ENUKPLAKPLA 29

Nyi yí jɔnɔ do mì ji nɔ mìkuɔ?

Wema tɔ

Ao mɛ vevi ɖe ci èlɔn kua? Le vevisese hwenu lɔ mɛɔ, ètɛnŋ biɔ se mɔ: ‘Nyi yí jɔnɔ do mì ji nɔ mìkuɔ? Mìagbevakpɔ mìwo mɛ vevi ciwo yí ku kpɔa?’ Le nukplakpla cɛ koɖo ci yí akplɔɛdo mɛɔ, àkpɔ Bibla ɖoŋci fakɔnnamɛwo.

1. Nyi yí jɔnɔ do mì ji nɔ mìkuɔ?

Yesu sɔ eku sɔ koɖo alɔn ci yí yi mɛ ɖaa. Mɛ ci yí dɔn alɔn yi mɛ ɖaa denyanɔ enu ciwo jɔjɔ le axa ni o. Lé eku le shigbe alɔn nɛ doɔ? Nɔ mɛɖe kuɔ, degbesenɔ vevi o. Decinɔ akogo o, nɔ élɔn yi xlɔwo koɖo yi xomumɛtɔwo sugbɔ do ɖe can. Bibla nu mɔ: “Amɛkukuwo degbenya enu ɖekpokpui o.”—Hlɛn Ŋununyatɔ 9:5, NWT.

2. Nyɔna ci mìkpɔnɔ ci mìnya nyɔnɔnwi ci yí kudo eku nuɔ?

Amɛ sugbɔ vɔnnɔ nɔ eku koɖo amɛkukuwo! Vɔ àtɛnŋ akpɔ akɔnfafa so nyɔ ci Bibla nu so eku nu mɛ. Yesu nu mɔ: “Nyɔnɔnwi lɔ a na vovo mí.” (Ʒan 8:32) Sɛnsɛn ɖewo kplanɔ nu mɔ nɔ mɛɖe kuɔ, ŋɖeka tonɔ le mɛ yí yi nɔnɔ agbe, vɔ denyi enu ci Bibla kpla mì nɛ o. Edasɛ mɔ mɛɖekɛ dekpenɔ fun le eku mɛ o. Can hɛnnɛ, ci amɛkukuwo denya enu ciwo yí jɔjɔ le axa nɔ woɔ, wodatɛnŋ awa nuvevi koɖo mì o. Eyi taɖo deʒan mɔ mìafa akɔn nɔ amɛkukuwo alo asɛn wo o, yí deʒan mɔ mìado gbe ɖaɖa nɔ wo alo axo ɖe nɔ wo o.

Mɛɖowo nunɔ mɔ yewoatɛnŋ axo nuxu koɖo amɛkukuwo. Vɔ datɛnŋ ajɔ ahan o. Shigbe lé mìkpɔɛ sabaɖe yɛ nɛɔ, amɛkukuwo “degbenya enu ɖekpokpui o.” Mɛ ciwo yí buini mɔ yewoxonɔ nuxu koɖo yewo mɛ vevi ciwo yí kuɔ, etɛnŋ nyi gbɔngbɔnvɔn ciwo yí nɔ wowo mɛ vevi lɔwo dumɛ yí woxokɔ nuxu koɖo. Eyi taɖo nɔ mìnya nyɔnɔnwi ci yí kudo eku nuɔ, aglɔn ta nɔ mì so gbɔngbɔnvɔnwo shi. Yehowa kanxle mì mɔ mìwoŋgbetekpɔ mɔ mìaxo nuxu koɖo amɛkukuwo o, ɖo énya mɔ nɔ mìca ka koɖo gbɔngbɔnvɔnwoɔ, woadahɛn nu le mì nu.—Hlɛn 2 Ese Wema 18:10-12.

JI DWI NI KPƆ DOJI

Gbekpla nubuwo so enyɔ ci Bibla nu so eku nu keŋ ado ŋsɛn xɔse ci èɖo nɔ Mawu amɛlɔntɔ ci yí detrenɔ fun nɔ amɛkukuwo o.

Ŋsu ɖeka koɖo eviɛ hwɛhwɛ amɛve le nyinɔnɔ le baan ji hwenu woɖyikɔ ashiɛ. Yi xlɔwo koɖo yi xomumɛtɔwo le axa nɔ wo keŋ afa akɔn nɔ wo yí ado ŋsɛn wo.

3. Kpla nu so nɔnɔmɛ ci mɛ amɛkukuwo le nyɔnɔnwitɔ nu

Le xexeɛ pleŋ mɛɔ, amowo ɖo jixɔse vovovowo kudo enu ci yí jɔnɔ do mì ji nɔ mìku nu. Vɔ jixɔse lɔwo pleŋ datɛnŋ anyi nyɔnɔnwi o.

Nɔnɔmɛ ci mɛ amɛkukuwo le jixɔse ciwo yí bɔ le míwo nutwi mɛɔ?

Nɔ àkpɔ enu ci Bibla kpla mìɔ, xo VIDEO lɔ.

VIDEO: Nɔnɔmɛ ci mɛ amɛkukuwo leɔ?—Akpaxwe kleŋ (1:19)

Foto lɔwo: Video ci yí nyi ‘Nɔnɔmɛ ci mɛ amɛkukuwo leɔ?—Akpaxwe kleŋ’ mɛ nujɔjɔ fotowo. 1. Mɛɖeka ku do baji le dotoxwe. 2. Ŋsu ɖeka dɔn alɔn le gblamɛ nɔ amɛ amɛve ci wole pipan mɛ yikɔ.

Hlɛn Ŋununyatɔ 3:20, keŋ agbeje nyɔbiɔse cɛwo mɛ:

Sɔ koɖo kpukpui cɛ ɖe, nyi yí jɔnɔ nɔ mɛɖe kuɔ?
Nɔ amɛ ku ɖe, ŋɖe tonɔ le mɛ yí vayi nɔnɔ agbea?

Bibla xo nuxu so Lazar ci yí nyi Yesu xlɔ ku nu nɔ mì. Nɔ èhlɛn Ʒan 11:11-14 ɔ, àkpɔ enu ci Yesu sɔ nɔnɔmɛ ci mɛ Lazar le sɔ koɖo. Yi godu nagbeje nyɔbiɔse cɛwo mɛ:

Nyi Yesu sɔ eku sɔ koɖoɔ?
Nyi nyɔ cɛ kpla mì so enu ci yí jɔnɔ do amɛkukuwo ji nuɔ?
Lé Bibla dre eku do sɔgbe do nu nɔ eoa?

4. Mìkpɔnɔ nyɔna so nyɔnɔnwi ci yí kudo eku nu mɛ

Nɔ mìnya nyɔnɔnwi ci yí kudo eku nuɔ, mìdegbevɔnnɔ nɔ amɛkukuwo o. Hlɛn Ŋununyatɔ 9:10, keŋ agbeje nyɔbiɔse cɛ mɛ:

Amɛkukuwo atɛnŋ awa nu koɖo mìa?

Nɔ mìkando Bibla mɛ nyɔnɔnwi lɔ jiɔ, mìdaxɔ ŋsukankan ci yí nyi mɔ, woɖo afa akɔn nɔ amɛkukuwo alo asɛn wo ji se o. Hlɛn Ezai 8:19 koɖo Enyɔdasɛ 4:11, keŋ agbeje nyɔbiɔse cɛ mɛ:

Ci eɔ kpɔɛ ɖe, lé Yehowa kpɔnɔ mɛ ciwo yí sɛnnɔ amɛkukuwo alo biɔnɔ kpekpedonu wo doɔ?

Foto lɔwo: Nuwana ciwo yí ca ka koɖo bubudodo amɛkukuwo nu. 1. Ŋsu ɖeka le klo ji yí dokɔ gbe ɖaɖa le ŋkɔ nɔ yɔdu ɖeka yí sɔ ŋɖuɖuwo wakɔ vɔnsa. 2. Ŋsu amɛtɔn ɖekawo ɖukɔ we le yɔxɔmɛ. 3. Mɛɖekawo sɔ elan taxuwo cɔn yí sɔ enuɖyivɔnvɔn ɖekawo ta le exwe ci woɖunɔ nɔ amɛkuku zan ji. — Nyɔnɔnwi ci yí kudo eku nu na vovo mì so nuwana ciwo yí dekpenɔ nɔ Yehowa mɛ

5. Nyɔnɔnwi ci yí kudo eku nu fanɔ akɔn nɔ mì

Wokplanɔ amɛ sugbɔ mɔ nɔ wokuɔ, woadɔn to nɔ wo do nuvɔn ciwo wowa vayi nu. Vɔ efa akɔn nɔ mì, ci mìnya mɔ mɛɖekɛ dekpenɔ fun le eku mɛ o, mɛ ci yí wa nuvɔn ganganwo can. Hlɛn Rɔmatɔwo 6:7, keŋ agbeje nyɔbiɔse cɛ mɛ:

Bibla mɔ nɔ mɛɖe kuɔ, yɛcu yi nuvɔnwo fɛn yí vo so nuvɔn mɛ; ci eɔ kpɔɛ ɖe, mɛɖe aku yí agbekpekɔ fun nɔ nuvɔn ciwo ewa vayia?

Nɔ mìjekɔshi Yehowa ɖɛ dojiɔ, ahanke mìagbevanya mɔ yɛdatre fun nɔ amɛkukuwo gbeɖe nɛ. Hlɛn 2 Ese Wema 32:4 koɖo 1 Ʒan 4:8, keŋ agbeje nyɔbiɔse cɛwo mɛ:

Mawu ci yí ɖo nɔnɔmɛ nywi cɛwo ciwo woyɔ le kpukpui cɛwo mɛ alɔn do ji mɔ wo le tre fun nɔ amɛkukuwoa?
Ci èkpɔɛ ɖe, nyɔnɔnwi ci yí kudo eku nu afa akɔn nɔ amɛa? Nyi yí taɖoɔ?

MƐÐEWO NUNƆ MƆ: “Ŋvɔnkɔ nɔ enu ci yí ajɔ do ŋji nɔ ŋku.”