lɔ hwenuɔ, Mawu ana emɔ ci ji míato ato le mɛ keŋ atɛnŋ a sun ji.’ (1 Korɛntitɔwo 10:13) Mìatɛŋ akando ji mɔ, Yehowa ana ŋsɛn ci yí ʒan mì nɔ mìawa enujɔjɔɛ gashiagamɛ. Átɛnŋ ana “ŋsɛn ci yí wu jɔjɔmɛtɔ” eo, yí akpedo eo nu nɔ nado ji le nɔnɔmɛ sɛnŋsɛnŋwo mɛ. (2 Korɛntitɔwo 4:⁠7) Ci Pɔlu do jeshi mɔ, Yehowa kpedo ye nu le nɔnɔmɛ cɛ hanwo mɛɔ, énu mɔ: “Ŋtɛnŋ wanɔ enushianu to mɛ ci yí donɔ ŋsɛnŋ ji.”​—Filipitɔwo 4:​13, nwt.

KPLA LÉ ALƆNNƆ ENU CIWO YÍ MAWU LƆNNƆ

20. Nɔnɔmɛ ciwo yí èɖo asran ɔ, yí nyi yí taɖoɔ?

²⁰ Nɔ mìji mɔ mìanyi Yehowa xlɔɔ, eʒan mɔ mìami enu ciwo yí Yehowa mɔ wodenyɔ o wawa. Vɔ egbeʒan mɔ mìawa enu wu ahan. (Rɔmatɔwo 12:⁠9) Mawu xlɔwo lɔnnɔ enu ciwo yí elɔnnɔ. Woxo nuxu so ɖewo nu le Ehajiji Wema 15:​1-5 mɛ. (Hliin.) Yehowa xlɔwo srannɔ yi nɔnɔmɛwo yí danasɛ “lɔnlɔn, jijɔkpɔkpɔ, fafa, jigbɔnɖɛxɔxɔ, xomɛvuwawa, enunywiwawa, [xɔse], xomɛfafa, koɖo amɛɖekijiɖuɖu.”​—Galatitɔwo 5:​22, 23.

21. Lé àwɛ adasɛ nɔnɔmɛ nywi ciwo yí Mawu lɔnnɔɔ?

²¹ Lé àtɛnŋ akpla lé àdasɛ nɔnɔmɛ nywi cɛwo doɔ? Ele mɔ àkplanɔ Bibla yí agbehlinni kabakaba keŋ ajeshi enu ciwo yí Yehowa lɔnnɔ. (Ezai 30:​20, 21) Nɔ èwɛkɔ ahan ɔ, àgbelɔn Yehowa sugbɔ doji, ecɛ ana yí àji veviɖe mɔ yeaɖo to yi.

22. Fɛncu ciwo yí àkpɔ nɔ èse tonu nɔ Yehowaɔ?

²² Mìatɛnŋ asɔ ashitrɔtrɔ ciwo yí eʒan mɔ àwa le ao gbenɔnɔ mɛ sɔ koɖo lé àɖe awu xoxui daɖɛ yí ado yoyu hannɛ. Bibla nu mɔ, eo le “ɖe amɛnyinyi xoxui lɔ” daɖɛ, keŋ ado “amɛnyinyi yoyu lɔ.” (Kolosetɔwo 3:​9, 10, nwt) Nyɔnɔnwi enyi mɔ ashitrɔtrɔ cɛwo danɔ fafɛɖe o, vɔ Yehowa ɖo gbe ɖɛ mɔ yeana “fɛncu sugbɔ” mì, nɔ mìtɛnŋ yí wa do wo ji yí ɖo to yi. (Ehajiji Wema 19:​11, nwt) Ɛɛ, sɔ gbeta mɔ yeaɖo to Yehowa yí asɔ ɖo kpe yi ji mɔ ŋsukantɔ teŋ Satana nyi. Sɛn Yehowa, denyi fɛncu ciwo yí àvaxɔ ŋci yɔ o, vɔ amɛɖekitɔmajimaji lɔnlɔn ci yí èɖo ni ŋci yɔ. Nɔ èwɛ ahan ɔ, ànyi Mawu xlɔ ŋtɔŋtɔ!